Mwakoro 3: Reirei 2—Ana Babaire ni Kamaiu Tamara are i Karawa
“Mwakoro 3: Reirei 2: Ana Babaire ni Kamaiu Tamara are i Karawa,” Tataekina Au Euangkerio: Te Kairi nakon Tibwauan ana Euangkerio Iesu Kristo (2023)
“Mwakoro 3: Reirei 2, ” Tataekina Au Euangkerio
Mwakoro 3: Reirei 2
Ana Babaire ni Kamaiu Tamara are i Karawa
Tamnei
Rabwatan Kristo ae karaoaki man te atiibu
A Bae ni Iango Aomata
Tera bukin te maiu aei?
I nako mai ia?
Iai te Atua ae tabe ibukiu? N na kanga n namakinna ae E tabe ibukiu?
N na kanga ni kakoaua iroun te Atua ngkai a bati bwaai aika a bubuaka n riki?
Bukin tera te maiu aei e matoatoa n tabetai? N na kanga ni kunea te korakora i nanon taai aikai?
N na kanga n riki bwa te aomata ae tamaroa?
Tera ae na riki i mwin mateu?
E buokira ana euangkerio ae kaokaki Iesu Kristo ni kaekai titiraki n te nano aika a kakawaki. Rinanon te euangkerio, ti reirei taekan kinakira ae mairoun te Atua ao ara konabwai ae akea tokina ngkai ngaira natin te Atua. E anganira te kaantaninga te euangkerio ao ni buokira ni kunea te rau, kimwareirei, ao nanon bwaai. Maiuakinan te euangkerio e buokiira n rikirake ao ni kunea te korakora ngkai ti kaitaraaki ma kakaewenako n te maiu.
E tangirate kabanea n tamaroa ibukiia Natina te Atua ao nanona e kan anganiira Ana kakabwaia aika korakora, are te maiu ae aki mamate ao te maiu ae akea tokina (taraa Mote 1:39; Reirei ao Berita aika Tabu 14:7). Ibukina bwa E tangiriira, E a tia ni katauraoa te babaire ibukira ni karekei kakabwaia aikai. I nanon koroboki aika tabu, te babaire aei e aranaki bwa te babaire ni kamaiu, te babire ni kakukurei ae korakora, ao te babaire ni kabomwii (taraa Aramwa 42:5, 8, 11, 13, 15, 16, 31).
N ana babaire te Atua, ti borau i nano te maiu imwain aei ngaira n tatabemaniira ti karaoa te borau n te maiu, ni bungiakira, n te maiu ae mamate, ni matera, ao te maiu i mwiin te maiu aei. E katauraoi bwaai aika ti kainnanoi n te mwananga aei te Atua bwa e aonga n are imwiin matera, ti na kona n oki rikaaki nako Matana n tokin te tai ao ni karekea bwaninin te kimwareirei.
E kakawaki Iesu Kristo n ana babaire te Atua. Rinanon Ana Mwakuri ni Kamaiu ao Mangautin Iesu, e karekea nakoira n tatabemaniira nako karekean te maiu ae aki mamate ao te maiu ae akea tokina.
I nanon maiura iaon te aba, ti aki uringa maiura n te maiu i mwain te maiu aei. Ke e aki bwanin otara n te maiu imwiin te mate. Ma, e a tia te Atua ni kaotii koaua aika mwaiti n taekan mwakoron mwanangara ae akea tokina aei. A katauraoi atatai aika a tau koaua aikai ibukira ni mataata n te kaantaninga n te maiu, n rinanon te kimwareirei, ao ni karekea te kaantaninga ibukin bwaai aika tamaroa aika a na roko. Te atatai aei bon te kaubwai ae tabu ni kairiira ngkai ti mena i aon te aba.
Iango ibukin te Anga Reirei
E katauraoi katotoon aron kabwarabwara ni buokiko te mwakoro aei ni katauraoi n am angareirei. Iai naba i nanona katotoon taian titiraki ao kakao aika ko kona ni kabonganai.
Ngkai ko katauraoi n anga reirei, tataromwaaka ni iangoi baike e rinanona te aomata ao kainanona ni maiuna n tamnei. Baireia bwa tera ae e na rangi ni ibuobuoki n te anga reirei. Katauraoiko ni kabwarabwarai nanon taian taeka ake a na aki ota iai aomata. Babaire ni kaineti nakon mwaitin te tai ae ko na kabonganaa, uringnga ni kakimototoi reirei.
Rinei koroboki aika a tabu bwa ko na kabonganai ngkai ko anga reirei. Te tiekition n “Atatai Aika Korakora Iaon Reirein te Ekaretia” are n te reirei iai i nanona koroboki aika tabu aika a na ibuobuoki.
Iangoia bwa angaa titiraki aika ko na titirakinii ngkai ko anga reirei. Bairei kakao ake ko na kanakoi are e na kaungaa nanon te aomata ni karaoa te mwakuri.
Katuruturua Ana berita te Atua are e beritani, ao tibwa am koaua n te bwai are ko anga reirei iai.
Tamnei
a anga reirei nakon te utu mitinare
Tera ae Ko na Reireinia Aomata i nanon 15-25 te Miniti
Rinea teuana ke e raka riki man reirei n te babaire ni kamaiu n anga reirei. Atatai aika korakora n reirein te ekaretia i aon tuua n tatabeua nako a katauraoaki i mwiin te kabwarabwara aei.
