“Mwakoro 6: Ukora Anuan Kristo,” Tataekina Au Euangkerio: Te Kairi n Tibwaan Ana Euangkerio Iesu Kristo (2023)
“Mwakoro 6,” Tataekina Au Euangkerio
Tamnei
Weteakiia Taan Akawa (E Weteiia Betero ma Anterea Kristo), iroun Harry Anderson
Mwakoro 6
Ukora Anuan Maiun Kristo
Iangoa Aio
E na kanga ukoran anuan maiun Kristo ni buokai ni kakoroa bukinakiu ngkai te mitinare?
N na kanga ni kaai ni ukora ao butimwaea anuan maiun Kristo?
E ngaa te anua ni maiu ke taian anua ni maiu ae I riai n kabanea au iango i aona ngkai?
Kabwarabwaraana
Ni moanan Ana mwakuri n te maiu aei, e nakonako Iesu i mataniwin te Naman Kariraia ao e weteiia uoman taan akawa, Betero ao Anterea. “Mai ri mwiu,” E taku, “ao N na karaoi ngkami bwa taan akawa aika konami aomata” (Mataio 4:19; taraa naba Mareko 1:17).
Te Uea e weteiko naba nakon Ana mwakuri, ao E kaoiko naba bwa ko na Iriiria. “Aekan aomata raa ngkami?” E titiraki. “E koaua ae I tuangkami, kam na riki n ai arou” (3 Nibwaai 27:27).
Tabeua mwakoro i nanon Tataekina Au Euangkerio e katuruturu bwa tera ko na karaoia ngkai te mitinare ngkoe, n aron ae ko na kanga ni kamatebwai, ko na kanga n angareirei, ao ko na kanga ni katea am kouru. N aron ae kakawaki ngkai tera ae ko karaoia antai ngkoe ao antai ae kona riki n ai arona. Anne bon bwai ae na katuruturuaki n te mwakoro aei.
E kabwarabwaraki ni koroboki aika tabu anuan maiun Kristo are e bon kakawaki ibukim ni ukoria ngkai ko mitinare ao i nanon bongin maium. Anuan maiun Kristo bon te tamaroa ke anuan tein te Tia Kamaiu ma aroarona. Te mwakoro aei e kabwarabwara tabeuan anua ni maiu akanne. Kamatebwaia aikai ao kiibu aika a irekereke ma aikai. Tarai tabeua anuan maiun Kristo ngkai ko kamatebwai man kibuntaeka tabeua ni koroboki aika tabu.
Am Kamatebwai
Kamatebwaia Reirei ao Berita aika Tabu 4. Tera kinankin te Uea n anuan maiuna ngkai e kakawaki ibukiia mitinare? E kanga ukoran anua ni maiu aikai ni buokiko ni kakoroa nanon bukinakim ni mitinare?
“Ukora Iesu Aio”
Te burabeti Moronaai e kaunga te nano, “I tuangkami bwa kam na ukoukora Iesu aio are a korea rongorongona burabeti ma abotoro” (Ita 12:41). Teuana te kawai ae kakawaki ni ukora Iesu bon te mwakuri n taningamarau n reiakina Taekana ao n riki n ai Arona. Am mition bon te tai ae tamaroa ni kabanean ami iango i aon aei.
Ngkai ko kataia n riki n ai aron Kristo, ko karaoa rai am kabanea n tamaroa ni bukinakim ni mitinare n ae tamaroa. Ko na rinanon te kimwareirei, te rau, ao rikiraken te maiu n tamnei ngkai e riki Anuan maiuna bwa mwakoron aroarom. Ko na katea naba te aam ae matoa ibukin reitinakom ni Iriiria rianon maium.
Bwaintangira mairoun te Atua
Anuani maiun Kristo bon taian bwaintangira mairoun te Atua. Ai aron bwaai aika tamaroa, bwaintangira aika a roko rinanon “te akoi mairoun te Atua te Tama, ao te Uea ae Iesu Kristo, ao te Tamnei ae Raoiroi” (Ita 12:41).
Katurua am iango iaon Kristo ngkai ko ukoria n kammwakura Anuan maiuna (taraa Reirei ao Berita aika Tabu 6:36). Anua ni maiu aikai bon tiaki bwaai ake a koreaki bwa a na karaoaki. Bon tiaki aanga ni mwakuri are ko na karikirakea i nanon te buroukuraam are katamaroaan-arom. Akea te kareke mane mai iai ti rinanoan kinakin arom i bon iroum. Ma, ko kona ni butimwaia ngkana ko kataia n anga nanom riki bwa ana reirei Iesu Kristo.
Tataro ibukin ana kakabwaia te Atua bwa E na anganiko anua ni maiu aikai. Nanorinano kakoauai kabwakam ao kainanoan Mwaakana i nanon maium. Ngkai ko karaoa aio, E na “karaoi baika mamaara bwa [ko] aonga ni korakora” (Ita 12:27).
