“8. Aia Kooram Unimwaane,” Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira (2024).
“8. Aia Kooram Unimwaane,” Aeniboki ni Kabuta.
Tamnei
mwaane a taetaenikawai
8.
Aia Kooram Unimwaane
8.1
Te Kantaninga ao taian Bootaki
Te Nakoanibonga ae te Merekitereka e buokiia natin te Atua ni katauraoi n oki Nakoina. E taua “kiingin ni kabane kakabwaia n tamnei n te ekaretia” (Reirei ao Berita aika Tabu 107:18).
Aobiti inanon te Nakoanibonga ae te Merekitereka bon unimwaane, ibonga aika rietaata, tamanuea, Itingaun, ao Abotoro. Te mwakoro aei iai inanona rongorongoia unimwaane ao kaain te kooram n unimwaane.
8.1.1
Kantaninga
Mwaane aika a tau 18 ke a ikawai riki a kona ni karekea te Nakoanibonga ae te Merekitereka ao ni katabuaki nakon te nakoa n unimwaane. Te mwaane ae katabuaki nakon te aobiti aei e rin inanon te berita ae tabu ni buoka te Atua ni kakoroa nanon Ana mwakuri (taraa Reirei ao Berita aika Tabu 84:33–44).
Unimwaane nako bon kaain te kurubu ae barongaaki irouia aomata aika iai irouia te nakoanibonga ae aranaki bwa aia kooram unimwaane. A bootaki ni mwakuri kaain te kooram n unimwaane ni buoka kakoroan nanon Ana mwakuri te Atua ibukin te kamaiuaki ao te karietataaki. A beku ibukiia tabeman, a kakoroi bukin tabeia n te nakoanibonga, a karekea te nano teuana, ao a reiakin ao a maiuakin reirei aika tabu.
8.1.2
Membwatibu n te Kooram n Unimwaane
Iai te kooram n unimwaane n uoote nako. E kaainaki irouia mwaane aikai:
Ni kabane unimwaane n te uoote.
Mwaane ni kabane ake a kona ao n tau n riki bwa unimwaane n te uoote (taraa 8.4).
Ni kabane ibonga aika rietata n te uoote, ma tiaki naake a beku ngkai n te beretitentii n te titeiki, n te bitiobiriki, n te kauntira ae rietaata, ke te tamanuea. Taan kairiiri aikai bon kaain te kooram n te titeiki irouia ibonga aika rietata. Ibukin rongorongon te kooram n ibonga aika a rietaata n te titeiki, taraa 6.2.1.1.
Te ataeinimwaane e kona ni waaki ni kaea te kooram n unimwaane n te tai are e koro iai 18, e ngae ngke e tuai ni katabuaki bwa te unimwaane. E marooro ma ana karo ao ana bitiobi ni karoan te babaire aei. Ni koron 19 ke ni kitanan mwengana, ibukin te nako n reirei n te kuura ae rietata ke n nako ni mitinare, e riai ni katabuaki bwa te unimwaane ngkana e tau. Taraa 10.6.
Mwaane ake a tia ni iein iaan 18 te ririki bon unimwaane aika tauraoi ao bon kaain naba te kooram n unimwaane.
Ibukin rongorongoia kaaro aika tuai mareaki iaan 18 te ririki, taraa 38.1.5.
Tabeua uoote e rang mwaiti ake iai irouia te Nakoanibonga ae te Merekitereka aika a kakaonimaki. Ibukin uoote aikai, te beretitentii n te titeiki e kona ni katea riki teuana te kooram n unimwaane (taraa Reirei ao Berita aika Tabu 107:89). Kooram n tatabeua nako iai oin ana beretitentii. Ngkana e kona, kooram n tatabeua nako e riai ni irengan kaaina n aekan roro nako ao n aia taneiai.
8.2
Irakin Ana Mwakuri te Atua Ibukin te Kamaiuaki ao te Karietataaki
E kaoiia ni kabane te Atua bwa ana nakon Kristo ao n ibuobuoki n Ana mwakuri ni kamaiu ao te karietataaki man:
Maiuakinan ana euangkerio Iesu Kristo.