Te Maiu I mwain te Maiu Aei: Ana Kaantaninga te Atua ao Ana Babaire Ibukira
Ngaira ni kabane bon natin te Atua aika tamnei. E karikiira n oin Katotongana.
Ti maeka ma te Atua i mwain bungiakira nakon te aonaaba. Ngaira bon kaain Ana utu. E kinaira ao n tangirira n tatabemaniira nako.
E a tia te Atua ni katauraoa te babaire ibukin kukureira ao rikirakera n te maiu aei ao n te maiu are akea tokina.
N ara tai ni maiu i mwain te maiu aei, ti rineia bwa tina iriira ana babaire te Atua. Nanon aei bwa ti na roko nakon te aonaaba bwa ti aonga n toua te mwaneka are i mwiina nakon rikirakera ae akea tokina.
E kakawaki Iesu Kristo n ana babaire te Atua. E karikea nakoira te maiu ae aki mamate ao te maiu ae akea tokina.
Te Karikibwai
Iaan ana kairiiri te Atua, e karaoa te aonaaba Iesu Kristo.
Bwakan Atam ao Ewa
Atam ao Ewa bon moan naati n tamnei iroun Tamara are i Karawa n roko iaon te aba. E karika rabwataia te Atua ao ni kamaekaia i nanon te Onaroka are Eten.
A urua te tua Atam ao Ewa, ao a kakioaki nako man te onaroka, ao a kararoaaki mai i matan te Atua. E aranaki aei bwa te Bwaka.
Imwiin te Bwaka, a karekea te mate n rabwata Atam ao Ewa. N rabwataia ae mamate, a konaa n reirei, rikirake, ao ni karikii natiia. A rinanon naba te rawawata, te bure, ao te mate.
Te Bwaka bon te mwaneka ni waerake ibukiia aomata nako. E karekea nakoira te bwaka bwa ti na bungiaki i aon te aba ao n rikirake n ana babaire Tamara are i Karawa.
Maiura n te Aonaaba
N ana babaire te Atua, ti kainanoia bwa ti na roko nakon te aonaaba ni karekei rabwatara, n reirei, ao n rikirake.
N te aonaaba, ti reiakinna n nakonako n te onimaki. Ma, Tamara are i Karawa e aki katikuira n ti ngaira. E a tia ni katauraoi bwai n tituaraoi aika maiti ao ni buokiira n oki rikaaki nako matana.
Ana Mwakuri ni Kamaiu Iesu Kristo
Ti bure ngaira ni kabane, ao ti na mate ngaira n tatabemaniira. Ibukina bwa e tangiriira te Atua, E kanakoa Natina, Iesu Kristo, nakon te aonaaba ni kabooira man ara bure ao te mate.
Ibukin ana anga karea Iesu, e kona ni kabwaraaki ao ni kaitiakaki ara bure. A konaa ni bitaki nanora n tamaroa riki ngkana ti rairi nanora. E karika aio nakoira bwa ti na manga oki nako matan te Atua ao ni karekea bwaninin te kimwareirei.
Ibukin Mangautin Iesu, ti na bane ni kautaki i mwiin matera. Nanon aei bwa tamneia ao rabwataia aomata n tatabemaniia e na manga botaki, ao ngaira n tatabemaniira nako ti na maiu n akea tokina n te rabwata ae kautaki, ae kororaoi.
E anga te rau,, te kaantaninga, ao te kamaiuaki Iesu Kristo. Ana anga karea ni kamaiu bon kaotan Ana tangira ae akea tiana. A konaa ni kaetaki bwaai ni kabane aike a katanginano n te maiu aei rinanon Ana Mwakuri ni Kamaiu Iesu Kristo.
Te Aonaaba n Tamnei
Ngkana e mate rabwata aio, e reitinako ni maeka tamneira n te aonaaba n tamnei. Aio te tabo ni motirawa n reiakinaki ao ni katauraoi i mwaain te Mangauti.
E tataekinaki n te aonaaba n tamnei ana euangkerio Iesu Kristo, ao ti kona n reitinako n rikirake ao n nakoraoi.
Te Mangauti, Te Kamaiuaki, ao Te Karietataaki
I mwiin ara tai n te aonaaba n tamnei, te Mangauti bon te mwaneka are i mwiina ni mwanangara ae akea tokina.
Te Mangauti bon ikotan tamneira ma rabwatara. Ti na kautaki ngaira n tatabemanira ao e na reke rabwatara ae kororaoi. Ti na maiu n akea tokina. E riki aio man ana Mwakuri ni Kamaiu te Tia Kamaiu ao Mangautina.
Te Motikitaeka ao Te Abanuea ni Mimitong
Ngkana ti a manga kautaki, e na riki Iesu Kristo bwa ara tia motikitaeka. N ae e karako ae e na aki rinanon aei, ni kabane natin te Atua a na karekea neia n te abanuea ae mimitong.
E ngae ngke ti na bane ni kautaki, ti na bon aki bane ni karekea te mimitong ae titebo ae akea tokina. E na motiki taekara Iesu Kristo ni kaineti nakon ara onimaki, mwakuri, ao ara rairannano n maiura ae mamate ao n te aonaaba n tamnei. Ti kona n oki ni maeka i matan te Atua ngkana ti kakaonimaki.
Titiraki ae Ko na Titirakiniia iai Aomata
Aikai katotoon titiraki ae ko kona n titirakiniia iai aomata. Titiraki aikai a kona ni buokiko ni moana te marooro ae manena ao ni mataata ni kainanon ao ni baike e atai te aomata.
