“పస్కాపండుగ,” పాత నిబంధనలు కథలు (2022)
“పస్కాపండుగ,” పాత నిబంధన కథలు
పస్కాపండుగ
ప్రభువు చేత రక్షించబడుట
ఫరో ఇశ్రాయేలీయులను స్వేచ్ఛగా వెళ్ళనివ్వడు, కాబట్టి చివరిగా ఒక తెగులు పంపుతానని ప్రభువు మోషేతో చెప్పారు. ఐగుప్తు దేశములోని ప్రతి కుటుంబములో తొలి సంతతి మరణిస్తుంది, వారి జంతువులలో తొలిచూలు కూడా మరణిస్తుంది.
ఇశ్రాయేలీయులు ఆయన సూచనలను పాటించినట్లైతే, తెగులు వారిని దాటుకొని వెళుతుంది కానీ వారిని బాధించదని ప్రభువు వాగ్దానం చేసారు.
పరిపూర్ణమైన మగ గొఱ్ఱెపిల్లను బలిగా అర్పించాలని మరియు వారి ఇంటి గుమ్మాలపై గొఱ్ఱెపిల్ల రక్తాన్ని పూయాలని ప్రభువు ప్రతి ఇశ్రాయేలీయ కుటుంబానికి చెప్పారు.
గొఱ్ఱెపిల్లను వండి, త్వరగా తినమని ఇశ్రాయేలీయులకు ప్రభువు చెప్పారు. వారు తినేటప్పుడు దుస్తులు ధరించి, వారి ఇళ్ళను వదిలి వెళ్ళడానికి సిద్ధంగా ఉండాలి. ఇశ్రాయేలీయులు ఈ పనులు చేస్తే, వారి తొలి సంతతి తెగులు నుండి రక్షించబడుతుందని ప్రభువు చెప్పారు.
ప్రభువు హెచ్చరించినట్లే, ఆ తెగులు వచ్చింది. ఫరో యొక్క పెద్దకుమారునితో పాటు, ఐగుప్తులో తొలి సంతతి మరణించారు. కానీ ఇంటి గుమ్మముపై గొఱ్ఱెపిల్ల రక్తమున్న ప్రతి ఇంటిని ఆ తెగులు దాటి వెళ్ళింది. ఇశ్రాయేలీయుల యొక్క తొలి సంతతి రక్షించబడ్డారు, ఎందుకంటే వారు ప్రభువుకు విధేయత చూపించారు.
ఈ తెగులు కారణంగా తన స్వంత కుమారుడు చనిపోయాడని ఫరో చూసినప్పుడు, ఇశ్రాయేలీయులందరినీ తీసుకొని ఐగుప్తు విడిచివెళ్ళమని మోషే, అహరోనులతో అతడు చెప్పాడు.
ఇశ్రాయేలీయులు వెళ్ళిపోయారు, కానీ ఫరో కోపంగా ఉన్నాడు. అతడు తన సైన్యాన్ని, రథాలను సమకూర్చి ఇశ్రాయేలీయులను వెంటాడాడు.
ఇశ్రాయేలీయులు ఎఱ్ఱసముద్రము దగ్గర దండుదిగారు. త్వరలోనే ఫరో మరియు అతని సైన్యం వారిని సమీపించారు. ఐగుప్తీయులు రావడం చూచినప్పుడు ఇశ్రాయేలీయులు భయపడ్డారు. కానీ ప్రభువు వారిని కాపాడతారని మోషే ఇశ్రాయేలీయులతో చెప్పాడు.
ఐగుప్తీయులు దగ్గరకు వచ్చినప్పుడు తన దండాన్ని పైకి ఎత్తమని ప్రభువు మోషేతో చెప్పారు. మోషే అలా చేసినప్పుడు, ప్రభువు ఆ సముద్రాన్ని పాయలుగా విడగొట్టారు. ఆరిన నేలపై ఇశ్రాయేలీయులు ఆ సముద్రాన్ని దాటారు. ఫరో మరియు అతని సైన్యము వద్దనుండి వారు పారిపోయారు.
ఐగుప్తీయుల సైన్యము ఇశ్రాయేలీయులను తరిమింది. ఇశ్రాయేలీయులందరూ సముద్రము అవతలి వైపు సురక్షితంగా ఉన్నప్పుడు, ప్రభువు నీటిని క్రిందికి వచ్చేలా చేసారు. ఐగుప్తీయుల సైన్యము సముద్రములో మునిగిపోయింది.
చివరికి ఇశ్రాయేలీయులు స్వేచ్ఛను పొందారు. వారు పాటలు పాడారు, నాట్యం చేసారు మరియు ప్రభువుకు కృతజ్ఞతలు తెలిపారు. ప్రభువు వారి ప్రాణాలను కాపాడి, ఐగుప్తు నుండి బయటకు తీసుకొని వెళ్ళిన సమయముగా వారు ఎల్లప్పుడూ పస్కా పండుగను జ్ఞాపకం చేసుకున్నారు.