Te Waaki ae Karauaki
Te riki n aron te Tia Kamaiu e bon te waaki ni maiu, ae karauaki . Ma te nano ni koaua ni kakukureia te Atua, kanakoraoa am babaire teuana imwin teuana.
Bwaina te taotaonaki n nano. E ataia te Atua bwa bitaki ao te rikirake e anaa te tai. E bon kukurei ma nanom ae koaua ao e na kakabwaiako n am kekeiaki ni kabane ake ko karaoi.
Ngkai ko ukoria n riki n ai aron Kristo, nanom, am iango, ao am mwakuri a na bitaki. Rinanon Ana Mwakuri ni Kamaiu ao mwaakan te Tamnei ae Raoiroi, aroarom a na bane ni kaitiakaki (taraa Motiaea 3:19).
Tamnei
Parley P. Pratt
Te Tamnei ae Raoiroi e karababaa ao ni kabubura ara konabwai. E “kaungaa te raoiroi, akoakoi, tamaroa, amarau, maem, ao tatangira. … Kakimototoana, ngaia, kanga ai aron, marau nakon te rii, kimwareirei nakon te nano, oota nakon te mata, katangitang nakon te taninga, ao te maiu nakoia aomata ni kabane” (Parley P. Pratt, Key to the Science of Theology [1855], 98–99).
Kamatebwaian Koroboki aika Tabu
Teraa ae a reireiia koroboki aika tabu aikai ibukin ana banna ni katooto Iesu Kristo?
Ibukin te onimaki ae kairaki nakon te kamaiuaki, ko riai ni kabotoa iroun Iesu Kristo (taraa Mwakuri 4:10–12; Motiaea 3:17; Moronaai 7:24–26). Ngkana ko karekea te onimaki iroun Iesu Kristo, ko na onimaki Irouna ngkai Natin te Atua ae Ana Rikitemanna. Ko onimaki bwa ngkai ko raira nanom, e na kabwaraaki am bure rinanon Ana Mwakuri ni kamaiu ao ni katabuaki iroun te Tamnei ae Raoiroi (taraa 3 Nibwaai 27:16, 20).
Te onimaki bon tiaki karekean te ataibwai ae kororaoi. Ma, bon te kakoaua mairoun te Tamnei iaon bwaai ake ko karaoi aika aki nooraki ma a koaua. (Taraa Aramwa 32:21.)
Ko kaota am onimaki rinanon am mwakuri. Mwakuri aikai ni ikotaki ma iriiran ana reirei ao ana banna ni katooto te Tia Kamaiu. A ikotaki ma te ibuobuoki nakoia tabeman ao buokakiia n rineia n iriira Kristo. Ko kabwarabwara naba am onimaki rinanon te tanigamarau, rairannano, ao te tangira.
Te onimaki bon te moan tua n te mwaaka. Ngkana ko kammwakura te onimaki iroun Iesu Kristo, ko na kakabwaiaaki ma Mwaakana ni kanakoraoa arom nako. Ko na konaa ni karekea te kakai ake ko na rinanona nakon ana kantaninga te Uea. (Taraa Iakoba 4:4–7; Moronaai 7:33; 10:7.)
Am onimaki iroun Iesu Kristo e na rikirake ngkai ko mataata raoi Irouna ao Ana kakabwaia. E na rikirake ngkai ko ukeuke i aon koroboki aika tabu, tataro ma nanom, ao ongeaaba nakon tuua. Te nanououa ao te bure bon kamamaaran te onimaki.
Tamnei
Unimwaane Neil L. Andersen
Te onimaki bon tiaki ti te namakin; bon te babaire. N raonaki ma te tataro, kamatebwai, ongeaaba, ao berita aika tabu, ti katea ao ni kamatoa ara onimaki. Ara koaua n aki nanokokoraki n Ana mwakuri te Tia Kamaiu ni boong aika katira e riki bwa te renti ae mwakaroiroi rinanon bwaai ake ti motitaekaia iai. Ngkanne, ngkana ti mena i nanon kabuebuen te maiu, … ti na karekea te korakora ni manga kaeta kawaira” (Neil L. Andersen, “E bon Koaua, Ke e Aki? Ngkanne Tera Bwaai aika Riki?” Riaona, May 2007, 74).
Te kantaninga e bon aki bebete iangoana. Onean mwiina, bon te kakoaua ae tiku, ni wene inanon am onimaki iroun Krristo, are te Atua e na kakoroi Ana berita (taraa Moronaai 7:42). Bon kantaningakin “ rokon bwaai aika a raraoi” rinanon Kristo (Ebera 9:11).
