Mwakoro 13: Katiteuanaaki ma Taan Kairiiri ao Membwa ni Katea te Ekaretia
“Mwakoro 13: Katiteuanaaki ma Taan Kairiiri ao Membwa ni Katea te Ekaretia,” Tataekina Au Euangkerio: Te Kairi n Tibwaan ana Euangkerio Iesu Kristo (2023)
“Mwakoro 13,” Tataekina Au Euangkerio
Tamnei
Ongo Irouna, iroun Simon Dewey
Mwakoro 13
Katiteuanaaki ma Taan Kairiiri ao Membwa ni Katea te Ekaretia
Iangoa Aio
N na kanga ni mwakuri ma taan kairiiri n te uoote ao membwa ni katea te Ekaretia?
Tera tabeia taan kairiiri n te titeiki ao uoote ibukin te mwakuri ni mitinare?
Tera ae na karaoaki inanon te boowii ibukin te reitaki ni mwakuri ma taan kairiiri n te uoote?
N na kanga ni butokaia taan kairiiri n tibwauaan te euangkerio ao ni kakorakoraia membwa aika boou ao ake a manga tibwa okira te ekaretia?
Mitinare a mwakuri ma taan kairiiri n te tabo ao membwa bwa a na kakaeia aomata ake a na reireinaki ao ni kairiia nakon te Tia Kamaiu. Ko katiteuanaaki man am tangira ibukin te Atua ao Natina. E na kakorakora am konabwai n te aro are ko na mwakuri inanon te katiteuanaaki ma taan kairiiri n te tabo ao membwa. Karaoa am beku ma ngaiia bwa mwakoron am kouru ao am baire ae moan te kakawaki.
Ngkai ko a moanna ni kinaia ao n tangiriia taan kairiiri n am tabo ao membwa, ko na noori kawai ake ko na kona ni boutokaiia iai n nakoaia ao n aia kekeiaki mitinare. Anga am bwaintituaraoi ao am tarena n aanga are na uotiarake iai ao ni kakorakoraki.
Te mwakoro aei e kabwarabwara bwa ko na kanga ni mwakuri ma membwa n tibwaa te euangkerio ao ni kakorakoraia membwa aika boou ao ake a manga tibwa okira te ekaretia. Ibukin rongorongona riki, taraa mwakoro 23 man te Aeniboki ni Kabuta.
Oin am Kamatebwai ke Ibukim ma Toam
Manga rinanoa rairakin te Uea are Ramonaai, kainnabana, ao ana aomata inanon Alma 18–19.
Tera taben Abiti n te rairaki aei? Tera ae kona ni karaoia ae aki kona ni karaoia Amon?
Tera ae ko reiakinna man ana katooto neienne ibukiia membwa ao mitinare ake uaia n ikarekebai ni karaoa te mwakuri?
Iangoi aia katooto membwa riki tabeman n ibuobuoki n te mwakuri ni mitinare:
Ko na kanga ni kaungaia taan kairiiri ao membwa n ira aia katooto?
Karikirakea am Reitaki ma Taan Kairiiri n te Tabo ao Membwa
Taan Kairiiri n ana Tabo te Ekaretia ao Membwa bon raom inanon ana mwakuri te Atua. Karaoa am reitaki are e na buokiko ni kaai ni mwakuri n uota te Ekaretia nakoia natin Tamara are i Karawa. A kona reitaki aikai ni kakabwaiako ni karokoa tokin maium.
Karaoa te onimakinaki ao te iraorao ae koaua ma taan kairiiri n te tabo ao membwa. Kakawari ma ngaiia ao reiakina rongorongoia aia utu, aroia, te bwai are a tatangiria, ao waaki ake a tia n rinanona n te Ekaretia. Bwaina te kokoua ma nanom n tangiriia.
Ngkana ko kawariia, karaoia n iai bukina. Kaota ingaingan nanom ni kabaeaki n te mwakuri n te kakae ao n te anga reirei. Karinea aia tai ao aron nako aia babaire.
Ngkana ko kaitibo ke ko reia te euangkerio inanon mweengaia, ukori aanga n ibuobuoki ni kakorakora aia onimaki. Ukeuke ma te tataromwaaka bwa ko na raonaki iroun te Tamnei. Tibwai baike ko a tia n rinanona ma te mwakuri ni mitinare n am aono.
