1 Ao Ngai, te Uea ae te Atua, I taetae nakon Mote, ni kangai: ^aTatan arei, are ko a tia n tuangnga bwa e na nako n aran au Rikitemanna, bon ngaia naba are man te ^bmoan tai, ao e roko i matau, ni kangai—Nooria, aio ngai, kanakoai, N na riki bwa natim, ao N na kaboia aomata ni kabaneia, bwa e na akea temanna te aomata ae na bua, ao ^cN na bon karaoia, mangaia are anganai karineam.

2 Ma, nooria, ^aNatiu ae Tangiraki, are e Tangiraki ao e ^bRineaki irou man te moan tai, e taku nakoiu—^cTamau, e na karaoaki ^dnanom, ao am bwai te ^emimitong n aki toki.

3 Mangaia are, ibukina bwa Tatan e ^akaitaraai, ao e ukeukera kamaunan ^binanomatan te aomata n rinerine, are Ngai, te Uea ae te Atua, I a tia n anganna, ao, bwa N na anganna naba oin mwaakau; ni mwaakan au Rikitemanna, I kariaia bwa e na ^cteweaki nako;

4 Ao e a riki bwa Tatan, eng, are te riaboro, taman taian ^akewe ni kabane, bwa e na mwamwanaia ao ni kamatakia aomata, ao ni kairia nakon te tautaekanaki n ana kantaninga, ni kabane ake aki kan ongo ni bwanau.

5 Ao ngkai te naeta e bon rangi n ^ananowanana riki nakoia manin te tawana are Ngai, te Uea ae te Atua, I a tia ni kariki.

6 Ao Tatan e karina i nanon te naeta, (bwa e a tia ni kairiia nako aika mwaiti bwa a na iria,) ao e ukeukeria naba bwa e na mwamwana ^aEwa, bwa e aki ata ana iango te Atua, mangaia are e ukeukera kamaunaan te aonaba.

7 Ao e taku nakon te aine: Eng, e a tia te Atua n taekina—Ko na tai amwarake man kai ni kabane n te ^anenaroka? (Ao e taetae man win te naeta.)

8 Ao te aine e taku nakon te naeta: Ti kona n amwarake ni uaan taian kai n te nne n aroka;

9 Ma man uaan te kai are ko nooria i nukan te nenaroka, e taku te Atua—Kam na tai kanna, ao kam na aki ringa, bwa kam kaawa ni mate.

10 Ao te naeta e taku nakon te aine: Kam na bon aki mate;

11 Bwa te Atua e ataia bwa n te bong are kam kanna iai, ngkanne a na kaukaki ^amatami, ao kam na riki n ai aroia atua, n ^bataa ae raoiroi ao ae buakaka.

12 Ao te aine ngke e nooria bwa te kai e raoiroi ibukin te amwarake, ao bwa e riki ni kan tarataraki ni maata, ao te kai ae na ^atangiraki bwa e na kawanawanaa, e kinika uaana, ao e ^bkanna, ao e anga naba nakon buuna ma ngaia, ao e kanna naba.

13 Ao mataia ni kauoman a kaukaki, ao a ataia bwa ^aakea karabaaia. Ao a itutui baan biku ni boboti ao a karaoi karabaia.

14 Ao a ongo bwanaan te Uea ae te Atua, ngke a ^anakonako n te nne n aroka, ni mwaitoron te ngaina; ao Atam ao buuna a nako ni karabaia mai matan te Uea ae te Atua i buakoni kain te nne n aroka.

15 Ao Ngai, te Uea ae te Atua, I wetea Atam, ao I taku nakoina: Ko na ^anakea?

16 Ao e taku: I ongo bwanaam n te nne n aroka, ao I maaku, ibukina bwa I ataia bwa I aki karabanai, ao I karabaai.

17 Ao Ngai, te Uea ae te Atua, I taku nakon Atam: Antai ae tuangko bwa akea karabaam? Ko a tia n amwarake man te kai are I tuangko bwa ko na aki kanna, ngkana ngaia ko na boni ^amate?

