“Mwakoro 11: Buokiia Aomata ni Karaoi ao ni Kawakinan Motinnnano,” Tataekina Au Euangkerio: Te Kairi nakon Tibwaan ana Euangkerio Iesu Kristo (2023)
“Mwakoro 11,” Tataekina Au Euangkerio
Mwakoro 11
Buokiia Aomata ni Karaoi ao ni Kawakinan Motinnano
Iangoa Aio
-
E kanga kawakinan motinnano n irekereke ma te rairaki?
-
E kanga kawakinan motinnano n irekereke ma kawakinan berita aika tabu?
-
N na kanga n anga au kakao ni buokiia aomata bwa a na rikirake n te maiu n tamnei ao ni kakorakoraa aia onimaki iroun Iesu Kristo?
-
Bukin tera ngkai e kakawaki bwa ko na tibwaua am koaua ma nanom ae koaua?
-
Tera kakabwaia ae I kona ni beritanna?
-
N na kanga ni buokiia aomata ni kawakin aia motinnano?
Te rairannano, Motinnano, ao te Rairaki
Ngkai te mitinare ngkoe ao ana reirei Iesu Kristo, ko tangira kamaiuan tamnein te aomata (taraa Motiaea 28:3). Te Tia Kamaiu “iai mwaakana ni kamaiuia” naake a kawakin aia berita aika tabu ake a karaoi rinanon otenanti n te nakoanibonga, ni moanaki man te bwabetito (taraa 2 Nibwaai 31:19). Kanakoan te kakao ao ni buokiia aomata ni kawakin baike a kabaeaki iai e na buoka aron katauraoaia ibukin te bwabetito.
A kamaiuaki aomata ake a raira nanoia (taraa Ereman 5:11). Te rairannano bon te rairaki nakon Iesu Kristo ma te nano ae bwanin ao ni koaua. Te motinnanno bon te bwai ae rang kakawaki ni karaoan te rairannano. Ngkana ko kaoiia aomata bwa a na karaoi motinnano ae mwakoron am anga reirei, ko kaoiia bwa a na rairinanoia.
Te motinnano nanona rinean te kawai ae ko mwakuriia ao n toua mwiin te rinerine anne. Te teimatoa ni karaoan nanon koaua n te euangkerio e na kairiiri nakon te rairaki.
Te rairaki bon bitakin ana koaua te aomata, nanona, ao maiuna ni butimwaea a n iriira ana kantaninga te Atua. Bon te babaire ma te atatai bwa ko na riki bwa ana reirei Kristo. E riki te rairaki ngkana aomata a kamwakura aia onimaki iroun Iesu Kristo, a rairi nanoia man aia bure, a bwabetitoaki, a karekea ana bwaintituaraoi te Tamnei ae Raoiroi, ao n teimatoa n uaa te toki. Te Uea ao Ana burabeti a nanona te bitaki aei bwa te manga bungiaki n te tamnei (taraa Ioane 3:3–5; Motiaea 27:25–26).
Ana Mwakuri ni Kamaiu te Tia Kamaiu e kabebetea aron te rairaki, ao te Tamnei ae Raoiroi e uota te bitaki ae korakora aei n te nano (taraa Motiaea 5:2; Aramwa 5:12–14).
Te rairaki bon te waaki ae irianaki ma te mwakuri, tiaki te bwai ae riki. Buokakiia aomata bwa a na rairaki nakon Iesu Kristo e bon rangi ni kakawaki ibukin am mwakuri ni mitinare. N aron kairam mairoun te Tamnei, ko kaoiia aomata bwa a na karaoi motinnano are a na buoka rikiraken te maiu n tamnei ao n namakina ana kairoro te Tamnei ae Raoiroi inanon maiuia. Ngkanne ko boutokaiia aomata ni kawakinan motinnano ake a tia ni karaoi. Ko buokiia bwa a na mwakuri n te onimaki nakon te bitaki n te tai ae maan (taraa Motiaea 6:3).