Tamnei
te boowi n te kurubu
Boutokaia Taan Kairiiri n te Tabo n aia Beku
Tabeua wewete n te nakoa ni kairiiri iai mwioko ibukin te mwakuri ni mitinare. Ataakin mwioko aikai a na buokiko ni boutokaia taan kariiri. Kabwarabwara aikai a reke man mwakoro 23 inanon te Aeniboki ni Kabuta.
Beretitenti n te titeiki: E taui kiingin te nakoanibonga n te titeiki ibukin tibwauaan te euangkerio ao kakorakorakiia membwa aika boou ao ake a manga oki. Ngaia ao ana kauntira a aanga te kairiiri ni kabane ni waaki aikai.
Bitiobiriki: E babaire ma te kooram n unimwaane ao beretitentii n te Bootaki n Aine ngkai a kaira ana mwakuri te uoote n tibwaua te euangkerio ao ni kakorakoraia membwa ake a boou ao ake a manga tibwa okira te ekaretia.
Te kooram n Unimwaane ao beretitentii n te Bootaki n Aine: A kaira ana mwakuri te uoote n te bong teuana ma teuana n tibwaa te euangkerio ao ni kakorakoraia membwa ake a boou ao ake a manga tibwa okira te ekaretia. A uaia ni kairii mwakuri aikai ma kauntiran te uoote, iaan ana baaronga te bitiobi. Taraa Aeniboki ni Kabuta, 8.2.3 ao 9.2.3.
Te tia kairiiri n te mition ibukin te mition n te uoote (ngkana e weteaki): E kaira aia mwakuri membwa n te uoote ao taan kairiiri, mitinare n te uoote, ao mitinare ake a bwanin aia tai. Ngkana e aki weteaki te tia kairiiri aei, te membwa n aia beretitentii te kooram n unimwaane e na tararua moa te nakoa aei. Taraa Aeniboki ni Kabuta, 23.5.3.
Katoa tai titirakiniko ibon iroum, “I riki bwa te kakabwaia nakoia taan kariiri n te tabo?” Karikirakea te anua ae “N na kanga n ibuobuoki?”
Kamatebwai ma Toam
Bairea am tai n nako ni kawara te tia kairiiri n te uoote. Titiraki bwa ko na kanga ni boutoka raoi teuanne ke neienne. Karaoa am babaire ibukin rikirakem.
Tamnei
bowiin kauntira
Boowi ni Babaire Ni Katoa Wiiki
Te reitaki ni babaire ma taan kairiiri n te tabo—n ikotaki ma taan kairiiri ibukiia te roronrikirake—e kakawaki ibukin te katiteuanaaki inanon am mwakuri ni mitinare. Ngkana e weteaki te tia kairiiri n te mition n te uoote, e na kairii boowi ni babaire aikai. Ma ti, te membwa n aia beretitentii te kooram n unimwaane are bonomwi n te nakoa aei ae na kairia.
Inanon boowi aika a uarereke, ao ni baireaki, ngkoe ma taan kairiiri n te tabo kam na bairea aron te mwakuri n tibwaua te euangkerio ao ni kakorakoraia membwa aika a boou ao ake a manga tibwa okira te ekaretia (taraa Aeniboki ni Kabuta, 23.5.7). A kona ni karaoaki boowi aikai n te itaramata ke ni kabonganaan bwaai n rabakau aika maiu man te iti. Te reitaki n aron waakin babaire e kona naba n riki n aanga riki tabeua inanon te wiiki, n ikotaki ma tareboon, tekiti, ao imeeri.
Tamnei
Unimwaane Quentin L. Cook
“Te konabwai n te katiteuanaaki ni mwakuri ao oin te taratara ike waakin aia babaire ma aia katei kouru mitinare e na bootau ma ana baire te uoote ke te mwaanga ao e kona n rangi n ibuobuoki te katei kouru ni kakoroa nanon te mwakuri ibukin Ikotakin Iteraera” (Quentin L. Cook, “Purpose and Planning,” mission leadership seminar, Tuun 25, 2019).
