In Remembrance of Me [Aron Paghandom Kanako], ni Walter Rane

Leksiyon 15 Materyal sa Pagpangandam sa Klase

Pagpaduol ngadto ni Jesukristo pinaagi sa Sakramento

Hunahunaa ang kataposang higayon nga ikaw miambit sa sakramento. Unsay imong gibati sa maong kasinatian? Unsa nga pagtagad ang imong gihatag ngadto sa Pag-ula sa Manluluwas ug sa imong relasyon sa pagpakigsaad Kaniya? Samtang magtuon ka sa mga leksiyon sa yunit 4, ikaw adunay oportunidad sa pagkonsiderar kon unsay imong mabuhat aron sa paghimo kang Jesukristo ug sa Iyang Pag-ula nga mas personal, may kalabotan, ug magamit sa imong kinabuhi.

Seksiyon 1

Sa unsang paagi nga ang sakramento makatabang nako nga mas mapaduol ngadto sa Manluluwas?

Pipila ka oras sa wala pa mosulod sa Tanaman sa Getsemani, si Jesus mimando sa Iyang Napulog Duha ka Apostoles sa pag-andam sa pagkaon alang sa Kasaulogan sa Pagpalabay (tan-awa sa Mateo 26:17–19). Dul-an sa 1,500 ka tuig, ang mga anak sa Israel nagsaulog sa Kasaulogan sa Pagpalabay ug migamit sa dugo sa walay lama nga mga nating karnero nga nagsimbolo sa ilang pagkalingkawas gikan sa tiglaglag nga anghel (tan-awa sa Exodo 12:21–28; 13:14–15). Human niini nga pagpangaon, si Jesukristo, ang Kordero sa Dios, mituman sa simbolo sa Kasaulogan sa Pagpalabay sa dihang ang Iyang dugo gipaagas ug Siya nahimong Manluluwas sa kalibotan (tan-awa sa Juan 1:29; 1 Pedro 1:18–19). Isip kabahin sa Iyang kataposang pagpangaon alang sa Kasaulogan sa Pagpalabay, “Siya mitukod sa sakramento isip usa ka handomanan sa Iyang labing dako nga sakripisyo sa pag-ula” (“Ang Buhi nga Kristo: Ang Pagpamatuod sa mga Apostoles,” ChurchofJesusChrist.org). Ang Pag-ula sa Manluluwas maglakip sa Iyang pag-antos sa Getsemani, sa Iyang kamatayon sa krus, ug sa Iyang mahimayaong Pagkabanhaw.

Si Jesus nga mipikas-pikas sa pan atol sa Kataposang Panihapon

icon, pagtuon

Pagtuon agi og Pagpangandam alang sa Klase

Basaha ang Mateo 26:26–28, ug hunahunaa kon unsa kaha ang bation nga makadawat sa sakramento gikan ni Jesukristo.

Ang pan ug bino, o tubig, mao ang sagrado nga mga simbolo sa sakramento. Ang simbolo usa ka pisikal nga representasyon sa konsepto, kalidad, o ideya. Samtang magtuon ka sa mosunod nga mga punto, pamalandongi kon sa unsang paagi nga ang mga simbolo sa sakramento makapahinumdom nimo sa Manluluwas ug sa unsay Iyang gihimo alang nimo:

• Atol sa 40 ka tuig sa karaang Israel diha sa kamingawan, gihatagan sila matag adlaw og mana o “pan gikan sa langit” (Juan 6:31; tan-awa usab sa Salmo 78:24–25). Human sa paghisgot mahitungod sa mana, si Jesukristo namahayag, “Ako mao ang pan nga gikan sa langit. … Ang mokaon niining maong pan mabuhi sa dayon” (Juan 6:51, 58).

• Isip kabahin sa Iyang Pag-ula, ang lawas ni Jesukristo “[gisamaran] alang natong tanan” (“Jesus sa Nazaret, Hari ug Dios,” Mga Himno, nu. 181). Si Presidente Dallin H. Oaks sa Unang Kapangulohan miobserbar, “Tungod kay kini gipikas-pikas, ang matag piraso sa tinapay talagsaon, sama nga ang mga indibidwal nga moambit niini talagsaon” (“Important Aspects of Missionary Work Remain Unchanged, Says Elder Oaks,” Church News, Hunyo 30, 2017, ChurchofJesusChrist.org).

