Sauaga (Manaoga a lē na Saua)

Laina Fesoasoani

E tatau i epikopo, peresitene o paranesi, ma peresitene o siteki ona valaau atu i e aunoa ma le toe faatali le telefoni fesoasoani a taitai o le Ekalesia i taimi taitasi latou te iloa ai se sauaga. O lenei punaoa e tuuina atu ai le lagolago e fesoasoani ai i tagata ua aafia i sauaga ma i le ausia ai o tulaga manaomia o le lipotiina atu. Alu i Numera o Laina Fesoasoani mo le numera o le laina fesoasoani ma mo nisi faamatalaga.

E matua lē tatau i se taitai o le Ekalesia ona faaleaogaina se lipoti o se sauaga faatautala pe fautuaina se tagata ina ia lē lipotia se gaoioiga faalesolitulafono.

I.S. ma Kanata

Afai e iloa e isi au paia se sauaga, e tatau loa ona latou faafesootaia vave ‘au pulega faaletulafono. E tatau foi ona latou fefautuaai ma o latou epikopo po o peresitene o le siteki, o e o le a valaau i le laina fesoasoani mo le sauaina mo se taitaiga i le fesoasoani atu i tagata ua aafia i sauaga ma le ausiaina o mea e manaomia mo le lipoti atu.

O Atunuu i Fafo atu o le I.S. ma Kanata

Aoao pe faapefea ma po o afea e tatau ai ona e lipoti atu se sauaga faatautala. E ao i peresetene o siteiki ma epikopo ona valaau vave atu i le laina fesoasoani mo se taitaiga pe afai o loo i ai sea laina fesoasoani i lo latou atunuu. I atunuu e leai se laina fesoasoani faapea, e tatau i se epikopo ua silafia se sauaga ona faafesootai lona peresitene o le siteki. O le a ia sailia ni faatonuga mai le ofisa o le fautua faaletulafono i le eria (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2020), 38.6.2.1, ChurchofJesusChrist.org). O isi aupaia e tatau ona mulimulita‘i i soo se matafaioi faaletulafono o le lipoti atu ma fefautuaai faatasi ma o latou epikopo.

E Le Mafai Ona Taliaina Sauaga

O le sauaina o le agaleaga lea po o le tuulafoaiina o isi (e pei o se tamaitiiti po o se toalua, tagata matutua, po o tagata e i ai manaoga faapitoa) i se auala e mafua ai ona afaina faaletino, faalelagona, pe faalefeusuaiga. O le tulaga o le Ekalesia e le mafai ona taliaina sauaga i soo se ituaiga, ma o i latou e faia sauaga, e tali atu mo i latou lava i luma o le Atua. Pe tausalaina faaletulafono se tasi pe leai ona o sauaga, o i latou o e faia sauaga e tuuina atu mo aoaiga faaleEkalesia ma e ono aveeseina ai lo latou tulaga o ni tagata auai o le Ekalesia (tagai i le Mataio 18:6; Mareko 9:42; Luka 17:2).

O ulua‘i tiutetauave o le Ekalesia i tulaga o sauaga, o le 1) fesoasoani atu, i se auala agalelei ma le gaualofa ia i latou o e na sauaina, ma 2) puipuia i latou o e e ono aafia gofie i le toe sauaina foi i le lumanai. E ui o nisi o ituaiga o sauaga e ono afua ai ni afaina faaletino, ae o ituaiga uma o sauaga e aafia ai le mafaufau ma le agaga. O sauaga e masani ona faataumaoia ai le faatuatua ma e mafai ona afua ai le le mautonu, masalosalo, le talitonuina, tausalaina, ma le fefe o le tagata ua sauaina.

E masani lava o i latou e faia sauaga e i ai nisi agasala matuia e lei faaleleia po o ni faafitauli tau i le soifua maloloina faalemafaufau pe na sauaina foi lava i latou ia. O nisi o tagata na faia sauaga ua lagona le faanoanoa, se mana‘o e ta‘uta‘u atu a latou agasala, ma se naunauta‘iga e amata le faagasologa o le salamo. O isi e ono faafitia le faia o se mea sese, faaleano i a latou amioga, po o le tuuaia o se isi tagata. O le iloiloina o le loto salamo ma le naunau e sui o le laasaga muamua lea i le fesoasoani atu i le tagata na faia le sauaga.

O nisi o tagata e faia sauaga faatautala e faitogafiti, faufauleaga, ma taufaasese ina ia ese la latou tala o mea na tutupu mai le faamatalaga a le tagata na sauaina. I tulaga uma, ia mafaufau muamua lava i le saogalemu ma le puipuiga o le tagata ua sauaina. E tatau i epikopo ma peresitene o siteki ona feutaga‘i ma le laina fesoasoani a o latou faavaeina se fuafuaga saogalemu.

