Lagolago mo Tagata e Tuuina atu le Tausiga

O se tagata e tuuina atu le tausiga o se tagata lea e tuuina atu le tausiga faifaipea mo se tagata ua le mafai e ia lava ona faatino nisi o manaoga po o manaoga uma lava. E masani lava o le tagata e mauaina le tausiga o se tagata lea o le aiga o loo ola ma se faaletonu faaletino po o le faalemafaufau, gasegase tumau po o maua i aafiaga o le matua o le soifua. O le tuuto atu o le taimi e manaomia i le tausiga o tagata faapena e mafai ona i le va o ni nai itula i se vaiaso e oo atu lava i le tausiga faale 24-itula.

O tagata e tuuina atu le tausiga e masani ona manaomia ia paleni le galuega, lotu, ma isi tiutetauave faaleaiga ae o le taimi foi lava lea ia taumafai ai e tuuina atu le tausiga patino i se ua pele. E ui o le tuuina atu o le tausiga o se aafiaga e masani ona matuai tauia lelei ma faatamaoaigaina, ae o manaoga o le tausiga faifaipea e mafai foi ona mafua ai le popole, lelavā, ōi i mea tau tupe, atuatuvale, ma le vaivai.

Atonu e i ai manaoga o tagata e tuuina atu le tausiga e le o iloa e isi, ma atonu foi latou te mumusu e talosaga atu mo se fesoasoani. O tagata e tuuina atu le tausiga atonu e maualuga atu le lamatia i faanoanoaga, atuatuvalega, faaaoga faatautala o vailaau faasaina, po o faafitauli faaletino o le soifua maloloina. Latou te ono oo foi i le faavauvau, inoino, po o le ita i le aveesea o o latou faamoemoega ma faanaunauga. O o latou olaga i lea aso ma lea aso, saolotoga e fai ni mea latou te mananao ai, ma sini mo le lumanai, atonu ua suia uma lava mai mea sa latou faamoemoeina i se taimi ua te‘a.

Saili ina ia Malamalama

A o e talanoa ai ma tagata e tuuina atu le tausiga, manatua e faaali atu le alofa ma le loto malamalama faapei ona faia e le Faaola. Ona e eseese ia tulaga uma, ma e eseese foi tulaga o tagata taitoatasi, ia mafaufau ma le agaga tatalo e fai atu fesili faapenei i se ala agalelei ma alofa e fesoasoani e te malamalama lelei ai i tulaga o le tagata e tuuina atu le tausiga ma iloatino ai ona manaoga.

O le a tulaga o i ai nei, ma o a ou tiutetauave?
O a ni vaega sili ona faigata e uiga i mea o e aafia ai?
Na faapefea ona aafia lou aiga (soifua maloloina, popolega tautupe, matafaioi, tiutetauave, ma isi mea faapena) i le avea ai ma se tagata e tuuina atu le tausiga?
O a ni luitau o feagai ma oe i au fegalegaleaiga ma le tagata o loo e tausia?
Mata e ono faaleleia lou tulaga, tumau ai pea faapena, po o le faasolo ina faalemanuia i le aluga o taimi?
O le a se ituaiga o fesoasoani tau tausiga o e mauaina i le taimi nei (mai i isi tagata o le aiga, uso ma tuafafine auaunaga, punaoa faalenuu, po o i latou o tuuina mai tausiga faalesoifua maloloina)?
O a ni galuega ma tiutetauave ua le mafai e oe ma isi tagata o le aiga ona faamaeaina, a le ona o le le lava o le taimi po o le tomai foi?
O le a se mea o e faia e tausia ai oe lava (tausiga paleni, moe, faamalositino, siaki masani o le soifua maloloina)?
O le a se isi mea e te manao e faasoa mai ia te a’u e uiga i lou tulaga?

Fesoasoani i le Tagata

A o e fesoasoani atu i le tagata i lona tulaga, mafaufau e faaaoga nisi o fautuaga nei.