Aomata ake a kawakin motinnano imwaain bwabetitoakiia bon ngaiia riki ake a karaoi ao ni kawakin berita aika tabu imwiina. Ngkana ko reireiniia aomata bwa a na kawakin motinnano ake ko tabeia iai, ko reireiniia bwa a na kawakin aia berita aika tabu. Karaoan ao kawakin berita aika tabu bon te mwakoro ae rangi ni kakawaki n ana euangkerio Iesu Kristo ao ana babaire te Atua ibukiia Natina.
Te mwakoro aei e kaairaki inanona kainibaire ibukin kanakoan taian kakao, kakabwaia ake a beritanaki, tibwauaan am koaua, ao ni buokiia aomata ni kawakin aia motinnano bwa aonga ni kona n nakon te Tia Kamaiu ao ni kamaiuaki.
Anga te Kakao
Ngkai te tia tei ngkoe ibukin Iesu Kristo, ko kaoiia aomata bwa a na Iriiria ao ni karekea te kimwareirei man Ana euangkerio. Ko anga kakao aika a onoti ibukiia bwa a na karaoi bwaai are a na karikirakea aia onimaki iroun Kristo. Ngkanne ko boutokaiia ni kawakinan aia motinnano ake a kabaeaki iai.
Kakao ao motinnano a kakawaki ni bukina aikai:
-
A buokiia aomata ni maiuakin reirei ake a reiakinaki iai bwa aonga n namakina ana kamatoa te Tamnei.
-
Kawakinan motinnano bon teuana te kawai ike aomata a kaota aron te rairannano (taraa Reirei ao Berita aika Tabu 20:37).
-
Te rairannano e buokiia aomata n namakina te rau ao te kimwareirei n ana kabwarabure te Atua. E na rikirake naba buokaia mairoun te Atua ibukin aia kangaanga.
-
Kawakinan motinnano e katauraoiia aomata ni karaoi ao ni kawakin berita aika tabu.
-
Ko kona ni kaota am tangira ibukiia aomata ao am onimaki n ana berita te Atua man buokakiia aomata ni kawakinan aia motinnano.
Kakao ae Kairaki iroun te Tamnei
Ukora ana kairi te Tamnei bwa tera te kakao are ko na anga ao ko na anga nningai. Iangoia tera te reirei ke te tua, ae mataata raoi, ae na buoka te aomata anne ni butimwaea am kakao. Te kakao ae eti ni bon taina raoi e kona ni kaungaia aomata bwa a na karaoi bwaai are a na karikirakea aia onimaki. Mwakuri aikai a kona ni kairiko nakon te bitaki n nano ae moan te korakora (taraa Motiaea 5:2; Aramwa 5:12–14).
Kakao ake ko anga a kona ni uarereke, n aron warekan te mwakoro man te boki ae tabu ke te roroko n te bootaki n toa. Ke a kona ni karekea te rikirake ngkana a tia ni bwabetitoaki. E na riai ni bootau te kakao ibukin te aomata are e waakina kawaina bwa e mena iaa tamneina teuanne ke neienne.
Kakao ake a reke man ana kairi te Tamnei a ibuobuoki ni buoka te aomata n karekea maiun tamneina (taraa 2 Nibwaai 28:30; Reirei ao Berita aika Tabu 93:12–13). Titirakiniko i bon iroum, “Baikara motinnano ake a kawakinaki iroun te aomata? Tera ae a na riai ni karaoia imwiina teuanne ke neienne bwa aonga n rikirake?”
Kakauongo irouia naake ko marooro mangaiia ke ko reireiniia. Man baike ko ongo ao n namakini, ukora ana kairi te Tamnei bwa baikara kakao ake a na kona ni buoka rikiraken temanna ma temanna nakon karaoan berita aika tabu.