Tera n am namakin bukin te maiu aei?
Tera ae e uota te kukurei nakoim?
Tera kangaanga aika ko kainanoa te Atua bwa E na buokiko iai?
Tera ae ko a tia n reiakinna man am kangaanga ake ko kaitarai?
Tera ae ko ataia n taekan Iesu Kristo? E kanga Maiuna ao ana mition n rota aron maium?
Kakao Aika Ko Kona ni Kanakoi
Ko kona ni butia te Atua bwa ko na ataia bwa te bwai are ti reiakin e bon koaua? (Taraa “Nonori Inanon te Anga Reirei: Tataro” ni kabanean te mwakoro n reirei 1.)
Ko kona n ira te taromauri ma ngaira n te Tabati aio n reiakina ae mwaiti riki n bwaai ake ti reiakinaki iai?
Ko kona ni wareka ana Boki Moomon ao n tataro bwa ko na ataia bwa bon ana taeka te Atua? (Ko kona n anga mwakoro ke kiibu aika onoti.)
Ti kona ni bairea tain manga botakira nakon ae e na roko?
Tamnei
te korobanna n te babaire ni kamaiu
Atatai Aika Korakora Iaon Reirein te Ekaretia
Te mwakoro aei e katauraoi reirei ao koroboki aika tabu ibukim ni kamatebwaia ni kakorakora am atatai ao koaua n te euangkerio ao ni buokiko n anga reirei.
Tamnei
bwain karawa
Te Maiu I mwain te Maiu Aei: Ana Kaantaninga te Atua ao Ana Babaire Ibukira
Ngaira Bon Natin te Atua, ao Ti Maeka ma Ngaia i mwaain Bungiakira
Te Atua bon Taman tamneira. Ngaira raoi bon Natina aika ti karikaki ni katotongana. Ngaira n tatabemaniira iai rikira mai ieta bwa ngaira bon natin te Atua. E konaa ni buokira te atatai aei rinanon taai ni kangaanga ao ni kona ni kaungaira nakon ara kabanea n tamaroa.
Ti maeka ma te Atua bwa Natina aika tamnei i mwain bungiakira nakon te aonaaba. Ngaira bon kaain Ana utu.
Tamnei
Beretitenti M. Russell Ballard
“Bon iai teuana kinaakira ae kakawaki ae ti bane n tibwaia ngkai ao n aki totoki, teuana ae ti riai n aki mwaninga, ao teuana ae ti riai n rangi ni kakaitau ibukina. Bwa ngkoe ae bon ngkoe bon natin te Atua ae te mwaane ke te aine ma maium n tamnei ae akea tokina.
“… Te mataata n te koaua aei—n rangi ni mataata iai ao ni butimwaia—e bon bita te maiu. E anganiko kinaakim ae rang okoro are akea temanna ae kona n anaia mai iroum. Ma ae riaon riki anne, e riai n anganiko te namakin ae korakora ni bonganam ao aron kakawakim ae reitinako. N tokina, e katauraoa ibukim te kantaninga ae rine, ni mimitong n te maiu (M. Russell Ballard, “Children of Heavenly Father” [Brigham Young University devotional, Mar. 3, 2020], 2, speeches.byu.edu).
Ti Rineia bwa Ti na Roko nakon te Aonaaba
E tangiriira Tamara are i Karawa ao nanona bwa ti na riki n ai Arona. Bon te aomata ae moan te rietaata ma rabwatana ae mimitong.
N te maiu i mwain te maiu aei, ti reiakinna bwa te Atua iai Ana babaire ibukira bwa ti na riki n ai Arona. Teuana mwakoron Ana baire bwa ti na kitana mweengara i karawa ao n nakomai nako aon te aonaaba ni karekei rabwatara aikai. Ti kainanoia naba ni karekei rabakaura ao ni karikirakea te onimaki n tain kitanan te Atua. Ti na aki uringa maekara ma te Atua. Ma, E na katauraoa te bwai ae ti kainanoia bwa ti aonga n oki rikaaki ni maeka ma Ngaia.
Te rinerine, ke te inaomata ao te kona n rinerine, bon mwakoron Ana baire te Atua ae kakawaki ibukira. Ni maiura i mwain te maiu aei, ngaira n tatabemaniira ti rineia n ira Ana baire te Atua n roko nakon te aonaba bwa ti aonga n toua te mwaneka are i mwiina nakon rikirakera ae akea tokina. Ti mataata bwa ngkai ti mena ikai, ti na karekei taai aika mwaiti ni karaoi bwaai aika boou n rikirake ao n rinanon te kimwareirei. Ti mataata naba bwa ti na kaitarai kakaitara. Ti na rinanon te kariiri, te kataaki, te nanokawaki, ao te mate.
N rinean te roko nako te aonaaba, ti onimaki n Ana tangira ao ana ibuobuoki te Atua. Ti onimaki n Ana babaire ibukin kamaiuakira.
E rinea Iesu Kristo Tamara are i Karawa bwa E na Kamaiura
E kakawaki Iesu Kristo n ana babaire te Atua. I mwaain rokora nako aon te aba, ti ataia ae ti na aki okira matan te Atua i bon iroura. E rinea Iesu Kristo Tamara are i Karawa, Natina ae Ana rikitemanna, ni buokira n oki rikaaki Nakoina ao ni karekea te maiu are akea tokina.
E butimwaaia ma te kukurei Iesu. E kariaia bwa E na ruo nakon te aonaaba ao ni kamaiura rinanon Ana anga karea ni kamaiu. Ana Mwakuri ni Kamaiu ao Mangautina e na karika kororaoin ana kantaninga te Atua ibukira.
