Lukas 24:1–12, 36–49; Jwan 20

Xwakli li Jesus

Li Jesukristo nanumta sa’ xb’een li kamk choq’ re chixjunileb’

Eb’ lix tzolom li Jesus ke’xk’e lix tz’ejwal li Jesus sa’ li muqleb’aal. Ke’raj xkawresinkil lix tz’ejwal, a’ut tiklaak re li hilob’aal kutan. Ke’xk’uub’ xna’leb’ naq te’sutq’iiq chirix li hilob’aal kutan re xchoyb’al xkawresinkil.

Lukas 23:52–56

Toj eq’la chi us, sa’ rox kutan xkamik li Jesus, li xMaria aj Magdala ut xkomoneb’ chik li ixq neke’xik sa’ li muqleb’aal.

Lukas 24:1; Jwan 20:1

Naq ke’wulak aran, koxe’xtaw naq isinb’il ut tolk’osinb’il chik li pek chire li muqleb’aal. Ke’ok sa’ li muqleb’aal, ut ink’a’ ke’xtaw xtib’el li Jesus.

Lukas 24:2–3; Jwan 20:1

Li xMaria kixchap raanil chixyeeb’al re laj Pedro ut laj Jwan naq wan ani ki’isink re lix tib’el li Jesus. Laj Pedro ut laj Jwan ke’xchap raanil toj sa’ li muqleb’aal.

Jwan 20:2–4

Naq ke’wulak sa’ li muqleb’aal, laj Pedro ut laj Jwan ke’ok chi sa’. Ke’ril naq maak’a’ chik lix tib’el li Jesus aran. Li b’atleb’ t’ikr kib’ate’ wi’ li Jesus toj wan aran.

Jwan 20:5–7

Ke’sutq’i sa’ rochocheb’ laj Pedro ut laj Jwan, a’ut toj kikana li xMaria chire li muqleb’aal, yoo chi yaab’ak. Ki’ilok chi sa’ li muqleb’aal ut kiril wiib’eb’ li anjel. Eb’ li anjel ke’xpatz’ re k’a’ut naq nayaab’ak. Kichaq’ok li xMaria, kixye naq xe’xxok lix tib’el li Jesus, ut ink’a’ naxnaw b’ar ta xe’xk’e.

Jwan 20:11–13

Toja’ naq kik’ulun li Jesus, a’b’an li xMaria ink’a’ naxnaw ru. Chan li Jesus re, “At ixq, k’a’ naq nakatyaab’ak?” Sa’ xch’ool li xMaria naq a’an laj ilol awimq. Li xMaria kixpatz’ re ma naxnaw b’ar wan xtib’el li Jesus.

Jwan 20:14–15

“Maria,” chan li Jesus. Li xMaria kixsutq’isi rib’. Kixk’e reetal naq a’an li Jesus! “At tzolonel,” chan li xMaria re. Li Jesus kixpatz’ re naq tixye reheb’ lix tzolom naq a’an tento taaxik rik’in lix Choxahil Yuwa’. Li xMaria kixtaweb’ li rech aj tzolomil ut kixye reheb’ naq xril li Jesus ut naq yo’yo wi’chik!

Jwan 20:16–18

Ewu sa’ li kutan a’an, ch’utch’uukeb’ lix k’ihaleb’ li apostol. Ke’xtz’ap rokeb’aal li kab’l xb’aan xxiweb’ naq eb’ laj jolominel aj Judio te’xyal xtawb’aleb’. Toja’ ut naq k’utaamil li Jesus sa’ xyanqeb’. Ke’ok xxiw li apostol. Sa’ xch’ooleb’ naq a’an jun musiq’ej. Chan li Jesus reheb’, “Chiwanq taxaq eerik’in li tuqtuukil usilal.”

Lukas 24:33–38; Jwan 20:19

Li Jesus kixye reheb’ li apostol naq te’xch’e’ li ruq’ ut li roq. Kiraj naq te’xnaw naq moko musiq’ej ta, wan b’an xtib’el xb’aqel. Kixtzeka ajwi’ jun li kar ut xya’al li kab’. Ke’saho’ xch’ool lix tzolom chirilb’al li Jesus!

Lukas 24:39–44; Jwan 20:20

Li Jesus kixtenq’aheb’ lix apostol chixtawb’aleb’ ru li raqal sa’ li loq’laj hu li neke’xye resil lix kamik ut lix waklijik chi yo’yo. Li Jesus kiraj naq te’xjultika chiruheb’ chixjunil naq sa’ xk’ab’a’ a’an, taaruuq te’xjal xk’a’uxl ut te’kuye’q xmaak. Eb’ lix apostol a’anaqeb’ aj yehol nawom chirix li Jesus.

Lukas 24:44–48

Li apostol aj Tomas maa’ani wan naq kik’ulun li Jesus. Laj Tomas kixye naq ink’a’ tixpaab’ naq yo’yo li Jesus wi ink’a’ taaril sa’ ruq’ li reetalil li klawx.

Jwan 20:24–25

Waqxaqib’aq kutan xnumik a’an, ch’utch’uukeb’ wi’chik lix tzolom li Jesus. Kiwulak li Jesus wi’chik. Laj Tomas wan aran.

Jwan 20:26

Li Jesus kixb’oq laj Tomas chixch’ikb’al li ruq’ sa’ li kʼobʼolal saʼ li ruqʼ ut xkʼatq lix saʼ. “Maak’e aawib’ chi maaka’ aapaab’aal, aj paab’anelaqat b’an,” chan li Jesus re laj Tomas. Kichaq’ok laj Tomas, kixye “At inQaawa’, at inDios!” Toja’ naq chik naq laj Tomas kixpaab’ naq xwakli chi yo’yo li Jesus. Li Jesus kixye naq osob’tesinb’il li ani napaab’an, us ta maajun wa rilom li Jesus.

Jwan 20:27–29