Tuua n Anga Te Kakao
Kanakoan kakao e kainnanoa te onimaki iroun Iesu Kristo. Onimaki bwa E na kakabwaiaiia aomata ngkana a butimwaea ao n riirimwiin am kakao.
A na kona n ibitaki riki aomata ngkana ko kaoiia bwa a na mwakuri iaon koaua n te euangkerio ao ni buokia n noria bwa e kanga te bitaki anne ni kakabwaiaia. A na bon bitaki ni korakoran namakinan te Tamnei ao ni kimwareirei man maiuakinan ana euangkerio Iesu Kristo.
N te tai are ko reitaki ma aomata, n itaramata, ke n te aonraain, iangoia ba tera te kakao are e na kona ni buokiia ni kakorakora aia onimaki iroun Kristo ao n namakina te Tamnei. N tabetai aei e kona n bebete n aron manga kaitiboom riki mangaia ke n roroko n ana waaki ni kakukurei te Ekaretia.
Ngkai ko katauraoi n anga te reirei, iangoa kainnanon ao rikiraken temanna ma temanna. Kakoaua bwa n aron bairean am anga reirei e na iai inanona teuana ke e na mwaiti riki te kakao are e na buoka te aomata bwa e na rikirake.
Taraia raoi bwa ko na aki anga te kakao ae rangi ni mwaiti inanon teuana te tai. Te aomata e kainnanoa ana tai ni mwakuri, n rikirake, ao n reiakinaki man te kakao n tatabeua nako.
Bwaina te ninikoria ma ko na aki rang riaio ngkai ko kaoiia aomata ni karaoan taian motinnano (taraa Alramwa 38:12). Karinea aia rinerine aomata.
Kamatebwaian Koroboki aika Tabu
Bukin tera ngkai a kakaawaki taian motinnano?
Kakao ma te Akoi ao Te Taetae ae Mataata
N angin te tai ao te kakao e anga te aeka n titiraki ae “ko kona n”, are e kainnanoa te kaeka ae eng ke tiaki. Karaoa am kakao ae e akoi, e onoti, ao e mataata. A riai ni kaoia ke ni kairiia aomata nakon karaoan motinnano ake a kabaeaki iai bwa a na mwakuriia ma aia onimaki iroun Iesu Kristo.
E ngae ngke e taraa n onoti am kakao ibukin temanna ma temanna, iangoi katooto aikai:
-
Kaean te taromauri e anganiko te tai ao te tabo ibukim n taromauria te Atua ao n namakina Tamneina. E kona naba ni buokiko n riki bwa mwakoron te komunite ni boutoka ngkai ko karaoi bitaki ni kaaniko riki ma te Tia Kamaiu. Ko kona n iriira nakon te bootaki n toa n te Tabati aei?
-
Ngkai ti a tia ni maroroakina kakawakin kamatebwaian booki aika tabu, ko kona ni wareka [teuana te kibu ae onoti man te boki ae tabu]? Ko kona ni korei am namakin ke ngkana iai am titiraki? Ti kona ni maroroakina am iango ngkana ti a manga kaitibo imiina.
-
Ti a tia ni maroroakina maiun te Tia Kamaiu ao Ana tua. Ko kona n toumwiin Ana katooto man bwabetitoaki nakon Ana Ekaretia ao ni karaoi berita ma Ngaia? (Taraa “The Invitation to Be Baptized and Confirmed” ni mwakoro 3.)
-
Ko a tia ni kaotia ae iai inanom ni kan reitaki ma te Atua inanon maium. Ko kona n tataro ma te onimaki ni boong akana imwiina bwa ko aonga n namakini taian kakabwaia man te tataro?
-
Iai ara tamnei are ti taku bwa e na rangi n ibuobuoki nakoim. Ti kona ni kaotia nakoim ke ni kanakoa te ringke nakoim? Ko na mataku iai? Ti kona ni kawariko ningabong n nooria bwa tera am iango iai?