Katokin bwaai bon kaantaningaan Iesu Kristo. E titiraki te burabeti Moomon: “Ao tera are kam na kantaningaia?” Ngkanne e kaeka, “I taku nakoimi bwa kam na karekea te kantaninga rinanon ana mwakuri ni kamaiu Kristo ao mwaakan mangautina, bwa kam na kateirakeaki nakon te maiu are akea tokina, ao aio ibukin ami onimaki irouna n aron te berita” (Moronaai 7:41; taraa kiibu 40–43).
Ngkana ko kabotoa am kantaninga iroun Kristo, ko na karekea te raunnano bwa bwaai ni kabane a na nakoraoi ibukin te raoiroi (taraa Reirei ao Berita aika Tabu 90:24). Te raunnano e na buokiko n teimatoa ma te onimaki ngkana ko kaitarai kataakim. E na kona ni buokiko n rikirake man kataakim ao ni karikirakea kaokan te maiu n tamnei ma te korokora. Te kaantaninga iroun Kristo e karekea te ati n roo nakon tamneim (taraa Ita 12:4).
Te kantaninga e na anganiko te kakoaua bwa te Atua e na kakorakora wanawanam, am mwakuri ae tamaroa (taraa Reirei ao Berita aika Tabu 123:17).
Teuana te kawai ni karikirakea te kaantaninga bon rinanon te rairannano. Te kaitiakaki ao kabwarabure rinanon ana angakarea ni kamaiu Iesu Kristo e weweteira ao karekea ara kantaninga (taraa Aramwa 22:16).
E kaumaki Nibwaai, “Kam waaki nako man teimatoa iroun Kristo, ma te kantaninga ae tamaroa ma ni kororaoi, ma tangiran te Atua ma aomata ni kabane” (2 Nibwaai 31:20). Ngkai ko maiuakina te euangkerio, ko na rikirake i nanon te atatai “kabaeaki n te kantaninga” (I Rom 15:13).
Tamnei
Beretitenti Dieter F. Uchtdorf
“ Inanon taai ni bwarannano, ti na kona n taua ni kamatoa nakon te kantaninga are bwaai a na ‘mwakuri n ikotaki ibukin [ara] raoiroi’ ngkai ti iriira aia reirei ana burabeti te Atua. Te aeka ni kantaninga aei iroun te Atua, Ana raoiroi, ao Mwaakana ni kabouira ma te ninikoria i nanon kangaanga aika a matoa ao n anga te korakora nakoia ake a namakina te maaku man maakuia are a mena iai, nanououa, ao rawawata” (Dieter F. Uchtdorf, “Mwaakan te Kantaninga ae Akea Tokina,” Riaona, Nobembwa 2008, 23).
Kamatebwaian Koroboki aika Tabu
Tera te kantaninga, ao tera ae ti na kantaningaia?
Temanna ngkoa,e titirakina Iesu, “Tera te tua ae korakora i buakon taian tua?” E kaeka Iesu: “Ko na tangira Iehova ae Atuam n nanom ni kabane, ao n tamneim ni kabanea, ao ni wanawanam ni kabanea. Aio te Moa n tua ae e korakora. Ao ai aron naba are te kauoua, are e kangai, Ko na tangira raom n ai aron tangiram i bon i roum” (Mataio 22:36–39).
Te tangira ae kororaoi bon “ana tangira Kristo” (Moronaai 7:47). E ikotaki ma ana tangira te Atua ibukiia Natina ni kabane.
E reirei te burabeti Moomon, “Tataro nakon te Tama ma korakoran nanomi ni kabane, bwa kam na kaonaki n te tangira aio” (Moronaai 7:48). Ngkana ko tataro ni karekea te tangira ae kororaoi ni kaona nanom, ko na bon katoonga ana tangira te Atua. Am tangira ibukiia aomata e na rikirake, ao ko na namakina te raraoma ae korakora ibukin kukureia ae akea tokina. Ko na nooriia ngkai bon natin te Atua ma aia konabwai ni konaa n riki n ai Arona, ao ko na mwakuri ibukiia.
Ngkana ko tataro ibukin te bwaintangira ae te tangira ae kororaoi, e na bon karako kabaeam i aon namakin aika aki nakoraoi n aron te un ke te mataai. Ko kona n aki momotiki taekaia tabeman ke waewaeiia. Ko na karekea riki te nanomwaka n oota irouiia ao aia iango. Ko na taotaonakinnano riki ao ni kataia ni buokiia aomata ngkana a korakai ke a bwarannano. (Taraa Moronaai 7:45.)
Te tangira ae kororaoi, ai aron te onimaki, e kairiiri nakon te mwakuri. Ko kakorakora ngkai ko buokiia tabeman ao n anga bon ngkoe.
Te Tangira ae Kororaoi e kona ni karekea te bitaki. E anga Tamara are i Karawa “i aoia ni kabane ake a iriira Natina, Iesu Kristo, … bwa ngkana e roko ao ti na riki n arona, … bwa ti aonga ni kaitiakaki n arona ae e itiaki (Moronaai 7:48).