Tararuakiia naake iai kainnanoia.
Kaoakiia ni kabane bwa a na karekea te euangkerio.
Bootakiia utu n te tai ae akea tokiia.
A baairei aron bootaki n te Tabati, waaki ni kakukurei, mwakuri n ibuobuoki, ao tabeua riki waaki taan kairiiri n te kooram n Unimwaane ni buokiia taari ni karaoa Ana mwakuri te Atua ibukin te kamaiuaki ao te karietataaki. Kaain te kooram n unimwaane ao te Bootaki n Aine a boonnanoia bwa a na buokia ni katiaa te mwakuri aei.
Ibukin rongorongon riki tabeua Ana mwakuri ni kamaiu te Atua ao te karietataaki, kamatebwaia mwakoro 1.
8.2.1
Maiuakinan Ana Euangkerio Iesu Kristo
Taan kairiiri n te kooram a boutokaia membwa ni maiuakina ana euangkerio Iesu Kristo. A katerea kamwakuran te onimaki, te rairanano, te riki n toronibwai, ao karaoan berita aika tabu ma te Atua man karekean otenanti. Otenanti aikai raona naba te entaumente n te tembora. Tara 1.2.1.
8.2.1.1
Reiakin te Euangkerio n te Mwenga
Ngkana membwa a reiakina ao a maiuakina te euangkerio n te mweenga, e na kamatoaki riki rairakiia nakon Tamara are i Karawa ao Iesu Kristo. Taan kairiiri n te kooram n unimwaane a kaungaia taari bwa a na kamatebwai koroboki aika a tabu ao aia taeka burabeti aika a maiu, ibon irouia ao n aia utu. Nakomai, Iriirai ao booki ni ibuobuoki tabeua a kona ni karakai riki aia kamatebwai.
Bootaki n utu bon te kawai ae kakaawaki n reiakina te euangkerio n te mweenga. A bon kakaraoaki ni katoa wiki n te Tabati, Moanibong, ke te bong riki teuana. Kanoana bon te tataro, kamatebwaian te euangkerio, kaoti koaua, te anene, ao waaki ni kakukurei.
Tamnei
te utu ae wareware
8.2.1.2
Reiakinan te Euangkerio inanon Bowin Kooram
Kooram n unimwaane a bootaki n te Tabati ibukin bukina aikai:
Kakorakoraan te onimaki.
Karekean te boonano.
Kakorakoraia utuu.
Karaoi babaire ni buoka te Atua n Ana mwakuri ibukin te kamaiuaki ao te karietataaki.
Bootaki a karaoaki n te kauoua ao te kaaua n Tabati n te namwakaina. Maanna bon 50 te miniti. Te beretitentii n te kooram n unimwaane e bairei bootaki aikai. Kaain te beretitentii e kairia.
E moanaki te bootaki ma te tataro. I mwiina e karaoa kanoan te bitineti n te kooram te membwa n te beretitentii. Te katooto, e kona n uaia ni marooro te kooram i aon aron irakin Ana mwakuri te Atua ibukin te kamaiuaki ao te karietataaki. Imwin anne ao E riai n tau te tai ibukin reiakinan ao marooroakinan te euangkerio.
Bootakin te kooram e riai ni maroroakinaki iai teuana ke e raka riki maroro man te maungatabu ni kabuta ae e a tibwa nako. Te beretitentii n te bootaki n unimwaane e rinei maroro ake a na maroroakinaki ni kaineti ma kainnanoia membwa. A kona n aneneaki Anene n taromauri ni kanakoraoa te reirei. A riai bootaki nako ni kainaki ma te tataro.
8.2.1.3
Waaki ni kakukurei
Beretitentii n te kooram n unimwaane a kona ni bairei waaki ni kakukurei. Waaki ni kakukurei aikai a kakorakoraia kaain te kooram ao a anganiia aia tai ni beku ibon imarenaia. Angiin waaki ni kakukurei a karaoaki tiaki n tairikin te Tabati ke te Moanibong.
