Ngaahi Tāpuaki Fakapēteliaké
Kapau kuó ke maʻu ha tāpuaki fakapēteliake, te ke lava ʻo kole ha tatau ʻo e tāpuakí ʻi he ʻinitanetí.
Vakai Fakalūkufuá
ʻOku ʻi ai e totonu ʻa e mēmipa moʻui taau kotoa pē ʻo e Siasí kuo papitaiso, ke ne maʻu ha tāpuaki fakapēteliake pea ʻoku totonu ke ne maʻu ia, he ʻoku ʻoatu ai ha fakahinohino fakalaumālie mei he ʻEikí. ʻOku fakakau ʻi he tāpuaki fakapēteliaké ha fanongonongo ʻo e hako ʻo ha taha pea mei he fale ʻo ʻIsilelí mo ha ngaahi faleʻi fakataautaha pea mei he ʻEikí. ʻI he taimi ʻe ako ai ʻe ha taha ʻene tāpuaki fakapēteliaké pea muimui ki he ngaahi faleʻi ʻoku ʻi aí, te ne ʻoatu ha fakahinohino, fakafiemālie, mo e maluʻi.
Ko Hono Fakahā ʻo e Hakó
ʻOku kau ʻi he tāpuaki fakapēteliaké ha fakahā ʻo e hakó, ʻo pehē ai ko e tokotahá ʻoku ʻo e fale ʻo ʻIsilelí—ko ha hako ʻo ʻĒpalahame, ʻoku kau ki ha hako pau ʻo Sēkope. Ko e tokolahi ʻo e Kau Māʻoniʻoni ʻi he Ngaahi ʻAho Kimui Ní ʻoku nau kau ki he hako ʻo ʻIfalemí, ʻa e hako ko ia ne tuku ki ai ʻa e tefitoʻi fatongia ke tataki e ngāue ʻa e ʻEikí ʻi he ngaahi ʻaho kimui ní.
Koeʻuhí ʻoku tau takitaha maʻu ha ngaahi hako kehekehe ʻiate kitautolu, ʻe malava ke fakahā ki ha ongo mēmipa ʻe toko ua ʻi ha fāmili tatau, ʻokú na ʻi ha ongo hako kehekehe ʻo ʻIsileli.
ʻOku ʻikai mahuʻinga ia pe ko e hako ʻo e tokotahá ʻi he fale ʻo ʻIsilelí ko e fakafou ʻi he totó pe ʻi he ohi. ʻOku lau ʻa e kau mēmipa ʻo e Siasí ko e hako ʻo ʻĒpalahame pea ko ha ʻea-hoko ki he ngaahi talaʻofa mo e ngaahi tāpuaki kotoa pē ʻoku ʻi he fuakava Faka-ʻĒpalahamé (vakai, Fuakava Faka-ʻĒpalahamé).
Ako mei he Tāpuaki Fakapēteliaké
Ko kinautolu kuo nau maʻu ha tāpuaki fakapēteliaké ʻoku totonu ke nau lau maʻu pē ia ʻi he loto-fakatōkilalo mo e faʻa lotu. ʻOku ʻi ai ha fakahā fakataautaha mo ha ngaahi fakahinohino mei he Tamai Hēvaní, ʻa ia ʻokú Ne ʻafioʻi hotau ngaahi mālohingá, ngaahi vaivaí, mo e faingamālie taʻengatá. ʻE malava ke kau ʻi he ngaahi tāpuaki fakapēteliaké ha ngaahi talaʻofa, ngaahi enginaki, mo ha ngaahi fakatokanga.
Ko kinautolu ʻoku nau muimui ki he akonaki ʻi heʻenau tāpuaki fakapēteliaké, ʻe siʻi e faingamālie ke nau hē pe takihalaʻi kinautolu. Ngata pē ʻi he muimui ki he faleʻi ʻi ha tāpuaki fakapēteliake ʻe lava ai ʻe ha taha ʻo maʻu ʻa e ngaahi tāpuaki ʻoku ʻi aí.
Neongo ʻoku maʻu ʻe he tāpuaki fakapēteliaké ha faleʻi fakalaumālie mo ha ngaahi talaʻofa, ka ʻoku ʻikai totonu ke tau fakakaukau ʻe tali kotoa ai ʻa e ngaahi fehuʻi ʻa e tokotaha haʻana e tāpuakí pe fakaʻauliliki ai ʻa e kotoa e ngaahi meʻa ʻe hoko ʻi heʻene moʻuí. Kapau ʻoku ʻikai lave ʻa e tāpuakí ki ha meʻa mahuʻinga ʻe hoko, hangē ko ha ngāue fakafaifekau taimi kakato pe mali, ʻoku ʻikai totonu ke pehē ʻe he tokotahá he ʻikai te ne maʻu ʻa e faingamālie ko iá.
