Tupe

Ua i ai i tagata uma le tiutetauave e saunia ai mo o latou lava manaoga, faapea ma manaoga o tagata o le aiga, i le mea sili e mafai ai. O le tiutetauave o le puleaina o mea tautupe a le aiga e tatau ona faasoaina i le va o le tane ma le ava ma se uiga o le faatuatuaina ma le fefaasoaa’i tatala. O le puleaina ma le atamai o mea tautupe e mafai ona tuuina mai ai le puipuiga ma faatupuina ai le tulaga manuia faaleaiga.

Atonu e aafia tagata i faafitauli tautupe ona o le leai o se galuega, soona faaaluina [o tupe], faalavelave faafuasei e lei mafaufauina, po o le lē lelei ona puleaina o tupe. Fesoasoani i tagata ina ia malamalama i le taua o le totogiina ma le faamaoni o le sefuluai, ola i mea o loo maua, teuina o tupe mo mea e lei fuafuaina, ma aloese mai le aitalafu. Ao amata ona ola tutoatasi atili aiga i mea tautupe, o le a latou lagona le faasilia ona puipuia ma fiafia i le filemu sili atu i o latou olaga.

Ia nofouta o faafitauli tautupe e masani ona oo mai e faapei o se tulaga faafuasei. Fesoasoani i tagata ia mafaufau muamua i a latou lava punaoa o i ai (e pei o uo ma aiga patino ma le aiga lautele) a o le’i sailia se fesoasoani tautupe mai le Ekalesia. Ao e saili atu i tagata o loo tauivi, ia iloa faailoga atonu o i ai ni o latou manaoga. Ia faamamafa e le aunoa i tagata le taua o le pulea ma le tatau o mea tautupe ma ia saunia mo faalavelave faafuasei po o faigata tautupe e lei mafaufauina.

Saili ina ia Malamalama

O le talanoaina o faafitauli tautupe e mafai ona avea o se mea mamafa, faaafaina lagona, ma faigata. A o e tuuina atu fesili, faamautinoa e faaali atu le alofa ma le gaualofa faapei ona faia e le Faaola. Mafaufau ma le agaga tatalo e fai atu fesili e pei o nei i se ala agalelei ma alofa ia fesoasoani ai ina ia e malamalama lelei i le tulaga tautupe o le tagata ma iloatino ai ona manaoga.

O le a le tulaga o au mea tautupe i le taimi nei? (Mo se faataitaiga, e fia le tupe maua o loo e mauaina, e fia o loo e faaaluina, ma e fia ni aitalafu o ia te oe?)
O ai e puleaina mea tautupe i lou aiga?
E faapefea ona e faia faaiuga o ni faatauga? (E afaina ou lagona i le faaaluina [o tupe]? Mafaufau-faapaketi?)
O le a se tulaga o i ai lau galuega?
O le a se tulaga e te iai pe ana faapea e tatau ona e faalagolago i au tupe faasao po o tupe teu?
O i ai sau paketi mo lou aiga? O le a se lelei o lou tausisia [o lena paketi]?
O le a le faapogai sili ona telē o ou faafitauli tautupe? (O faapogai e mafai ona aofia ai le soona faaaluina o tupe, pili o falema‘i, po o le tete’aga.)
O ai se isi tagata na e fesili i ai mo se fesoasoani (e pei o aiga po o uo)?
O le a se fesoasoani tautupe ua uma ona e mauaina?
O a isi punaoa o ia te oe e mafai ona e faaaogaina?

Fesoasoani i le Tagata

A o e fesoasoani i le tagata ia malamalama i mataupu faavae o le ola tutoatasi, mafaufau e faaaoga nisi o fautuaga nei: A o lua galulue faatasi, saili e faaali atu le gaualofa ma fesoasoani i tagata ia faatumau se lagona o le mamalu.

Aoao atu mataupu faavae o le totogiina ma le faamaoni o se sefuluai ma tuuina atu se taulaga anapogi lima foai, faapena foi mataupu faavae o le ola tutoatasi.

Aoao atu faapea o le puleaina o mea tautupe a le aiga e tatau ona avea ma se tiutetauave faasoaina i le va o le tane ma le ava.

Faailoa mai punaoa o i ai mo fesoasoani tautupe.

Fai se lisi o taleni ma tomai.
Ia fai se lisi o fesootaiga, sootaga, meatotino, aseta tautupe, po o isi aseta lea e mafai ona fesoasoani e maua ai tupe maua.

Uunaia le aiga ia puleaina ma le mataalia a latou tupe ma faakalena le totogiina o aitalafu po o se faiga e faaitiitia ai aitalafu, pe a manaomia, ma faateleina tupe faasao.

Valaaulia ulugalii e atiina ae se fuafuaga mo le faaaluina [o tupe] (tagai i le tusigalue Tupe Patino mo le Ola-Tutoatasi).
Fautuaina ulugalii e fuafua ma mataitu le faaaluina o tupe.
Fautuaina ulugalii e auai i le vaega o le Tupe Patino Ola Tutoatasi. Afai e le o i ai se vaega i la outou eria, manatunatu e faafesootai le tagata tomai o le ola tutoatasi a le siteki.

Lagolago le Aiga

O faafitauli tautupe e aafia ai tagata uma o le aiga. Iloilo le aafiaga i le toalua po o isi tagata o le aiga ma talanoaina na faafitauli.

Uunaia le aiga ina ia avea mataupu tautupe o se taumafaiga faaleaiga.

Valaaulia le aiga e faamuamua le teuina o tupe (mo mea e pei o faatauga tetele i le lumanai, faalavelave faafuasei, misiona, ma aoaoga).
Fesoasoani i le aiga ina ia malamalama i le auala e paketi ai.
Uunaia tagata ia mulimuli i mataupu faavae ola-tutoatasi ma ia tapa atu i tagata o le aiga ma uo mo se fesoasoani ona sosoo ai lea ma le epikopo, pe a manaomia.

Faaaoga Punaoa a le Uarota ma le Siteki

Mafaufau e galulue faatasi ma taitai o le uarota ma isi tagata faatuatuaina e tuuina atu le lagolago, taitaiga, ma le fesoasoani faifaipea. Talosaga le faatagaga a le tagata ao lei talanoa i isi i le mataupu.

E mafai e taitai ona mafaufau e talanoaina le tulaga i totonu o le aufono a le uarota ina ia faailoa ai punaoa, tagata fesootai, ma avanoa e fesoasoani ai i le tagata.

Faafesootaia le aiga ma se tasi e mafai ona faufautuaina i latou, fesoasoani ia i latou e faatutu ni sini, ma faia se fuafuaga ina ia galulue faatasi.

Valaaulia le tagata tomai faapitoa o le uelefea po o se tasi i le uarota e fesoasoani i le aiga e saunia se paketi ma se fuafuaga o le faaaluina o [tupe].

Faailoa ma uunaia le faaaogaina o faalapotopotoga tauleleia i le lotoifale ma punaoa.

O punaoa e mafai ona aofia ai:

Faalapotopotoga a le malo ma ofisa tumaoti
NGOs (e le o ni faalapotopotoga a le malo)
Faalapotopotoga e le manaomia ni polofiti
Vasega o mea tautupe i le lotoifale
Uepisaite ma polokalama Initoneti mo le puleaina o tupe