Te beretitenti n te kooram n unimwaane e tararuai waaki ni kakukurei aikai. E kona ni mwiokoa ana kauntira ke kaain te kooram bwa e na kaira te babaire ao ni karaoan nanon babaire (taraa 8.3.5). Beretitentii a maroroakini waaki ni kakukurei ma te bitiobi bwa kanoan aia babaire.
8.2.2
Tararuakiia Naake Iai Kainnanoia
Ngkai taan iriira Iesu Kristo, kaain te kooram n unimwaane iai tabeia n taben nanoia ma te tangira naake iai kainnanoia. N tatabemaniia ao n te kooram, a ukori kawai ni beku ibukiia tabeman n te uoote ao n te kaawa. Ngkana e bon tauraoi, JustServe.org e anga iango ibukin waaki n ibuobuoki.
Ibukin rongorongon riki aroia kaain te kooram n unimwaane ao te Bootaki n Aine n tabeakiniia naake iai kainnanoia, taraa 22.6.2.
8.2.2.1
Mwakuri n Ibuobuoki
Te mwakuri n ibuobuoki bon tabeakinaia tabeman n aron are e na karaoia te Tia Kamaiu. Kaain te kooram n unimwaane a karekei mwioko n ibuobuoki mairoun te beretitentii n te kooram. Ibukin rongorongona riki tabeua, taraa mwakoro 21.
8.2.2.2
Kainnano ibukin te Tai ae Uarereke
Taari n te mwakuri n ibuobuoki a kakaea ao a tobwai kainnanoia naake a beku ibukiia. A kona membwani kainnanoa te ibuobuoki ibukin te tai ae uarereke n tain te aoraki, te bung, te mate, buan te mwakuri, ao kangaanga riki tabeua.
Ngkana e kainnanoaki, taari n ibuobuoki a butiia te beretitenti n aia kooram unimwaane ibukin te ibuobuoki. N ana kariaia te bitiobi, te beretitentii e kona ni wetea te tia tararua n te mwakuri ni ibuobuoki n bairei waaki aikai (taraa 8.3.5).
Te kooram n unimwaane ao te Bootaki n Aine a karaoi waaki aiaki n tobwai kainnano ibukin te tai ae uarereke (taraa 22.3.2). E kona te bitiobi n anga te ibuobuoki man te angabwai n aki mamatam ngkana e riai.
N tabeua taabo, iai aia kona bitiobi n buokiia membwa ake a kainnano n ana oota te bitiobi ibukin te amwarake ao tabeua riki bwaai. N angiin te tai te bitiobi e katabea te beretitentii n te Bootaki n Aine bwa e na reitaki ma membwa ao ni kanoa te booma ibukin te oota. Ma, e kona naba ni mwiokoa te beretitenti n aia kooram unimwaane. Te kauntira n te Bootaki n Aine ke te beretitenti n aia kooram unimwaane e kona ni mwiokoaki ngkana akea te beretitenti. Te tia kairiri are mwiokoaki e anga te booma are e a tia arona nakon te bitiobi ibukin ana kariaia.
Ibukin riki rongorongona, taraa 22.6.2 ao “Welfare Resources” inanon Leader and Clerk Resources.
8.2.2.3
Kainnano Aika Maan Taia ao te Riki n Toronibwai
Ngkai e tararuaaki iroun te bitiobi, te beretitentii n te kooram n unimwaane ao te Bootaki n Aine a buokiia membwa ni kainnano aika a maan taia ao n te riki n toronibwai. A anga tuua iaon reirei n te riki n toronibwai iaon te maiu n rabwata ao te maiu n tamnei. Tara mwakoro 22 ao “Te Riki n Toronibwai” n te Gospel Library app.
Ngkana temanna te aomata ke te utu a kainnanoa te ibuobuoki, te beretitenti n te kooram n unimwaane ao n te Bootaki n Aine a uaia ni marooro, n aron baireana iroun te bitiobi, bwa ko na kanga n ibuobuoki (taraa 22.4).
