Mataio 21:1–16

’Ua tomo Iesu i roto ia Ierusalema nā ni’a i te ’āteni

’Ua fa’ari’i te mau ta’ata i tō rātou Fa’aora

Tē fātata ra te taime nō te Pāsa a te ’āti Iuda, e ’ōro’a faufa’a rahi nō te mau ’āti Iuda. ’Ua haere mai e rave rahi ta’ata i Ierusalema nō te Pāsa a te ’āti Iuda. ’Ua haere ato’a mai Iesu ’e tāna mau pipi. I te fa’aro’ora’a te ta’ata tē haere mai ra Iesu, ’ua haere atu rātou e fārerei iāna.

Mataio 21: ; Ioane 12:12–13

I te pirira’a Iesu ’e tāna mau pipi ia Ierusalema, ’ua ani ’oia ia rātou ’ia ’āfa’i mai i te hō’ē ’āteni. E rave rahi matahiti nā mua atu, ’ua tohu te hō’ē peropheta ē e haere mai te Fa’aora ma te ha’eha’a, nā ni’a i te hō’ē ’āteni ’āpī.

Mataio 21:1–7 ; hi’o ato’a Zekaria 9:9

’Ua tomo Iesu i roto i te ’oire nā ni’a i te hō’ē ’āteni. ’Ua ’oa’oa roa te ta’ata i te ’itera’a iāna. ’Ua fa’ari’i rātou iāna mai te hō’ē ari’i. ’Ua tu’u rātou i te mau ’āma’a rā’au ’e i te mau ’ahu nā raro, ’ia haere te ’āteni nā ni’a iho. ’Ua ha’amāuruuru rātou i te Atua ma te tuō : « Hosana ! ’ia ora na te Ari’i o ’Īserā’ela ’o tei haere mai ma te i’oa o te Fatu. »

Mataio 21:8–9 ; Luka 19:36–38 ; Ioane 12:13

’Ua uiui haere te ta’ata i Ierusalema e aha tē tupu ra. « ’O vai teie ? », ’ua ui rātou. ’Ua pāhono vetahi ē, ’o Iesu nō Nazareta.

Mataio 21:10–11

I muri iho, ’ua haere Iesu i te hiero. Tē ’aitaui ra te tahi mau ta’ata i te moni ’e tē ho’oho’o ra i te mau ’ānimara nō te tūsia. ’Ua ’ite Iesu ē tē vai ra te mana’o ’ino i reira.

Mataio 21:12

E mea au ’ore nā Iesu te mea ē, tē ’āpī ra rātou i ni’a i te ta’ata tei hina’aro e ha’amori i roto i te hiero. ’Ua tīahi ’oia ia rātou i rāpae i te hiero ’e ’ua fa’atahuri i tā rātou mau ’aira’amā’a. ’Ua nā ’ō ’oia : « E parauhia tō’u fare e fare purera’a, fa’arirohia iho nei rā e ’ōutou ’ei ana nō te ’eiā haru. »

Mataio 21:12–13 ; hi’o ato’a Isaia 56:7 ; Ieremia 7:11

’Ua haere mai te mau matapō ’e te mau piri’o’i ia Iesu i roto i te hiero, ’e ’ua fa’aora ’oia i tō rātou ma’i. ’Ua pi’i te mau tamari’i : « Hosana », nō te ’āruera’a ia Iesu, ’e nō te paraura’a ē ’o ’oia te Fa’aora.

Mataio 21:14–15

’Ua riri vetahi o te mau tahu’a ’e o te mau pāpa’i parau i te ’itera’a i tā Iesu i rave ’e i te fa’aro’ora’a i tā te tamari’i e parau ra. ’Ua fa’aha’amana’o Iesu ia rātou i te hō’ē pāpa’ira’a mo’a tei parau ē e fa’atupu te Atua i te ’āruera’a maita’i roa a’e nā roto i te vaha o te mau tamari’i.

Mataio 21:15–16 ; hi’o ato’a Salamo 8:2