1828 - 1829

Տերն ուղարկում է Օլիվեր Քաուդերիին

Իմանալ, թե ինչպես է Աստված խոսում մեզ հետ

Ջոզեֆը և Էմման շարունակեցին Մորմոնի Գրքի թարգմանությունը։ Աշխատանքը շատ ծանր էր, իսկ նրանք պետք է աշխատեին նաև իրենց ֆերմայում։ Ջոզեֆն աղոթում էր, որ Երկնային Հայրն ինչ-որ մեկին ուղարկի, ով կօգնի իրեն թարգմանել Մորմոնի Գիրքը։

Սրբեր, 1․56, 58

Հեռավոր Նյու Յորքում Օլիվեր Քաուդերին, որը երիտասարդ ուսուցիչ էր, ապրում էր Ջոզեֆ Սմիթի ծնողների հետ։ Օլիվերն ուսուցանում էր Ջոզեֆի կրտսեր եղբայրներին և քույրերին:

Սրբեր, 1․58-59

Օլիվերը լսել էր Ջոզեֆի և ոսկե թիթեղների մասին։ Նա հետաքրքրված էր։ Նա զրուցեց Ջոզեֆի ծնողների հետ։ Նրանք ասացին Օլիվերին, որ Ջոզեֆը կատարում է Աստծո աշխատանքը։

Սրբեր, 1․59

Այժմ Օլիվերն ավելի հետաքրքրված էր։ Ջոզեֆի ծնողներն ասացին Օլիվերին, որ նա պետք է աղոթի և անձամբ իմանա, թե արդյոք դա Աստծո աշխատանքն է։ Եվ այսպես, մի գիշեր Օլիվերն աղոթեց ամբողջ սրտով: Աստված խաղաղություն տվեց նրա մտքերին։ Օլիվերը գիտեր, որ Ջոզեֆ Սմիթն Աստծո ծառան է։ Նա զգում էր, որ պետք է օգնի Ջոզեֆին։

Սրբեր, 1․60

Երբ ուսումնական տարին ավարտվեց, Օլիվերը գնաց հանդիպելու Ջոզեֆին և Էմմային։ Ջոզեֆն ու Օլիվերն արթուն մնացին մինչև ուշ գիշեր՝ խոսելով ոսկե թիթեղների և Աստծո աշխատանքի մասին։

Սրբեր, 1․60

Օլիվերն ասաց, որ ինքը կգրի, մինչ Ջոզեֆը թարգմանի: Նրան դուր էր գալիս սովորել Հիսուսի մասին։ Նա նաև հարցեր ուներ և ուզում էր ավելի ամուր հավատք ունենալ։

Սրբեր, 1․61

Մարգարե Ջոզեֆի միջոցով Տերն Օլիվերին ուղերձ տվեց: Նա ասաց Օլիվերին, որ հիշի այն գիշերը, երբ աղոթել էր։ Աստված խաղաղություն էր տվել նրան։ Միայն Աստված գիտեր այդ աղոթքի մասին։ Օլիվերի հավատքն ավելի ուժեղացավ: Նա շարունակում էր օգնել Ջոզեֆին, և Տերը շատ բան սովորեցրեց նրան այն մասին, թե ինչպես է Աստված խոսում մեզ հետ։

Վարդապետություն և Ուխտեր 6.14-24, 8.1-3, 9.7-9, Սրբեր, 1.62-64