Ko Hotau Feituʻú ʻEni

2010

Fēpueli 2010

Ko Hotau Feituʻú ʻEni

Akoako mo Teuteu

ʻI ha Sāpate ʻe taha naʻe kole mai ai ke u tā ʻeku vaioliní ʻi he lolotonga ʻo e houalotu sākalamēnití. Naʻá ku fuʻu manavasiʻi ʻi heʻeku taá, pea naʻe tetetete hoku ongo nimá mo hoku ongo vaʻé. Naʻe pehē ʻe he kakai ia ʻi he fakatahaʻangá naʻe sai ʻeku taá, ka naʻá ku ongoʻi naʻe mei lava pē ke toe lelei ange. Hangē ko e lau ʻa e Tokāteline mo e Ngaahi Fuakava 38:30, “Kapau te mou mateuteu, ʻe ʻikai te mou manavahē.” Naʻá ku ako ʻi he meʻá ni hono mahuʻinga ʻo e akó.

ʻOku ʻikai ngata ʻene fekauʻaki ʻeni mo e meʻaleá ka mo ha toe faʻahinga meʻa pē he moʻuí. Hangē ko ʻení, ʻi he kalasi fiká, naʻe ʻikai mahino lelei kiate au ʻa e fakamatalá. Ko e taimi naʻá ku toutou ako ai iá, naʻe ola lelei ʻi he ikuʻangá, peá u lava ʻo tulituli hake. ʻOku tatau pē ʻi he ongoongoleleí. Kapau te tau ako fakahoko ʻetau fakamoʻoní, te tau lelei ange ʻo ʻikai fuʻu ilifia pe momou ʻi hono vahevahé. Ko hono moʻoní, ʻoku ou faʻa vahevahe he taimi ʻe niʻihi ʻeku ʻilo ki he ongoongoleleí mo hoku kaungāmeʻa taʻe-tui ʻOtua he akó.

ʻOku ou ʻilo te tau toe lelei ange ʻi he moʻuí ʻi he taimi ʻoku tau faʻa ako aí.

Tifale C., taʻu 15, Veisinia, USA

ʻI Heʻeku Tufa ʻa e Sākalamēnití

Ko e fuofua taimi naʻá ku tufa ai ʻa e sākalamēnití heʻeku hoko ko ha tīkoní, naʻá ku tailiili mei he kamatá ki heʻene ʻosi. Naʻá ku hohaʻa telia naʻá ku ʻalu ki ha feituʻu hala pe ʻalu ki ha ʻotu hala. Naʻe fuoloa ʻeku nofo-ʻamanaki ke tufa ʻa e sākalamēnití ʻi he lōlōa taha ʻeku manatú. Naʻá ku siofi ʻa e kau tīkoní he uike kotoa pē mo fakakaukau ki heʻenau fotu fakaʻeiʻeiki maí.

Ko e sākalamēnití ko ha taimi mahuʻinga ia ʻoku tau fakakaukau ai kia Sīsū Kalaisi mo e meʻa te tau lava ʻo liliú mo e founga te tau lava ai ʻo fakalakalaká. ʻE lava ha tīkoni ʻo tokoniʻi ha niʻihi ke nau tokanga he lolotonga ʻo e sākalamēnití ʻaki haʻane teunga taau, ʻulungāanga ʻapasia, luelue māmālie, toʻo fakalelei ʻa e laulau sākalamēnití, pea ʻoua ʻe fakakata holo.

Naʻá ku lavaʻi ia ʻi hoku ʻuluaki uiké ʻo ʻikai fai ha fehālaaki, pea ʻoku ʻikai ke u toe tailiili. Ko ia ʻi heʻeku tufa ʻa e sākalamēnití, ʻoku ou ongoʻi ʻapasia mo fiefia ai.