Gospel Topics: “Premortality,” “Plan of Salvation”
Tamnei
bungin taai ietan taari
Te Karikibwai
Ana babaire Tamara are i Karawa e katauraoa karikan te aonaaba, ike Natina aika tamnei a na karekea rabwataia ao ni karekei aekan taneiai nako. Maiura iaon te aba e bon riai n reke ibukira bwa ti na rikirake ao n riki n ai aron te Atua.
Iaan ana kairiiri Tamara are i Karawa, e karika te aonaaba Iesu Kristo ao bwaai ni kabane i nanona. I mwiina e karika te mwaane ao te aine Tamara are i Karawa ni Katotongana. Te karikibwai bon kaotan Ana tangira te Atua ao Nanona ibukira ni karekei taai n rikirake.
Atam ao Ewa bon moan natin Tamara are i Karawa n tamnei n roko iaon te aba. E karaoa rabwataia te Atua ni Katotongana ao ni kamaekaia i nanon te Onaroka are Eten. I nanon te onaroka a maeka n akea bureia, ao te Atua e katauraoa kainanoia.
Ngke a mena Atam ao Ewa n te onaroka, e tuangiia te Atua bwa a na aki kana uaan te kai n ata te raoiroi ao te buakaka. Ngkana a ongeaba nakon te tua aei, a na tiku ni maeka i nanon te onaroka. Ma, a na bon aki kona n rikirake ao n reiakinaki man ataakin te kakaitara ao kakaewenako n te maiu ae mamate. A na aki kona n ata te kimwareirei ibukina bwa aki kona n rinanon te rawaawata ao te maraki.
E kaririia Atam ao Ewa Tatan bwa e na kana uaan te kai are e taburoroko kanakina, ao a rineia bwa ana kanna. Ibukin te rinerine aei, a kaeaki nako man te onaroka ao ni kamaenakoaki mai i matan te Atua. E aranaki aei bwa te Bwaka.
I mwiin te Bwaka
Imwiin te Bwaka, a karekea te mate n rabwata Atam ao Ewa. Aikoa mena i nanon te maiu ae aki bubure, ma a mataata ao n rinanon bwaai aika uoua te raoiroi ao te buakaka. A kona ni kabongana inaomataia n rinea ae i marenan te raoiroi ao te buakaka. Ibukina bwa Atam ao Ewa a rinanon kakaitara ao kakaeweako, a kona n reiakinaki ao n rikirake. Ibukina bwa a rinanon te rawawata, a kona naba n rinanon te kimwareirei. (Taraa 2 Nibwaai 2:22–25.)
N aki tabe ma karawawatakiia, a namakinna Atam ao Ewa ae rikiia n rabwataia ae mamate bon te kakabwaia ae korakora. Teuana te kakabwaia bwa a kona ni karikiia natiia. Aio e katauraoa te kawai ibukia natin te Atua n tamnei ake tabeman n roko nakon te aonaaba ao ni karekei rabwataia.
Ni irekereke ma te kakabwaia ae reke man te Bwaka, a kimwareirei Atam ao Ewe. E taku Ewa, “Ngke arona bwa ti aki riaon te tua ti na aki kona ni [kariki], ao n aki kona n ataa ae raoiroi ao ae buakaka, ao te kimwareirei ni kaboakira, ao te maiu ae akea tokina are e anga te Atua nakoia ni kabane aika ongeaba” (Mote 5:11; taraa naba kibu 10).
Gospel Topics“Fall of Adam and Eve,” “Agency and Accountability”
Maiura n te Aonaaba
A bae ni iango aomata, “Bukin tera I mena n te aonaba aei?” Maiura n te aonaaba bon te mwakoron Ana babaire te Atua ae kakawaki ibukin rikirakera ae akea tokina. Ara kantaninga ae te kabanea ni kakawaki bwa ti na katauraoira n oki rikaaki nako matan te Atua ao ni karekea bwaninin te kimwareirei. Kabwarabwara aika i nano bon tabeua kawai bwa te maiu n te aonnaaba e katauraoira ibukin aio.
Tamnei
e moangare te ataeinimwaane
Karekean te Rabwata ae Mamate
Te kantaninga n rokora nako aon te aba bon karekean rabwatara are a na maeka iai tamneira. A tabu rabwatara, ana karikibwai ae kamiimi te Atua. Ao man rabwatara aikai, ti kona ni mwakuri, n reirei, ao n rinanon taneiai aika mwaiti are e aki kona tamneira ni karaoi. Ti kona n rikirake ni kawai are ti aki kona n rikirake iai ngke tamnei ngaira.
Ibukina bwa a mamate rabwatara, ti rinanon te maraki, te aoraki, ao kakatai riki tabeua. Taneiai aikai a kona ni buokira n reiakina te taotaonakinano, te nanoanga, ao aroaro tabeua aika mairoun te Atua. A kona n riki bwa mwakoron kawaira nakon te kimwareirei. Rinean te eti ngkana e matoatoa karaoana bon aron ae e kangaa te onimaki, te kaantaninga, ao te tangira ae kororaoi n riki bwa mwakoron anuara.
Reiakina aron Kabonganaan te Inaomata n Rinerine ma te Wanawana
Teuana riki te kantaninga n te maiu ae mamate aei bon reiakinan aron kabonganaan inaomatara n rinerine ma te wanawana—n rinea ae eti. Reiakinan aron kabonganaan inaomatara n rinerine ma te wanawana bon te mwakoro ae kakawaki n riki n aiaron te Atua.
