Nō ni’a i te Faufa’a ’Āpī

Te ’ā’amu o Iesu Mesia ’e tāna mau pipi

Tē pāpa’i ra te hō’ē peropheta tahito i ni’a i te tahi ’ōtaro parau.

E piti tuha’a nō te Bibilia : te Faufa’a Tahito ’e te Faufa’a ’Āpī. Tei roto i te Faufa’a Tahito te mau pāpa’ira’a nā te mau peropheta nō te tau tahito. ’Ua pāpa’i vetahi o teie mau peropheta ē ’ua fafau te Atua ’ia tono mai i te hō’ē Fa’aora. ’O te Tamaiti a te Atua ’oia ’e e fa’aora ’oia ia tātou mai te hara ’e te pohe nō te fa’ati’a ’ia fa’aea fa’ahou tātou i pīha’i iho i te Atua.

Isaia 53:3–5 ; Iakoba 7:11 ; Mose 4

Tē fa’ati’a nei te Faufa’a ’Āpī ’ua nāhea teie parau fafau i te tupura’a. Tē fa’ati’a nei te reira i te fānaura’a o Iesu Mesia, te Tamaiti a te Atua.

Luka 2:4–7

Tē ha’api’i ra ’o Iesu i te hō’ē pupu ta’ata.

Tē fa’ati’a ato’a ra te Faufa’a ’Āpī i te orara’a o Iesu. ’Ua pārahi ’oia i rotopū i te mau ’āti Iuda ’e ’ua ha’api’i ’oia ia tātou nāhea i te ora e ti’a ai ia tātou ’ia ho’i i te Metua i te ao ra ’ia tae i te hō’ē mahana.

Mataio 5:1–2

Tē aupuru ra ’o Iesu i te hō’ē tamari’i.

’Ua ha’amaita’i ’o Iesu ’e ’ua tāvini i te mau ta’ata. ’Ua rave ’oia e rave rahi semeio nō rātou, mai te fa’aorara’a i te feiā ma’i ’e te fa’aho’ira’a i te ora i roto i te feiā pohe.

Mataio 4:23

Tē fa’atōro’a ra ’o Iesu i te hō’ē o tāna mau ’āpōsetolo.

’Ua mā’iti ’o Iesu hō’ē ’ahuru ma piti o tāna mau pipi ’ia riro ’ei ’āpōsetolo. ’Ua hōro’a ’oia ia rātou i te mana nō te fa’atere i tāna ’Ēkālesia.

Luka 9:1–2

Te matarara’a mai Iesu i rāpae i te mēnema.

Nō te mea ’ua aroha ’oia ia tātou, ’ua amo ’o Iesu i ni’a iāna i te tā’āto’ara’a o tō tātou māuiui, tō tātou ’oto, ’e tā tātou mau hara. ’Ua pohe ’oia nō tātou. E toru mahana i muri iho, ’ua upo’oti’a ’oia i ni’a i te pohe ’e ’ua ti’a fa’ahou mai ’oia ! Tē ora nei Iesu Mesia ’e nā roto iāna, e ti’a ia tātou ’ia tātarahapa i tā tātou mau hara ’e ’ia ora fa’ahou i muri mai i tō tātou pohera’a.

Alama 7:11–13

Tē tai’o ra e piti tamari’i nō teie ’anotau i te Faufa’a ’Āpī.

Nā te feiā i mātau ’e i here ia Iesu i pāpa’i i teie mau mea. ’Ua pāpa’i tāna mau ’āpōsetolo i te mau rata nō te tauturu i te mau melo o te ’ēkālesia ’ia patu i tō rātou fa’aro’o i ni’a ia Iesu Mesia. ’Ua fa’ahereherehia te mau mea tā rātou i pāpa’i e rave rahi roa matahiti te maoro. I teienei, e nehenehe ’outou e tai’o i te reira i roto i te Faufa’a ’Āpī ’e ’ia ha’api’i mai e nāhea i te pe’e ia Iesu Mesia.

Luka 1:1–4