Katauraoi ibukin te Boowi iaon Waaki ni Babaire ni Katoa Wiiki
Kaota am boutoka nakoia taan kairiiri n te uoote man rorokom ni kaea te boowi ni katoa wiiki. Imwaain te boowi, karekea am tai inanon am tai ni kamatebwai ma toam ni maroroakinna bwa ko na kanga n iri n te aro ae nakoraoi.
Kakabooui baike ko korei mwiia n te Preach My Gospel app bwa aonga taan kairiiri n reke aia rongorongo aika ngkai ibukiia naake ko mwakuri mangaiia. Katauraoi n anga am ribooti iaon taian mwioko ni boowi ake mai imwaaina.
Katauraoi ibukin Boowi iaon Waaki ni Babaire ni Katoa Wiiki
Boowi iaion waaki ni babaire ni katoa wiiki e boboto iaon kainnanoia aomata. N tain te boowi, anga ngkoe bwa ko na kanga ni boutokaia kaain te uoote, n ikotaki ma te roronrikirake, n ibuobuoki ni karekei kainnanoia aomata.
Te boowi iaon waaki ni babaire ni katoa wiiki a katerea aua atuun reirei aikai:
Ti na kanga ni buokiia naake a tia n reireinaki? Bwaai ake a kona ni maroroakinaki:
Antai membwa ake a kona n ira waakin te angareirei n te wiiki ae na roko? Antai ae na kaoiia aika a na iri?
Tera kakaewenako ibukiia naake a tia n reireinaki? A na kanga membwa n ibuobuoki?
Tera kainnanoia naake a tia ni baireaki aia tai ni bwabetito? E a tia te baire ibukin te bwabetito? (Taraa “Te Mwakuri n te Bwabetito” inanon mwakoro 12.)
Ti na kanga ni buokiia naake a tibwa tia n bwabetitoaki n te tai ae nako? Bwaai ake a kona ni maroroakinaki:
Antai membwa aika a boou inanon aia moan ririki ni kaaina te aro ae a roroko n te bootaki n toa? Ti na kanga ni buoka temanna are e aki roroko?
Antai membwa aika a boou ae iai raoraoia n te uoote? E na kanga te mwakuri n ibuobuoki nakoia tarira ao mwaanera ni bongana? E na kanga te kooram ibukiia te roronrikirake ao taian kiraati n ibuobuoki?
Antai te membwa ae boou ae iai mwiokoana ke nakoana?
Ti na kanga ni buokiia membwa aika a boou bwa a na moana aia kakae ibukiia aia bakatibu ake a tia ni mate bwa aonga ni karaoaki otenanti n te tembora ibukiia? Membwa aika a boou iai aia beeba ni kariaia nakon te tembora? Ngkana iai te tembora ae uakaan, ti na kanga ni buokiia bwa a na nako n te tembora ni karaoa te bwabetito ibukiia aia bakatibu aikai?
Tera te reirei man mwakoro 3 ae riai ni manga reiakinaki riki? A na kanga membwa n ira buakon te waaki?
Manga rinanoa Kawaiu iaon te Berita rikiraken temanna ma temanna te membwa ae boou.
Ti na kanga ni buokiia membwa ake a manga tibwa okira te ekaretia? Bwaai ake a kona ni maroroakinaki:
Antai ae tii ngaia kaain te aro mairouia ana utu ae a kona ni kawaria mitinare ao n reireinna?
Antai membwa ake a manga tibwa okira te ekaretia ake a kona ni kawaria mitinare ao n reireiniia?
Antai membwa ake a manga tibwa okira te ekaretia ae iai raoraoia n te uoote ma tibwangaia aika tau ni karaoa te beku?
Ti na kanga ni buokiia membwa aikai?
Ti na kanga ni kakaeia riki aomata aika a na reireinaki? Bwaai ake a kona ni maroroakinaki:
Ti na kanga ni buokiia aomata, n ikotaki ma te roronrikirake, ao utu ni maiuakin reirei iaon te tangira, tibwatibwa, ao te kakao? (Taraa “Katiteuanaaki ma Membwa” inanon mwakoro 9.)