“Ti kakoaua ae ti riai ni … itiaki,” Taekan te Onimaki(1:13). Te itiaki bon te banna ibukin katei ao aroaro ake a boboto i aon anua ni maiu aika raraoi. Bon te kakaonimaki nakon te Atua ao tabeman. Mwakoron te tamaroa ae riai bon te keiaki n riki n tamaroa ao n itiaki n te maiu n tamnei ao n rabwata.
Te tamaroa e oioi mai i nanon te iango ao nanom. “E riai te raoiroi ni katamaroa am iango” e taku te Uea (Reirei ao Berita aika Tabu 121:45). Kabanea am iango iaon iango aika a raraoi, iango aika a kaunganano. Kanakoi iango aika aki boongana man am iango nakon te maeka ma ngaai.
Am iango kanga ai aron te tabo ni kamataku. Ngkana ko kariaia taian iango aika aki raoiroi n taua am iango, ko na bon karekea te bure. Ngkana ko bon matoa ni kaona am iango ma tamaroan bwaai, ko na bon mwaneia bwa tera te itiaki ao ni katinanikua bwa tera te buakaka. Kawanawanako bwa tera ae ko kariaiai n rin ao tiku n am iango.
Ngkai ko kataia ni maiu n itiaki n am “kakoaua [e na] korakora ma ni matoatoa i matan te Atua, ao te Tamnei ae Tabu e na riki bwa raom n tainako” (taraa Reirei ao Berita aika Tabu 121:45‒46).
Te kokoaua e roko man te moan tua ae korakora n tangira te Atua (taraa Mataio 22:37). Ibukina ngkai ko tangira te Atua, ko bon riai n etieti Nakoina n taainako. Ai aron natin Ereman mwaane, ko na “nakonako n eti imatana” (Aramwa 53:21).
Ngkana iai iroum te kokoaua, ko na ataia bwa iai te eti ao te bure ao ikanne are bon te Atua te koaua—ana koaua te Atua. Ko kabongana inanomatam n rinerine ni kaineti ma ana koaua te Atua, ao ko na waekoa n rairananom ngkana ko aki. Tera ae ko rineia n iangoia—ao tera ae ko karaoia ngkana ko onimakinna bwa akea temanna ae taratara—bon te babaire ae matoa n am kokoaua.
Tamnei
Taniera I nanon Nneia Raian, iroun Clark Kelley Price
Te kokoaua e nanonaki bwa ko aki karinanoa teim ke anuam bwa ko aonga ni kakukureia aomata ke ni butimwaeaki mairouia tabeman. Ko karaoa te bwai ae eti riki ngkana tabeman a bwainingarea nanom n riki n etieti nakon te Atua (taraa 1 Nibwaai 8:24–28). Ko maiu ma ni karineaki n taabo ni kabane, n reitaki bwa ko na kanga ni kaotiko iaonrain.
Ngkana iai te kokoua iroum, ko na kawakin am berita ae tabu ma te Atua ai aron naba te etieti n am motinnano nakoia tabeman.
Te kokoaua e ikotaki ma te kakaonimaki ma te Atua, bon ngkoe, am taan kairiiri, ao aomata. Ko aki karaoa te kewe, te iraa, babakanikawai, ke mwamwana te aba. Ngkana ko karaoa te bwai ae bure, ko butimwaea bukinam ao ko raira nanom nakon are ko kataia ni kaetia ke ni kataniko mai iai.
Ngkana ko maiuakina te kokoaua, ko na karekea te rau i bon iroum ao karineam. Te Uea ao aomata a na onimakiniko.
Kamatebwaian Koroboki aika Tabu
E kanga Iesu ni kaota te kokoaua riki i nanon Ana tai ni bwainikirinaki?
Ikotia nakon te Onimaki, Tamaroa, iroun Wailter Rane
Atatai
E reirei te onimaki Uea, “Ukoukori reirei, riki te kamatebwai ao n te onimaki naba” (Reirei ao Berita aika Tabu 88:118). I nanon am mition ao rinanon maium, ukoukora te atatai, riki te atatai n te maiu n tamnei.
Kamatebwaia booki aika tabu ni katoabong, ai aron naba aia taeka burabeti aika maiu. Rinanon te kamatebwai ao tataro, ukoukori buoka ibukin titiraki aika onoti, kangaanga, ao taai aika angaraoi. Tarai kibuntaeka man koroboki aika tabu are ko na konaa ni kabongana i nanon am angareirei ao ni kaekaan titiraki iaon te euangkerio.
