Taimi Feʻinasiʻakí
Ko Sīsū Kalaisi Hoku Fakamoʻuí mo e Huhuʻí
Ko e Fakamoʻuí mo e Huhuʻí ko e ongo huafa mo e tuʻunga ia ʻo Sīsū Kalaisi. ʻOkú na fakamatalaʻi ʻa e meʻa naʻá Ne fai maʻá e fānau kotoa ʻa e ʻOtuá.
Koeʻuhí ko e Hinga ʻa ʻĀtama mo ʻIví, ʻe foua ai ʻe he tokotaha kotoa pē ʻa e mate fakaesinó. ʻI heʻetau maté, ʻe mavahevahe leva hotau laumālié mo hotau sinó. Ko e taimi naʻe toetuʻu ai ʻa Sīsū Kalaisí, naʻe toe fakatahaʻi Hono sinó mo Hono laumālié, pea he ʻikai ke toe fakamavahevaheʻi kinaua. Koeʻuhi ko ʻEne fai ʻení, te tau toetuʻu kotoa ai.
Naʻe toe totongi huhuʻi foki ʻe Sīsū ʻa ʻetau ngaahi angahalá, kapau te tau fakatomala, ʻe lava ke fakamolemoleʻi kitautolu pea tau toe nofo fakataha mo Ia mo e Tamai Hēvaní. ʻOku ʻiloa ʻa e feilaulau ko ʻení ko e Fakalelei ʻa Sīsū Kalaisí. Koeʻuhi ko e feilaulau ʻa Sīsuú, ʻokú Ne hoko leva ko hotau Fakamoʻui mo e Huhuʻi. Ko e Fakaleleí ko hono fakahaaʻi maʻongoʻonga taha ia ʻo e ʻofa ʻa e Tamai Hēvaní kiate kitautolú. Ko hono fakahaaʻi taupotu taha foki ia ʻo e ʻofa ʻa e Fakamoʻuí ki he Tamai Hēvaní pea mo kitautolu fakafoʻituitui.
ʻOku akoʻi kitautolu ʻe he potufolofola ʻo e māhina ní kau ki he Fakalelei mo e ʻofa lahi ʻa e ʻOtuá kiate kitautolú. ʻOfa ke fonu ʻofa mo houngaʻia homou lotó ʻi he meʻaʻofa maʻongoʻonga taha ʻa e ʻOtuá kiate kitautolú: ʻa Hono ʻAlo ko Sīsū Kalaisí.
Tohinoa Folofola Fēpueli 2010
Lau ʻa e Sione 3:16 ʻi he Fuakava Foʻoú.
Lotu ke ke ʻilo pe ʻoku moʻoni ʻa e potufolofolá ni. Kole ke ke ongoʻi e ʻofa ʻa e ʻOtuá kiate koé.
Ako maʻuloto ʻa e potufolofola ko ʻení.
Fili ha taha ʻo e ngaahi ʻekitivitī ko ʻení, pe faʻu pē haʻo ʻekitivitī ʻaʻau:
-
ʻOku akoʻi ʻe he Hiva Palaimeli ko e “Naʻá Ne Fekau Hono ʻAló” (Tohi Hiva ʻa e Fānaú, 20–21) ʻa e founga ʻoku fakahaaʻi ʻaki ʻe he Tamai Hēvaní ʻEne ʻofa kiate kitautolú. Ako ʻa e foʻi hivá, pea feinga ke fakahoko ʻa e meʻa ʻokú ne talamaí ke fakahaaʻi ai hoʻo ʻofa mo hoʻo houngaʻia ʻi he Fakamoʻui ko Sīsū Kalaisí.
-
Kosi pea fokotuʻutuʻu ʻa e pāsolo (ʻi toʻomataʻú) ʻa ia ʻokú ne fakahaaʻi ʻa e meʻa ʻoku fai ʻe he Fakaleleí maʻatautolu takitahá. Vahevahe ʻeni mo ho fāmilí.
ʻOku anga fēfē hono tokoniʻi koe ʻe he meʻa naʻá ke faí ke mahino ʻa e potufolofola ko ʻení?
Hiki ʻi hoʻo tohinoá pe tā ha fakatātā fekauʻaki mo e meʻa naʻá ke faí.
Te tau lava ke fakataha mo e Tamai Hēvaní mo Sīsū koeʻuhí ko e Fakalelei ʻa Sīsū Kalaisí.
Māmani
Fakaleleí
Tamai Hēvaní mo Sīsū Kalaisi
“He naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú, koeʻuhí ko ia kotoa pē ʻe tui kiate iá ke ʻoua naʻa ʻauha, kae maʻu ʻa e moʻui taʻengatá” (Sione 3:16).
Tā fakatātaaʻi ʻe James Johnson