• Ang bino gigamit sa unang sakramento sa pagrepresentar sa dugo ni Jesukristo. Kita gihugasan pinaagi sa Iyang dugo (tan-awa sa 1 Juan 1:7). Karon naggamit kita og tubig, nga timailhan usab og paghugas (tan-awa sa Doktrina ug mga Pakigsaad 27:2) ug mahinungdanon kini sa kinabuhi. Samtang diha sa usa ka atabay, si Jesus miingon sa babaye nga Samarianhon nga ang tubig nga Iyang itanyag kanato sama sa “usa ka tuboran nga mohatag og buhing tubig ug kinabuhing walay kataposan” (Juan 4:14).

• Si Elder D. Todd Christofferson sa Korum sa Napulog Duha ka Apostoles mitudlo: “Ang pasumbingay nga mokaon sa unod [ni Kristo] ug moinom sa Iyang dugo dunay dugang nga kahulogan, ug mao kana ang pagsabot og maayo sa mga hiyas ug kinaiya ni Kristo. … Sa pag-ambit nato sa tinapay ug tubig sa sakramento kada semana, mas maayo nga atong ikonsiderar kon unsa kahingpit natong ilakip ang Iyang kinaiya ug ang sumbanan sa Iyang walay sala nga kinabuhi sa atong kinabuhi ug pagkatawo” (“Ang Buhing Tinapay Nga Nanaog Gikan sa Langit,” Liahona, Nob. 2017, 37).

mga simbolo sa sakramento

icon, irekord

Irekord ang Imong mga Hunahuna

Isulat ang mga tubag sa mosunod nga mga pangutana: Unsay nagustohan nimo mahitungod sa simbolikanhong mga kahulogan sa pan ug tubig? Unsay gusto nimong hinumdoman mahitungod sa Manluluwas sa sunod higayon nga moambit ka sa pan ug tubig atol sa sakramento?

Seksiyon 2

Sa unsang paagi nga ang pag-ambit sa sakramento maghatag nako og mas dakong kahigayonan sa gahom sa Ginoo?

Atol sa Iyang pagpangalagad taliwala sa mga Nephite ug mga Lamanite, si Jesukristo mihatag sa Iyang mga disipulo og katungod ug misugo nila nga ipangalagad ang sakramento ngadto sa mga miyembro sa Iyang Simbahan. Siya miingon, “Kini kamo sa kanunay maninguha sa pagtuman … gani ingon nga Ako mibuhat sa pagpikas-pikas sa pan ug pagpanalangin niini ug paghatag niini nganha kaninyo” (3 Nephi 18:6; tan-awa usab sa bersikulo 5). Ang panagtigom kanunay ug ang takos nga pag-ambit sa sakramento usa usab ka sugo gikan sa Ginoo sa atong panahon karon (tan-awa sa Doktrina ug mga Pakigsaad 20:75; 59:9).

Si Jesukristo nga nangalagad sa sakramento ngadto sa mga Nephite

icon, pagtuon

Pagtuon agi og Pagpangandam alang sa Klase

Basaha ang 3 Nephi 18:7, 10–12; 20:8–9, ug pangitaa ang mga panalangin nga gisaad sa Ginoo niadtong matinud-anong nagsunod sa Iyang sugo sa pagpangalagad ug pag-ambit sa sakramento.

Si Sister Cheryl A. Esplin, kanhi magtatambag sa Kinatibuk-ang Kapangulohan sa Primary, mihulagway usab sa mga panalangin nga ihatag sa Ginoo ngari nato pinaagi sa sakramento:

Sister Cheryl A. Esplin

Ang sakramento mahimong kasinatian sa paglig-on sa espirituhanong paagi kon kita maminaw sa mga pag-ampo sa sakramento ug pagbag-o sa atong mga pakigsaad. … Sa atong pag-ambit sa sakramento, kita misaksi sa Dios nga atong hinumdoman ang Iyang Anak sa kanunay, dili lang sa mubong panahon sa sakramento. …

Ang sakramento mao ang panahon sa tinuoray nga espiritwal nga kasinatian samtang mamalandong kita sa matubsanon ug makaabag nga gahom sa Manluluwas pinaagi sa Iyang Pag-ula. …

… Samtang ang mga naghupot sa pagkapari mohatag nato sa sagradong simbolo, sama ra nga ang Manluluwas Mismo nagpatuy-od sa Iyang bukton sa kalooy ngari kanato, nagdapit nato sa pag-ambit sa mga bililhong gasa sa gugma nga anaa pinaagi sa Iyang pag-ula—mga gasa sa paghinulsol, pagpasaylo, kahupay, ug paglaom.