A reireiniira bwaai aika a eti ao n anganiira tuua Tamara are i Karawa ao Iesu Kristo ni kairiira nakon te kakukurei. E kairiiraTatan bwa ti na karaoa ae bure, n tangiria bwa ti na aki kukurei n ai arona. Ti rinanon kakaitara i marenan te raoiroi ao te buakaka, are a bon riai n riki bwa reiakinara ni kabongana inaomatara n rinerine (taraa 2 Nibwaai 2: 11).
Ngkai ti ongeaaba nakon te Atua, ti rikirake ao ni karekea Ana kakabwaia aika beritanaki. Ngkana ti aki ongeaba, ti karika ae ti na raroa mai Irouna ao ni butimwaea te rekenikai man karaoan te bure. E ngae ngke n taai tabetai e tara n aki reke aei, n tokina e kairiira te bure nakon te aki kukurei. N angiin te tai kakabwaia man te ongeaba—ao rotakira man te bure—aki waekoa n riki ke ni bon kona n noraki. Ma a na bon riki, bwa e bon momotiraoi te Atua.
E ngae ngke ti karaoa ara kabanea n tamaroa, ti bon bane ni bure ao “man aki karekea te neboaki mairoun te Atua” (I-Rom 3:23). N ataan aei, e katauraoa te kawai ibukira Tamara are i Karawa bwa ti na rairi nanora bwa ti aonga n oki Nakoina.
E uota mwaakan te tia Kabooira te rarirannano, Iesu Kristo, i nanon maiura (taraa Ereman 5:11). Ngkai ti rairii nanora, ti riki ni itiaki man te bure rinanon Ana anga karea ni kamaiu Iesu Kristo ao te bwai n tituaraoi ae te Tamnei ae Raoiroi (taraa 3 Nibwaai 27:16–20). Rinanon te rairannano, ti namakina te kimwareirei. Te kawai n oki rikaaki nakon Tamara are i Karawa e uki nakoira, bwa E bon nanoanga. (Taraa “Rairannano” n reirei 3.)
Reiakinna n Nakonako n te Onimaki
Te kantaninga riki teuana n te maiu aei bon karekean taian taneiai ake a kona n reke ti rinanon kamaenakoara mairoun Tamara ae i Karawa. Ibukina bwa ti aki Noria, ti riai n reiakinna n nakonako n te Onimaki (taraa 2 I-Korinto 5:6–7).
E aki katukuira n ti ngaira te Atua iaon kawaira n te maiu aei. E a tia ni katauraoa te Tamnei ae Raoiroi ni kairiira, kakorakoraira, ao ni katabuiira. E a tia naba ni katauraoi koroboki aika tabu, burabeti, te tataro, ao Ana euangkerio Iesu Kristo.
Mwakoron nako te taneiai ni maiura ae mamate—te kimwareirei ao te rawawata, te tokanikai ao konaakira—a kona ni buokiira n rikirake ngkai ti katauraoi n oki rikaaki nakon te Atua.
Ibukin bwakan Atam ao Ewa, ti bane n rotaki n te bure ao te mate. Ti aki kona n tokanikai man mwiin te bure ao te mate i bon iroura. N ana babaire ni kamaiu Tamara are i Karawa, E katauraoa te kawai n tokanikai man kairoron te Bwaka bwa ti aonga n oki Nakoina. I mwain karikan te aonaaba, E rinea Iesu Kristo bwa ara Tia Kamaiu ao te tia Kabooi Maiura.
Bon ti Iesu Kristo ae kona ni kabooira man te bure ao te mate. Bon Ngaia Natin te Atua ni Koaua. E maiu n akea ana bure, ao e ongeaba n taainako nakon Tamana. E tauraoi ao n ongotaeka ni karaoa ana kantaninga Tamana.
E raonaki Ana Mwakuri ni Kamaiu te Tia Kamaiu ma Korakaina n te Onaroka i Ketetemwane, Korakaina ao matena n te kaibangaki, ao Mangautina. E korakai n ae moan te korakora—ni korakora n te aro are E wanako raraana man bwangabwangan kunna (taraa Reirei ao Berita aika Tabu 19:18).
Ana Mwakuri ni Kamaiu Iesu Kristo bon te waaki ae moan te mimitong n rongorongoia te botanaomata n te aonaaba. Rinanon Ana anga karea ni kamaiu, e kammwakura ana babaire te Tama. E na bon akea konabwaira n akean Ana Mwakuri ni Kamaiu Iesu Kristo ibukina bwa ti aki kona ni kamaiura i bon iroura man te bure ao te mate (taraa Aramwa 22:12–15).
Ana anga karea ara Tia Kamaiu bon kaotan Ana tangira ae moan te korakora ibukn Tamana ao ibukira. “Rababana, ao anauna, ao nanona, ao rietana” n tangirara iroun Kristo e riaon ara atatai (I-Ebeto 3:18; taraa naba kibu 19).
Tamnei
Te Tauraki n te Kaibangaki, iroun Harry Anderson
E Tokanikai Iesu Kristo i aon te Mate ibukira ni Kabane
Ngke e mate Iesu iaon te kaibangaki, e maenako Tamneina ma Rabwatana. N te kateniua ni bong, a ikotaki Tamneina ao Rabwatana, n aki manga maenako. E kaoti nakoia aomata aika a mwaiti, n kaotia nakoia bwa iai Rabwatana ae te iriko ma te rii ae aki mamate. Botakin te tamnei ao te rabwata aei e aranaki bwa te Mangauti.
