’O Simona ’e te mana o te Atua

’Apo i te parau nō te autahu’ara’a a te Atua

Tē hi’o ra Simona i te hō’ē ’āpōsetolo tē fa’aora ra i te hō’ē ta’ata.

Tē ora ra te hō’ē ta’ata i Samaria, ’o Simona tōna i’oa. I tōna fa’aro’ora’a i te ’evanelia a Iesu Mesia, ’ua ti’aturi ’oia. ’Ua māere ato’a ’oia i te mau temeio tā te mau pipi a Iesu i rave ma te mana o te Atua. ’Ua bāpetizohia Simona, nā reira ato’a e rave rahi tāne ’e vahine i Samaria.

Te ’Ohipa 8:5–13

Tē tu’u ra Petero ’e Ioane i tō rāua rima i ni’a i te upo’o o te hō’ē ta’ata.

’Ua fa’aro’o te mau ’āpōsetolo i Ierusalema ē, tē bāpetizohia ra te mau ta’ata i Samaria. Haere atu ra Petero ’e Ioane i Samaria. Ma te fa’a’ohipa i te mana o te Atua, te autahu’ara’a, ’ua tu’u rāua i tō rāua rima i ni’a i te mau ta’ata tei bāpetizohia ’e ’ua hōro’a ia rātou i te hōro’a nō te Vārua Maita’i.

Te ’Ohipa 8:14–17

Tē hōro’a ra Simona i te moni nō te ho’o mai i te autahu’ara’a a te Atua.

I tō Simona ’itera’a ia Petero ’e Ioane i te ravera’a i te reira, ’ua hōro’a ’oia i te moni ia rāua ma te parau ē : « E hō mai ato’a mai i tenā na mana nō’u. » ’Ua hina’aro ’oia e ho’o mai i te autahu’ara’a a te Atua ’ia ti’a ato’a iāna ’ia hōro’a i te hōro’a nō te Vārua Maita’i.

Te ’Ohipa 8:18–19

Tē ha’api’i ra Petero ia Simona nō ni’a i te autahu’ara’a.

’Ua fa’ata’a atu Petero ē, ’aita e ta’ata e nehenehe e ho’o mai i te mana o te Atua. E hōro’a te reira nō ’ō mai iāna ra. Parau atu ra Petero ia Simona e tītauhia i tōna ’ā’au ’ia taui. ’Ua ani ’oia ia Simona ’ia tātarahapa ’e ’ia pure i te Atua nō te fa’a’orera’a hara.

Te ’Ohipa 8:20–23

Tē ani ra Simona ia Petero ’ia fa’a’ore i tāna hapa.

’Ua tātarahapa ’o Simona. ’Ua ani ’oia ia Petero ’ia pure nōna nō te tauturu iāna ’ia taui.

Te ’Ohipa 8:24