Xtikibʼankil
Li na’leb’ chirix li Ak’ Chaq’rab’
Li seraq’ chirix li Jesukristo ut eb’ li neke’taaqen re
Li Santil Hu jachbʼil ru saʼ wiibʼ jachal: li Najter Chaqʼrabʼ ut li Akʼ Chaqʼrabʼ. Sa’ li Najter Chaq’rab’ wankeb’ xtz’iib’ahom najteril profeet chiru najter kutan chaq. Junjunq reheb’ li profeet a’an ke’xtz’iib’a naq li Dios kixyeechi’i xtaqlankil chaq jun aj Kolonel. A’anaq li Ralal li Dios ut tixkol qix chiru li maak ut chiru li kamk re naq tooruuq chi wank wi’chik rik’in li Dios.
Isaias 53:3–5; Jakob 7:11; Moises 4
Li Ak’ Chaq’rab’ naxye chan ru naq kitz’aqlok ru li yeechi’ihom a’an. Na’aatinak chirix lix yo’lajik li Jesukristo, li Ralal li Dios.
Lukas 2:4–7
Li Ak’ Chaq’rab’ na’aatinak ajwi’ chirix lix yu’am li Jesus. Kiwan sa’ xyanqeb’ laj Judio ut kixk’ut chiqu chan ru toowanq re naq tooruuq chi sutq’iik rik’in li qaChoxahil Yuwa’ sa’ jun kutan.
Mateo 5:1–2
Li Jesus kirosob’tesiheb’ ut kik’anjelak chiruheb’ li kristiaan. Naab’al li sachb’a-ch’oolej kixb’aanu choq’ reheb’, jo’ xk’irtesinkileb’ li yajeb’ ut xwaklesinkileb’ li kamenaq.
Mateo 4:23
Li Jesus kixsik’eb’ ru kab’laju reheb’ li neke’taaqen re, re naq te’wanq choq’ apostol. Kixk’e li wankilal re xb’eresinkil lix Iglees reheb’.
Lukas 9:1–2
Sa’ xk’ab’a’ naq nokoxra, li Jesus kixk’ul chixjunil li qarahilal, xrahil qach’ool, ut li qamaak sa’ xb’een. Kikam sa’ qak’ab’a’. Oxib’ kutan xkamik, kinumta sa’ xb’een li kamk ut kiwakli chi yo’yo! Li Jesukristo yo’yo, ut sa’ xk’ab’a’ a’an naru naqajal qak’a’uxl chirixeb’ li qamaak ut naru taawanq qayu’am chirix naq nokokam.
Li kristiaan li ke’nawok chaq ru ut ke’rahok chaq re li Jesus ke’xtz’iib’a resileb’ li na’leb’ a’an. Eb’ lix apostol ke’xtz’iib’aheb’ li hu re xtenq’ankileb’ li komon sa’ li Iglees chixwaklesinkil lix paab’aaleb’ chirix li Jesukristo. Lix tz’iib’ahomeb’ neke’k’uulaman chiru k’iila chihab’. Anajwan naru nakawil lix tz’iib’ahomeb’ sa’ li Ak’ Chaq’rab’ ut naru nakatzol chan ru xtaaqenkil li Jesukristo.
Lukas 1:1–4