Ukora ana wirikiriki te Tamnei ae Raoiroi ngkai ko iangoi kawai aika a riai n anga te kakao ae akoi, onoti, ao ni mataata.
Oin am Kamatebwai ke Ibukim ma Toam
Inanon am tienoo ni kamatebwai, korea te kakao ae bebete, ae kaneineti, ao ni mataata ibukin motinnano n tatabeua nako akana inanon te reirei. Ngkana ko a tia ni karaoa te waaki ni kakukurei aei mai imwaaina, manga kaokia riki ao kabotaua am kakao aika a boou ma ake mai imwaaina.
Manga rinanon kakao ake ko a tia ni korei ma toam. Ngkanne maroroakin titiraki aikai:
-
Ti na kanga ni buokiia aomata bwa a na oota n ana kakabwaia te Uea ake e a tia beritani n irekereke ma te kakao aei?
-
Bukin tera ngkai e kakawaki te kakao aei ibukiu?
-
N na kanga ni buokiia aomata n namakina ana tangira te Atua ibukiia ngkai I anga te kakao?
-
N na kanga ni katamaroa riki au ibuobuoki ibukiia tabeman bwa a na mwakuri iaon kakao ake I anga?
Iangoa temanna are ko reireinna. Kataneiaiko anga kakao aikai n aron ae aongkoa ko taetae ma te aomata anne. Manga rinanon riki am kakao n aron ae kainnanoaki.
Kakabwaia ake a Beritanaki nakoia Aomata
E berita te Atua bwa E na kakabwaiaira ngkana ti kawakin Ana tua (taraa Berita aika Tabu 130:20–21). Aomata ake a kawakin tuua ao n teimatoa ni kakaonimaki “a kakabwaiaki ni bwaai ni kabane” ao a na “maeka ma te Atua n te aro ni kukurei ae aki totoki” (Motiaea 2:41).
Ngkai ko kaoiia aomata bwa a na karaoi aia motinnano, anga te berita ibukin taian kakabwaia ibukin kawakinan aia motinnano. Ko kona ni kinai kakabwaia aikai man kamatebwaian booki aika tabu, aia reirei burabeti ni boong aika kaitira, ao reirei ake inanon mwakoro 3. Iangoi naba kakabwaia inanon maium. Tataromwaaka baireia tera kakabwaia ake kona beritani nakoia aomata n tatabemaniia ngkai ko anga kakao aikai.
Ngkai ko kaoa te aomata bwa e na maiuakina te tua, anga reirei iaon aikai:
-
Te ongotaeka nakon tuua e kaota ara tangira ibukin Tamara are i Karawa ao Natina, Iesu Kristo (taraa Ioane 14:15).
-
Te ongeaba nakon tuua e bon kaota ara onimaki iroun te Atua (taraa Taeka n Rabakau 3:5–6).
-
E kakabwaiaira te Atua n te maiu n tamnei ao n rabwata (taraa Motiaea 2:41).
-
Ana kakabwaia te Atua ae te kabanea ni korakora bon te maiu ae akea tokina (taraa Reirei ao Berita aika Tabu 14:7).
-
Ngkai ti tataro ma nanora ni koaua ao ni mwakuri inanon te onimaki, e na buokiira te Atua ni kakoroi bukin bwaai ake E tuangiira bwa ti na karaoi (taraa 1 Nibwaai 3:7).
-
E kakoroa bukin Ana berita te Atua bwa e na kakabwaiaira ni kaineti ma Ana kawai ao Ana tai (taraa Reirei ao Berita aika Tabu 88:68).
Angin te tai aomata a rootaki n taian kakaitara ni kawakinan taian tua. Boutokaiia naake ko reireiniia, ao kakoaua nakoia bwa e na kakabwaiaia te Atua ngkai a kataia n ira nanon Ana kantaninga. Buokiia ni kamatataia bwa te kakaitara bon te tai n rikirake n rineia bwa ko na iriira Kristo e ngae ngke e rang kangaanga (taraa 2 Nibwaai 2:11, 13–16).
