Ko Ho Tāpuaki Fakapēteliaké

ʻOku fakamatalaʻi ʻe Palesiteni Monisoni ʻa e tāpuaki fakapēteliaké ko ha “Liahona fakatāutaha ʻoku hoko ko ha siate folau mo ne tataki ho halá.” Ko e hā leva ʻa e tāpuaki ko ʻení, pea ʻe founga fēfē haʻane tokoni ʻi hono tataki hoʻo moʻuí?

Ko e hā ʻa e tāpuaki fakapēteliake?

ʻOku ʻi ai ha tefitoʻi taumuʻa ʻe ua ho tāpuakí. ʻUluakí, te ne fakahā ʻa e laine ʻo e hako ʻokú ke haʻu aí, pe ko e faʻahinga fē ʻi he fale ʻo ʻIsilelí ʻokú ke kau ki aí. Uá, ʻe ʻi ai ha fakamatala ke tokoni ʻi hono tataki koé. Ngalingali ʻe kau ʻi ho tāpuakí ha ngaahi talaʻofa, ngaahi naʻinaʻi, pea mo ha ngaahi fakatokanga.

ʻOku totonu ke u taʻu fiha kae maʻu hoku tāpuakí?

ʻOku ʻikai ke ʻi ai ha taʻu tukupau ia, ka ʻoku totonu ke ke lahi feʻunga ke hounga kiate koe ʻa e natula toputapu ʻo e tāpuakí. ʻOku tokolahi ha kāingalotu ʻoku nau kamata fakakaukau ke maʻu honau tāpuakí ʻi he kamata honau taʻu hongofulu tupú.

ʻE founga fēfē haʻaku maʻu e tāpuakí?

ʻUluaki talanoa mo hoʻo pīsopé pe palesiteni fakakoló. Kapau kuó ke mateuteu mo moʻui taau, te ke maʻu ha tohi fakaongoongolelei. Ka hili ia, te ke lava ʻo aleaʻi mo e pēteliake ʻi ho feituʻú ki ha taimi ke fai ai.

Ko e hā te u fai ʻaki hoku tāpuakí?

Tauhi ia ʻi ha feituʻu malu, pea toutou lau ia. Manatuʻi, ʻoku toputapu mo fakatāutaha ho tāpuakí. ʻE lava pē ke ke vahevahe ia mo e kau mēmipa ho fāmili tonú, ka ʻoku ʻikai totonu ke fakamatalaʻi ia ʻi he kakaí. ʻIkai ngata ai, ka ko e ngaahi tāpuaki kotoa ko ia ʻoku fakalau ʻi ho tāpuaki fakapēteliaké ʻoku makatuʻunga ia ʻi hoʻo angatonú pea mo e taimi ʻa e ʻEikí.