Pule i le Ola

Asiasi i le “Pule i le Ola” vaega i le ChurchofJesusChrist.org po o i totonu o le polokalama o le Gospel Library ia maua laina fesoasoani e faaaoga fua mai le lalolagi ma punaoa mo le fesoasoani ai i tagata o loo tauivi ma faigata e fesootai ma le pule i le ola.

O le pule i le ola o se faafitauli faalekelope tau soifua maloloina lautele lea e tele ina mafai ona foia. O le toatele o tagata e taumafai e pule i le ola e le fia oti; latou te moomia se mapusaga mai tiga faaletino, faalemafaufau, faalelagona, po o tiga faaleagaga o feagai ma i latou. Peitai, atonu e latou te oo atu i le tulaga vevesi ogaoga lea e latou te le maua ai le faamoemoe ma le mafai ai ona maua se tali i o latou tiga, pe a latou talitonu o i latou o se avega i isi, pe a latou lagona le faanoanoa, pe ua gase lagona o le uiga o le oti ma le tigā, pe a latou le mafai ona toe iloa mafuaaga e ola ai.

O le lamatia i le pule i ola e mafai ona faaitiitia pe a galulue faatasi tagata o le aiga, uo, tagata o le uarota, ma polofesa o le soifua maloloina faalemafaufau e fesoasoani ia i latou o e o loo tauivi ai. E tatau i tagata uma ona aoao uiga lamatia ma faailo lapatai o le pule i le ola, ona aapa atu lea e saili fesoasoani mo se tagata ua mafaufauina le pule i le ola. O le talanoa ai ma se tasi e uiga i le pule i le ola e le faatupulaia ai le ono faatino ai e lena tagata o lagona e pule i le ola.

E tatau i tagata uma ona matuai vaai toto‘a i soo se tulaga e ta’ua pe taumate ai e se tagata i o loo ia mafaufau e uiga i le pule i le ola, po o se tasi e pele ua ta‘u pe taumate mai o loo iai se tagata o loo i tulaga o le pule i le ola. E tatau i tagata uma ona aapa atu i le alofa e faamafanafana, faamalosiau, ma tausia latou o e o loo tauivi ma lenei faafitauli faapea ma o latou aiga.

Ae faanoanoa ai, e ui lava i a tatou taumafaiga sili ona lelei, e leo mafai lava ona puipuia mai le pule i le ola. Pe a oo ina tupu, e tu’ua se loto sili ona nutimomoia, vevesi faalemafaufau, ma fesili e le o taliina mo tagata o le aiga ma e ua pele. I tulaga faapenei, e tatau i taitai ma tagata o le uarota ona saili atu ia faamalolosia ma lagolagoina le aiga ma e ua pele.

Na saunoa mai Elder Dale G. Renlund, “[O le] manatu faalelotu tuai e faapea o le pule i le ola o se agasala ma o se tasi e na te faatinoina le pule i le ola e faate’a atu o ia i seoli e faavavau… [e] sili ona sese” (Dale G. Renlund, “Malamalama i le Pule i le Ola” [vitio])

Na tuuina mai e Elder M. Russell Ballard ia upu faamafanafana nei:

“O le mea moni, tatou te le iloa tulaga uma e mafua ai ona pule i le ola. E na o le Alii e silafia itu uma, ma o ia lava foi lea o le a faamasinoina a tatou amioga iinei i le lalolagi.

“Pe a ia faamasinoina i tatou, ou te lagona o le a Ia aumaia mea uma lava e iloilo: o fausaga o totino tuufaasolo ma fausaga faavailaau , o tulaga o o tatou mafaufau, lo tatou gafatiaga faaleatamai, aoaoga tatou te maua, o uputuu a o tatou tama, lo tatou ola maloloina, ma isi mea faapena” (“Pule i le Ola: Nisi Mea Ua Tatou Iloa, ma Nisi Tatou Te Leiloa,” Ensign, Oke. 1987, 8).

Saili ina ia Malamalama

A o e talanoa ai ma tagata, faamautinoa e faaali atu le alofa ma le loto malamalama faapei ona faia e le Faaola. O aafiaga ma tulaga o le olaga e eseese mo tagata uma lava. Afai e te lagona o se tasi o loo lamatia i le taumafai e pule i le ola, mafaufau ma le loto tatalo e fai atu fesili e pei o nei ia fesoasoani ia te oe ia malamalama lelei ai i ona popolega ma manaoga.