Ti na kanga ni buokiia membwa, n ikotaki ma taan kairiiri n te Moanrinan, ni kaoia raoraom nakon ana waaki ni kakukurei te Ekaretia?
Kamatebwai ma Toam
Mataku n tamnein te boowi iaon waaki ni babaire inanon te Aeniboki ni Kabuta, 23.5.7. Tera ae ko reiakinna ae ko na kona ni karaoa nanona n te boowi ni baibaire ae katoa wiiki are imwiina? Ko na kanga ni katauraoiko raoi ni maroroakin kainnano ao ni babaire ma taan kairiiri n te uoote? N ami tai ni boowi n are imwiina, katei taian kouru bwa ko na kanga ni kariikirakea arom.
Boutoka ana Baire te Uoote ibukin Tibwaan te Euangkerio
Te kauntira n te uoote e karaoi baire aika a bebete ibukin tibwauaan te euangkerio (taraa Aeniboki ni Kabuta, 23.5.6). Ko na ataa te baire aei. N tain boowi iaon waaki ni babaire, kakaei kawai are ko na buokiia taan kairiiri bwa a na mwakuri iaon aia kouru. Teimatoa n kaongoia taan kairiiri ibukin baike ko karaoi bwa ko na boutokaiia membwa ibukin tibwaan te euangkerio.
Ngkana ko kaoaki bwa ko na ira te boowi ni kauntira n te uoote, katauraoiko raoi n anga te marooro ae uarereke ae boou iaon rikirakeia naake ko reireiniia ao ngkana iai mwioko aika ko karekei (taraa Aeniboki ni Kabuta, 29.2.5). Taraa te tibwanga aei bwa te tai ni karikirakea te onimakinaki ao aia onimaki taan kairiiri n te uoote.
Tamnei
aomata aika a iobai ni kamauri
Kataneiako ma Kainnanoia kaain te Aono n am Tabo
Iai kainnanon te uoote ao te mwaanga ae onoti ae ko riai n taneiai iai. Ko kona ni mwakuri n te mwaanga ae karako kaaina ke n aia uoote kairake n ikawai aika a tuai n iein, ke ko kona ni mwakuri ni uoote aika a mwaiti. Tabeman taan kairiiri e mwaiti baika a tia n rinanona ao tabeman e karako. Tabeman taan kairiiri e mwaiti te tai ae aki tabetabe iai nakoia ake tabeman.
Kakaei aanga are ko na buokiia iai taan kariiri. A na bae ni bubutiko bwa ko na ibuobuoki ni boutokaia membwa inanon mwiokoaia ibukin karaoan aia mwakuri n ibuobuoki. A na bae ni bubutiko bwa ko na kaungaia membwa aika a boou ni kaoiia raoraoia bwa a na iri n taromauri. Ko kona n anga am atatai aika a boou ibukin te mwakuri ni mitinare ngkai taan kairiiri ao membwa a reiakin kawai n tibwaa te euangkerio.
N te tabo are e rangi n taara ni boou iai te Ekaretia, a na bae ni butiko taan kairiiri n te mwaanga bwa ko na buokiia membwa aika a boou ni kamatataia bwa e kanga te Uea ni katea Ana Ekaretia.
E na taraa ni kaokoro am mwakuri ma taan kairiiri n taabo aika a kakaokoro, ma waaki aikai a rangi ni kakawaki ibukin kakabwaiakiia aomata ao katean ana Ekaretia te Uea.
Buokiia Membwa ao Taan Kairiiri n Tangira, Tibwatibwa, ao ni Kakao
Kaungaia membwa bwa a na tibwaua te euangkerio n arona ae riai ao ae ti taneiai iai. Te Aeniboki ni Kabuta e anga kaetieti ao witea ni buokiia membwa ao taan kairiiri ni karaoa aei man maiuakin reirei ibukin te tangira, tibwatibwa, ao te kakao (taraa Aeniboki ni Kabuta, 23.1.1, 23.1.2, and 23.1.3). Katikui reirei aikai inanom ngkai ko mwakuri ma taan kairiiri.