Ngkana ko taningamarau ni kamatebwai ao n tataromwaaka, e na kaotaa am iango te Tamnei ae Raoiroi. E na reireiniko ao n anganiko te mataata. E na buokiko ni kamwakuri taian angareirei man koroboki aika tabu ao mairouia burabeti ni boong aika kaitira i nanon maium. N aron Nibwaai, ko kona ni kaangai:
“E kimwareirei tamneiu ni koroboki aika a tabu, ao e iangoia raoi nanou ma te karaurau. … Nooria, e kimwareirei tamneiu ni bwaai aika a kaineti ma te Uea; ao e teimatoa nanou n iangoi ma te karaurau bwaai ake I a tia n noori ma n ongo” (2 Nibwaai 4:15–16).
Kamatebwaian Koroboki aika Tabu
E na kanga te atatai ni buokiko ni karaoa ana mwakuri te Uea?
Te taonakinnano bon ana konabwai te onimaki nakon te Atua ngkai ko kaaitara te mwaarara, kakaitara, ke karawawata. Rinanon am onimaki, ko onimakina ana tai te Atua ibukin Ana kakabwaia ake a beritanaki ni kakoroaki bukiia.
Ngkana ko taotaonakinano, ko noora te maiu man am nonoori ae akea tokina. Ko na aki kaantaninga te kakabwaia ae waekoa ke mwiina n roko. Nanom ae etieti n taainako e na ataaki “teutana i mwin teutana, … ikai te reirei teuana i mwin teuana teutana ikai ao teutana ikanne” (2 Nibwaai 28:30). Naano tabeua aika etieti a na bon aki ataaki ni karokoa mwiin te maiu aei.
Te taotaonakinnano bon tiaki te taningaroti ke te aki ngoongo ni kerikaaki. E bon “kakukurei [karaoan] bwaai ni kabane aika a wene i nanon mwaaka [m]” ngkai ko beku iroun te Atua (Reirei ao Berita aika Tabu 123:17). Ko unikii, tebokii, ao ribana te koraa, ao e na anganiko te Atua rikirakem “teutana i mwin teutana” (Aramwa 32:42; taraa naba 1 I Korinto 3:6–8). Ko reitaki ni mwakuri ma te Atua, ni kakoaua are ngkana ko a tia ni karaoa katabeam, E na katiaa Ana mwakuri i nanon Ana tai ao ni kaineti nakon aia rinerine n tatabemaniia.
Te taotaonakinnano e nanonaki naba bwa te bwai teuana are e aki kona ni bitaki, ko konaa ni butimwaaia ma te ninikoria, te akoi, ao te onimaki.
Karikirakea te taotaonakinnano ma tabeman, n reitaki ma toam ao koraki ake ko beku ibukiia. Bwaina te taotaonannano bon ibukim naba. Keiakina te kabanea n tamaroa i nanom ngkai ko ataia ae ko na rikirake teutana i mwin teutana.
N ai aron tabeua anuan maiun Kristo, rikirake i nanon te taotaonakinnano bon te waaki ae abwabwaki mwakuriana. Kamwakuran te taotaonakinnano e kona ni karekea te anainano ni kamarurung n tamneim ao i aoia koraki ake irarikim.
Tamnei
Beretitenti Dieter F. Uchtdorf
“Te taotaonakinnano e nanonaki bwa te tataninga ao te kekeiaki ni ua te toki. E kananonaaki bwa ko na reitinako ma te bwai teuana ao ni karaoi ni kabane ake ko kona ni karaoi—ni mwakuri, kantaninga, ao ni kamwakura te onimaki; kaitarai kangaanga ma te kamarurungaki , riki ngkana a karimwiiaki rokon bwaai ake e tangiria nanora. Te taotaonakinnano tiaki ti te teimatoa; bon te teimatoa ni koaua!” (Dieter F. Uchtdorf, “Reitinako inanon te Taotaonakinnano,” Riaona, Meei 2010, 57).
Inanoi ma te Atua (E tataro Iesu ma Tinana), iroun Simon Dewey
Nanorinano
Te nanorinano bon te nano ni kukurei nakon ana kantaninga te Uea. Bon te nano ae kukurei n Anganna te karinerine ibukin te bwai ae tia ni karaoia. E tau ibukin te reiakinaki (see Reirei ao Berita aika Tabu 136:32). Te nanorinano e ikotaki ma te kakaitau ibukin ana kakabwaia te Atua ao ana kakoaua n teimatoam ni kainanoa Ana buoka. E buokiia koraki ake a nanorinano.
Te nanorinano bon ana kanikina korakoran te maiu n tamnei, tiaki te mamaara. Te nanorinano bon te bwai ni kabirimwaaka rikiraken te maiu n Tamnei ae rangi ni kakawaki(taraa Ita 12:27).
Ngkana ko onimakina te Uea, ko kona ni karekea te koaua raoi bwa Ana tua bon ibukin arom. Ko na kakoaua iroum bwa ko kona ni karaoi bwaai ake E kainanoiko iai ngkana ko katan Irouna. Ko bon kukurei naba n onimakiniia Ana toro ao n irii aia reirei. Te nanorinano e na buokiko n riki n ongotaeka, mwakuri korakora, ao ni beku.