E mafai ona e fesoasoani mai ia ou malamalama po o a mea o e lagonaina ma e aafia ai i le taimi nei?
Pe sa maua oe i se tulaga o se faafitauli o le soifua maloloina faalemafaufau? Pe o e mulimulitaia togafitiga faatonuina mo lenei tulaga?
Pe o ia te oe le faamoemoe faapea o tulaga uma e mafai ona faaleleia i lou olaga?
O a ni au mafuaaga o lou ola ai?
O a punaoa na fesoasoani ia te oe e taulimaina ai i aso ua tuanai?
Pe na e taumafai e faamanu’alia oe muamua? O le a le lata mai?
Pe o e mafuafau e uiga i le pule i le ola i le taimi nei?
Pe o i ai sau fuafuaga e taumafai le pule i le ola? Pe na e mafaufau i se taimi, nofoaga, po o le auala?
Pe o iloa e lou aiga, uo, po o isi ou mafaufauga?
O le a le tulaga o le faigofie ona e maua le fesoasoani i le taimi nei?

Fesoasoani i le Tagata

A o e saili e fesoasoani atu i le tagata, mafaufau i fautuaga nei:

Fesoasoani i le tagata ia maua le faamoemoe ma le faamalologa e ala i le Faaola o Iesu Keriso.

Fesoasoani i le tagata ia malamalama i le mana gafatia ma le lavea‘i o Iesu Keriso.
Fesoasoani i le tagata ia malamalama o ia o se atalii/afafine o le Atua ma e sili lona taua.
Fesoasoani i le tagata ia iloa e alofa le Atua ia te ia po o le a lava le mea e tulai mai.
Fesoasoani i le tagata ia malamalama o le faamalologa atonu e le faapea o se fofo e foia ai se ma‘i faalemafaufau i lenei olaga. Tagai i le punaoa i luga o le Soifua Maloloina Faalemafaufau mo nisi faamatalaga.
Mafaufau e fono e le aunoa ma le tagata ma lona aiga e faaopoopo atu i asiasiga fai soo mai taitai o le Ekalesia.
Ia faafesootai atu le tagata i isi punaoa a le Ekalesia e pei o “Pule i le Ola” ma le “Soifua Maloloina Faalemafaufau” vaega i le ChurchofJesuCrhist.org, lea e na te maua ai tali i ana fesili patino.
Faamautinoa e iloa e le tagata le punaoa o le laina tuusa’o o le pule i le ola ma maua ai le fesoasoani i le faafitauli.

Feutagai ma punaoa o tomai faapolofesa.

Afai o e popole e uiga i le saogalemu o se tasi, pe talitonu e ono taumafai se tasi e pule i le ola, ia vave faafesootai loa auaunaga o faalavelave faafuasei faalesoifua maloloina i le lotoifale po o le ofisa o Tautua mo Aiga a le AAG (i nofoaga o loo maua ai). E mafai foi ona faafesootaia e taitai o le Ekalesia le laina fesoasoani a le Ekalesia mo se fesoasoani i lea mataupu.
O nei punaoa e mafai ona fesoasoani ia te oe ia faailoa mai ai tomai faapolofesa i le lotoifale po o faalapotopotoga ia e mafai ona fesoasoani i le tagata.

Fesoasoani i le tagata ia maua togafitiga talafeagai mo lona tulaga faalesoifua maloloina faalemafaufau.

Uunai le tagata e faaaoga punaoa o loo fautua mai e le Tautua mo Aiga a le AAG po o auaunaga faafomai mo faalavelave faafuasei. Atonu e mafai ona e fesoasoani ia te ia e faatulaga taimi o fautuaga po o le alu i le potu o faalavelave faafuasei o le falemai e pito lata ane.
Faatasi ai ma le faatagaga mai le tagata, ia faailoa atu i tagata o le aiga talafeagai le tulaga o loo i ai. Fai atu ia i latou e saili faatonuga mai tagata polofesa tomai faapitoa i le soifua maloloina faalemafaufau e uiga i le ala e fuafua ai mo le saogalemu o le tagata. E ono aofia ai iinei le faasaina o le ono mauaina e le tagata o mea e ono lamatia ai o ia.
Pe a talafeagai ai, ia fesootai soo ma le tagata polofesa tomai faapitoa i le soifua maloloina faalemafaufau po o tagata o le aiga i le taimi o togafitiga.
Afai e teena e le tagata le fesoasoani ma i ai sana fuafuaga mo le lamatiaina o ia ma le faamoemoe e faatino, vave faafesootai loa punaoa o faalavelave faafuasei i le lotoifale (e pei o le pulega a le malo) ma tagata o le aiga e momoli atu le tagata i auaunaga faafaalavelave faafuasei.

