Te ’Ohipa 10

’Ua fa’ari’i Korenelio ’e tōna mau hoa i te Vārua Maita’i

Nō te mau ta’ata ato’a te ’evanelia

E fa’atere fa’ehau nō Roma ’o Korenelio. E mea ti’aturi ’oia ’e tōna ’utuāfare i te Atua, e ’ere rā rātou i te ’āti Iuda, ’e ’aita rātou i fa’aro’o i te parau nō Iesu Mesia. E mea ’ōpere Korenelio i tāna faufa’a i te feiā veve ’e e mea pure ’oia i te Atua.

Te ’Ohipa 10:1–2

I te hō’ē avatea, ’ua haere mai te hō’ē melahi ia Korenelio ’a ha’apae ai ’oia i te mā’a ’e ’a pure ai. ’Ua parau te melahi : « E Korenelio, ’ua fa’aro’ohia tā ’oe pure. » ’Ua ’ite te Atua i tōna maita’i. ’Ua parau te melahi ia Korenelio ’ia ’imi i te ’āpōsetolo Petero, tei fa’aea i roto i te ’oire tei pi’ihia ’o Iopa. Nā Petero e parau ia Korenelio e aha tē rave.

Te ’Ohipa 10:3–6, 30–32

’Ua parau Korenelio i tōna mau tāvini i tā te melahi i parau mai. ’Ua tono ’oia ia rātou i Iopa, nō te ani ia Petero ’ia haere mai e fārerei iāna.

Te ’Ohipa 10:7–8

I Iopa, tei ni’a Petero i te tāpo’i fare, tē pure ra. Tē po’ia ra ’oia ’e tē fātata ra i te tāmā’a, ’ite ihora ’oia i te hō’ē ’ōrama.

Te ’Ohipa 10:9–10

’Ua ’ite Petero i te hō’ē ’ahu pū i te poura’a mai nā ni’a mai i te ra’i, ’ua te huru te mau ’ānimara ’e te mau manu i roto. Fa’aro’o a’era Petero i te hō’ē reo i te nā-’ō-ra’a e mea tano ’oia ’ia ’amu i te reira mau ’ānimara. Terā rā ho’i e mau ’ānimara teie ’aita te ’āti Iuda i fa’ati’ahia ’ia ’amu. I parau te ture a Mose ē, e mea vi’ivi’i te reira. ’Aita Petero i hina’aro e ’amu i te reira.

Te ’Ohipa 10:11–14

’Ua parau te reo ē ’ua fa’ariro te Atua i te hō’ē mea ’ei mea mā ra, ’eiaha ïa e parau e mea vi’ivi’i. E toru taime te ’ōrama i te tupura’a. ’Ua uiui te mana’o o Petero e aha ra ïa teie.

Te ’Ohipa 10:15–17

I taua taime ra, ’ua parau te Vārua ia Petero ē, e toru ta’ata tē ’imi ra iāna. ’Ua parau te Vārua : « ’A haere ato’a atu […] nā’u ho’i rātou i tono mai. »

Te ’Ohipa 10:16–21

E mau tāvini nō Korenelio nā ta’ata to’otoru. ’Ua parau rātou ia Petero nō ni’a i te melahi tā Korenelio i ’ite, ’e ’ua ani atu e ti’a ānei ia Petero ’ia haere mai e ha’api’i iāna. Tei mātauhia, ’aita te ’āti Iuda e tomo i te roto i te fare o te ta’ata e ’ere i te ’āti Iuda, ’e ’aita te mau ’āpōsetolo i ha’api’i ia rātou i te ’evanelia. ’Ua ha’amana’o rā Petero i tāna ’ōrama, ’ua fa’aoti a’era e haere.

Te ’Ohipa 10:22, 28

I tō Petero taera’a atu, tē tīa’i ra Korenelio iāna mai te tahi mau hoa e rave ’e te mau melo o te ’utuāfare. ’Ua parau ’oia ia Petero ē, ’ua ineine rātou nō te fa’aro’o i te mau mea ato’a tā te Atua i fa’aue iāna ’ia parau ia rātou.

Te ’Ohipa 10:26, 33

I teienei, ’ua māramarama Petero i te mea tā te Atua i ha’api’i iāna i roto i te ’ōrama. ’Ua parau Petero i terā mau ta’ata ē, ’aita te Atua e here i te hō’ē nūna’a ’aore rā i te hō’ē pupu ta’ata hau atu i te tahi. E fa’ari’i te Atua i te ta’ata ato’a e pe’e iāna ’e ’o tē rave i te mea ti’a. ’Ua ha’api’i Petero ia Korenelio ’e i tōna ’utuāfare ’e i tōna mau hoa nō ni’a ia Iesu Mesia.

Te ’Ohipa 10:34–43

’A ha’api’i ai ’oia, ’ua haere mai te Vārua Maita’i i te mau ta’ata ato’a e fa’aro’o ra. ’Ua ani Petero ia rātou ’ia bāpetizo ia rātou i te i’oa o Iesu Mesia. ’Ua ha’api’i mai Petero ē, e fa’ari’i-poupou-hia te mau tamari’i ato’a a te Atua i roto i te ’Ēkālesia a Iesu Mesia. ’Ua porohia te ’evanelia a Iesu Mesia i te mau ta’ata ato’a.

Te ’Ohipa 10:44–48