Te beretitenti n aia kooram unimwaane, te beretitenti n te Bootaki n Aine, ke temanna te tia kariiri e buoka temanna ke te utu ni karaoa ana Babaire n te Riki n Toronibwai. Taari ao Aine n te mwakuri n ibuobuoki a kona naba n ibuobuoki n te babaire. N angiin te tai, tabeman membwa n te kooram n unimwaane ao te Bootaki n Aine iai rabakauia ke aia taneiai ae kona n ibuobuoki iai. Aomata ni kabane ake a ibuobuoki a kaini taekan rongorongo. Ibukin riki rongorongona, taraa 22.3. 3 ao 22.8.
8.2.2.4
Ngkana e Mate Kaain te Uoote
Ngkana e mate kaain te uoote, te beretitentii n aia kooram unimwaane ao n te Bootaki n Aine e anga te karaunano ao te ibuobuoki. Iaan ana kairiri te bitiobi, a kona n ibuobuoki ma te taunimate.
Ngkana e kona, membwa ake a tia ni mate ake a tia ni karekei aia entaumente a na taunaki ke ni kabuekaki rabwataia ma kunnikain te tembora. Rabwatan te mwane e kona ni kunnikaiaki iroun buuna ke iroun te mwane ae kaain te utu ae e a tia n entaute. Ngkana akea kaain te utu ke ngkana e aki tangiria ni karina te kunnikai, e kona te bitiobi n tuanga te beretitenti n aia kooram unimwaane bwa e na tuanga te mwaane are e a tia n entaute bwa e na kunnikaia rabwatana ke n taraa aron karinakin te kunnikai. Ibukin rongorongo riki tabeua, taraa 38.5.8.
Beretitentii n aia kooram unimwaane ao n te Bootaki n Aine, taari ao Aine n te mwakuri n ibuobuoki, ao tabeman a reitanako n anga te karaunano ao te ibuobuoki imwin te taunimate.
8.2.3
Kaoakiia ni Kabane Bwa Ana Karekea te Euangkerio
Naake iai irouia te Nakoanibonga ae te Merekitereka iai tabeia bwa a na kaoiia aomata ni kabane ni karekei ana kakabwaia ana euangkerio Iesu Kristo (taraa Reirei ao Berita aika Tabu 53:3). A karaoa aei man tibwauan te euangkerio, kakorakoraia membwa aika boou, ao taben nanoia naake a aki rang kakaonimaki. Taraa 23.2 ao 23.3.
N aia bowi kaain te beretitentii ao te kooram, te beretitentii n te kooram e marooroakin kawai ake a kona iai taari ni kaoiia aomata ni bane ni karekei ana kakabwaia te euangkerio. Taraa 23.1.1, 23.1.2, ao 23.1.3.
Te beretitenti n aia kooram unimwaane e mwiokoa te membwa man te beretitentii bwa e na ibuobuoki ni kaira te mwakuri n tibwauan te euangkerio n te uoote. E mwakuri ma te membwa are e mwiokoaki man te beretitentii n aia bootaki Aine ni karaoi mwakuri aikai (taraa 23.6.2).
Te membwa n te beretitentii n aia kooram unimwaane e kona ni karaoa taben te tia kairiiri ibukin te mwakuri ni mitinare n te uoote. Ngkana e a tia te bitiobiriki ni wetea te tia kairiiri ibukin te mwakuri ni mitinare n te uoote, te membwa n te beretitentii aei e tararuaa ana mwakuri. Taraa 23.6.1 ao 23.6.3.
Te tia kairiiri n te mition n te uoote, are e kona n ae te membwa n te beretitentii n te kooram ni unimwaane, e kairi bootaki ni babaire ni katoa wiiki. Te kantaninga ibukin bootaki aikai bwa e na bairea kaoakiia ni kabane bwa a na karekei kakabwaia n te euangkerio. A raonaki bootaki aikai ma anganakiia membwa n te beretitentii n te Bootaki n Aine ao n te kooram n unimwaane, mitinaren te uoote, te tia ibuobuoki n te kooram n ibonga, kaain te bereitentii n aia kiraati Ataeinaine aika kabanea n ikawai, ao mitinare ake a bwanin aia tai. See 23.4.