ʻI he founga tatau pē, ʻoku ʻikai totonu ke pehē ʻe he tokotaha ʻokú ne maʻu e tāpuakí, ʻe hoko kotoa ʻa e ngaahi meʻa ʻoku lave ki ai ʻa e tāpuakí ʻi he moʻuí ni. ʻOku taʻengata ʻa e tāpuaki fakapēteliaké, pea ʻe malava ke ope atu hono ngaahi talaʻofá ki he ngaahi taʻengatá. Kapau ʻoku moʻui taau ha taha, ʻe fakakakato kotoa ʻa e ngaahi talaʻofá ʻi he taimi ʻa e ʻEikí. Ko e ngaahi talaʻofa mo e ngaahi tāpuaki he ʻikai hoko ʻi he moʻui ní ʻe hoko ia ʻi he moʻui ka hokó.
Ko e ngaahi tāpuaki fakapēteliaké ʻoku toputapu mo fakafoʻituitui ia. ʻE lava ke vahevahe ia mo ha mēmipa tonu ʻo e fāmilí, ka ʻoku ʻikai totonu ke lau leʻo lahi ia ʻi he kakaí pe lau pe fakaʻuhingaʻi ʻe ha niʻihi kehe. Naʻa mo e pēteliaké pe pīsopé pe palesiteni fakakoló, ʻoku ʻikai totonu ke nau fakaʻuhingaʻi ia.
Ko kinautolu kuo nau maʻu ha tāpuaki fakapēteliaké, ʻoku totonu ke nau mataʻikoloa ʻaki ʻa hono fakaleá, fakalaulauloto ki ai, mo moʻui taau ke maʻu ʻa e ngaahi tāpuaki ko ia kuo talaʻofá ʻi he moʻuí ni pea ʻi he moʻui ka hokó.
Ke ʻiloʻi ʻa e founga ke maʻu ai ha tāpuaki fakapēteliake, ʻoku totonu ke talanoa ʻa e kau mēmipa ʻo e Siasí mo ʻenau pīsopé pe palesiteni fakakoló.
Ngaahi Tefito Fekauʻakí
Ngaahi Folofolá
Ngaahi Fakamoʻoni Fakafolofolá
Ngaahi Maʻuʻanga Tokoni Ako Folofolá
-
Fakahinohino ki he Ngaahi Folofolá, “ʻEvangeliō,” “ʻIsileli,” “Tāpuaki Fakapēteliaké, Ngaahi,” “Pēteliake”
Ngaahi Pōpoaki mei he Kau Taki ʻo e Siasí
Ngaahi Vitioó
“Tafaʻaki ʻo e Filí”
Ngaahi Maʻuʻanga Tokoni Fakaakó
Ngaahi Maʻuʻanga Tokoni Fakalūkufuá
Kole ha tatau ʻo hoʻo tāpuaki fakapēteliake pē ʻaʻaú pe ʻa ha taha kuo pekia, ChurchofJesusChrist.org
ʻŪ Makasini ʻa e Siasí
“Ko hai te u talanoa mo ia ʻo fekauʻaki mo hano maʻu ha tāpuaki fakapēteliaké?” Liahona, Siulai 2010
“Ko Ho Tāpuaki Fakapēteliaké,” Ensign pe Liahona, Fēpueli 2010
Robert K. Wagstaff, “Ko e Fē Taimi ʻOku Totonu Ke u Maʻu ai Hoku Tāpuaki Fakapēteliaké?” Liahona, ʻAokosi 2009
“About Patriarchal Blessings,” Liahona, Māʻasi 2004
Daniel H. Ludlow, “Of the House of Israel,” Ensign pe Liahona, January 1991
“Teaching Children about Patriarchal Blessings,” Ensign, October 1987
David A. Edwards, “What a Patriarchal Blessing Can Do for You,” New Era, May 2013
Ngaahi Tohi Lēsoni Akó
Ngaahi Talanoá
Ngaahi Maʻuʻanga Tokoni ki hono Akoʻí
Ngaahi Talanoa moe Ngaahi ʻEkitivitī ki hono Akoʻi ʻo e Fanaú
“Ngaahi Tāpuaki Fakapēteliaké,” Ngaahi Lēsoni Tokoni ki Hono Akoʻi ʻo e Fānaú
Mītiá
Ongó
“What is a Patriarchal Blessing,” The Latter-day Saints Channel Q&A, episode 62