Vaisū

O le vaisū o se faalagolago faifaipea i se amioga po o se vailaau leaga. O vaisū o soo se ituaiga o lona uiga o le faia‘ina lea , ma i‘u ina faalagolagotau i vailaau oona po o se amioga. O vaisu e mafai ona oo atu ai i le toilalo i le faataunuuina o tiutetauave tetele i le galuega, aoga po o le aiga. E mafai ona taitai atu ai i le taufaasese ma le tauamiotonuina o filifiliga le lelei. O le toatele o i latou o e tauivi ma vaisū e lagona le faanoanoa tele ma le leai o se faamoemoe.

Saili ina ia Malamalama

O le talanoaina o vaisū e mafai ona faigata, ma e atonu e lagonaina e tagata le faavaivaia ma le ma. Ao talanoa ai ma tagata, faafetai ia i latou mo lo latou lototele i le aapa atu mo se fesoasoani. Saili ia faaali atu le alofa ma le loto malamalama faapei ona faia e le Faaola.

Mafaufau ma le agaga tatalo e fai atu fesili e pei o nei ia fesoasoani ai ina ia e malamalama lelei i le vaisū o le tagata ma iloatino ai ona manaoga.

Faailoa mai ia te a’u le mea o loo tupu.
Na faapefea ona amata lenei faafitauli?
O le a le luitau aupito tele i le faatoilaloina o lenei vaisū?
O a ni taumafaiga na e faia e faatoilalo ai lenei luitau? O le a la se mea ua avea ma fesoasoani e oo mai i lenei taimi?
E faapefea ona fesoasoani atu le Alii ia te oe e faatoilalo lau vaisū?
O ai isi ua iloa lenei mea ma o le a le ituaiga lagolago o loo latou tuuina atu ia te oe?

Fesoasoani i le Tagata

A o e fesoasoani i le tagata ia faatoilalo lenei luitau, mafaufau e faaaoga nisi o fautuaga nei. Ia manatua e faaali atu pea lava le alofa ma le agalelei a o lua galulue faatasi ai.

Fesoasoani i le tagata e fai se fuafuaga e aloese ai po o le talanoa i tulaga ia o loo vaivai ai o ia i faaosoosoga. Ia toe iloilo soo le fuafuaga.

Aoao atu i le tagata le aoaoga faavae o le faitalia ma fesoasoani ia te ia ia malamalama o vaisū e le suia ai le faasinomaga faavavau.

Aoao atu, o soo se vaisū lava e mafai ona faatoilaloina e ala i le Faaola o Iesu Kerisa ona o Lana Togiola.
Fesoasoani i le tagata ina ia malamalama i le ala e mafai e le Faaola ona faia ina ia mafai ai e le tagata ona faatoilaloina luitau.
Fesoasoani i le tagata ina ia malamalama i le ala e mafai e le Faaola ona faia ia mafai e le tagata ona faatoilaloina luitau.
Fesoasoani i le tagata ia iloa lona faasinomaga o se atalii/afafine o le Atua ma iloa ona lava malosiaga, taleni, ma tomai.

Fesoasoani i le tagata e faailoa ia tulaga pito taatele e faatupula‘ia ai faaosoosoga (e pei o tulaga ia e faaoso ai mafaufauga ma ma‘oi e faatatau i vaisu).

Vaavaai mo lagona o i tua atu o na tulaga (mo se faataitaiga, o lagona o le nofonofonoa, tuuatoatasi, ita, ōi, po o le vaivai).
Mafaufau i nofoaga, o taimi, ma auala o tulaga faali‘ali‘a taitasi.

Valaaulia le uso/tuafafine e auai i se fonotaga i le lotoifale o le Polokalama mo le Toe Faaleleia o Olaga mai le Tagofia o Mea ua Fai ma Vaisū (TMV), vaega lagolago po o isi fonotaga o laasaga e 12 o le toe manuia mai vaisū.

Faamalosiau i le tagata e talanoa sao ma faamaoni i lona toalua, matua, po o isi tagata o le aiga e uiga i le vaisū.

Fesoasoani i le tagata i le sailia o le fesoasoani mai se tasi na te talitonuina.

Lagolago le Aiga

O vaisū e i ai foi aafiaga i tagata o le aiga faapea foi ma le tagata lava ia. A o e talanoa ai ma latou o le aiga ua afaina, faamautinoa e faaali atu le alofa ma le loto malamalama faapei ona faaalia e le Faaola. Iloilo le aafiaga i le toalua po o le aiga o le tagata ma talanoa e uiga i na faafitauli.

Amata i le fesoasoani ai i tagata o le aiga ia lagonaina le alofa ma le amana‘iaina. Atonu e mafai ona e faapea atu, “O se tulaga faigata lenei o loo e iai. O le a sou lagona?”

Vaavaai mo soo se tulaga o le fefe, popole, tuuaia o le tagata lava ia po o le leai o se faatuatuaina.

Valaaulia le toalua po o tagata o le aiga ina ia suesue mataupu faavae o loo i totonu o le Taiala Lagolago: Fesoasoani mo Taitoalua ma Aiga o i Latou o loo Toe Faaleleia.

Valaaulia tagata o le aiga ia auai i le Polokama o le Toe Faaleleia toalua ma aiga o se vaega lagolago po o se vaega lagolago e tai tutusa.

Fesoasoani i tagata o le aiga ia malamalama i le ala e mafai e le Faaola ona fesoasoani ia i latou patino ia faamaloloina, e tusa lava pe faatoilaloina le vaisu pe leai foi e le ua pele ia i latou (tagai i le Alema 7:11; Mataio 11:28-30).

Faaaoga Punaoa a le Uarota ma le Siteki

Mafaufau e fai atu i taitai o le uarota ma isi tagata faatuatuaina e tuuina atu le lagolago, taitaiga ma le fesoasoani faifaipea. Talosaga le faatagaga a le tagata ao lei talanoa atu i isi e uiga i le mataupu.

E mafai e le epikopo ona galulue ma le tagata ina ia iloa se tasi faatuatuaina e avea o se faufautua mo le tagata, ma faamalosiau loa lea ia i laua e faatutu ni sini ma fai se fuafuaga e galulue faatasi ai.

O le faufautua e tatau mo se tasi e talia e lea tagata ma e onomea pe a o se tasi na faatoilaloina foi lea lava faafitauli e tasi.
Afai o le tagata o se tamaitiiti o le vaega o tausaga vaava‘aia, e tatau i le epikopo ona faaaafia matua pe a sailia se faufautua.

Asiasi i le uepisaite mo le Polokama o le Toe Faaleleia o Vaisu (addictionrecovery.ChurchofJesusChrist.org) e sue ai se fonotaga i le lotoifale e auai atu i ai le tagata. Afai e le o i ai se mea, mafaufau e faafesootai atu le peresitene o le siteki e talosaga i ai ia amataina se fonotaga.

Faailoa punaoa i le lotoifale e tuuina ane auaunaga e ogatasi ma mataupu faavae o le talalelei.

O punaoa e mafai ona aofia ai faufautua faapolofesa, polokalama mo togafitiga, ma matagaluega a le malo.
Atonu e manaomia foi e le tagata le fesoasoani faaopoopo faafomai. Mafaufau ia maua mai se suesuega faapolofesa e iloa ai le maualuga talafeagai o le tausiga.