Hechos 10

Laj Kornelio ut eb’ li rochb’een ke’xk’ul li Santil Musiq’ej

Li evangelio taawulaq sa’ chixjunileb’ li teepal

Laj Kornelio, a’an jun aj taqlanel sa’ xyanqeb’ laj soldado Romano. A’an ut lix junkab’al neke’xpaab’ li Dios, a’b’an maawa’eb’ laj Judio ut maak’a’ xnawomeb’ chirix li Jesukristo. Laj Kornelio naxtenq’aheb’ li neb’a’ ut natijok chiru li Dios.

Hechos 10:1–2

Jun li anjel kixk’ut rib’ chiru laj Kornelio naq yoo chi tijok ut chixkuyb’al xsa’. Chan li anjel, “At Kornelio, li Dios xrab’i laa tij.” Li Dios kiril naq laj Kornelio naxtenq’aheb’ li ras riitz’in. Li anjel kixye re laj Kornelio naq tixtaw li apostol aj Pedro, li wan chaq sa’ li tenamit Jope xk’ab’a’. Laj Pedro tixye re laj Kornelio k’a’ru tixb’aanu.

Hechos 10:3–6, 30–32

Laj Kornelio kixye reheb’ lix moos k’a’ru xye li anjel. Kixtaqlaheb’ aran Jope re te’xpatz’ re laj Pedro naq taawulaq rik’in.

Hechos 10:7–8

Aran Jope, laj Pedro yoo chaq chi tijok sa’ xb’een li rochoch. Kichal xtz’okajik ut xik raj re chi wa’ak, a’ut ki’ok chirilb’al jun li k’utb’esinb’il matk’.

Hechos 10:9–10

Laj Pedro kiril jun nimla t’ikr chi kub’eek chaq sa’ choxa; wankeb’ k’iila paay chi xul chi sa’. Toja’ naq kirab’i jun xyaab’ kuxej li kixye naq laj Pedro tixtiweb’ li xul a’an. A’b’an a’aneb’ li xul li ink’a’ naru xtiwb’aleb’ sa’ xk’ab’a’ xchaq’rab’eb’ laj Judio. Lix chaq’rab’ laj Moises kixye naq tz’aj ruheb’ li xul a’an. Laj Pedro ink’a’ kiraj xtiwb’aleb’.

Hechos 10:11–14

Li xyaab’ kuxej kixye naq ink’a’ taayeehe’q naq tz’aj ru li k’a’ru saqob’resinb’il xb’aan li Dios. Kik’utb’esiik li matk’ a’an oxib’ sut. Laj Pedro kiraj xnawb’al k’a’ru naraj naxye.

Hechos 10:15–17

Aran, li Santil Musiq’ej kixye re laj Pedro naq wankeb’ li winq li yookeb’ chixsik’b’al. “Matk’oxlak chi xik rik’ineb’,” chan, “xb’aan naq laa’in xintaqlank chaq reheb’.”

Hechos 10:16–21

Li oxib’ chi winq, a’aneb’ lix moos laj Kornelio. Ke’xye re laj Pedro naq jun li anjel kixk’ut rib’ chiru laj Kornelio, ut ke’xpatz’ re laj Pedro naq taawulaq rik’in laj Kornelio. Sa’ li najter q’e kutan, eb’ laj Judio ink’a’ neke’ok sa’ rochocheb’ li maawa’eb’ aj Judio, ut eb’ li apostol ink’a’ neke’xk’ut li evangelio chiruheb’ a’an. A’b’an sa’ xk’ab’a’ lix matk’, laj Pedro kixye naq taawulaq rik’in laj Kornelio.

Hechos 10:22, 28

Naq laj Pedro kiwulak aran, ak wan laj Kornelio chiroyb’eninkil rochb’eeneb’ li ramiiw ut lix junkab’al. Kixye re laj Pedro naq te’raj rab’inkil yalaq k’a’ru chi na’leb’ taaraj li Dios naq laj Pedro tixye reheb’.

Hechos 10:26, 33

Aran, laj Pedro ki’ok chixtawb’al ru li na’leb’ yoo chaq chixyeeb’al li Dios sa’ lix matk’. Laj Pedro kixye reheb’ naq li Dios ink’a’ jwal naxra junaq tenamit malaj teepal sa’ xb’eeneb’ lix komon chik. Li Dios naxk’ulub’a yalaq ani nataaqen re a’an ut naxb’aanu li k’a’ru us. Laj Pedro kixk’ut li na’leb’ chirix li Jesukristo chiru laj Kornelio ut eb’ li rochb’een.

Hechos 10:34–43

Naq laj Pedro yoo chixk’utb’al li na’leb’, li Santil Musiq’ej kichal sa’ xb’eeneb’ li yookeb’ chirab’inkil. Laj Pedro kixb’oqeb’ chixk’ulb’al li kub’iha’ sa’ xk’ab’a’ li Jesukristo. Laj Pedro ki’ok chixnawb’al naq wan xna’aj chixjunileb’ li ralal xk’ajol li Dios sa’ lix Iglees li Jesukristo. Lix evangelio li Jesukristo kik’utman chiru yalaj ani.

Hechos 10:44–48