8.2.4
Katiteuanakiia Utu n Akea Tokina
Naake iai irouia te Nakoanibonga ae te Merekitereka a boutokaia membwa ni katiteuanaia utu ibukin te tai ae akea tokiia. Aio ae raonaki:
Karaoan berita aika tabu ma te Atua man karekean otenanti, n aron te entaumente n te tembora.
Karaon te mwakuri n te tembora ao te mwakuri n rongorongon te utu (taraa 1.2.4).
Ni bowin te beretitentii ao kooram, te beretitentii n te kooram e marooroakini kawai ake a kona iai taari ni kataia ni kakoroi nanon mwakuri aikai.
A bairei naba kawai kaain te Beretitentii ni buokiia membwa ni karikirakea otaia n te ao nanoia ni karekei otenanti aika tabu ao ni karaoi berita aika tabu ma te Atua inanon te tembora. A kaungaia taari bwa a na kabatia te nako n nebonebo inanon te tembora ngkana a kona.
Te beretitentii e kaungaia kaain te kooram bwa a na reiakina rongorongoia aia utu. A buokiia membwa aika boou ao aika a oki, unimwaane aika tibwa katabuaki, ao mitinare aika tibwa weteaki bwa a na kakaei ao ni katauraoi araia aia bakatibu ibukin otenanti n te tembora.
Te beretitenti n aia kooram unimwaane e mwiokoa te membwa n te beretitentii bwa e na ibuobuoki ni kaira te mwakuri n te tembora ao n rongorongon te utu n te uoote. E mwakuri ma te membwa are e mwiokoaki man te beretitentii n te Bootaki n Aine ni karaoi mwakuri aikai.
Te membwa n te beretitentii n aia kooram unimwaane aio e na kona ni kakoroa nanon taben te tia kairiri n te uoote ibukin te mwakuri n te tembora ao n rongorongon te utu. Ngkana e a tia ni weteaki te tia kairiri ibukin te mwakuri n te tembora ao te mwakuri n rongorongon te utu iroun te bitiobiriki, te membwa n te beretitentii aei ngaia are e tararuaa ana mwakuri. Taraa 25.2.2.
Te tia kairiiri ibukin te tembora ao rongorongon te utu n te uoote, ae kona n ae te membwa n te beretitentii n te kooram n unimwaane, e na kairi bootaki n te tembora ao n rongorongon te utu (taraa 25.2.7). Bootaki aikai a kakaraoaki n tainako. Kaaina naba bon te membwa are mwiokoaki man te Beretitentii n te Bootaki n Aine, te tia ibuobuoki n te kooram n ibonga, kaain te bereitentii n aia kiraati Ataeinnaine ake a kabanea n ikawai, ao taan rabakau ibukin te tembora ao n rongorongon te utu.
Tamnei
mwaane n taraa te tamnei
8.3
Taan kairiiri n Aia Kooram Unimmwaane
8.3.1
Beretitentii n te Titeiki ao Bitiobi
Te beretitenti n te kooram n unimwaane e bon kaineti mwiin tabena nakon te beretitentii n te titeiki. E reitaki n tainako ma kaain te beretitentii ni karekea te kaetieti ao te ribooti iaon tabena.
Te beretitenti n aia kooram unimwaane e karekea naba te kairi mairoun te bitiobi, are bon te aobitia n tararua n te uoote. A kaitibo n te tai ae mwaiti. A maroroakina aia kekeiaki n Ana mwakuri te Atua ibukin te kamaiuaki ao te karietataaki, n raonaki ma aia ibuobuoki taari n ibuobuoki. A maroroakina naba (1) rikirakeia ao kainnanoia kaain te uoote (2) bowin te kooram n unimwaane, kiraati, ao waaki ni kakukurei.
8.3.2
Te Kauntira ae Rietaata
Te beretitentii n te titeiki e mwiokoa temanna te kauntira ae rietaata bwa e na tei ibukiia i nanon aia kooram unimwaane. A kabwarabwaraaki tabena inanon 6.5.
8.3.3
Beretitentii n te Kooram ni Unimwaane
8.3.3.1
Wetean te Beretitentii n Aia Kooram Unimwaane
Imwin te marooro ma te bitiobi, te beretitenti n te titeiki e wetea te unimwaane ke te ibonga ae rietata bwa e na beku bwa te beretitenti n aia kooram unimwaane.