ʻOku ʻi ai hoku ngaahi tehina ʻe toko fā, pea ʻoku ou feinga mālohi ange ke lahi ange ʻeku tokoniʻi kinautolú pea ʻoua naʻá ku fakakikihi mo kinautolu. ʻOku mahuʻinga ke te hoko ko ha sīpinga lelei. Kapau ʻe ʻikai, mahalo te nau fakakaukau ʻoku ʻikai mahuʻinga ʻa e lakanga fakataulaʻeikí. Ka ʻoku mahuʻinga. Kuo hoko ha liliu kiate au talu mei heʻeku maʻu ʻa e lakanga fakataulaʻeikí. Ko e tokotaha maʻu lakanga fakataulaʻeiki leleí ʻoku totonu ke ne tauhi ʻa e ngaahi fekaú, angalelei ki he niʻihi kehé, mo manatuʻi ko e kau maʻu lakanga fakataulaʻeiki kitautolu ʻi he ʻapi akó ʻo tatau pē ʻi he ngaahi ʻaho Sāpaté.

Hao-Seni W., taʻu 15, Taiuani

Fakaʻaongaʻi Fakapotopoto ʻa e Taimí

ʻOku ou saiʻia he Pōpoaki ʻa e Kau Palesitenisī ʻUluakí ʻi ʻAokosi ʻo e 2008, “[ʻOfa Ke Tau Moʻui Pehē],” ʻa ia naʻe fai ʻe Palesiteni Tōmasi S. Monisoní. Naʻá ne ʻai ke u fakakaukau ki he taimi ʻoku tau faʻa maumauʻi ai ʻa e taimí ʻi he ʻikai ke tau feinga ke fakaʻaongaʻi fakapotopoto iá. Hangē ko ʻení, naʻe ongo moʻoni kiate au ʻa e talanoa naʻe fai ʻe Palesiteni Monisoni fekauʻaki mo e ongo fefine naʻá na vākovi, ʻo ʻikai ke na fakatokangaʻi, naʻá na fetohiʻaki fakapulipuli pē ʻi he konga lahi ʻo ʻena moʻuí. Ko e taimi naʻe siʻi mālōlō ai e taha ʻo e ongo fefiné ni, naʻe tangi hono kaungāmeʻá ʻi he ngaahi taʻu ne molenoa ʻa ia he ʻikai ke ne toe lava ʻo fakafoki maí.

Vikitā Y., taʻu 17, ʻEkuatoa

Ko Homou Feituʻú ʻEni

Ko hoʻomou ngaahi pēsí ʻeni—ko hoʻomou feituʻu ke vahevahe ai mo e toʻu tupu kehé ʻa e ʻuhinga ʻo e ongoongoleleí kiate koé. Ko e ngaahi meʻa ʻeni te ke lava ʻo nofo ʻamanaki atu ke lau ʻi he ngaahi peesi ko ʻení mo e meʻa te ke lava ʻo tokoni aí:

Ngaahi meʻa ne hoko pe ngaahi ʻilo naʻá ne tokoniʻi koe ke mahino mo ke moʻui ʻaki ai ʻa e ongoongoleleí ʻo toe lelei ange.
Ha tā ʻata lelei naʻá ke ʻai, mo ha potufolofola ko hano fakamatala.
Ha meʻa lelei ne hoko ʻi he lolotonga haʻo ngāue ʻi he Fatongia ki he ʻOtuá pe Fakalakalaka Fakatāutahá.
Ko haʻo fakamatala fekauʻaki mo ha potufolofola ʻokú ne ueʻi fakalaumālie koe. Fakakau mai ai hao laʻi tā kapau ʻokú ke loto ki ai.
Lipooti fekauʻaki mo e Liahoná. Ko e hā e meʻa naʻá ke saiʻia ʻi hono laú?

ʻĪ-meili mai hoʻo talanoá, taá, pe ngaahi fakamatalá ki he liahona@ldschurch.org. Kātaki kae tohiʻi ʻa e “Our Space” ʻi he laine ki he kaveingá, pea fakakau mai ai mo e ngofua mei hoʻo mātuʻá ke paaki ʻa e meʻa ʻokú ke ʻomaí. ʻE ala fai hano liliu koeʻuhí ke lōloa feʻunga pe mahino.