Fesoasoani i le tagata e tuuina atu le tausiga ia malamalama i le mana togiola ma le faamalosiau o le Faaola o Iesu Keriso (tagai i le Alema 7:11–12; MF&F 88:6; Mosaea 24:13–15).

Filima‘oti pe faapefea ona fesoasoani atu i se tagata o tuuina atu le tausiga ina ia fesootai pea ma isi tagata o le uarota atoa ma sauniga tapuai.

Afai e lagona e le tagata e tuuina atu le tausiga ma le tagata o mauaina le tausiga o loo avea i latou ma se avega tugā i le uarota, fesoasoani ia i latou ia malamalama e faatauaina i latou ma o le toatele o tagata o le uarota ua fiafia e auauna atu ia i latou.
Ia mautinoa o loo tuuina atu le faamanatuga i le fale, pe a manaomia.
Faamautu pe o manaomia e le tagata e tuuina atu le tausiga se fesoasoani e auai ai i le Lotu, le malumalu, po o nisi gaoioiga.
Faasoa atu i le tagata e tuuina atu le tausiga le ala o avea ai lana faataitaiga ma aafiaga o loo fesoasoani atu ai i isi tagata o le uarota.
Mafaufau e tuu atu i le tagata e tuuina atu le tausiga avanoa talafeagai e auauna atu ai e aunoa ma le faaopoopo atu i le latou avega.

Asiasi atu i le tagata e tuuina atu le tausiga ma le tagata o tausia ma faailoa atu lou alofa ma popolega mo i latou uma o loo aofia ai.

Fuafua ni asiasiga i le fale ina ia malamalama lelei ai i le tulaga o loo iai.
Tuu atu se faamalosiauga ma se fesoasoani i le tagata e tuuina atu le tausiga ina ia malamalama e le o tuuaunoaina o ia.
Fesoasoani e faatulaga ni faamanuiaga faaleperisitua pe a talosagaina po o le musuia foi ina ia faia.
Ia talanoaina po o a fuafuaga a le tagata e tuuina atu le tausiga mo le fetuunaiga o le tausiga pe po o le a le mea e fai pe a faateteleina se faaletonu o le tulaga, ma pe faapefea ona fesoasoani le uarota.

Faailoa atu punaoa o i ai ina ia mafai e le tagata e tuuina atu le tausiga ona tapa atu i ai mo se fesoasoani.

Fai se lisi o taleni, tomai, ma punaoa o tagata o le aiga ma uo o e mafai ona tuuina atu se fesoasoani manaomia ma faia se fuafuaga e faaaoga ai nei punaoa.
Fesoasoani i le tagata e tuuina atu le tausiga ia iloa avanoa mo taimi mo le tagata lava ia. Mafafau i manaoga patino ma faaleagaga ma faapea foi ma avanoa faafiafia.

Faailoa atu punaoa faaopoopo e manaomia, e pei o le:

Fesoasoani tautupe
Inisiua
Fesoasoani ma le lagolago mai isi tagata o le aiga
Lagolago mo le soifua lelei faaletino ma le mafaufau
Galuega
Femalagaaiga
Fealuaiga faafaigofie ma tekonolosi fesoasoani po o masini

Lagolago le Aiga

Afai o loo i ai isi tagata o le aiga i le fale, atonu e manaomia ona latou fesoasoani i le tagata e tuuina atu le tausiga. Faamautu le aafiaga o lenei mea i luga o le tagata e tuuina atu le tausiga ma le tagata o loo mauaina le tausiga, faapea foi i luga o le toalua, fanau, ma isi tagata o le aiga ma ia talanoaina na faafitauli.

Fesoasoani i tamaiti ia malamalamalma i le fetuunaiga o matafaioi ma manaoga i totonu o le aiga.

