Lukas 4:16–31

Li Jesus naxch’olob’ xyaalal lix k’anjel

Ki’isiik chaq aran Nazaret

Li Jesus kiwulak aran Nazaret, b’ar wi’ wankeb’ lix komon ut li ramiiw. Aran ajwi’ kik’i chaq. Sa’ li hilob’aal kutan, kiwulak sa’ li ch’utleb’aal kab’l, b’ar wi’ li kristiaan neke’wulak chixtzolb’al li loq’laj hu ut chixloq’oninkil li Dios.

Lukas 4:16–17

Sa’ li ch’utleb’aal kab’l, li Jesus kixaqli ut kixyaab’asi jun raatin li profeet aj Isaias sa’ li loq’laj hu. Li loq’laj hu naxye naq taachalq jun aj Kolonel. Tixjultika li evangelio reheb’ li neb’a’ ut tixk’irtesi li yot’b’il aamej. Tixtenq’aheb’ li mutz’ ut li rahob’tesinb’ileb’.

Isaias 61:1–2; Lukas 4:17–19

Li Jesus kiraqe’ chixyaab’asinkil li aatin a’an ut kichunla. Chixjunileb’ yookeb’ chixka’yankil. Kixye reheb’ naq sa’ li kutan a’an, li aatin li kixyaab’asi ak yoo chi tz’aqlok ru. A’an li Kolonel.

Lukas 4:21

Eb’ aj Nazaret sachsookeb’ xch’ool xb’aan lix yehom li Jesus. Chan ru naq a’an raj li Kolonel? Ke’xk’oxla naq a’an yal ralal li xMaria ut laj Jose, moko Ralal ta li Dios. Choq’ reheb’ a’an, a’an yal rech winqilaleb’.

Lukas 4:22

Li Jesus kixnaw naq li kristiaan neke’raj naq tixb’aanu junaq sachb’a-ch’oolej re xk’utb’al naq a’an li Kolonel. Kixye naq li sachb’a-ch’oolej, a’an choq’ reheb’ li wan xpaab’aal, ut wan naq li Dios naxb’aanu li sachb’a-ch’oolej choq’ reheb’ li maawa’eb’ aj Israel xb’aan naq ninqeb’ wi’chik lix paab’aal. Junjunqeb’ li kristiaan sa’ li ch’utleb’aal kab’l ke’josq’o’ rik’in li Jesus.

Lukas 4:23–28

Ke’xmin ru chi elk sa’ li tenamit ut chi taqe’k sa’ xb’een jun li tzuul. Aran sa’ xb’een li tzuul ke’raj xkutb’al li Jesus taq’a.

Lukas 4:28–29

A’b’an li Jesus ki’eelelik chiruheb’ li yookeb’ xjosq’il.

Lukas 4:30

Li Jesus ki’ok chi k’utuk sa’ jalan chik li tenamit xb’aan naq ink’a’ ke’raj naq taawanq aran Nazaret.

Lukas 4:31–32