mapahiyumong young adult sa simbahan

Leksiyon 11 Materyal sa Pagpangandam sa Klase

Pagpahimulos sa mga Panalangin sa Simbahan sa Ginoo

Sa usa ka panahon sa dihang ang pagtambong sa simbahan taliwala sa nagkalainlaing mga denominasyon nagkakunhod sa daghang mga dapit sa tibuok kalibotan, kini mahimong ilabi ka importante sa pagpaninguha og mas lawom nga pagsabot kon nganong si Jesukristo mitukod og usa ka simbahan sa panahon sa Iyang mortal nga pagpangalagad ug unya gipahiuli sa ulahing mga adlaw. Samtang kamo magtuon, hunahunaa kon giunsa sa gipahiuli nga Simbahan sa Ginoo pagdala o makadala sa inyong kinabuhi og dugang nga katuyoan, kalig-on, ug hingpit nga kalipay.

Seksiyon 1

Unsa ka talagsaong mga panalangin ang makuha lamang pinaagi sa pagkamiyembro sa Simbahan sa Ginoo?

Si Apostol Pablo mitudlo nga ang Simbahan sa Ginoo “tinukod ibabaw sa patukoranan nga mao ang apostoles ug mga propeta, nga niini si Jesukristo mao ang ulohang bato sa pamag-ang” (Mga Taga-Efeso 2:20). Sa panahon sa Iyang mortal nga pangalagad, mipili si Jesukristo og napulog duha ka lalaki ug gi-orden sila nga mahimong Iyang Apostoles. Siya mihatag kanila sa awtoridad ug sa mga yawe sa pagkapari aron sila makapangulo sa Iyang Simbahan, makatudlo sa Iyang ebanghelyo, makapamatuod sa Iyang pagkatinuod, ug makalihok diha sa Iyang ngalan (tan-awa sa Mateo 10:1, 7–8; 16:19; Mga Buhat 1:21–22; Doktrina ug mga Pakigsaad 107:23).

Human mabanhaw si Jesukristo, mipadayon Siya sa pagpangulo sa Iyang Simbahan pinaagi sa Iyang Apostoles, kinsa mihupot sa mga yawe sa pagkapari sa pagdumala sa buhat sa kaluwasan. Bisan pa niana, daghan ang misupak sa Iyang tinawag nga mga sulugoon, ug ang mga miyembro sa Simbahan misugod sa pagkahulog ngadto sa kasaypanan. Human sa pagkamatay sa Apostoles, ang “mga tawo mituis sa mga baroganan sa ebanghelyo ug mihimo og walay pagtugot nga mga kausaban sa organisasyon sa Simbahan ug sa mga ordinansa sa pagkapari. Tungod niining nagdagsang nga hingpit nga pagbiya gikan sa kamatuoran, gibawi sa Ginoo ang awtoridad sa pagkapari gikan sa yuta” (Gospel Topics, “Apostasy,” topics.ChurchofJesusChrist.org). Kini nailhan isip ang Dakong Apostasiya.

Kini nga kahimtang sa apostasiya mipadayon hangtod ang Langitnong Amahan ug si Jesukristo mipakita ngadto ni Joseph Smith sa 1820 (tan-awa sa Joseph Smith––Kasaysayan 1:16–20). Pipila ka tuig human niini nga pagpakita, mipadala si Jesukristo og langitnong mga mensahero ngadto ni Joseph Smith, kinsa mitugyan diha kaniya sa awtoridad ug mga yawe sa pagkapari (tan-awa sa Joseph Smith––Kasaysayan 1:68–72; Doktrina ug mga Pakigsaad 110:11–16; 128:19–21). Pinaagi niining balaang awtoridad, mitawag si Jesukristo og bag-ong Apostoles ug gitukod og balik ang Iyang Simbahan dinhi sa yuta (tan-awa sa Doktrina ug mga Pakigsaad 1:30).

Pagpahiuli sa Melchizedek nga Pagkapari, ni Walter Rane

Karon ang Unang Kapangulohan ug ang Korum sa Napulog Duha ka Apostoles naghupot sa tanang awtoridad ug mga yawe sa pagkapari nga kinahanglan sa pagdumala sa Simbahan sa Ginoo. Kini ilabi ka mahinungdanon ngari sa matag usa kanato kinsa gusto nga mahimong mas maayo ug mas maduol ngadto ni Kristo.

