Te ’Ohipa 6–7
’Ua parau pāpū Setephano nō Iesu Mesia
E tāvini itoito mau tei hōro’a i tōna ora nō tōna ’itera’a pāpū
’Ua tupu ’oi’oi te ’Ēkālesia. Tē tāfifi ra te mau ’āpōsetolo nō te ha’apa’o i te tā’āto’ara’a o te mau melo.
Te ’Ohipa 6:1–2
’Ua fa’aoti te mau ’āpōsetolo e pi’i e hitu ta’ata ’o tē nehenehe e tauturu mai. ’Ua ani rātou i te mau melo ’ia hi’o mai i te mau tāne mana’o pa’ari ’e tei ’ī i te Vārua Maita’i.
Te ’Ohipa 6:3
Hō’ē o te mau ta’ata tā rātou i mā’iti ’o Setephano ïa. ’Ua hōro’a te mau ’āpōsetolo i te hō’ē ha’amaita’ira’a iāna. E fa’aro’o rahi tō Setephano ’e ’ua rave i te mau temeio rarahi i rotopū i te ta’ata.
Te ’Ohipa 6:5–8
’Ua ha’api’i Setephano nō ni’a ia Iesu Mesia ma te pa’ari ’e te Vārua. ’Aita rā te feiā fa’atere o te hō’ē sunago i au roa i te mea tāna e ha’api’i. ’Ua parau rātou ē, tē parau pāto’i ra ’oia ia Mose ’e i te Atua. ’Ua ’āfa’i rātou ia Setephano i mua i te tahu’a rahi ’e i te tahi atu feiā fa’atere.
Te ’Ohipa 6:9–15 ; 7:1
’Ua riro te hōho’a mata o Setephano mai te hōho’a mata o te hō’ē melahi. ’Ua fa’aha’amana’o ’oia i te feiā fa’atere ē, ’ua tono te Atua ia Mose nō te fa’aora i te ’āti ’Īserā’ela, ’aita rā rātou i pe’e noa ia Mose. ’Ua parau ’o Setephano ē, mai te huru Mose ia Iesu Mesia. ’Ua tono te Atua ia Iesu nō te fa’aora i tōna mau ta’ata, ’aita rā te feiā fa’atere i pe’e iāna. ’Ua riri te feiā fa’atere ia Setephano.
Te ’Ohipa 7:20–43, 51–54
Ma te ’ī i te Vārua Maita’i, ’ua hi’o ’o Setephano i ni’a i te ra’i. ’Ua ’ite ’oia ia Iesu Mesia i te ti’ara’a i pīha’i iho i te Metua i te ao ra.
Te ’Ohipa 7:55–56
I tō Setephano paraura’a i te feiā fa’atere i te mea tāna i ’ite, ’ua riri atu ā rātou. ’Ua tuō rātou ma te riri ’e ’ua haru mai ia Setephano. Huti ihora rātou iāna i rāpae i te ’oire.
Te ’Ohipa 7:57
’Ua tu’u rātou i tō rātou ’ahu i te ’āvae o te hō’ē ta’ata, ’o Saulo te i’oa. Pēhi atu ra rātou ia Setephano i te ’ōfa’i nō te ha’apohe iāna. ’Ua ’āfaro Saulo i te mea tā rātou e rave. ’Ua pure Setephano. ’Ua ani ’oia i te Fatu ’ia fa’a’ore i te hapa a te ta’ata tei ha’apēpē iāna. ’Ua ani ato’a ’oia i te Fatu ’ia fa’ari’i i tōna vārua i ni’a i te ra’i.
Te ’Ohipa 7:59–60 ; 8:1