Ngkana e a tau buburan te iunite, te beretietenti n te kooram n unimwaane e anga aran temana ke uoman unimwaane ke ibonga aika rietata nakon te beretitenti n te titeiki bwa a na beku bwa ana kauntira. E karaoa aei imwin marorona ma te bitiobi. Te beretitentii n te titeiki e tarai aara akanne. Kaain te beretitentii n te titeiki ke te kauntira ae rietaata a kanakoa te wewete.
Ni kabane taian ara ake a kanakoaki ibukin weteakiia kaain te beretitentii n aia kooram unimwaane a kainnanoa ana kariaia te beretitentii n te titeiki ao kaain te kauntira ae rietaata.
Kaain te beretitentii n te titeiki e uotarake araia kaain te beretitentii n aia kooram unimwaane n te bootaki n toa ibukin kamatoakiia. E kona naba te beretitentii n te titeiki ni mwiokoa temanna te ibonga ae rietaata bwa e na karaoa aei.
Kaain te beretitentii n aia kooram unimwaane e uotarake araia taari ake a weteaki nakon nakoa n te kooram ake tabeua ibukin te kamatoa ni bootakin te kooram (taraa 8.3.4 ao 8.3.5).
Te beretitenti n te titeiki e katabua te beretitenti n aia kooram unimwaane ao e anganna te kiing ibukin nakoana. Ibukin riki rongorongon kiingin te nakoanibonga, taraa 3.4.1. Te membwa n te beretitentii n te titeiki ke te kauntira ae rietaata e katabuia kauntira.
8.3.3.2
Taabe
Aikai taben te beretitenti n aia kooram unimwaane. E na buokaki irouia ana kauntira.
Ngaia kaain kauntiran te uoote. E beku bwa (1) kaain te kauntira are e ibuobuoki n tobwai kainnano n te uoote ao e kakaei buokaia ao (2) te tia tei ibukiia kaain te kooram n unimwaane (taraa 29.2.5).
A kairii ana waaki te kooram n ira Ana mwakuri te Atua ibukin te kamaiuaki ao te karietataaki (taraa mwakoro 1).
E bairei ao n tararua aia ibuobuoki taari n ibuobuoki. E karaoa te tabe ibukin te mwakuri n ibuobuoki ma te beretitentii n te Bootaki n Aine, are a bowi iai teuana n te kuata. E ukora ana kariaia te bitiobi ibukin taabe n te mwakuri n ibuobuoki. E karaoai intawiu ibukin te mwakuri n ibuobuoki tao teuana n te kuata. Taraa mwakoro 21.
Iaan ana kairiiri te bitobi, marooro ma te membwa ae ikawai n te uoote. Ti te bitiobi ae na marooro ma membwa n te Ekaretia iaon kororaoia, bwainikirinaki, ao kariaia ni kabonganakin mwaane n aki mamatam. Taraa Counseling Resources.
Ma te beretitentii n te Bootaki n Aine, ibuobuoki ni kairi waaki n te uoote ni kaoia ni kabane ni karekei ana kakabwaia te euangkerio (taraa 8.2.3 ao 9.2.3). E tararuaa te tia kairiri i bukin te mwakuri ni mitinare n uoote ngkana iai.
N raona te beretitentii n te Bootaki n Aine, e buoka kairan te mwakuri n te uoote n te tembora ao te mwakuri n rongorongon te utu (taraa 8.2.4 ao 9.2.4). E tararuaa te tia kairiiri ibukin te mwakuri n tembora ao te mwakuri n rongorongon te utu ngkana iai.
E babairei mwakuri ma kaain te kooram n unimwaane ni kakorakoraia taari, ake a tuai n iein ao ake a tia. Temanna te kauntira e kona ni katabeaki ni beku ma kairake n ikawai aika tuai iein (taraa 14.1.2.2).
E reitaki ma kaain te kooram n tatabemaniia tao teuana n te ririki. A maroroakin tibwanga n te nakoanibonga ao aron te membwa ao ana utu.