Magsulti sa importansya sa pagtambong sa simbahan alang sa tanang “relihiyoso og panghunahuna nga mga tawo,” si Presidente Dallin H. Oaks sa Unang Kapangulohan miobserbar, “Ang pagtambong ug ang pagkaaktibo sa kalihokan diha sa usa ka simbahan motabang kanato nga mahimong mas maayo nga mga tawo ug mas maayong mga impluwensiya sa mga kinabuhi sa uban” (“Ang Panginahanglan alang sa usa ka Simbahan,” Liahona, Nob. 2021, 24). Dayon miingon siya:

Presidente Dallin H. Oaks

Kita, siyempre, nagmatuod nga ang mga kasulatan, karaan ug moderno, klarong nagtudlo sa gigikanan ug panginahanglan alang sa usa ka simbahan nga gipangulohan pinaagi ug uban sa awtoridad sa atong Ginoo, si Jesukristo. Kita usab nagpamatuod nga ang gipahiuli nga Simbahan ni Jesukristo naestablisar aron sa pagtudlo sa kahingpitan sa Iyang doktrina ug sa pagdumala gamit ang Iyang awtoridad sa pagkapari sa pagpahigayon sa mga ordinansa nga gikinahanglan aron makasulod sa gingharian sa Dios [tan-awa sa Juan 3;5]. Ang mga miyembro nga mobiya sa pagtambong sa Simbahan ug mosalig lamang sa indibidwal nga pagkaespirituhanon mobulag sa ilang kaugalingon gikan niining mahinungdanon nga mga butang sa ebanghelyo: ang gahom ug mga panalangin sa pagkapari, ang kahingpitan sa gipahiuli nga doktrina, ug ang mga pagdasig ug mga oportunidad sa paggamit niana nga doktrina. Ilang giwala ang ilang oportunidad nga makasarang sa pagpadayon sa ilang pamilya alang sa kahangtoran. (“Ang Panginahanglan alang sa usa ka Simbahan,” Liahona, Nob. 2021, 25)

pag-orden sa pagkapari

Si Elder Robert D. Hales sa Korum sa Napulog Duha ka Apostoles mitudlo usab:

Elder Robert D. Hales

Kon ang gahom sa pagkapari wala dinhi sa yuta, ang kaaway adunay kagawasan sa pagsuroysuroy ug paghari nga walay pagpugong. Walay gasa sa Espiritu Santo nga mogiya ug molamdag kanato; walay propeta nga mamulong diha sa ngalan sa Ginoo; walay mga templo diin kita makahimo og sagrado, mahangturong mga pakigsaad; walay awtoridad sa pagpanalangin o pagbunyag, sa pagpang-ayo o paghupay. (“Blessings of the Priesthood,” Ensign, Nob. 1995, 32)

icon, pamalandong

Pamalandong agi og Pagpangandam alang sa Klase

Unsaon nimo pagpasabot ngadto sa usa ka tawo nga dili sa atong tinuohan ang talagsaong mga panalangin nga anaa sa mga miyembro sa Ang Simbahan ni Jesukristo sa mga Santos sa Ulahing mga Adlaw?

Seksiyon 2

Sa unsang paagi nga ang aktibong pag-apil diha sa Simbahan nagpanalangin kanako ug sa uban?

Si Elder D. Todd Christofferson sa Korum sa Napulog Duha ka Apostoles mitudlo mahitungod nining mga panalangin sa pag-apil sa Simbahan:

Elder D. Todd Christofferson

Importante nga masabtan nga ang labing mahinungdanong katuyoan sa Dios mao ang atong pag-uswag. … Nagkinahanglan kana og labaw pa kay sa pagminaayo lang o mobati og pagkaespirituhanon. Nagkinahanglan kana og hugot nga pagtuo diha ni Jesukristo, paghinulsol, pagbunyag sa tubig ug sa Espiritu, ug sa paglahutay inubanan sa hugot nga pagtuo hangtod sa kataposan. Dili kini hingpit nga makab-ot kon mag-inusara, mao nga usa ka dakong rason nga ang Ginoo adunay usa ka simbahan mao ang pagmugna og usa ka komunidad sa mga Santos nga mosuporta sa usag usa diha sa “higpit ug pig-ot nga dalan nga padulong sa kinabuhing dayon” [2 Nephi 31:18]. (“Nganong Anaa ang Simbahan,” Liahona, Nob. 2015, 108)