E reirei Unimwaane Holland, “Tabeua kakabwaia a waekoa n roko, tabeua a oimwi n roko, ao tabeua a bon aki roko; ma ibukiia naake a kawakina ana euangkerio Iesu Kristo, a roko” (“An High Priest of Good Things to Come,” Ensign, Nob. 1999, 38).
Kamatebwaian Koroboki aika Tabu
Tera ae a reiakinaki ni booki aika tabu aika a oti imwiina n nanon te Uea ni kan kakabwaiaira?
Am Kamatebwai
Wareka Reirei ao Berita aika Tabu 82:10 ao 130:20–21. Ngkanne kamatebwaai koroboki aika tabu aikai. Karaoi uoua te kaoram n am tienoo ni kamatebwai. N iterana teuana, korei tua ake ko kunei ni kiibu n tatabeua nako. Iaon are te iterana, korei berita ibukin kawakinan te tua.
Tibwaa Am Koaua
Tibwaa am koaua n te tai are ko anga am kakao ao berita ibukin kakabwaia. Kaotia bwa ko kanga n tia ni kakabwaiaki ngkai ko maiuakina te reirei are ko anga reirei iaona. Tibwaua am koaua bwa te reirei anne e na kakabwaia maiun te aomata ngkai teuanne ke neienne a maiuakinna.
Am koaua ae nako mai inanom e buoka ni karaoa te tabo ibukiia aomata are a na namakina ana kamatoa te Tamnei ae Raoiroi iaon koaua ake ko taekin. Aei e na kaungaia ni butimwaei kakao ake ko anga.
Ibukin rongorongona riki, taraa “Share Your Testimony” inanon mwakoro 10.
Buokiia Aomata ni Kawakin Aia Motinnano
Ngkana a butimwaea am kakao aomata n te bwai are a na karaoia, ririmwiina ni buokiia bwa a na kawakin aia motinnano. Ko buokiia aomata ni karikirakea aia onimaki iroun Kristo. Tabem bwa ko na kakorakora aia onimaki ao aia botumwaaka ni kateimatoa te rikirake bwa a na rairaki n ae bwanin. Ko na aki tii kaoiia aomata bwa a na bitaki, boutokaiia bwa na mwakuriia.
Aomata a na karekea ana kakoaua te Tamnei ngkai a kamwakura aia onimaki nakon te rairannano man kawakinan tuua. N taainako te kakoaua anne e aki kona n roko “ni karokoa ae e tia ni kataki moa [aia] onimaki” (Ita 12:6). Tai kubanako ngkana a kaoti kakaitara. Baireia bwa ko na kanga ni buokiia rinanon katakiia bwa aonga ni karekea ana kakoaua te Tamnei. A kona naba tabeman kaain te Ekaretia n anga aia boutoka.
N taainako aomata a namakina ana kairoro te Tamnei ngkana ko mena irarikiia. Katuruturua kakawakin te tataro, warekan booki aika tabu, ao n ririmwiin am kakao bwa aonga ni karekei namakin aikai ngkana a tiku ibon irouia.
Kawakinan motinnano a katauraoia aomata ibukin otenanti ao berita aika tabu ni kawain te rairaki ae teimaan. A kona ni buokaki man am kekeiaki “ni kaotia raoi man aia mwakuri” nanoia n iriira Iesu Kristo (Reirei ao Berita aika Tabu 20:37).
Te Baire ibukin te Reitaki ae Uarereke ni Katoa Bong
Moana am ibuobuoki nakoia aomata ni kawakinan aia motinnano man te moan tai are ko kawariia ao n reirei ma ngaiia. Tuangiia bwa a na korei aia motinnano iaon aia tareboon, karenta, ke te bwai are ko anganiia.
