Lukas 24:13–25

Li Jesus naxk’ojob’eb’ xch’ool wiib’ lix tzolom

Wotz neke’b’eek sa’ li b’e naxik Emaus

Sa’ li kutan naq kiwakli chi yo’yo li Jesus, wiib’eb’ lix tzolom yookeb’ chi b’eek chalen Jerusalen toj sa’ jun k’aleb’aal Emaus xk’ab’a’. A’aneb’ aj taaqenel re li Jesus, ut ke’raho’ xch’ool. Neke’raatina rib’ chirix lix kamik li Jesus ut chixjunil chik li xk’ulman chiruheb’ li kutan toje xe’nume’.

Lukas 24:13–14

Naq yookeb’ chi b’eek, li Jesus kijilok ut kib’eek rochb’eeneb’, a’ut ink’a’ ke’xk’e reetal naq a’an li Jesus. Li Jesus kixpatz’ reheb’ k’a’ru neke’aatinak wi’ ut k’a’ut naq neke’raho’ xch’ool.

Lukas 24:15–17

Ke’sach xch’ool naq ink’a’ naxnaw k’a’ru kik’ulman. Ke’xye re li kixk’ul li Jesus. Sa’ xch’ooleb’ a’an naq te’kole’q xb’aan li Jesus, a’ut kamenaq chik.

Lukas 24:18–21

Ke’xye ajwi’ naq ke’wulak lix ixq sa’ lix muqleb’aal, a’b’an maak’a’ chik xtib’el li Jesus aran. Eb’ li anjel ke’xye reheb’li ixq naq yo’yo li Jesus.

Lukas 24:21–24

Toja’ naq li Jesus kixyaab’asi reheb’ k’a’ru naxye li loq’laj hu chirix li Kolonel. Kixye naq eb’ li profeet ke’xjultika naq li Kolonel taakamq toja’ naq taawakliiq wi’chik.

Lukas 24:25–27

Naq ke’wulak aran Emaus, ak yoo chi ewuuk. Li wiib’ chi tzolom ke’xb’oq li Jesus chi kanaak rik’ineb’. Li Jesus kichunla chi wa’ak rochb’eeneb’. Li Jesus kixchap li wa, kirosob’tesi, ut kixjek’ reheb’ lix tzolom. Toja’ ut naq ke’xnaw naq a’an li Jesus. A’b’an sachaamil li Jesus chiruheb’.

Lukas 24:29–31

Li wiib’ chi tzolom ke’xseraq’i chirib’ileb’ rib’ li ke’reek’a sa’ xch’ooleb’ naq li Jesus naxyaab’asi li loq’laj hu chiruheb’. Ke’xchap raanil toj aran Jerusalen re xyeeb’al reheb’ li rech tzolomil naq xe’ril li Jesus.

Lukas 24:32–35