Ngkai rabwata aika mamate, ti na bon mate ngaira n tatabemaniira nako. Ma, ibukina bwa E tokanikai Iesu i aon te mate, aomata ni kabane ake a bungiaki nako aon te aba a na manga kautaki. Te mangauti bon te bwai n tangira mai karawa ibukira ni kabane, ae ti anganaki rinanon Ana akoi te Atua ao Ana nanoanga ni kamaiu. Tamneia ao rabwataia aomata ni kabane a na manga bootaki, ao ngaira n tatabemaniira ti na maiu n akea tokina n te rabwata ae kautaki, ae kororaoi. Bwa ngke tiaki ibukin Iesu Kristo, te mate e na kabuai ni kabane kaantaninga ibukin te maeka rimwii ma Tamara are i Karawa (taraa 2 Nibwaai 9:8–12).
E karekea Nakoira Kaitiakara man Ara Bure Iesu
Ni mataata n te kaantaninga are ti kona ni karekea rinanon Kristo, ti riai ni mataata nakon tuan te momotiraoi. Aio te tua ae aki bibitaki are e uota mwiin te bwai ae riki man ara mwakuri. Te ongotaeka nakon te Atua a oko mwiin bwai aika a tamaroa, ao te aki ongotaeka a roko iai mwiina ae buakaka. (Taraa Aramwa 42:14–18.) Ngkana ti bure, e riki n aki kororaoi maiura n tamnei, ao bon akea te bwai ae bareka ae kona ni maeka imatan te Atua (taraa 3 Nibwaai 27:19).
Tamnei
E tataro i Ketetemwane, iroun Harry Anderson
N tain karaoan Ana anga karea ni kamaiu Iesu Kristo, E onea mwiira, ni korakai, ao ni kabwaka boon te katuaeaki ibukin ara bure (taraa 3 Nibwaai 27:16–20). N Ana babaire te Atua e angan Iesu Kristo te mwaaka bwa te tia tei ibukira—n tei imarenara ao te motiraoi (taraa Motiaea 15:9). Ibukin Ana anga karea ni kamaiu Iesu, E kona n anga te nanoanga are bon Ana bwai nakoira ngkai ti kamwakura te onimaki nakon te rairannano (taraa Moronaai 7:27; Reirei ao Berita aika Tabu 45:3–5). “Ngaia are te nanoanga e kona ni kakoroi bukin bwaai ake e tangiri te momotiraoi, ao e katobibi[ra] ni bain te mwengaraoi” (Aramwa 34:16).
Bon tii rinanon te bwai n tangira ae Ana Mwakuri ni Kamaiu te Tia Kamaiu ao ara rairannano are ti kona n oki iai nakon te Atua. Ngkana ti rairi nanora, a kabwaraki ara bure ao ni kaitiakaki ni maiun tamneira. Ti a kainaomataaki man rawawatan barekan ara bure. A kamarurungaki tamneira aika uruaki. Ti a onrake n te kimwareirei (taraa Aramwa 36:24).
E ngae ngke ti aki kororaoi ao ni manga bwaka, e mwaiti riki te akoi, te tangira, ao te nanoanga iroun Iesu Kristo nakon riki te aki kororaoi, te kabwaka ke te bure inanora. E aki toki n tauraoi te Atua ao n ingainga ni butimwaira ngkana ti tan Nakoina ao n rairi nanora (taraa Ruka 15:11–32). Akea te bwai ke temanna ae “e na karaureira ma ana tangira te Atua, are i nanon Kristo Iesu are ara Uea” (I-Rom 8:39).
E Katokaa Marakira i Aona Iesu, Rawawatara, ao Mamaarara
I nanon Ana anga karea ni kamaiu,e katokaa marakira , rawaawatara, ao mamaarara i Iaona. Ibukin aei, E ataia “ni kaineti ma te rabwata bwa e na kanga ni buokiia ana aomata ni kaineti ma mamaaraia” (Aramwa 7:12; taraa naba kibu 11). E kakao, “Bane mai nako Iu” ao ngkai ti karaoia, E anganiira te rau, te kaantaninga, te korakora, nonori ae raka, ao te kamaiuaki (Mataio 11:28; taraa naba kiibu 29–30).
Ngkai ti katan iaon Iesu Kristo ao Ana mwakuri ni Kamaiu, E kona ni buokira bwa ti na tokanikai iaon katakira, aoraki, ao te maraki. Ti kona ni kaonaki n te kimwareirei, te rau, ao te raunnano. Bwaai ni kabane aike a katanginano ibukin te maiu a kona ni kaetaki rinanon Ana Mwakuri ni Kamaiu Iesu Kristo.
Gospel Topics: “Jesus Christ,” “Atonement of Jesus Christ,” “Grace”
Tamnei
a kawara te ruanimate
Te Aonaaba n Tamnei
A mwaiti aomata aika a iangoia, “Tera ae riki imwin mateu?” E katauraoi tabeua kaeka aika a kakawaki nakon te titiraki aei te babaire ni kamaiu.
Te mate bon mwakoron Ana “babaire n akoi” te Atua ibukira (2 Nibwaai 9:6). Nakon riki tokin maiura, te mate bon te mwaneka are i mwina nakon rikirakera ae akea tokina. Ngkana ti na riki n aron te Atua, ti riai n rinanon te mate ao i mwina karekean rabwatara ae mangauti, ae kororaoi.