Kaitaraan te nanorinano bon te kainikatonga. Te riki ni kainikatonga e nanonaki bwa ko onimakiniko riki i bon iroum nakon onimakinan te Atua. E nanonaki naba ni karimoan tangiran bwain aon te aba nakon tangiran ana bwai te Atua. Te kainikatonga e kakaiangatoa, koraki ake a rang kainikatonga a ukoria ni karekea ae mwaiti riki ao n iangoa nakoraoiia riki nakoia tabeman. Te kainikatonga bon te bwai ni kakaitara ae korakora.
Bauro, te abotoro, angareirei nakoia aomata aika a mwaiti
Botumwaaka
Te botumwaaka bon te teimatoa, te kekeiaki ae uaana. I nanon te mwakuri ni mitinare, te botumwaaka bon kaotan am tangira ibukin te Uea. Ngkana ko mwakuri korakora, ko na kunea te kimwareirei ao te raunnano i nanon ana mwakuri te Uea (taraa Aramwa 26:16).
Te mwakuri korakora e raoanaki ma karaoan bwaai aika a raraoi ni mwaawan am tai n oneamwin taningaan tuangam irouia am taan kairiiri bwa tera ae ko na karaoia (taraa Reirei ao Berita aika Tabu 58:27–29).
Reitinako ni karaoa ae raoiroi e ngae ngkana e kangaanga ke ko a bon kua. Eng kinaa kainnanoan kabarantami ma ni motirawa bwa kam na aki “kabirimwakai [ngkami nakon] korakorami” (Motiaea 4:27).
Kabanea nanom ao kukureim iaon te Uea ao Ana mwakuri. Totokoi bwaai ake ana katabetabeko man bwaai aika a moanibwai. Taratara am tai ao am kekeiaki i aon waaki ni kakukurei ake ana moan katiaaki i nanon am tabo ao n rang ibuobuoki nakoia aomata ake ko reireiniia.
Tamnei
Beretitenti Henry B. Eyring
“Aio Ana Ekaretia te Uea. E weteira ao n onimakiniira riki i nanon mamaarara are E atai iroura. E atai taian kataaki ake ti kaaitarai. Man te kakaonimaki i nanon te mwakuri n ibuobuoki rinanon Ana Mwakuri ni Kamaiu, ti kona n ata ae ti tangiria bwa tera ae E tangiria ao ni karaoa are ti karaoia ni kakabwaiaia koraki ake ti beku ibukiia n tei Ibukina. Ngkai ti beku Irouna n te tai ae maan ma te kakaonimaki, ti na bon bitaki. Ti kona n teimatoa n riki n ai Arona” (Henry B. Eyring, “Act in All Diligence,” Riaona, Meei 2010, 62–63).
Kairake aika Taan Buaka aika Uoua Tengaa (Uoua Tengaa Rorobuaka n Ataeinimwaane), iroun Arnold Friberg
Ongotaeka
Am mwakuri n ibuobuoki ngkai te mitinare bon reitan berita aika tabu are ko karaoia ma te Atua n te bwabetito ao i nanon te tembora. Ngkana ko karekei taian otenanti ni bwabetito ao te entaumente, ko a beritanaki bwa ko na kawakin Ana tua.
E reirei te Uea Beniamina, “I tangiria bwa kam na iangoa te kakabwaia ma te aro ni kukurei irouia ake a kaawakin ana tua te Atua. Bwa taraia, a kakabwaiaki ni bwaai ni kabane, n te maiu n rabwata ao n tamnei; ao ngkana a teimatoa ni kakaonimaki ni karokoa te toki ao a na butimwaeaki mai karawa, ao a na maeka ma te Atua n te aro ni kukurei ae aki totoki” (Motiaea 2:41).
Te ongeaaba n tuua bon kaotan te tangira ibukin Tamara are i Karawa ao Iesu Kristo (taraa Ioane 14:15). E taku Iesu, ”Ngkana ko kawakina au tua, ko na kabaeaki n au tangira, n aron ae I kawakina ana tua Tamau, ao e kabaeai n ana tangira” (Ioane 15:10).
Iriira te kanibaire i nanon: Kainibaire Ibukiia Mitinare n Riki Bwa Ana Reirei Iesu Kristo. Iriira naba aia reirei am beretitenti n am mition ao kainnabana ngkai a reirei nakoim i nanon te etieti.
Tamnei
Unimwaane Dale G. Renlund
“Te ongotaeka bon ara rinerine. E kamataata aio te Tia Kamaiu. Ngkai e taekinaki i nanon ana Rairairi Iotebwa Timiti man Ruka 14:28, Iesu e taku, Ngaia are, kawakina aei i nanomi, bwa kam na karaoi bwaai ake I reirei iai, ao n tua nakoimi.’ E bon rang bebete. … Ngkana ti karaoia, maiura n tamnei e na teimaan man korakora rikiraken tamaroana. Ti na totokoi bakataean bwaai n ibuobuoki are e anga te Atua ao man karaoan bwaai aika akea uaaia ao kawai n rairaki man kabuanibwai i nanon maiura” (Dale G. Renlund, “Constructing Spiritual Stability” [Brigham Young University devotional, Tebetembwa. 16, 2014], 2, speeches.byu.edu).
