Ko e Ngāue ʻi he Siasí
Ko e Fē ʻa e Taimi ke Tokoni Aí?
Mei he “Teuteu ki ha Mali Fakalangi,” Liahona, Fēpueli 2006, 19; mo ha lea naʻe fai ʻi he ʻUnivēsiti Pilikihami ʻIongi–ʻAitahoó ʻi he ʻaho 7 ʻo ʻEpeleli 2007.
Ko e taimi ʻoku manatu ai ʻa ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá, ki he ngaahi taʻu faingataʻa naʻe ʻi he ʻApiako Pisinisi ai ʻo Hāvatí, ʻokú ne pehē, “[Naʻe fakangāueʻi au ʻo aʻu ki he ngataʻanga hoku iví].”
ʻI he taimi ko ʻení ne uiuiʻi ai ʻa ʻEletā Heili ke ne hoko ko e palesiteni ʻo e kōlomu ʻo e kaumātuʻá. Naʻá ne hohaʻa ki he mafatukituki ʻoku tānaki mai ʻe he faʻahinga uiuiʻi peheé ki heʻene taimi tēpilé. ʻOkú ne pehē, “Ko e taha ʻeni ʻo ha ngaahi taimi hāhāmolofia ʻi heʻeku moʻuí naʻe ʻikai ke u tali ʻio ai he taimi pē ko iá. Naʻá ku foki ki ʻapi ki hoku uaifí ʻo pehē ange ki ai, ʻMahalo pē te u tō he ʻakó kapau te u tali ʻa e uiuiʻi ko ʻení.’”
Naʻe tali ʻa Sisitā Heili ʻo pehē, “Lōpeti, ʻe sai ange kiate au ke u maʻu ha taha maʻu lakanga fakataulaʻeiki mālohi, ʻi haʻaku maʻu ha tangata maʻu mataʻitohi M.A. mei Hāvati.” Pea naʻá ne fāʻofua kiate ia mo pehē, “Te ta fakahoko fakatouʻosi ia.”
Naʻá na tūʻulutui leva ʻo lotu peá na kamata ngāue. Ko e ngaahi māhina hoko atu aí naʻe faingataʻa, ka ne na lava pē ʻo “fakahoko fakatouʻosi ia.”
Hili mei ai ha ngaahi taʻu siʻi lolotonga ʻa e femoʻuekina ʻa ʻEletā Heili ʻi heʻene hoko ko e palesiteni ʻo ha kautahá, ne fakaafeʻi ia ke ne hoko ko e pīsope ʻo hono uōtí. Hili mei ai ha taʻu ʻe hongofulu, lolotonga ʻene hoko ko ha tokoni palesiteni ʻo ha kautaha lahi he 1975, kuo ui ia ke hoko ko ha tokoni ki he Kōlomu ʻo e Kau ʻAposetolo ʻe Toko Hongofulu Mā Uá. Naʻe ʻikai faingataʻa ke ne tali ʻa e ngaahi uiuiʻi ko ʻení.
ʻOkú ne fakamatala, “Naʻe faingofua pē. Naʻá ku ʻosi fai ʻe au ʻa e fili ko iá ʻi heʻeku kei siʻí.”
Naʻe fakaʻosi ʻaki ʻe ʻEletā Heili ʻene pehē, “ʻE hoko mai ki he tokotaha kotoa pē ʻo kimoutolu ʻa e fehuʻí, ʻKo e fē ʻa e taimi ke fua fatongia aí?’ Ko e tali lelei taha ʻeni te u lava ʻo ʻoatu kiate kimoutolú, ʻKo e taimi ʻe kole atu aí.’”
Faitaaʻi ʻe Steve Bunderson