O taitai o le ekalesia e le o faamoemoe pe uunaia e su‘eina le pogai o le gasegase pe tuuina atu togafitiga i tagata o loo tauivi ma faafitauli o le soifua maloloina faalemafaufau e sootau i sauaga. O le toatele o e ua tausalaina e tatau ona manatu e sailia le fesoasoani tau tomai faapitoa faapolofesa. O le Tautua mo Aiga a le AAG (i nofoaga e i ai) ua avanoa e tuuina atu fautuaga ma ofo atu isi faamatalaga i taitai e uiga i punaoa i o latou alalafaga.

E tatau i epikopo ona taula’i atu i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata (2020) mo faatonuga e uiga i valaauga i le Ekalesia, pepa faataga o le malumalu, ma isi fesili e faatatau i ai, pe a ua suesueina loa le tagata na faia sauaga ma ua maua se taunuuga e uiga i le ogaoga o le sauaga. Pe a mafaufau i tapuia‘iga o le avea ma tagata o le ekalesia mo talavou e faia sauaga, tagai i le Tusitaulima Aoao, 32.7.7.

Saili ina ia Malamalama

Mafaufau ma le agaga tatalo e fai atu fesili e pei o nei ia fesoasoani ai ina ia e malamalama lelei i le faafitauli o le tagata ma lona saunia ma le naunau mo le salamo.

E mafai ona e fesoasoani mai ia ou malamalama i le tulaga e pei ona iai?
O le a le taua mo oe o lou salamo?
Pe na faapefea ona e faaaogaina mataupu faavae o le talalelei e fo‘ia ai manaoga ma amioga saua?
O le a se mea ua e naunau e fai ina ia e sui ai?
E mafai faapefea ona ou fesoasoani ia te oe i le faagasologa o lou salamo?
E i ai se isi mea e uiga i lenei sauaga e tatau ona ou iloaina?

Fesoasoani i le Tagata

A‘o e fautuaina le tagata, mafaufau e faaaoga nisi o fautuaga nei:

Ia talanoaina ma le tagata o taunuuga o amioga saua ia te ia lava ma lona aiga, e aofia ai aoaoga faavae ma aiaiga a le Ekalesia e faatatau i faatautala. (Toe iloilo punaoa o loo i totonu o Aiaiga Faavae ma Aoaoga a le Ekalesia mo nisi faamatalaga).

Fesoasoani ia maua e le tagata le faamoemoe ma le faamalologa e ala atu ia Iesu Keriso ma Lana Togiola.

I tulaga e pei o sauaga faaletino po o faaupuga, fesoasoani i le tagata e faailoa ni auala maloloina lelei, ma le lē saua e tali atu ai i tulaga po o lagona faigata, e pei o nei:

Ia tuu ia lava se taimi e faanofomalie ai faalogona ma ia faataga se tali magafagafa e ala i le, mo se faataitaiga, alu e savalivali, manava tele i totonu, faitau e oo i le 100, po o le galue i se galuega faatino.
Fefaasoaa‘i malie popolega e aunoa ma ni faitioga.
Faaalu se taimi e mafaufau ai i manatu ma lagona o isi.

Lagolago le Aiga

O sauaga faatautala e i ai aafiaga i tagata o le aiga faapea foi ma le tagata lava ia. Iloilo le aafiaga i le toalua po o le aiga o le tagata ma talanoa i na faafitauli. E ui i le tatau ai ona fesoasoani i lē na solitulafono i le faagasologa o lona salamo, o ni isi taimi e lagonaina e le ua sauaina le lē amanaiaina o ia pe a foliga mai o le taulaiga patino a taitai o le fesoasoani atu lea i le na solitulafono. Ia fesootai so’o atu i le na sauaina ia faamautinoa o ona manaoga o loo faapea foi ona faamalieina.

Faaaoga punaoa i le lotoifale po o le fesoasoani faapolofesa mo tagata o le aiga o e ono manaomia le fautuaina po o le lagolago.

Fesoasoani i tagata o le aiga ia malamalama i le ala e mafai ai e le Faaola ona fesoasoani e faamalolo i latou lava (tagai i le Alema 7:11 ma le Mataio 11:28-30).

Tuuina atu le lagolagosua faifaipea i isi o le aiga o e o ono aafia ai.

Faaaoga Punaoa a le Uarota ma le Siteki

Talosaga mo le faatagaga a le tagata ao lei talanoaina le tulaga ma isi. E tatau i epikopo ona fesootai atu i le laina fesoasoani o le sauaina pe a tulai mai ni fesili e faatatau i le le faalauaiteleina ma le tiute e puipui ai.

Fesoasoani i le tagata e saili ma maua mai le fesoasoani faapolofesa, pe a tatau ai.

Faaaoga punaoa i le lotoifale e tuuina atu auaunaga e ogatasi ma mataupu faavae o le talalelei.
Faafesootai le Tautua mo Aiga o le AAG i le lotoifale po o ofisa o le eria mo nisi punaoa po o filifiliga mo fautuaga.

Mafaufau e galulue ma le epikopo e tuuto atu le taimi i le aufono a le uarota po o se isi fonotaga ina ia aoaoina taitai i le aloese ma le tali atu i sauaga faatautala.