Kamatebwaian Koroboki aika Tabu
Tera ae ko kona n reiakinna ibukin taekan te ongeaaba man booki aika tabu?
Kristo ao Taan Akawa (Ko Tangirai Riki Nakoia Naakai), by J. Kirk Richardsiroun J. Kirk Richards
Te Baeten ibukin te Riki n Ai Aron Kristo
Baeten aikai a kona ni buokiko ni karikirakea ao ni karekea te anua ni maiu are a kabwarabwaraaki i nanon te mwakoro aei ao tabeua anua ni maiu ni kabwarabwaraaki i nanon koroboki aika tabu:
Kinaa te anua ni maiu are ko tangiria ni ukoria.
Korea kabwarabwaraan te anua ni maiu.
Karinani ao kamatebwaia kibuntaeka man koroboki aika tabu are e kaota katooto iaon anua ni maiu ke are a reireia taekana .
Korei am iango ao am namakin.
Katei kouru ao karaoi baire nakon te rikirake i nanon te anua ni maiu.
Tataro ibukin ana buoka te Atua ni karikirakea ao ni karekea te anua ni maiu aei.
Tuoa raoi rikirakem ni katoa tai.
Tamnei
Unimwaane Jeffrey R. Holland
“Te Uea e kakabwaiaiia koraki ake a tangiria ni kanakoraoa aroia, naake a butimwaea ni kainnanoi tuua ao ni kataia ni kawakini, ake a nano n raoiroin Kristo ao ni keiakina aia kabanea n tamaroa n aron are a na karekei. Ngkana ko bwaka ni karekean anne, n aroia naba tabeman, e mena ikanne te Tia Kamaiuni buokiko ni waaki nako. … IN te tai ae aki maan ko na karekea te tokanikai are ko ukoria” (Jeffrey R. Holland, “Ningabong te Uea E na Karaoa te Kamimi I Buakomi,” Riaona, Meei 2016, 126).
Am Kamatebwai
Kinai anua ni maiu man te mwakoro aei ke man koroboki aika tabu. Iriira te baeten are e a tibwa kabwarabwaraki bwa e na ota ao ukoukora te anua ni maiu anne.
Taraa aram iaon am taeki ni mitinare. E kanga ni kaokoro man are irouia taan mwakuri ake a bwainna kaain man kambana? Taraia raoi bwa uoua moan kakawakin mwakorona bwa aram ao aran te Tia Kamaiu.
Ko na kanga ni kanakoraoiko n tei ibukin te Tia Kamaiu bwa temanna Ana reirei?
Bukin tera e kakaawaki ibukiia aomata n raona aram ma te Tia Kamaiu n aanga aika a tamaroa?
Koroi am iango i nanon am tienero ni kamatebwai.
Kamatebwaian Koroboki aika Tabu
Rinanoa anua ni maiu ake a karinanaki i nanon koroboki aika tabu aikai. Koroi am namakin i nanon am tienero ni kamatebwai.
Kinaa te anua ni maiu i nanon te mwakoro aei. Bon titirakiniko:
N na kanga n reiakina riki taekan te anua ni maiu aei?
E na kanga ukorakin te anua ni maiu aei ni buokai n riki bwa te minita ae tamaroa n ana euangkerio Iesu Kristo?
Kakaei katooto n anuan maiun Kristo ni maiuiia mwaane ao aine i nanon koroboki aika tabu. Koroi am namakin i nanon am tienero ni kamatebwai.
Kakaei katooto n anuan maiun Kristo n taian katangitangi aika a tabu n te Ekaretia. Ngkai ko ukora te anua ni maiu, kamatenukuna taekan te anene n taromauri ke te anene are e kunea te kakorakora ao te mwaaka. Kaokioka ke anenea taekana i bon iroum ibukin te kairi mai ieta ao ni kaoa namakinan te tamnei.
Kamatebwai Ma Toam ao te Kaibibiti Toa
Kamatebwaia taeka ni kakoaua nakon anuan maiun Kristo i nanon te Gospel Library ke tabeua bwaai n ibuobuoki ake a kariaiakaki. Maroroakinna bwa e kanga mwakurian bwaai ake ko reiakin. Ko kona naba ni maroroakinna bwa tera ae ko a tia n reiakin i nanon am kekeiaki i bon iroum n aron Kristo.