Titiraki ngkana ngkoe, ke te membwa are e ira buakon te waaki, e kona ni karaoa te reitaki ae uarereke ni katoa bong imarenan te roroko n anga reirei. Kamataata bwa oin bukin te reitaki aikai bwa e na boutokaiia, ao kabwarabwai tabeua kawai ae ko kona ni karaoia. Reitaki aikai bon te anga teuana ni kamwakura te reirei inanon Reirei ao Berita aika Tabu 84:106.
Bairea am anga n reitaki are e na rangi n nakoraoi, n aron te kakaawari ae uarereke, tareboon, tekiti, ke am rongorongo iaon bwaai ni kaongora. Rabakau aika a boou e anga baika ko na rinei ibukin kauring ao boutoka riki tabeua.
Kaungaiia ao Buokiia Aomata n Am Reitaki ni Katoa Bong
Ibukin kakao n tatabeua ake ko anga, korei taekaia n te Preach My Gospel app n ririmwiina n te bong are imwiina. Ngkai ko karaoa am baire n te bong are imwiina, ukora ana kairi te Tamnei ngkai ko maroroakinna bwa a na kanga aomata ni kawakin motinnano ake a kabaeaki iai.
Karaoa am reitaki ni katoa bong ma aomata n te aro ae tamaroa ao ni kaunganano. Tataro Ibukiia. Kaota am tangira ao am atatai ngkai ko buokiia ni kawakin aia motinnano. Kaekai titiraki ao buokiia bwa a na tokanikai iaon taian kangaanga. Ngkana e reke taina, kaai ni wareware mangiia man ana Boki Moomon. Tibwaa ana kaongora te Ekaretia aika a riai, n raonaki ma katangitang ake a katauraoaki man te Ekaretia are a na kona ni kaungaia iai. Bwaina te karinerine ibukin aia tai ao aia iango.
Kabwarabwaraiia bwa a na kinaaki irouia tabeman kaain te Ekaretia. Ngkana e riai, tuangiia membwa bwa a na buokiia aomata ni kawakin aia motinnano (taraa mwakoro 10).
Anga am taeka ni kamoamoaia aomata ake a tabe ni mwakuri ni kawakin aia motinnano. Buokiia bwa a na nooria e kanga ni kukurei nanon te Uea n aia kekeiaki. Aomata aikai a bitii maiuia, are e bon anaa te mwakuri ae mwaiti ao te tataonakinnano. Buokiia bwa a na kinai kakabwaia ake a karekei. Kaotam am onimaki bwa a kona n tokanikai.
Kaota naba am tangira ngkana a tuai kawakin aia motinnano aomata akanne. Anga am boutoka nakoia n am reitaki ni katoa bong. Te katooto, ngkana temanna ae butimwaea te kakao bwa e na wareka te mwakoro n ana Boki Moomon ma e tuai karaoia, anga nanom bwa ko na warekia mangaia. Buoka te aomata bwa e na kunea bwa man baike e rinanona ma aron kawakinan motinnano a kona ni kakabwaia maiun teuanne ke neienne.
E na kona n anaa aia tai aomata ae mwaiti ni kataia ni kawakina te motinnano, ao ko riai n kamwaita nanakom ni kawariia ni buokiia. Maroroakinna bwa a kanga n tokanikai iaon taian kangaanga ni kawakinan motinnano. Bwaina te taotaonakinnano ao ni boutoka, n aki tiribure ke ni motikitaeka.
Karekea ana kairi te Tamnei ae Raoiroi n am Reitaki ni Katoa Bong
Ngkana ko taorimwiia imwiin am reitaki ma aomata, tuangiia bwa a na tibwauai baike a rinanona n kawakinan aia motinnano. Titirakiniia tera ae a tia n reiakinna ao n namakinna. Aei e na buokiia ni kinaa ana kairi te Tamnei inanon maiuia ao ni buokiia n atai mwaneka ake imwiina.