E reireiniia kaain te kooram tabeia n te nakoanibonga (taraa Reirei ao Berita aika Tabu 107:89). Kanoan aei bon reiakinaia bwa a na kanga ni kamwakura aia nakoanibonga ni karaoan otenanti ao kakabwaia.
E tararuaa ao e buoka katamaroan te anga reirei n te kooram (taraa mwakoro 17).
E bairei ao e kairi bootakin te kooram.
E tararuai aia waaki ni kakukurei kaain te kooram n unimwaane (taraa 8.2.1.3).
E buokiia ataeinimwaane ao mwaane ake a tauraoi ni karekea te Nakoanibonga ae te Merekitereka (taraa 8.4).
E tararuai rekootin te kooram, ribooti, ao te mwane (taraa LCR.ChurchofJesusChrist.org). E kona n ibuobuoki te tia koroboki (tia koroboki 8.3.4).
Te beretitentii n te titeiki ao membwa ake a mwiokoaki man te kauntira ae rietaata a reireiniia kaain te beretitentii n aia kooram unimwaane taabe aikai. A kona ni karaoa aei n tain bootaki ni kairiiri n te nakoanibonga n te titeiki, aia bootaki beretitentii n te kooram, ao karaoan aia kakawari ma beretitenti n te kooram n unimwaane (taraa 29.3.3).
Rinanon ana beku, te beretitenti n aia kooram unimwaane e boutoka te bitiobi ni kabanea ana tai irouia te roronrikirake ao taben te bitiobi aika a onoti.
8.3.3.3
Bowin te Beretitentii
Te beretitentii n aia kooram unimwaane ao te tia koroboki e mwaiti aia tai ni bowi. Te beretitenti e kairi bowi aikai. Te kauntira ae rietaata are mwiokoaki nakon te kooram aei e iri naba.
E kona ni kakanoa te akenta ni bwaai aikai:
Babaire ni kakorakoraia kaain te kooram (ao naake a tauraoi) ao aia utu.
Babaire ni katiaa Ana mwakuri te Atua ibukin te kamaiuaki ao te karietataaki.
Karaoan te mwakuri ni mitinare ao te mwakuri n te tembora ao te mwakuri n rongorongon te utu.
Kaeka nakon reirei ao tabeia mairoun te bitiobi ao taan kairiiri n te titeiki.
Karaoi taabe man kauntiran te uoote.
E iangoi taabe ibukin te mwakuri n ibuobuoki ma te tataro.
E rinanoi rongorongon intawaiu ibukin te mwakuri n ibuobuoki. E bairei kawai ni kinai korakora ao e ibuobuoki n tobwai kainnano. (Tara mwakoro 21.)
E taraia taari ake a kona ni beku n nakoa ao n taabe.
Bairei bootaki n te kooram ao waaki ni kakukurei.
8.3.4
Tia koroboki
N ana kariaia te bitiobi, kaain te beretitentii n aia kooram unimwaane e kona ni wetea kaain te kooram bwa te tia koroboki n te kooram. E uotarake arana ibukin te kamatoa ni bootakin te kooram ao e kaokoroa.
E kona ni kakanoa taben te tia koroboki n aikai:
E karaoi akenta ibukin bowin te beretitentii ao bowin te kooram.
E koroboki n tain te bowi ao e korei mwiin taabe.
Katei tain intawiu n te mwakuri n ibuobuoki (taraa 21.3).
E katauraoa ao e kanakoa ana ribooti n te kuata iaon te roroko ao mwaitin intawaiu ibukin te mwakuri n ibuobuoki ake a karaoaki.
E ibuobuoki ni katauraoa te kataumwane n te ririki ao e taui mwiin kabanemwane.
8.3.5
Nakoa riki Tabeua
Nakoa aika tabeua aikai a kona ni ibuobuoki. Te bitiobi ao te beretitenti n aia kooram unimwaane a marorokinna aron kainnanoakiia.
Taan reirei n te kooram bwa e na anga reirei ni Bowin te Kooram n te Tabati
Te mataniwi n te mwakuri ni ibuobuoki bwa e na ibuobuoki ni babaire ao ni karaoi ibuobuoki nakoia aomata ake a kainnano (taraa 8.2.2.2). Taan ibuobuoki ao kaain te komete a kona naba ni weteaki.