Ko na riki bwa te kakabwaia nakoia taan kairiiri ngkai ko boutoka aia kekeiaki inanon te mwakuri aei. N onean mwiin anne, aia banna ni katooto a kaungaaki riki iai nanoia membwa n tibwaua te euangkerio ao ni kakorakoraia membwa aika a boou ao ake a manga tibwa okira te ekaretia.
Taraa “Katiteuanaakia ma Membwa” inanon mwakoro 9 ibukin iango iaon boutokakiia membwa n aia kekeiaki n tibwaua te euangkerio.
Kamatebwaian Koroboki aika Tabu
Kamatebwai kiibu aikai. E kanga te Tia Kamaiu ao ana reirei aikai n tangiria, n tibwatibwa, ao ni kakao? Baikara mwakuri aika kaungaaki man katooto aikai inanon am anga reirei? Ko na kanga ni buokiia membwa n tibwaa te euangkerio n arona ae riai ao ae ti taneiai iai?
Ni katoa te tai are ko kamatebwai iai, korei mwiin baike ko reiakin.
Tamnei
a kakarabakau mwaane
Boutokaia Taan Kairiiri n te Tabo ni Kakorakoraia Membwa aika a Boou
Ngkana a bwabetitoaki ao a kamatoaki aomata, a riki bwa taan “buokan-aba ma ake a itiaki, ao ana utu naba te Atua” (I-Ebeto 2:19; taraa naba 1-Korinto 12:12–27). Mwakuri ma taan kairiiri n te tabo ni buokiia membwa aika a boou ni “kamwarakeaki n ana taeka te Atua ae raoiroi, bwa a na waaki n te kawai ae eti, … n ti onimakina ana mwakuri aika a raraoi Kristo” (Moronaai 6:4).
Tamnei
Unimwaane Ulisses Soares
“Aomata aika a boou ake a rairaki nakon te Ekaretia a roko ma ingaingan nanoia ibukin baike a kunei. Ao ti riai ni karikirakeia iaon te iangainga n nano anne. … A kona mitinare n ibuobuoki ni kabwarabwara ao n reitiia aomata ake a reireiniia ao ake a boou ake a rairaki ma membwa aika a kakaonimaki ake are a na kona ni karoko irouia, n ongora irouia, ni kairiia, ao ni butimwaiia naba nakon te taromauri imwaain ae a bwabetitoaki. … Ngkai ti [buokiia] naake a rin n te tabo ni bwabetito, ti na nooria riki natin te Atua n teimatoa n uaa te toki ao ni karekea te maiu are akea tokina” (Ulisses S. Soares, “Convert Retention,” mission leadership seminar, Tuun 25, 2018).
Buokiia Membwa aika Boou n Ira te Bootaki n Toa
Iai tabem ae moan te kakawaki ni buokiia membwa aika a boou bwa a roko ni kaea te taromauri. Mwakuri ma taan kairiiri ni kakoaua raoi bwa kam buokia bwa e na roko. Te bwai ae kakawaki e kaota ana tai n roroko te membwa are e boou n te bootaki n toa e kona ni buokiko ao te tia kairiiri n te uoote n ataia bwa teuanne ke neienne a kainanoa riki te mwakuri ni kaunga nano.
Membwa aika a boou kanga taraan ae a teimatoa n roroko n te bootaki n toa ao ni kana te toa ngkana iai raoraoia n te uoote. Buokiia bwa a na namakinna ae bon ngaiia kaaina, ai moarara riki inanon aia moan ririki ni maiuakina te euangkerio. (Taraa Reirei ao Berita aika Tabu 84:106, 108.)
Manga moan anga riki te reirei n mwakoro 3
Buokiia membwa aika a boou ni kakorakora aia onimaki iroun te Tia Kamaiu Iesu Kristo ao Ana euangkerio. Koaua ao reirei man te euangkerio a kamatoai waakaaia membwa aika a boou ngkai a teimatoa n reirei mairoun te Tamnei.
Imwiin te kamatoa, manga reireiniia riki aia reirei mitinare. Ko riki bwa te tia kairiiri n te anga reirei. E ngae n anne, ikarekebai ma taan kairiiri n te uoote bwa aonga mitinare n te uoote ke tabeman riki membwa n ira buakon te waaki. Manga kaokan riki te reirei inanon mwakoro 3 bon te anga ae tamaroa ni buokiia membwa aika a boou ni “kamwarakeaki n ana taeka te Atua” (Moronaai 6:4). Ngkai ko anga reirei, kaungaia membwa aika a boou bwa a na kawakin motinnano ake a kabaeaki iai inanon reirei aikai.