Ngkai ko reitaki ma aomata ni katoa bong, teuana oin bukin tabem ae kakawaki bwa ko na kaoa te Tamnei ae Raoiroi bwa e na raoniia inanon maiuia. Buokiia bwa a na ataia bwa a na kanga n namakina te Tamnei ngkana akea ngkoe irarikiia. E riai am reitaki ni katoa bong ni kakorakora namakinan te tamnei are a namakinna ngke ko reireiniia. A na rairaki ngkana a namakina mwaakan ao ana kairoro te Tamnei ae Raoiroi.
Kaota te Tangira
Waakin te rairannano e bon boboto iaon katotongan anuan maiun Kristo (taraa 4 Nibwaai 1:15). Ukora te bwaintangira man te tangira ae kororaoi. Kaotia bwa te tangira ae koaua e kona ni buokiia aomata n namakina te Tamnei inanon maiuia. Ni kaotan am tangira a na buokiia naba iai ni butimwaei kakao ao ni kawakin motinnano are e na kairiia nakon te rairaki.
Ngkai ko tangiriia ao n reireiniia aomata, e na nano riki oin rairakim nakon te Tia Kamaiu.
Am ibuobuoki nakon rairakin te aomata temanna bon te mwakuri ae tabu. Ko na kunea te kimwareirei ae akea tokina ngkai ko kabanea nanom nakon te mwakuri aei bwa ko na beku ibukiia aomata (taraa Mataio 10:39; Motiaea 2:17; Aramwa 27:17–18; Reirei ao Berita aika Tabu 18:10–16).
Oin am Kamatebwai ke Ibukim ma Toam
Korei inanon te Preach My Gospel app am iango ake ko bairei ibukin am reitaki ni katoa bong ma aomata n tatabemaniia ake ko reireiniia. Moantaai karaoa am babaire ni baike ko na karaoi n ririmwiin am reitaki iaon temanna ma temanna.
Rinea teuana te kakao are ko na anga ngkana ko reireina temanna ma temanna. Ngkanne kinai tabeainga aika a kakaokoro are a na kona n totokoa temanna man butimwaean ke kawakinan te motinnano anne. Maroroakinna ao kataneiaiko bwa ko na kanga ni buokiia raoi aomata ngkai a mwakuri ni katoka aron te tabeianga anne.
Te Uea e Tangiriia Aomata bwa a na Roko ao n Tiku
E korakora mwiin te mwakuri ni mitinare ngkai a kataia aomata ni karaoa ao ni kawakina te motinnano ni maiuakina te euangkerio ao n tiku ni kakaonimaki n te Ekaretia inanon maiuia ae bwanin. E aki tau ibukiia bwa a na tii roko n te Ekaretia. E tangiria te Uea bwa a na roko ao a na tiku (taraa Ioane 15:16). Bairei am anga reirei ao am kakao ni kabane ni karokoa tokin anne. Ni karekei kakabwaia ni kabane ake e katauraoi Tamara are i Karawa ibukiia, a riai membwa ni maiuakina te euangkerio man kawakinan tuua ao berita aika tabu ake a tia ni karaoi ngkai a tiku ni kakaonimaki inanon te Ekaretia.
E reirei Nibwaai: “Imwiin touan te kawai ae eti man irariki aio, I kan titirakini ngkami bwa akea riki te bwai ae kam riai ni karaoia? Taraia, I taekina aio nakoimi, Tiaki; … kam waaki nako man teimatoa i nanon Kristo, …ao [ngkana kam] teimatoa ni karokoa te toki, ao taraia, e kangai ana taeka te Tama: E na reke iroumi te maiu ae akea tokina,” (2 Nibwaai 31:19–20).
Anga am kabanea ni kekeiaki ae tamaroa ni buokiia aomata bwa a na karekea “te maiu are akea tokina, are te bwai n tituaraoi ae moan te korakora mai i buakon ana bwai n tituaraoi nako te Atua” (Reirei ao Berita aika Tabu 14:7).