18 Ao te mwaane e taku: Te aine are ko anganai, ao ko tua bwa e na tiku ma ngai, e anganai uaan te kai ao I kanna.

19 Ao Ngai, te Uea ae te Atua, I taku nakon te aine: Tera te bwai aei ae ko a tia ni karaoia? Ao te aine e taku: Te naeta e ^amwamwanaai, ao I kanna.

20 Ao Ngai, te Uea ae te Atua, I taku nakon te naeta: Ibukina bwa ko a tia ni karaoa aei ko na ^akamaraiaaki i aoia maan aika manana ni kabaneia, ao i aoia manin te tawana aika katamanti ni kabaneia; ko na kawakawa i aon biritom, ao ko na kana bubun te tano ni bongini maium ni kabane;

21 Ao N na katuka te kairiribai imarenam ma te aine, imarenan am kariki ao ana kariki; ao e na kaikoaka atuum, ao ko na kaikoaka bukin waena.

22 Nakon te aine, Ngai, te Uea ae te Atua, I taku: N na kakorakora ni kamwaita nanokawakim ao bungim. Ko na bungiia natim n te ^ananokawaki, ao nanom bon nakon buum, ao e na tautaeka i aom.

23 Ao nakon Atam, Ngai, te Uea ae te Atua, I taku: Ibukina bwa ko a tia n ongo bwanaan buum, ao ko a tia ni kana uaan te kai are I tuangko, ni kangai—Ko na tai kanna, e na kamaraiaaki aontano ibukim, ko na amwarake mai iai n am bong ni kabane ni maium n te nanokawaki.

24 Ingin aroka naba, ao kateketeke a na riki nakoim, ao ko na amwarake man aroka n te tawana.

25 Man ^amaonon ramwam ko na amwarake n te kariki, ni karokoa ko okira te tano—bwa ko na boni mate—bwa ko anaaki mai iai: bwa boni ngkoe te ^btano, ao ko na oki nakon te tano.

26 Ao Atam e arana buuna bwa Ewa, ibukina bwa boni ngaia tinaia aika maiu ni kabane; bwa I a tia Ngai, te Uea ae te Atua, ni wetea te moan aine mai buakoia aine ni kabane, ake a ^amwaiti.

27 Nakon Atam, ao nakon buuna naba, Ngai, te Uea ae te Atua, I karaoi kunikai man kuniia maan, ao I ^akunikainiia iai.

28 Ao Ngai, te Uea ae te Atua, I taku nakon au Rikitemanna: Nooria, te ^aaomata e a riki n ai aron temanna mai buakora n ^bataa ae raoiroi ao ae buakaka; ao bwa e kaawa n arora baina ni ^ckatoonga naba te ^dkai ni kamaiu, ao ni kanna ao ni maiu n aki toki;

29 Ngaia are Ngai, te Uea ae te Atua, N na kanakoa man te Nne n Aroka are ^aEten, bwa e na ribana aontano ike e bon anaaki mai iai;

30 Bwa ngkai Ngai, te Uea ae te Atua, I maiu, ao au ^ataeka a na aki kaakeaaki, bwa ngkai a nako mai wiiu a na riai ni kakoroaki nanoia.

31 Ngaia are I kakionakoa te aomata, ao I katuka mai mainikun te Nne n Aroka are Eten, te ^akerubim ao te kabang ae ura, ae minomino ni kaitarai taabo nako ni kawakina kawain te kai ni kamaiu.

32 (Ao aikai taeka ake I taekini nakon au tia mwakuri ae Mote, ao a boni koaua n aron ae I nanonna; ao I a tia n taekini nakoim. Taraia bwa ko na aki kaoti nakon te aomata temanna, ni karokoa I tuangko, ma ti nakoia ake a kakoauaa. Amen.)