Wareki booki aika tabu ma membwa aika a boou, ai moarara riki ana Boki Moomon, ao anga te reirei iaon reirein te euangkerio. Buokiia bwa a na tibwaa te euangkerio ma raoraoia ao aia utu. Iai kainnanoia membwa ae onoti n tatabemaniia nako, ao ko kona ni buoka teuanne ke neienne n namakinna bwa e tangiraki ao ni butimwaeaki.
Te Covenant Path Progress Report ao My Covenant Path
Iai bwaai n ibuobuoki irouia taan kairiiri n te tabo ibukin aia kekeiaki mitinare n ai aron ae ko a tia ni karaoia. Teuana mai buakon aikai bon te Riiboti iaon te Covenant Path Progress, e kuneaki n te Member Tools app ke te Leader and Clerk Resources. Te ribooti aei e anganiia taan kairiiri n te aba te kariaia ni kona n noori taneiai aika a kakawaki are e kainnanoia te aomata ni kateimatoa rikirakena ni kawain te berita imwaain ao imwiin te bwabetito.
My Covenant Path bon te bwai n ibuobuoki bwa e na buokiia membwa aika a boou ni “kamatoa atinroon [aia] onimaki iroun Iesu Kristo ao n namakinna ae kanga bon mweengaia te Ekaretia” (My Covenant Path, iv). E kabwarabwarai waaki ni kakukurei ao tibwanga nakoia membwa aika a boou, n aron rongorongon te utu ao ni buokiia bakatiku ake a tia ni mate ni karekei otenanti aika tabu inanon te tembora. Kaungaia kaain te tabo bwa a na kairiia membwa aika a boou rinanon taneiai aikai. Anga te boutoka n aron te bubuti.
Oin am Kamatebwai ke Ibukim ma Toam
Kamatebwaia My Covenant Path. Tera ae ko reiakinna ibukin am beku ni buokiia membwa bwa a na kakorakoraia aika a boou aika a tibwa rairaki? Ko na kanga ni boutoka ana kekeiaki te kauntira ni uoote? Ni katoaa te tai are ko kamatebwaia te mwakoro aei, korei mwiin baike ko reiakin.
Boutokaia Taan Kairiiri n te Tabo ni Kakorakoraia Membwa aika a Boou
Tabeman membwa a rineia ni katoka iriiran waakin te Ekaretia. Taan kairiiri n te tabo ao membwa tabeman a kataia ni kamatoa aia reitaki mangaiia ao ni kawariia ni buokiia. E taku te Tia Kamaiu:
“Ma kam na aki toki n ibuobuoki nakon ae aekan aei; bwa kam aki ataa te tai are a na rairaki iai man rairananoia, ma ni kawarai ma nanoia ni kabane, ao N na katoka aorakiia; ao kam na riki bwa taan uota te kamaiu nakoia” (3 Nibwaai 18:32).
A kona taan kairiiri n te aba ni butiko bwa ko na ibuobuoki ni karikirakea aia onimaki membwa ake a oki. N taainako mwioko aikai a kaairaki naba iai membwa ake tii ngaiia kaain te aro mai buakoia aia utu. Iangoia ma te tataromwaaka bwa ko na kanga ni kaoa te Tamnei nakon mweengaia membwa ake a manga tibwa okira te ekaretia ngkai ko reireiniia reirein te euangkerio ao ni kaoiia bwa a na mwakuriia. Kaota am namakin n akoi ao n nanoanga ibukin tabeaiangan nanoia.
Ngkana a kaoti kangaanga, reireia te euangkerio nakoia kaain te bata ake a tuai ni bwabetitoaki. Am tangira ma am boutoka a kona ni kakorakora riki aia onimaki iroun Kristo ao ni karikirakea nanoia ni karaoi ao ni kawakin berita aika tabu.
