Luka 24:1–12, 36–49 ; Ioane 20

’Ua ti’a fa’ahou te Fatu

’Ua upo’oti’a Iesu Mesia i ni’a i te pohe nō te tā’āto’ara’a

’Ua tu’u te mau pipi a Iesu i tōna tino i roto i te mēnema. ’Ua hina’aro rātou e rave rahi atu ā mea nō te aupuru i tōna tino, tē fātata nei rā te Sābati. ’Ua ’ōpua rātou e ho’i fa’ahou mai ’ia oti te Sābati.

Luka 23:52–56

I te po’ipo’i roa i te toru o te mahana i muri a’e i te pohera’a o Iesu, ’ua haere atu ’o Maria Magadala ’e te tahi atu mau ta’ata i te mēnema.

Luka 24:1; Ioane 20:1

I te taera’a atu, ’ua ’ite rātou ē, ’ua tura’i-’ē-hia te ’ōfa’i tāpo’i o te mēnema. ’Ua haere rātou i roto i te mēnema, ’e ’aita te tino o Iesu i reira.

Luka 24:2–3 ; Ioane 20:1

’Ua horo ’o Maria e fa’a’ite ia Petero ’e ia Ioane, ’ua rave-’ē-hia te tino o Iesu e te ta’ata. ’Ua horo atu ra Petero ’e ’o Ioane i te mēnema.

Ioane 20:2–4

I tō rāua taera’a atu i te mēnema, ’ua tomo Petero ’e ’o Ioane i roto. ’Ua ’ite atu rā rāua ’ua mo’e te tino o Iesu. Tei reira noa ā te ’ahu i pū’ohuhia tōna tino.

Ioane 20:5–7

’Ua ho’i Petero ’e Ioane i te fare, ’ua fa’aea rā Maria i pīha’i iho i te mēnema, ma te ta’i. ’Ua hi’o ’oia i roto i te mēnema ’e ’ua ’ite atu ra e piti melahi. ’Ua ui mai ra rāua iāna nō te aha ’oia e ta’i ai. ’Ua parau ’oia ē, ’ua rave-’ē-hia te tino o Iesu, ’e ’aita ’oia i ’ite tei hea roa.

Ioane 20:11–13

Haere mai nei Iesu, ’aita rā ’o Maria i ’ite ē ’o ’ōna terā. ’Ua ui atu ra Iesu iāna, « E terā ra vahine, e aha ’oe i ’oto ai ? » ’Ua mana’o Maria ē, ’o te ta’ata fa’a’apu. Ui a’era ’oia iāna ē, ’ua ’ite ānei ’oia tei hea te tino o Iesu.

Ioane 20:14–15

’Ua parau Iesu : « E Maria .» ’Ua fāriu iho rā ’oia. I teienei rā, ’ua ’ite ’oia ē ’o Iesu ! Na ’ō atura ’oia Iāna : « E te ’Orometua ». ’Ua ani Iesu iāna ’ia haere e fa’a’ite i te tahi atu mau pipi ē, e haere ’ōna i tōna Metua i te ao ra. ’Ua fārerei Maria i te tahi atu mau pipi ’e ’ua fa’a’ite ia rātou ē, ’ua ’ite mata ’oia ia Iesu ’e ’ua ora fa’ahou mai ’oia !

Ioane 20:16–18

I taua pō ra, e rave rahi ’āpōsetolo tei ’āmui mai. ’Ua tāpiri rātou i te mau ’ūputa, ’ua mata’u rātou ’o te tāmata te feiā fa’atere ’āti Iuda e ’imi ia rātou. I reira iho, ’ua ’ite atu ra rātou ia Iesu i te ti’ara’a i rotopū ia rātou. I te ha’amatara’a, ’ua ri’ari’a rātou. ’Ua mana’o rātou ē, e vārua ’oia. ’Ua parau Iesu : « ’Ia ora na ’outou ».

Luka 24:33–38 ; Ioane 20:19

’Ua ani Iesu i te mau ’āpōsetolo ’ia fāfā i tōna nā rima ’e te ’āvae. ’Ua hina’aro ’oia ’ia ’ite rātou ē, e tino tōna, e ’ere i te vārua noa. ’Ua ’amu roa ato’a ’oia i te i’a ’e te meli nā muri iho ia rātou. ’Ua ’oa’oa roa te mau pipi i te ’itera’a iāna !

Luka 24:39–44 ; Ioane 20:20

I muri iho, ’ua tauturu Iesu i tāna mau ’āpōsetolo ’ia hāro’aro’a i te mau pāpa’ira’a mo’a tei ha’api’i nō ni’a i tōna pohera’a ’e i tōna ti’afa’ahoura’a. ’Ua hina’aro ’oia ’ia ha’api’i i te mau ta’ata ato’a ē, maoti ’oia, e nehenehe rātou e tātarahapa ’e e fa’a’orehia tā rātou hara. E riro te mau ’āpōsetolo ’ei ’ite nōna.

Luka 24:44–48

’Aita te ’āpōsetolo Toma i reira i te taera’a mai Iesu. ’Ua parau ’oia ē, e’ita ’oia e ti’aturi ē ’ua ora Iesu maori rā e ’ite mata ’oia i te mau puta naero i roto i tōna nā rima.

Ioane 20:24–25

E va’u mahana i muri mai, ’ua putuputu ’āmui te mau pipi. ’Ua fā fa’ahou mai Iesu. Tei reira ato’a ’o Toma i taua taime ra.

Ioane 20:26

’Ua ani Iesu ia Toma ’ia fāfā i te mau pēpē i roto i tōna nā rima ’e i te ’ao’ao. ’Ua parau ’oia ia Toma : « ’Eiaha e fa’aro’o ’ore, e ti’aturi rā ». ’Ua parau ’o Toma : « E ta’u Fatu ’e tō’u Atua ». I teienei, tē ti’aturi nei ’o Toma ’ua ti’afa’ahou mai Iesu. ’Ua parau Iesu ē, e ha’amaita’ihia te ta’ata ’ia ti’aturi ana’e rātou, noa atu ’aita rātou i ’ite mata atu iāna.

Ioane 20:27–29