Marooro ni Kauntira, Maungatabu n te Tioun, ao Marooro ni Kauntira ibukiia Taan Kairiiri n te Mition
Tabeua boong i mwain te kauntira ke maungatabu, tuangiia mitinare n tatabeman ni katauraoa te nimaua ni miniti i aon aia marooro n anuan maiun Kristo. Aanga te tai n tain te boowi ibukiia tabeman mitinare n tibwaua aia reirei.
Bwenauaia mitinare n aua te kurubu ao anganiia katabeaia aikai:
Tera kawai are Iotebwa Timiti e kamwakura ana onimaki iroun Iesu Kristo?
E kanga ana onimaki ni kataaki?
Tera ae e karaoia are kanga aron anuan maiun Kristo?
Ti na kanga n ira ana banna ni katooto Iotebwa Timiti?
Imwiin tiaia tain kurubu, ikotiia mitinare ao titirakiniia n tibwaia bwa tera are a tia ni marooroakin.
Taan Kairiiri n te Mition ao Kauntira n te Mition
Tuangiia mitinare bwa a ma wareka teuana man euangkerio ake aua i nanon te Nu Tetemanti 3 Nibwaai 11–28. Anganiia bwa ana mwaakenna bwa tera ae e karaoia te Tia Kamaiu are a na konaa ni karaoi.
Kabonganai katean kouru ao babaire n anga reirei n reireiniia mitinare taekan te mwakuri korakora. Kaotia bwa e kanga te mwakuri korakora ni katuruaki i aoia aomata bwa bon kaotan te tangira.
I nanon aia tai ni intawiu ke marooro, tuangiia mitinare ni reirei i aon anuan maiun Kristo are a ukoria.
Te Waaki Ni Kakukurei
Te kantaninga ibukin te waaki ni kakukurei aei bon buokakiia ni kinaa aroia ibukin rikiraken maiuia n tamnei. Wareki bwaai aika i nano. Iangoia bwa e kanga koauan rongorongo ibukim, ao rinei kaeka aika riai. Koroi am kaeka i nanon am tienero ni kamatebwai.
Akea ae e kona ni kaeka “tainako” ni katoai rongorongo. Rikiraken te maiun n Tamnei bon rinanoan te waaki ae maan. Anne teuana bukina bwa e bon kakukurei ao uaana—ibukina bwa iai taai n rikirake aika a aki konaa ni warekaki ao n rinanon taian kakabwaia n rikirake.
Kamweraoiko ma moan am waaki ae ko mena iai. Taua ma nanom nakon karaoan te mwakuri n tamnei are e kainanoa rikirakena. Ukoukora ana ibuobuoki te Atua. Ngkana iai kangabuakaam, karekea te kakoaua iroum bwa E na buokiko. Ngkana ko tataro, ukora kairam iaon anua ni maiu ake a katuruaki taratara iaona ni mwaitin te tai i nanon am mition.
Kiingin Kaeka
1 = aki
2 = tabetatai
3 = angin te tai
4 = e kuri ni katoatai
5 =katoatai
Te Onimaki
I kakoaua Kristo ao ni Butimwaea ngkai au Tia Kamaiu. (2 Nibwaai 25:29)
I namakinna ni koaua bwa E tangirai te Atua. (1 Nibwaai 11:17)
I onimakina te Tia Kamaiu n tau ni butimwaea Ana kantaninga ao ni karaoa te bwai are E tuangai. (1 Nibwaai 3:7)
I kakoaua bwa rinanon Ana Mwakuri ni Kamaiu Iesu Kristo ao mwaakan te Tamnei ae Raoiroi, I kona ni karekea kabwaraan au bure ao ni katabuaki ngkana I raira nanou. (Enoti 1:2–8)
Iai au onimaki bwa te Atua e ongo ao ni kaekai au tataro. (Motiaea 27:14)
I kakoaua bwa te bong teuana N na maeka ma te Atua ao n riki n ai Arona. (Ita 12:4)
Te Tangira ae Kororaoi ao te Tangira
I namakina nanou ae koaua ibukin te mweeraoi ae akea tokina ao kukureia tabeman. (Motiaea 28:3)
Ngkana I tataro, I bubuti ibukin te tangira ae kororaoi—ana tangira Kristo ae itiaki. (Moronaai 7:47–48)
I kataia ni kan oota n aia namakin tabeman ao n tarai bwaai man aia iango. (Iuta 1:22)
I kabwarai aia bure tabeman ake a tia ni kaunai ke bure nakoiu. (I-Ebeto 4:32)
I kawariia ma te tangira ni buokiia koraki ake a tiku n tii ngaiia, ikakorakora, ke bwarannano. (Motiaea 18:9)
Ngkana e riai, I kaota au tangira ao au tabeaianga ibukin tabeman man te mwakiuri n ibuobuoki nakoia n rinanon te taeka ao karaoan te mwakuri. (Ruka 7:12–15)
I taratarai anga ni buokiia tabeman. (Motiaea 2:17)