Ikarekebai ma taan kairiiri n te tabo ngkana ko mwakuri ma membwa ake a manga tibwa okira te ekaretia. Konabwai aikai a na iai mwiia ae teimaan iaoia aomata ao kaain te taromauri n te tabo.
Kamatebwaian Koroboki aika Tabu
Tera ae anga reirei Iesu Kristo iaona ibukin buokaia naake a rootaki?
Aramwa ao Amureki a reireiniia aomata aika a mwaiti ake a bwaka man te Ekaretia. Tera ae ko reiakinaki man baike a rinanona ibukin kakorakorakiia membwa ake a manga oki?
Kabongana te Preach My Gospel app ni karaoi babaire ni maroro ma membwa aika a boou ao aika tibwa manga oki ake a biti maiu ao n roroko n taromauri. Tera ae a rangi ni buokaki riki iai? N am tienoo ni kamatebwai, korei am iango ibukin baike a rinanona. Tera ae ko reiakinaki are e na buokiko ni mwakuri ma naake ko reireiniia n te tai aei?
Wareka ao maroroakina mwakoro 23 inanon te Aeniboki ni Kabuta. Ko na kanga ni boutokaiia taan kairiiri n te tabo inanon mwiokoaia?
N tain boowi ibukin waaki ni babaire ni katoa wiiki, titirakiniia taan kairiiri n te uoote ngkana iai membwa ake a manga tibwa okira te ekaretia inanon am aono ae a tangiria bwa ko na kawariia n te wiiki aio. Ngkana ko kawariia, ukoria ni kakorakora aia onimaki iroun Iesu Kristo.
Kinaia bwa antai ae a bane n tia ni bwabetitoaki ao ni kamatoaaki n ririki aika nako. Rinanoa ana rekooti temanna mai buakoia ao maroroakinna inanon te boowi ibukin waaki ni babaire ni katoa wiiki bwa ko na kanga ni mwakuri ma taan kairiiri ni buoka te aomata aei. Korei am iango ao am kaoti n te Preach My Gospel app. Kaokioka aei ibukiia ake a tibwa rairaki inanon am aono.
Marooro ni Kauntira n te Mwakoro, Maungatabu n te Tioun, ao Marooro ni Kauntira ibukiia Taan Kairiiri n te Mition
Kaoa te bitiobi ke temanna te tia kairiiri n te uoote bwa e na maroroakina taekan kakorakorakiia membwa aika a boou ao ake a manga oki. Titirakina te aomata aei bwa e na katereterea raoi bwa a kanga aroia mitinare n ibuobuoki.
Maroroakina taekan te taetae ni kaikonaki ibukin te tiibu ae bua, te mwane ae bua, ao te nati ae bakatae (taraa Ruka 15). Kaoiia mitinare bwa a na tibwai baike a reiakin ao a kanga ni maiuakinna n aia mwakuri ni mitinare.
Taan Kairiiri n te Mition ao Kauntira n te Mition
Mwakuri ma taan kairiiri n te tabo ni kaungaiia bwa a na buokiia membwa aika a boou:
Katabuaki nakon te nakoa n te nakoanibonga (ibukiia mwaane n te ririki ae riai).
Mwiokoaki n riki bwa taari mwaane n ibuobuoki (ao taari aine n ibuobuoki ibukiia aine).
Karekea te beeba ni kariaia nakon te tembora ao ni bwabetitoaki n te tembora ibukiia aia bakatibu ake a tia ni mate.
Katauraoa araia aia bakatibu ake a tia ni mate ni uotia nakon te tembora .
Karekea mwiokoam ke nakoam bwa ko na beku n aia uoote ke mwaanga.
N am reitaki n ikarekebai ma te beretitenti n te titeiki, reireiniia taan kairiiri n te tabo bwa a na kanga ni kakaraoa aia boowi ibukin waaki ni babaire ni katoa wiiki ae na nakoraoi riki.
Ngkai ao imwiina riimwiin aia kekeiaki membwa aika a boou n ongora bwa a uara ao tera ae a na kona n ibuobuoki iai mitinare ao membwa.
Kaoiia membwa aika a boou bwa a na maroro ma mitinare ao ni karakini baike a tia n rinanona inanon te Ekaretia.