Si Apostol Pablo mitudlo kon sa unsa nga paagi ang pagkabahin sa usa ka komunidad sa mga Santos naglig-on kanato ug mas makapaduol kanato ngadto ni Jesukristo.

icon, pagtuon

Pagtuon agi og Pagpangandam alang sa Klase

Basaha ang Mga Taga-Efeso 4:11–14, ug hunahunaa ang pagmarka sa lainlaing mga paagi sa pag-apil diha sa Simbahan sa Ginoo nga makapanalangin sa inyong kinabuhi.

Mipasabot usab si Elder Christofferson nga ang mga kasinatian uban sa kaubang mga miyembro sa Simbahan naghatag kanato sa kinahanglanong mga oportunidad sa paggamit sa ebanghelyo sa Ginoo:

Elder D. Todd Christofferson

Isip lawas ni Kristo, ang mga miyembro sa Simbahan nangalagad sa usag usa diha sa reyalidad sa adlaw-adlaw nga kinabuhi. Kitang tanan dili hingpit; kita mahimong makasala ug masakitan. Kasagaran atong sulayan ang usag usa pinaagi sa atong personal nga mga kinaiya. Diha sa lawas ni Kristo, kinahanglang molabaw pa kita sa pagkat-on lang sa mga konsepto ug dungganong mga pulong ug “tinud-anay nga pag-apil” samtang kita nagkat-on nga “magpuyo nga maghiusa sa gugma” [Doktrina ug mga Pakigsaad 42:45]. (“Nganong Anaa ang Simbahan,” Liahona, Nob. 2015, 108)

icon, irekord

Irekord ang Inyong mga Hunahuna

Kita makabaton og “tinud-anay nga pag-apil” sa kasinatian sa pagtukod sa gingharian sa Ginoo pinaagi sa mga calling, mga buluhaton sa pagpangalagad, pagserbisyo sa uban, o sa pagkat-on sa pakig-uban niadtong kinsa lahi gikan kanato. Paghunahuna mahitungod niadtong “tinud-anay nga pag-apil” sa mga kasinatian nga ikaw diha o aduna sa inyong ward o branch. Pagpili og usa ka kasinatian ug isulat kon giunsa niini pagtabang kaninyo sa paggamit sa mga pagtulun-an sa ebanghelyo ug mahimong mas mahisama ni Jesukristo. Kon kamo wala magtambongan sa simbahan, hunahunaa ang pagrekord kon giunsa ninyo ug niadtong anaa sa inyong ward o branch nga mapanalanginan kon kamo magsugod sa pagtambong sa simbahan.

Seksiyon 3

Unsa ang akong mabuhat sa pagtabang sa akong ward o branch nga mahimong usa ka mas maabiabihong dapit alang sa tanang mga tawo?

Paghunahuna kon unsa ang bation nga tagdon og maayo ug sa tinuod nga paagi kon nagtambong sa simbahan. Kanus-a kamo nagtabang og usa ka tawo sa inyong ward o branch nga mobati niana nga paagi?

duha ka tawo nga nag-istoryahanay sa simbahan

icon, pagtuon

Pagtuon agi og Pagpangandam alang sa Klase

Si Moroni mitudlo sa importansya sa pagpakigdait diha sa Simbahan. Basaha ang Moroni 6:4–5, ug hunahunaa kon unsaon nga kamo makatabang sa pagmugna og pagbati nga nahisakop sa inyong ward o branch.

Hunahunaa ang mosunod nga ehemplo sa pagpakigdait nga gipakigbahin ni Sister Carole M. Stephens, kanhi magtatambag sa Kapangulohan sa Relief Society:

Sister Carole M. Stephens

Si [Maria] adunay daghang higala nga dili kaayo aktibo o wala pa makadungog sa mensahe sa gipahiuli nga ebanghelyo ni Jesukristo. Kada adlaw iyang gamiton ang iyang hugot nga pagtuo ug mag-ampo aron makahibalo kinsa ang nagkinahanglan og panabang, ug dayon iyang sundon ang aghat nga iyang nadawat. Manawag siya sa telepono, mopadayag sa iyang gugma, ug mosulti sa iyang mga higala, “Nagkinahanglan mi nimo.” Siya adunay family home evening sa iyang apartment kada semana ug moimbitar og mga silingan, mga miyembro, ug mga misyonaryo sa pag-apil––ug pakan-on niya sila. Imbitaron niya sila sa pagsimba, mobantay nila ug motupad sa paglingkod nila kon sila moabot. (“Kita Adunay Dako nga Rason nga Maglipay,” Liahona. Nob. 2013, 116–117)

icon, buhat

Pamalandong agi og Pagpangandam alang sa Klase

Kinsa diha sa inyong ward o branch ikaw makapanalangin pinaagi sa pagtabang? Unsa ang inyong buhaton sa pagtabang kanila nga mobati sa gugma sa Manluluwas kon sila motambong sa simbahan? Hunahunaa ang pagtan-aw sa “Inviting Others to ‘Come and Stay’ [Pagdapit sa Uban sa ‘Pag-anha ug sa Pagpabilin’]” (1:39) alang sa mga ehemplo kon unsaon sa pagpakigdait. (Mubo nga sulat: Bisan dili sa inyong pinulongan, kini nga video anaay Iningles alang sa imong paggamit kon kini makatabang.)

Gusto pa og Dugang? (Mahimong sundon o dili)

Unsa ang ubang mga rason nga kita nagkinahanglan sa gipahiuli nga Simbahan ni Jesukristo?

Ang mosunod nga mga pamulong sa komperensiya, gikutlo gikan niini nga leksiyon, naghatag og daghan pang mga rason nga ang Simbahan sa Ginoo importante alang sa atong pag-uswag ug abilidad sa pagdala sa atong mga kaugalingon ug sa uban ngadto sa Manluluwas:

• Presidente Dallin H. Oaks

  Pamulong ni Presidente Oaks: “Ang Panginahanglan alang sa usa ka Simbahan” (Liahona, Nob. 2021, 24–26)

• Elder D. Todd Christofferson

  Pamulong ni Elder Christofferson: “Nganong Anaa ang Simbahan” (Liahona, Nob. 2015, 108–11)

Asa ako makakat-on pa og dugang mahitungod kon unsaon sa awtoridad sa pagkapari ug mga yawe sa pagkapari pagpanalangin sa atong mga kinabuhi?

Presidente Julie B. Beck

Diha sa pamulong “Gibubo nga mga Panalangin” (Liahona, Mayo 2006, 11–13), si Presidente Julie B. Beck, kanhi Kinatibuk-ang Presidente sa Relief Society, mipakigbahin og mga panalangin nga kita makadawat pinaagi sa pagkapari.

Presidente Russell M. Nelson

Si Presidente Russell M. Nelson mipaila tali sa awtoridad sa pagkapari ug sa mga yawe sa pagkapari diha sa iyang pamulong “Mga Yawe sa Pagkapari” (Liahona, Okt. 2005, 26–30). Ang talagsaong pagkaanaa niini nga awtoridad ug mga yawe diha sa Simbahan ni Kristo nagtugot sa Ginoo sa pagpadayon sa pagpanalangin ug pagdala sa matag usa kanato ngadto Kaniya.

Asa ako makakat-on pa og dugang mahitungod sa tampo sa kababayen-an sa Simbahan?

Presidente Russell M. Nelson

Diha sa pamulong “Usa ka Hangyo ngadto sa Akong mga Sister” (Liahona, Nob. 2015, 95–98), mihisgot si Presidente Nelson sa gahom sa mga tingog, kalig-on, kaalam, ug lig-ong pagtuo sa kababayen-an.

Unsa ang akong mahimo nga mas maabiabihon ngadto sa uban diha sa akong branch o ward?

Sa 1 Mga Taga-Corinto 12:12–25 si Apostol Pablo mitudlo kon unsa kita ka gikinahanglan diha sa Simbahan sa Ginoo.

Sa pagkat-on pa og dugang mahitungod kon unsaon nga mahimong mas maabiabihon ngadto sa mga tawo sa inyong ward o branch, basaha ang artikulo “Unsaon Nato Pagmugna og Kultura sa Pagpaapil diha sa Simbahan?” (Liahona, Hulyo 2019, 8–11).