Luka 24:13–25

Tē tāmāhanahana nei Iesu e piti pipi

Te haere-’āmui-ra’a i ni’a i te ’ē’a nō Emausa

I te mahana ’a ti’afa’ahou ai Iesu, tē haere rā e piti pipi mai Ierusalema i te hō’ē ’oire pi’ihia ’o Emausa. E feiā ’āpe’e rātou nō Iesu, ’e tē ’oto ra rāua. Tē paraparau ra rāua te tahi i te tahi nō ni’a i te pohera’a o Iesu ’e te tahi atu mau mea i tupu i terā mau mahana i ma’iri a’enei.

Luka 24:13–14

’A haere noa ai rāua, ’ua haere mai Iesu ’e ’ua haere a’era nā muri iho ia rāua, ’aita rā rāua i ’ite ē ’o Iesu terā. ’Ua ui atu ’oia e aha tā rāua e paraparau ra ’e nō te aha rāua i ’oto ai.

Luka 24:15–17

’Ua māere rāua, ’aita ’oia i ’ite i te ’ohipa i tupu a’enei. ’Ua fa’ati’a rāua i te parau nō Iesu. I mana’o rāua ē, e riro ’oia ’ei Fa’aora nō rāua, i teienei rā ’ua pohe ’oia.

Luka 24:18–21

’Ua parau ato’a rāua ē, ’ua haere te tahi mau vahine i tōna mēnema, ’aita fa’ahou te tino o Iesu i reira. ’Ua parau te mau melahi i terā mau vahine ē, tē ora ra Iesu.

Luka 24:21–24

Ha’api’i atu ra Iesu ia rāua i te mea tā te mau pāpa’ira’a mo’a i parau nō ni’a i te Fa’aora. ’Ua parau ’oia ē, ’ua ha’api’i te mau peropheta ē, e pohe te Fa’aora ’e e ti’a fa’ahou mai.

Luka 24:25–27

I te taera’a rātou i Emausa, e tapera’a mahana. ’Ua ani nā pipi e piti ia Iesu ’ia fa’aea mai ia rāua ra. ’Ua pārahi Iesu i raro nō te ’amu e ’o rāua. ’Ua rave ihora ’oia i te pāne, ha’amaita’i ihora, hōro’a atu ra i nā pipi ra. I taua taime ra, ’ua ’ite rāua ’o Iesu teie. I reira iho, ’ua mo’e ’oia.

Luka 24:29–31

’Ua paraparau nā pipi nō ni’a i te māhanahana tā rāua i fa’ari’i i roto i tō rāua ’ā’au ’a ha’api’i ai Iesu ia rāua nō roto mai i te mau pāpa’ira’a mo’a. ’Ua rū rāua e ho’i i Ierusalema nō te fa’a’ite i te tahi atu mau pipi ē, ’ua ’ite rāua ia Iesu.

Luka 24:32–35