Ngkana e mate rabwata aio, e reitinako ni maeka tamneira n te aonaaba n tamnei. Aio te tabo ni motirawa n reiakinaki ao ni katauraoi i mwaain te Mangauti ao te Kabanea ni Motikitaeka. Ara atatai man maiura ae mamate a tiku ma ngaira.
N te aonaaba n tamnei, aomata ake a butimwaea ao ni maiuakina ana euangkerio Iesu Kristo “a butimwaeaki nakon te aro ni kakukurei, are e bon aranaki bwa te bwaretaiti” (Aramwa 40:12). Ataei aika uarereke a butimwaeaki naba nakon te bwaretaiti ngkana a mate.
Tamnei ake n te bwaretaiti a na karekea te rau man aia kangaanga ao rawawataia. A na reitinako n rikirake ni maiuia n tamnei, ni karaoa Ana mwakuri te Atua ao ni karaoa te mwakuri n ibuobuoki nakoia aomata. A na reireia te euangkerio nakoia naake a aki karekea n aia tai ni maiu n te aonnaaba (taraa Reirei ao Berita aika Tabu 138:32–37, 57–59).
N te aonaaba n tamnei, aomata ake e aki reke aia tai ni karekea te euangkerio iaon te aba, ke naake a rineia n aki kan iririi tuua, a na rinanon tabeua totoko (taraa Reirei ao Berita aika Tabu 138:6–37; Aramwa 40:6–14). Ma, ibukina bwa e etieti ao n akoi te Atua, e na reke aia tai n reireiaki Ana euangkerio Iesu Kristo. Ngkana a butimwaia ao n rairi nanoia, a na kaboaki man aia bure (taraa Reirei ao Berita aika Tabu 138:58; taraa naba 138:31–35; 128:22). A na butimwaeaki nako nanon te rau n te bwaretaiti. N tokina ao a na karekea aia tabo n te abanuea ae mimitong ni kaineti ma te rinerine ake a karaoi n tain maiuia n te aonnaaba ao n te aonnaaba n tamnei.
Ti bon tiku n te aonaaba n Tamnei ni karokoa ti a manga kautaki.
Bwai ni Kairi nakon Koroboki aika a tabu, “Bwaretaiti”
Te Mangauti, Te Kamaiuaki, ao Te Karietataaki
Mangauti
Ana babaire te Atua e karika ae ti na rikirake ao ni karekea te maiu ae akea tokina. I mwiin ara tai n te aonaaba n tamnei, te Mangauti bon te mwaneka are i mwiina n te rikirake anne.
Te Mangauti bon ikotan rabwatara ma tamneira. Ngaira n tatabemaniira ti na manga kautaki. E riki aio man ana Mwakuri ni Kamaiu te Tia Kamaiu ao Mangautina. (Taraa Aramwa 11:42–44.)
Ngkana ti a manga kautaki, ngaira n tatabemaniira ti na karekea te rabwata ae kororaoi, aika aki manga maraki ao n aoraki. Ti na maiu n aki kona ni manga mate, ni maiu n akea tokina.
Te Kamaiuaki
Ibukina ngkai ti na manga bane ni kautaki, ti na kawakinaki—ke ni karekea te kamaiuaki—man te mate n rabwatta. Te bwai n tangira aei ti anganaki rinanon ana akoi Iesu Kristo.
Ti kona naba ni kawakinaki—ke ni karekea te kamaiuaki—man te katuuaa are e tangiraki iaan tuan te motiraoi ibukin ara bure. Te bwai n tangira aio e kona naba n reke rinanon tamaroan ana nanoanga Iesu Kristo ngkana ti rairi nanora. (Taraa Aramwa 42:13–15, 21–25.)
Karietataaki
Te karietataaki, ke te maiu ae akea tokina, bon te kabanea n rietata ni kukurei ao ni mimitong n te abanuea ae te tiretio. Te Karietataaki bon te bwaintangira ae iai te bwai ae e na karaoaki ni karekeana. E reirei Beretitenti Nelson, “Aroaro aika a tau ibukin karekeana e na iai i nanona te onimaki iroun te Uea, rairannano, bwabetito, karekean te Tamnei ae Raoiroi, ao te teimatoa n kakaonimaki nakon taiain otenanti ao berita aika a tabu n te tembora” (“Salvation and Exaltation,” Riaona, Meei 2008, 9).
Te Karietataaki nanona bon te maeka ma te Atua n akea tokina n utu aika akea tokiia. Bon atakin te Atua ao Iesu Kristo, n riki n ai Aroia, ao n rinanon te maiu ni kukurei are a Rinanona.
Bwai ni Kairi nakon Koroboki aika Tabu, “Mangauti”
Atuun rongorongon te Euangkerio: “Resurrection,” “Salvation”
Tamnei
e otanako otan tai rinanon te nang
Te Motikitaeka ao Te Abanuea ni Mimitong
Te bwai ae na taraaki: Ngkana ai tibwa te moan tai n reiakinaki taekan aba n uea aika mimitong, reireia ni kaineti nakon bootaun aron ma kainanon ao matatan te aomata.
Ngkana ti a manga kautaki, Iesu Kristo e na riki bwa ara tia motikitaeka ae etieti ao n nanoanga. N karakon ae naaki rinanon aei, ngaira n tatabemaniira ti na karekea n nera n te abanua ae mimitong. E ngae ngke ti na bane ni kautaki, ti na bon aki bane ni karekea te mimitong ae titebo ae akea tokina (taraa Reirei ao Berita aika Tabu 88:22–24, 29–34; 130:20–21; 132:5).