Iango ibukin te Kamatebwai ao Karaoana
Am Kamatebwai
-
Ataa te tua man reirei 4. Kakaei ao korei rongorongo man booki aika tabu ao aia taeka burabeti ni boong aika kaitira are a kabwarabwarai kakabwaia ake a beritanaki n irekereke ma te tua aei. Iangoi kakabwaia ake ko karekei man ongotaekam ni kawakina te tua aei, ao korei inanon am tienoo.
-
Ngkana ko reitaki ma am utu ke aomata tabeman, titirakiniia bwa a kanga n tia ni kakabaiaki n ongeaba ni kawakinan te tua ae onoti (te katooto, kawakinan te bong ae te Tabati n tabuia, ongeaba n tuan te kabwianibwai, ke kawakinan te tua are e kangaanga iroun te aomata are ko reireinna). .
-
Kaekai titiraki aikai ni buokiko n atai aanga ake ko na rikirake iai ngkana ko anga taian kakao. Karaoi babaire ibukin rikirakem.
-
A ataia aomata ake ko reireiniia ae I tangiriia?
-
Iai au onimaki bwa a na kakabwaiaki man karaoan nanon ara kakao?
-
I anga te tai ae riai ao nanou ni karaoa te reitaki ni katoa bong ma aomata ni buokiia ni kawakin motinnano ake a kabaeaki iai?
-
Aron bairean ara anga reirei iai inanona kakao aika a onoti aika a na karaoaki?
-
Kamatebwai ma Toam ao te Kaibibiti Toa
-
Rinanon kakao inanon teuana mai buakon aia reirei mitinare. Ibukin kakao n tatabeua nako, kaekai titiraki aikai:
-
Baikara kakabwaia are e a tia ni beritani te Uea nakoia naake a kawakina te motinnano aei?
-
E kanga te ongotaeka n te tua aei ni buokiia aomata ni karikirakea aia onimmaki ao aia koaua?
-
E kanga te motinnano aei ni buokiia aomata n rairinanoia ao ni kai namakina te Tamnei?
-
-
Man am bwai ni mwakuri ni karaoan am babaire, korei karinani araia aomata ake ko a tia n reitaki mangiia uoua te bong n nako. Kairiia naake ko reireiniia ao membwa.
-
Ibukin temanna ma temanna, korei kakao ake ko anga ao motinnano ake a tia ni karaoi.
-
Iangoia tera kakao ake ko a kaman tia n anga.
-
Maroroakinna bwa bukin tera ngkai ko kona ni karekei motinnano mairouia aomata aikai ma tiaki mairouia tabeman.
-
Tera ae ko na karaoia n ririmwin kakao aikai?
-
Marooro ni Kauntira n te Mwakoro, Maungatabu n te Tioun, ao Marooro ni Kauntira ibukiia Taan Kairiiri n te Mition
-
Maroroakin iango aika a nakoraoi man kakauiango ibukin am reitaki ni katoa bong ma aomata ake ko reireiniia. E kanga aroia mitinare ni mwakuri ma membwa n te aro ae nakoraoi? Tera ae boretiaki ke bwaai ni kaongora aika a maiu man te iti ae a bongana? Tera ae ko na kona ni karaoia ngkana akea aomata n aia auti ke a tabetabe ni kaitibo ma ngkoe?
-
Maroroakin kawai ike mitinare a reiakini tuua n te aro ae nakoroi inanon reirei 4.
Taan Kairiiri n te Mition ao Kauntira n te Mition
-
N angaraoina, raoniia mitinare ngkana a na anga reirei. Buokiia bwa a na kabanei nanoia iaoia aomata ni karaoi ao ni kawakin motinnano ake a kabaeakii ai.
-
Kaungaiia taan kairiiri n te nakoanibonga n te uoote, ao membwa bwa a na karaoi aia reitaki ma aomata ni katoa bong ma aomata ake a reireinaki irouia mitinare—ngkana aomata a kariaia te reitaki aei.