Eb’ li seraq’ sa’eb’ li loq’laj hu
Li xTabita, jun ixq li “naxb’aanu naab’al li usilal”—Kiwaklesiik chi yo’yo xb’aan xwankil li Jesukristo

Hechos 9:36–42

Li xTabita, jun ixq li “naxb’aanu naab’al li usilal”

Kiwaklesiik chi yo’yo xb’aan xwankil li Jesukristo

Li xTabita yoo chi kemok.

Li xTabita, a’an jun xtzolom li Jesukristo. Nawan sa’ jun li tenamit Jope xk’ab’a’, chixk’atq li palaw. Nawulak chiru xtenq’ankileb’ li neb’a’.

Hechos 9:36

Li xTabita yoo chixsiib’al raq’eb’ li wankeb’ xmajelal.

Li xTabita naxyiib’ li aq’ej ut naxsi reheb’ li ixq li wankeb’ sa’ rajb’al ru. Neke’xra li xTabita.

Hechos 9:39

Kiyajer li xTabita.

Li xTabita kiyajer. Jwal kaw lix yajel, jo’kan naq kikam.

Hechos 9:37

Wiib’eb’ li winq ke’xseeb’a rib’ chixtawb’al laj Pedro.

Jwal ra lix ch’ooleb’ laj paab’anel aran Jope. Ke’xnaw naq nach’ wan laj Pedro, a’an jun lix apostol li Jesus. Ke’xtaqla wiib’eb’ li winq chixyeeb’al re laj Pedro naq tixseeb’a chaq rib’ chi chalk.

Hechos 9:38

Ke’xk’am xb’e laj Pedro toj rik’in li xTabita.

Laj Pedro kiwulak b’ar wi’ wan xtib’el li xTabita. Wankeb’ ajwi’ aran li ixq li ke’tenq’aak xb’aan li xTabita. Ke’xk’ut chiru laj Pedro li aq’ej kixyiib’ li xTabita choq’ reheb’.

Hechos 9:39

Wiq’wo laj Pedro chi tijok chixk’atq li xTabita.

Laj Pedro kixye re li wankeb’ aran naq te’xkanab’ xjunes. Kiwiq’la ut kitijok.

Hechos 9:40

Kiwaklesiik li xTabita chi yo’yo.

Chirix naq kitijok laj Pedro, kixye, “At Tabita, waklin.” Kixte lix sa’ ru ut kichunla. Laj Pedro kixtenq’a li xTabita chi xaqliik. Kiwan wi’chik xyu’am! Li Pedro kixb’oqeb’ li ramiiw li xTabita re naq te’ril. Ke’sach xch’ool! Ke’xnaw naq kiwaklesiik sa’ xk’ab’a’ lix wankil li Jesukristo. Naab’aleb’ chik li kristiaan ke’ok chixpaab’ankil li Kristo.

Hechos 9:40–42