Aomata ake aki reke aia tai ni kabwanina matataia ao n ongeaaba n ana tua te Atua n aia tai ni maiu iaon te aba e na reke aia tai n te aonnaaba n tamnei. E na motikii taekaia aomata Iesu ni kaineti nakon ana onimaki teuanne ke neienne, aia mwakuri, ao aia rainanano n tain maiuia iaon te aba ao n te aonnaaba n tamnei (taraa Reirei ao Berita aika Tabu 138:32–34, 57–59).
Bookii aika tabu a reirei iaon te mimitong n abanuea aika tiretio, teretirio, ao teretio. Aikai n tatabeua nako bon kaotan Ana tangira te Atua, ni momotiraoi, ao n nanoanga.
Te koraki ake a kamwakura aia onimaki iroun Kristo, n rairi nanoia man aia bure, ni karekei otenanti n te euangkerio, ni kawakin aia berita aika tabu, ni karekea te Tamnei ae Raoiroi, ao n teimatoa n uaa te toki a na kamaiuaki n te abanuea are te tiretio. Te abanuea aei a na maeka naba iai aomata ake e aki reke aia tai ni karekea te euangkerio ngke a maeka iaon te aba ma “a na bon butimwaia ma nanoia ni kabane” ao a karaoia n te aonaba n tamnei (Reirei ao Berita aika a Tabu 137:8; taraa naba kibu 7). Ataei ake a mate i mwain ae a roko n te roro ni bukinaki (waniua aia ririki) a na kamaiuaki naba n te abanuea are tiretio (taraa Reirei ao Berita aika Tabu 137:10).
Aomata ake a rianako tamaroan maiuia “ake a aki karekea te koaua iroun Iesu n te rabwata, ma a karekea i mwina” a na karekea nneia n te abanuea are teretirio (Reirei ao Berita aika a Tabu 76:74). E na bon reke naba aio nakoia naake aki kakaonimaki n aia koaua ibukin Iesu. Te abanuea aio e kabotauaki ma mimitongin namwakaina. (Taraa Reirei ao Berita aika Tabu 76:71–80.)
Naake a reitinako n aia bure ao n aki rairii nanoia n te maiu aei ke ni butimwaea ana euangkerio Iesu Kristo n te aonaba n tamnei a na karekea kanuwangaia n te abanuea ae teretio. Te abanuea aio e kabotauaki ma mimitongin itoi. (Taraa Reirei ao Berita aika Tabu 76:81–86.)
Tein Aron te Reirei ae Kimototo nakon ae Tau Abwakina
Te kabwarabwara n aron tein te reirei aei bon te katooto n reiakinan temanna ngkana e rangi ni uarereke te tai. Ngkana ko na kabongana aron teina aio, rinea teuana ke ae mwaiti n taian tua ake ko na reirei iaona. Atatai aika korakora n reirein te ekaretia iaon tuua n tatabeua nako a katauraoaki mai imwaina n te reirei.
Ngkai ko anga reirei, anga taian titiraki ao kakauongo. Kanakoi kakao ake a na buokiia aomata n reiakinna bwa a na kangaa n rikirake ni kaan nakon te Atua. Teuana te kakao ae kakawaki bon ibukin te aomata bwa e na manga kaitibo ma ngkoe riki. Abwakin tain te reirei e bon nakon am titiraki are ko anga ao arom ni kakauongo are ko na karaoia.
Tera ae Ko na Reireiniia Aomata inanon 3-10 te Miniti
Ngaira ni kabane bon natin te Atua aika tamnei. Ngaira bon kaain Ana utu. E kinaira ao n tangirira n tatabemaniira nako.
E a tia te Atua ni katauraoa te babaire ibukin kukureira ao rikirakera n te maiu aei ao n te maiu are akea tokina.
N ana babaire te Atua, ti kainanoia bwa ti na roko nakon te aonaaba ni karekei rabwatara, n reirei, ao n rikirake.
E kakawaki Iesu Kristo n ana babaire te Atua. E kangaraoa nakoira reken te maiu ae akea tokina.
Iaan ana kairiiri te Atua, e karika te aonaaba Iesu.
Te taneiai are ti rinanona i aon te aba a bon riki bwa buokara ni katauraoira n oki nako matan te Atua.
Ti bure ngaira ni kabane, ao ti na mate ngaira n tatabemaniira. Ibukina bwa e tangiriira te Atua, E kanakoa Natina, Iesu Kristo, nakon te aonaaba ni kabooira man ara bure ao te mate.
A konaa ni kaetaki bwaai ni kabane aike a katanginano n te maiu aei rinanon Ana Mwakuri ni Kamaiu Iesu Kristo.
Ngkana rabwatara aio e mate, tamneira e reitinako ni maiu. Ti na bane ni kautaki n te kabanea n tai. Nanon aei bwa tamneia ao rabwataia aomata n tatabemaniia e na manga botaki, ao ngaira n tatabemaniira nako ti na maiu n akea tokina n te rabwata ae kautaki, ae kororaoi.
Ngkana ti a manga kautaki, e na riki Iesu Kristo bwa ara tia motikitaeka. N ae e karako ae e na aki rinanon aei, ni kabane natin te Atua a na karekea neia n te abanuea ae mimitong. Ti kona n oki ni maeka i matan te Atua ngkana ti kakaonimaki.