Atonu o le a iloa e tamaiti ma tupulaga talavou e tele atu ni o latou tiutetauave pe afai o se matua po o so latou tei o loo avea ma tagata e tuuina atu le tausiga pe mauaina le tausiga (mo se faataitaiga, o tiutetauave mo le aiga, lotoa, po o le vaaiga o le taavale).
O matua o loo avea ma tagata e tuuina atu le tausiga po o e o loo mauaina le tausiga, atonu e le mafai ona faaalu se taimi tele ma a latou fanau e pei ona latou mananao i ai.

Ia faaaofia tamaiti i gaoioiga ma isi aiga o le uarota.

Valaaulia aiga o le uarota e asiasi atu i le fale, ma faamalosiau i latou e auai i gaoioiga faaleaiga, e pei o afiafi faaleaiga.

Atonu e lagona e le tagata o loo mauaina le tausiga e pei ia o se avega mamafa i tagata e tuuina atu le tausiga, ma atonu foi e faigata ona tonu ona manatu i le tele o mea pe afai e matuai ogaoga lava ona gafatiaga. Mafaufau i ni auala e fesoasoani ai i le tagata ia maua le faamoemoe ma le faamalieina.

E fua lava i le tulaga, fesoasoani ia ona iloa ma auai i gaoioiga anoa (e pei o auaunaga, mea faafiafia, faatasiga a aiga, galuega fesoasoani a le tagata lava ia ma mea e fiafia e fai, ma isi mea faapena).
Mafaufau i avanoa e auauna atu ai i le Ekalesia mai le fale, e faapei e ala mai lea i le FamilySearch Indexing po o isi avanoa i luga o upegatafailagi. vineyard.lds.org

Faaaoga Punaoa a le Uarota ma le Siteki

E mafai e taitai o le uarota po o isi tagata faatuatuaina ona tuuina atu le lagolago, taitaiga, ma le fesoasoani faifaipea. Talosaga le faatagaga a le tagata e tuuina atu le tausiga a’o lei talanoaina le mataupu ma nisi tagata.

E ao ona mafaufau taitai e talanoaina le tulaga i totonu o le aufono a le uarota e faamautu ai auala e mafai ona lagolago atu ai le uarota i le tagata e tuuina atu le tausiga ma le tagata o loo mauaina le tausiga.

E ao i le epikopo ona valaaulia le au peresitene o le Aualofa e galulue faatasi ma le tagata e tuuina atu le tausiga e iloilo atili ai le tulaga ma faamautu ai auala e taulimaina ai manaoga.
E tatau i le peresitene o le korama a toeaina ma le peresitene o le Aualofa ona mafaufau e tofia ni uso ma tuafafine faamaoni o auaunaga i le aiga.
Fesoasoani i le tagata e tuuina atu le tausiga e faailoa ane se tagata faatuatuaina o le e mafai ona avea ma se lagolagosua tumau mo ia. E mafai ona avea lea tagata o se uso po se tuafafine o auaunaga po o se isi tagata o le uarota.

Saili ni auala mo tagata o le uarota e tuuina atu ai le fesoasoani.

Faailoa ni tagata o le au paia e mafai ona asiasi atu i le fale e tuumamaina ai [lagona] o le tuuatoatasi.
Ia faaaofia le autalavou ma isi i ni galuega fesoasoani e fesoasoani ai i le aiga.
Faailoa ni auala e mafai ai e tagata o le uarota ona tuuina atu e le aunoa le malologa e ala i le fesoasoani i le tagata o loo mauaina le tausiga ao auai atu le tagata e tuuina atu le tausiga i se vaega lagolago, taulima ni manaoga faaleagaga pe faaletagata lava ia, po o le sue mai o isi fesoasoani mo malologa.

Faailoa ia faalapotopotoga ma punaoa i le lotoifale ma faamalosiau i le tagata e tuuina atu le tausiga e faaaoga ia mea. O punaoa e mafai ona aofia ai:

Faufautua faapolofesa
Vaega lagolago i le lotoifale ma le atunuu mo tagata e tuuina atu le tausiga (faafesagai po o le initoneti)
Faalapotopotoga a le malo ma tutoatasi
Faalapotopotoga e le i lalo o le faamalu a le malo (NGO)