Te mataniwi ibukin waaki ni kakukurei bwa e na ibuobuoki ni bairei ao ni karaoi ana waaki ni kakaukurei te kooram n unimwaane (taraa 8.2.1.3). Taan ibuobuoki ao kaain te komete a kona naba ni weteaki.
Kauoman n tia koroboki bwa a na buoka te tia koroboki n aia kooram unimwaane
Taan koroboki n te mwakuri n ibuobuoki bwa a na bairei tain intawiu ibukin te mwakuri n ibuobuoki ao n ibuobuoki ni katauraoa te ribooti ibukin te kuata
Ngkana nakoa aikai ke tabeua riki a kainnanoaki, te beretitentii n aia kooram unimwaane e anga araia taari ake a na beku. A anga aara aikai nakon te bitiobiriki. Ngkana e kariaia te bitiobiriki, kaain te beretitentii n te kooram e weteia. E uotarake araia ibukin te kamatoa ni bootakin te kooram ao e kaokoroia.
N aron kainnanoana, te beretitenti n aia kooram unimwaane e kona n mwiokoia taari bwa a na buoka ana waaki te kooram n unimwaane ni kawai riki tabeua. Taari ma mwiokoaia ibukin te tai ae uarereke aki kainanoa weteaia ao kaokoroaia.
Tamnei
uoman mwaane angan temanna te kakabwaia n te nakoanibonga
8.4
Buokaia Unimwaane Aika Tauraoi ni Karekea te Nakoanibonga ae te Merekitereka
Te mwaane ae tauraoi n riki bwa te unimwaane bon kaain te Ekaretia ae te mwaane ae e tuai n reke irouna te Nakoanibonga ae te Merekitereka ao (1) bon 19 ana ririki ke raka riki (2) e uarereke iaan 19 te ririki ma e a tia ni mare.
Buokaia mwaane ake a tauraoi n riki bwa unimwaane ni katauraoi ni karekea te Nakoanibonga ae te Merekitereka bon teuana ana moanibwai te beretitentii n te kooram. Te beretitentii e anganiia mwaane ake a tauraoi aia tai n ibuobuoki ao n tibwauai aia tarena. Taari n ibuobuoki aika botumwaaka a riai ni katoaaki ma mwaane ake a tauraoi n riki bwa unimwaane.
Te beretitentii n te kooram ao taari n ibuobuoki a reireiniia mwaane ake a tauraoi n riki bwa unimwaane rongorongon:
Taben te unimwaane, ao tabena n ibuobuoki (taraa Reirei ao Berita aika Tabu 20:38–45; 42:44; 107:11–12). Mwaane ake a tauraoi n riki bwa unimwaane ake taan reirei ao ibonga a kona ni beku bwa taari n ibuobuoki.
Oin bukin te otenanti n te nakoanibonga ao kakabwaia ao aron karaoaia (taraa mwakoro 18).
A kanga mwaane ao aine n reitaki ni mwakuri ni kakoroa nanon ana mwakuri te Atua.
Ibukin rongorongon riki atuun reirei aikai, taraa “Nakoanibonga ae te Merekitereka,” “Nakoanibonga,” ao “Aine n te Ekaretia” (Gospel Topics, topics.ChurchofJesusChrist.org).
Te anga reirei aei e kona ni karaoaki nakon temanna ke n te kiraati i tinanikun kiraati ake n te Tabati.
N te tai are te bitiobi ao te beretitentii n te titeiki a noria bwa te mwaane ae tauraoi n riki bwa te unimwaane e a tauraoi ao e tau, e kona ni katabuaki bwa te unimwaane n te Nakoanibonga ae te Merekitereka.
8.5
Kaain te aro ae aki Toamau
Te beretitentii n aia kooram unimwaane e anga te tararua ae onoti nakoia membwa ake aki toamau. Ibukin rongorongon aron buokaia membwa aikai, taraa disability.ChurchofJesusChrist.org; taraa naba 38.8.27 inanon te aeniboki aei.