Lagolago le Aiga

O se tagata o se o loo lamatia i le faatinoina o le pule i le ola e mafai ona aafia ai olaga o tagata o lona aiga. O matua, taitoalua, ma isi tagata o le aiga e masani lava ona tauivi i le iloaina o le ala e fesoasoani ai i sē ua pele i taimi o se faalavelave. E tele ina lofituina i latou ma e latou te ono misia faailo lapatai. A o e taumafai e fesoasoani atu i tagata o le aiga, mafaufau i fautuaga nei:

Tausia le lē faalauaiteleina e uiga i le tulaga vagana ai o le faamata’u ua ono tula’i mai, o le tulaga o loo aofia ai se tamaitiiti e itiiti tausaga, po o le tagata po o le aiga ua tuuina atu ia te oe le faatagaga e talanoa atu ai i isi.

Faamautu le aafiaga o le tulaga o le tagata i lona aiga ma fesoasoani i tagata o le aiga e faailoa punaoa e latou te manaomia mo lo latou lagolagoina ma le taitaiga.

Ia faamalosiau atu i le aiga e fefautuaai faatasi e uiga i manaoga o le tagata ma le auala e faaaoga ai punaoa o loo avanoa e fesoasoani ai ia te ia ma i latou.
Afai e mananao i ai le aiga, feiloai faatasi ma i latou (po o le fautua atu isi taitai o le Ekalesia e feiloai ma i latou pe a talafeagai ai) ina ia atiina a‘e se fuafuaga atoa e faamalieina ai o latou manaoga, e aofia ai fuafuaga mo le saogalemu ma lagolago atu i se pele ia i latou ia maua le tausiga faalepolofesa ma faaleagaga e manaomia.

Mafaufau i le fesoasoani faapolofesa patino po o le faufautua mo tagata o le aiga.

Uunai taitoalua, matua, ma isi tagata o le aiga ina ia auai foi i le faufautua faatasi ma le tagata pe afai e faamautu mai e le tagata tomai faapolofesa faapitoa faalesoifua maloloina faalemafaufau o lenei auai e fautuaina ma talafeagai.

Faaaoga Punaoa a le Uarota ma le Siteki

Mafaufau i fautuaga nei a o e taumafai e faaaoga punaoa a le uarota ma le siteki e fesoasoani ai i le tagata ma le aiga. Manatua ia tausia le lē faalauaiteleina e uiga i le tulaga vagana a ua tuuina atu e le tagata po o le aiga ia te oe le faatagaga e talanoa atu ai i isi.

Fai atu i taitai o le Ekalesia po o isi tagata faatuatuaina e tuuina atu faifaipea le lagolago, taitaiga, ma le fesoasoani i le tagata.

Faailoa ma le agaga tatalo se tagata e faatuatuaina o se e mafai ona tulitatao atu i le tagata e le aunoa ma valaaulia lena tagata ina ia faia lea tiute.

O le tagata ua filifilia e tatau o se tasi e mafana lelei ai lagona o lea tagata.
O le tagata e tatau ona magafagafa ma tulaga lelei faalemafaufau ma e mafai ona avea o se tasi o se uso po o se tuafafine mo auaunaga.

Mafaufau e faatulaga aoaoga mo sui auai o aufono o le uarota po o le siteki i le puipuiga o pule i le ola.

Faaaoga anomea mai Punaoa Faufautua po o mai le vaega “Pule i le Ola“ i le suicide.ChurchofJesusChrist.org.
Mafaufau e valaaulia se tagata tomai faapitoa polofesa mai le polokalama o punaoa o le lotoifale e lata ane e fesoasoani ai. O le Tautua mo Aiga a le AAG (i nofoaga e maua ai) po o auaunaga faafomai faalavelave faafuasei i le lotoifale e mafai ona fesoasoani e faailoa atu punaoa faapena.