Hechos 6–7

Laj Esteban kixch’olob’ xyaalal li Jesus

Kaw xch’ool jun lix moos li Qaawa’ naq kikamsiik

Yoo chaq chi nimank li Iglees sa’ junpaat. Ch’a’aj choq’ reheb’ li apostol naq te’ril chixjunileb’ li komon.

Hechos 6:1–2

Eb’ li apostol ke’xye naq te’xb’oqeb’ wuqubeb’ aj tenq’. Ke’xpatz’ reheb’ laj paab’anel naq te’xsik’eb’ li winq chaab’ileb’ xna’leb’ ut wan li Santil Musiq’ej rik’ineb’.

Hechos 6:3

Jun reheb’ li ke’xsik’eb’ ru, a’an laj Esteban. Eb’ li apostol ke’rosob’tesi laj Esteban. Kaw xpaab’al laj Esteban ut kixb’aanu nimla sachb’a-ch’oolej chiruheb’ li ras riitz’in.

Hechos 6:5–8

Wan xna’leb’ laj Esteban naq kixk’ut li na’leb’ chirix li Jesukristo, ut wan ajwi’ li Santil Musiq’ej rik’in. A’ut li na’leb’ a’an ink’a’ kiwulak chiruheb’ laj jolominel re li ch’utleb’aal kab’l. Ke’xye naq laj Esteban yoo chixmajewankil laj Moises ut li Dios. Ke’xk’am laj Esteban chiru laj tij ut xkomoneb’ chik laj jolominel

Hechos 6:9–15; 7:1

Ke’ril xnaq’ ru laj Esteban chanchan jun li anjel. Kixjultika reheb’ naq li Dios kixtaqla laj Moises chixkolb’aleb’ laj Israel, a’b’an wan naq ink’a’ neke’ab’in chiru laj Moises. Laj Esteban kixye naq laj Moises, a’an chanchan li Jesukristo. Li Dios kixtaqla li Jesus re tixkol li ras riitz’in, a’b’an eb’ laj jolominel ink’a’ ke’ab’in chiru. Ke’josq’o’ laj jolominel rik’in laj Esteban.

Hechos 7:20–43, 51–54

Chi nujenaq rik’in li Santil Musiq’ej, laj Esteban ki’ilok sa’ choxa. Kiril li Jesukristo chi xaqxo chixk’atq li qaChoxahil Yuwa’.

Hechos 7:55–56

Naq laj Esteban kixye reheb’ laj jolominel k’a’ru kiril, jwal ke’josq’o’ wi’chik. Ke’xjap re rik’in josq’il ut ke’xchap laj Esteben. Ke’xkelo chirix li tenamit.

Hechos 7:57

Ke’xkanab’ lix b’aataleb’ chiroq jun li winq aj Sawlo xk’ab’a’. Toja’ naq ke’xteni chi pek laj Esteban re xkamsinkil. Choq’ re laj Sawlo, us li yookeb’ chixb’aanunkil. Laj Esteban kitijok. Kixpatz’ re li Qaawa’ naq tixkuyeb’ xmaak li yookeb’ chi rahob’tesink re. Kixpatz’ ajwi’ re li Qaawa’ naq tixk’ul lix musiq’ sa’ choxa.

Hechos 7:59–60; 8:1