Li Jesus na’ok aran Jerusalen

Li tenamit naxk’ul lix Kolonel

Eb’ li kristiaan neke’royb’eni li Jesus sa’ xsutam Jerusalen.

Ak wulak re li Paswa, jun xnimal ru ninq’e choq’ reheb’ laj Judio. Naab’aleb’ ke’wulak Jerusalen re xninq’ehinkil li Paswa aran. Li Jesus ut eb’ lix tzolom ke’wulak ajwi’ aran. Naq eb’ li kristiaan ke’rab’i naq chal re li Jesus, neke’xik chixk’ulb’al.

Mateo 21:1; Jwan 12:12–13

Li Jesus ut eb’ lix tzolom neke’nach’ok aran Jerusalen.

Naq li Jesus ut eb’ lix tzolom ke’nach’ok aran Jerusalen, li Jesus kixpatz’ reheb’ naq te’xk’am chaq jun li b’uur. K’iila chihab’ chaq junxil, jun li profeet ak kixye naq li Kolonel taachalq sa’ tuulanil, sa’ xb’een jun li b’uur.

Mateo 21:1–7; chi’ilmanq ajwi’ Sakarias 9:9

Li Jesus ki’ok sa’ li tenamit sa’ xb’een jun li b’uur. K’a’jo’ naq ke’saho’ xch’ool li kristiaan naq ke’ril. Ke’xk’ul a’an jo’ jun li rey. Ke’xk’e xxaq li mokooch ut t’ikr chiru li ch’och’ b’ar wi’ li Jesus taanume’q sa’ xb’een lix b’uur. Ke’b’antioxin chiru li Dios ut ke’xjap re chixyeebal, “Usilaatinanb’il li xchal sa’ xk’ab’a’ li Qaawa’! Chinimaaq xloq’al li Qaawa’ taqe’q.”

Mateo 21:8–9; Lukas 19:36–38; Jwan 12:13

Naab’aleb’ aran Jerusalen ke’xpatz’ rib’ k’a’ru yoo chi k’ulmank. “Ani a’an?” chankeb’. Wankeb’ li ke’sumen ut ke’xye naq a’an li Jesus aj Nazareth.

Mateo 21:10–11

Li Jesus narileb’ jun siir li kristiaan chi jalink tumin sa’ li santil ochoch.

Toja’ naq li Jesus kiwulak sa’ li santil ochoch. Junjunqeb’ li kristiaan yookeb’ chi jalink tumin ut chi k’ayink xul li te’mayejaaq. Li Jesus kixnaw naq moko ch’olch’o ta yookeb’ xb’aanunkil.

Mateo 21:12

Li Jesus naxye reheb’ li yookeb’ chi jalink tumin naq te’elq sa’ li santil ochoch.

Ink’a’ nawulak chiru li Jesus naq yooqeb’ chi ch’e’ink tumin rik’ineb’ li neke’raj loq’onink sa’ li santil ochoch. Kirisiheb’ sa’ li santil ochoch ut kixkut lix meexeb’ chi ch’och’. A’an kixye, “Li wochoch rochochil li tijok tixk’ab’a’in; ut laa’ex yookex chixk’eeb’al choq’ xna’ajeb’ laj elq.”

Mateo 21:12–13; chi’ilmanq ajwi’ Isaias 56:7; Jeremias 7:11

Li Jesus naxk’irtesiheb’ li kristiaan sa’ li santil ochoch.

Li mutz’eb’ malaj li ink’a’ neke’ru chi b’eek ke’xsik’ li Jesus sa’ li santil ochoch ut a’an kixk’irtesiheb’. Li kok’al ke’xjap re chixyeeb’al “Hosanna,” ut neke’xloq’oni li Jesus ut rik’in xyeeb’al naq a’an laj Kolonel.

Mateo 21:14–15

Li Jesus na’aatinak rik’ineb’ laj tij ut eb’ laj tz’iib’.

Junjunq reheb’ laj tij ut eb’ laj tz’iib’ ke’josq’o’ naq ke’ril li kixb’aanu li Jesus ut naq ke’rab’i li neke’xye li kok’al. Li Jesus kixjultika reheb’ jun raqal sa’ li loq’laj hu li naxye naq li Dios tixwaklesi jun li b’ich sa’ xtz’uumal reheb’ li kok’al.

Mateo 21:15–16; chi’ilmanq ajwi’ Salmos 8:2