Laj Simon ut lix wankilal li Dios—Xtawb’al li na’leb’ chirix lix tijonelil li Dios

Hechos 8:5–24

Laj Simon ut lix wankilal li Dios

Xtawb’al li na’leb’ chirix lix tijonelil li Dios

Laj Simon yoo chirilb’al jun li k’irtesink xb’aan jun li apostol.

Jun li winq aj Simon xk’ab’a’ kiwan aran Samaria. Naq kirab’i resil lix evangelio li Jesukristo, kixpaab’. Kitoch’e’ ajwi’ xch’ool xb’aan li sachb’a-ch’oolej neke’xb’aanu lix tzolom li Jesus rik’in lix wankilal li Dios. Kikub’e xha’ laj Simon, jo’ ajwi’ naab’aleb’ chik li winq ut ixq aran Samaria.

Hechos 8:5–13

Laj Pedro ut laj Jwan yookeb’ chixk’eeb’al li ruq’ sa’ xb’een xjolom jun li winq.

Eb’ li apostol aran Jerusalen ke’rab’i resil naq yookeb’ chi kub’sink ha’ aran Samaria. Laj Pedro ut laj Jwan ke’wulak Samaria. Rik’in lix wankilal li Dios—a’an li tijonelil—ke’xk’e li ruq’eb’ sa’ xb’een xjolomeb’ li ke’kub’e xha’ ut ke’xk’e reheb’ a’an li maatan re li Santil Musiq’ej.

Hechos 8:14–17

Laj Simon kixyeechi’i tumin re xloq’b’al lix tijonelil li Dios.

Naq laj Simon kiril laj Pedro ut laj Jwan chixb’aanunkil a’an, kixyeechi’i tumin reheb ut kixye, “K’ehomaq ajwi’ we li wankilal a’in.” Kiraj xloq’b’al lix tijonelil li Dios re naq truuq ajwi’ chixk’eeb’al li maatan re li Santil Musiq’ej.

Hechos 8:18–19

Laj Pedro kixk’e xna’leb’ laj Simon chirix li tijonelil.

Laj Pedro kixch’olob’ naq maa’ani naru naloq’ok re lix wankilal li Dios. A’an jun maatan k’eeb’il xb’aan li Dios. Laj Pedro kixye re laj Simon naq tento tixjal lix ch’ool. Kixb’oq laj Simon chixjalb’al xk’a’uxl ut chi tijok chiru li Dios re naq tixpatz’ xkuyb’al xmaak.

Hechos 8:20–23

Laj Simon kixpatz’ re laj Pedro naq tixkuy xmaak.

Kiraho’ xch’ool laj Simon. Kixpatz’ re laj Pedro naq taatijoq chirix re naq tixjal xk’a’uxl.

Hechos 8:24