Kon mas palandongon nato ang kaimportante sa sakramento, mas masagrado ug makahuluganon kini ngari kanato. (“Ang Sakramento—Pagbag-o sa Kalag,” Liahona, Nob. 2014, 12, 13–14)

young adult nga nag-ambit sa sakramento

icon, paghisgot

Paghisgot agi og Pagpangandam alang sa Klase

Duol ngadto sa usa ka masaligan nga higala o paryente nga nagpakita og ehemplo sa hugot nga pagtuo diha ni Jesukristo. Pangutan-a sila kon unsay ilang gihimo aron mapalambo ang ilang balaang pagtahod atol sa sakramento o hangyoa sila sa pagpaambit kon giunsa nila sa pagpaningkamot nga kanunay nga mohinumdom sa Manluluwas. Pangandam sa pagpaambit sa unsay imong nakat-onan diha sa klase.

Seksiyon 3

Unsaon nako pagkahibalo kon takos ba gayod ako nga moambit sa sakramento?

Si Apostol Pablo miawhag sa mga miyembro sa Simbahan nga “magsusi” sa ilang kaugalingon (1 Mga Taga-Corinto 11:28) sa dili pa sila moambit sa sakramento. Siya dayon mipasidaan, “Kay kon dili niya ilhon ang kahulogan sa lawas sa Ginoo inigkaon niya sa pan ug inig-inom gikan sa kopa, siya ang nagpahamtang og silot sa iyang kaugalingon” (1 Mga Taga-Corinto 11:29; tan-awa usab sa mga bersikulo 27–28; 3 Nephi 18:28–29). Ang panghimaraot mao ang makapugong sa paglambo sa usa ka tawo (tan-awa sa Giya ngadto sa mga Kasulatan, “Panghimaraot,” scriptures.ChurchofJesusChrist.org).

Si Elder John H. Groberg, samtang nagserbisyo sa Seventy, mihatag sa mosunod nga giya sa pagsusi sa personal nga katakos:

Elder John H. Groberg

“Kon nagtinguha kita nga molambo (nga mao ang paghinulsol) ug dili ubos sa restriksiyon sa pagkapari, niana, sa akong hunahuna, kita takos…. Hinoon, kon, kita walay tinguhang molambo, kon kita walay intensyon nga mosunod sa giya sa Espiritu, kinahanglan nga mangutana kita: Andam ba kitang moambit, o giyama-yamaan ra ba nato ang importanting katuyoan sa sakramento, nga mao ang buhat isip usa ka pagpasiugda sa personal nga paghinulsol ug kalamboan? (“The Beauty and Importance of the Sacrament,” Ensign, Mayo 1989, 38)

icon, buhaton

Buhaton

Samtang moambit ka sa sakramento, ikonsiderar unsay imong mabuhat aron himoon nga labing maayo kana nga sagradong kasinatian. Mahimo nimong sugdan ang imong pagpangandam pinaagi sa pagsusi sa imong kaugalingon. Kon ikaw mibati nga dili takos sa pag-ambit sa sakramento, pakigkita sa imong bishop o presidente sa branch ug isulti niya ang imong mga problema.

Gusto pa og Dugang? (Opsiyonal)

Unsa ang gisulti sa Ginoo mahitungod sa sakramento sa atong panahon karon?

si Propeta Joseph Smith

Pinaagi ni Propeta Joseph Smith, ang Ginoo mihatag og importante nga mga instruksiyon mahitungod sa sakramento diha sa Doktrina ug mga Pakigsaad 20:46, 58, 75–79; 27:1–4; 59:9, 12.

Unsay ipasabot sa “kanunay nga mohinumdom [sa Manluluwas]?”

Diha sa video “Nga Sila sa Kanunay Mohinumdom Kaniya” (6:29), si Elder Claudio R. M. Costa, kanhi sa Seventy, mipaambit kon unsay ipasabot sa kanunay nga mohinumdom ni Jesukristo.

Unsa ang akong buhaton aron ang mga panagtigom alang sa sakramento mahimong mas sagrado?

Presidente Dallin H. Oaks

Diha sa pakigpulong “Ang Miting sa Sakramento ug ang Sakramento” (Liahona, Nob. 2008, 17–20), si Presidente Oaks mipasabot kon unsaon nga mapalambo ang atong kasinatian sa pagsimba atol sa mga panagtigom alang sa sakramento.