Luka 4:16–31

Tē fa’a’ite pāpū ra ’o Iesu i tāna misiōni

’Ua pāto’ihia ’oia i Nazareta

’Ua haere atu ’o Iesu i Nazareta, i reira tōna ’utuāfare ’e tōna mau hoa e ora ai. ’O te vāhi ïa ’oia i pa’ari ai. I te mahana sābati, ’ua haere ’oia i te sunago, i reira te mau ta’ata e ’imi ai i te mau pāpa’ira’a mo’a ’e e ha’amori i te Atua.

Luka 4:16–17

I roto i te sunago, ’ua ti’a ’o Iesu ’e ’ua tai’o i te pāpa’ira’a mo’a a te peropheta ra ’o Isaia. ’Ua fa’a’ite te pāpa’ira’a mo’a ē e tae mai te Fa’aora ’ia tae i te hō’ē mahana. E poro ’oia i te ’evanelia i te feiā veve ’e e fa’aora i te mau ’ā’au ’oto. E tauturu ’oia i te feiā matapō ’e te feiā e māuiui ra.

Isaia 61:1–2 ; Luka 4:17–19

’Ua fa’aoti ’o Iesu i te tai’o ’e ’ua pārahi. ’Ua hi’o te mau ta’ata ato’a iāna. ’Ua parau ’oia ia rātou ē i taua iho ā mahana, e tupu mau te pāpa’ira’a mo’a tāna i tai’o. ’O ’oia te Fa’aora.

Luka 4:21

’Ua māere roa te mau ta’ata nō Nazareta i tā Iesu i parau. E mea nāhea ē ’o Iesu te Fa’aora ? Nō rātou, ’o te tamaiti noa ’oia nā Maria ’e ’o Iosepha, ’eiaha rā te Tamaiti a te Atua. Nō rātou, e au ’oia i te hō’ē ta’ata huru mātarohia.

Luka 4:22

’Ua ’ite ’o Iesu ē ’ua hina’aro te mau ta’ata ’ia rave ’oia i te tahi semeio, ’ia ha’apāpū ’o ’oia te Fa’aora. ’Ua ha’api’i atu ’oia ē nō te feiā ti’aturi te mau semeio, ’e i te tahi taime ’ua rave te Atua i te mau semeio nō te feiā e ’ere nō ’Īserā’ela nō te mea ’ua rahi atu tō rātou fa’aro’o. ’Ua riri ihora te tahi mau ta’ata i roto i te sunago ia Iesu.

Luka 4:23–28

’Ua fa’ahepo rātou iāna ’ia haere atu i rāpae i te ’oire ’e ’ia haere i ni’a i te ’āivi. ’Ua hina’aro rātou e tūra’i iāna mai ni’a atu i te ’āivi i raro.

Luka 4:28–29

’Ua ma’ue ’ē atu rā ’oia i te mau ta’ata i hae.

Luka 4:30

Nō te mea ’aita rātou i hina’aro iāna i Nazareta, ’ua haere atu ra ’o Iesu i te tahi atu ’oire nō te ha’api’i atu.

Luka 4:31–32