Matua Nofofua e Maitaga

O matua nofofua e maitaga e ono oo i ni luitau tulaga ese. Atonu e o’o ina e iloa lea tulaga i soo se taimi o le maitaga, ma o matua nofofua e maitaga atonu e i ai ni atugaluga eseese ma atufola o le malamalama i taunuuga o luitau o loo latou feagai. E latou te feagai ma le galuega fitā o le filifilia o se lumanai mo a latou fanau, faapea ma o latou foi lumanai. O nisi o le a faaipoipo, o isi o le a tuu la latou tamaitiiti mo le vaetamaina, ma o nisi o le a filifili e avea ma se matua nofofua. Ia aapa atu i le alofa e faamafanafana, faamalosiau, ma tausia ia le tina nofofua e maitaga po o le tama foi. Faailoa atu lou manao e fesoasoani atu, ma faafetai i le tagata mo lona naunau e faaaofia ai oe.

O le Tautua mo Aiga a le AAG e tuuina atu ni faatalatalanoaga fai fua mo matua nofofua e maitaga, ma e mafai foi ona tuuina atu faamatalaga e uiga i le faaipoipoga, vaetamaga po o le avea ma se matua nofofua. Ia uunaia le matua nofofua e maitaga e feiloai ma lona epikopo, o le e mafai ona faafesootaia o ia i le Tautua mo Aiga a le AAG. Afai e le o i ai se Tautua mo Aiga a le AAG, atonu e mafai ona maua e le epikopo ia punaoa faaopoopo mo fautuaga.

Saili ina ia Malamalama

A o e talanoa ai ma matua nofofua e maitaga, faamautinoa e faaali atu le alofa ma le loto malamalama faapei ona faia e le Faaola. Ona e eseese ia tulaga uma, ma e eseese foi tulaga o tagata taitoatasi, ia mafaufau ma le agaga tatalo e fai atu fesili faapenei i se ala agalelei ma magafagafa e fesoasoani e te malamalama lelei ai i popolega ma manaoga o le matua nofofua e maitaga.

O a ni ou atugaluga po o popolega aupito sili o i ai i le taimi nei?
O a ni au fuafuaga mo lou lumanai?
O a ni au fuafuaga mo le lumanai o lau tama?
O le a le lua sootaga i le taimi nei ma le isi matua o le tamaitiiti?
O le a le lua sootaga i le taimi nei ma matua o matua ma tagata o le aiga lautele o lau tama?

Afai e te silafia ane o lenei tulaga o se taunuuga o sauaga faatautala, po o le faalefeusuaiga ia logo pulega a le malo. O se laina fesoasoani o loo maua mo lau epikopo e valaau i ai mo le taulimaina o lenei faafitauli.

Fesoasoani i le Tagata

A o e fesoasoani i le matua nofofua e maitaga a o ia faia ni faaiuga e uiga i le lumanai, mafaufau e faaaoga nisi o manatu nei.

Fesoasoani ia maua e le matua nofofua e maitaga le faamoemoe ma le faamalologa e ala i le Faaola ma Lana Togiola.

Fesoasoani ia te ia ia malamalama o le laveaiga ma le malosi e mai le Faaola o Iesu Keriso.
Fesoasoani i le matua nofofua e maitaga ia iloa lona faasinomaga o se afafine o Matua Faalelagi ma iloa ona lava malosiaga, taleni, ma tomai.
Fesoasoani i le matua nofofua e maitaga ia lagona le alofa o le Atua mo ia ma ia iloa o le Atua o se paaga e faatasi ma ia e mafai ona fautua mai mo le faigamalaga i le lalolagi a lenei tamaitiiti.

Uunaia le matua nofofua e maitaga ia talanoa ma le epikopo.

Afai e talafeagai ai, valaaulia le matua maitaga e toe iloilo lona faamanuiaga faapeteriaka mo le taitaiga ma le faamafanafanaga.

Fesoasoani ia te ia e faailoa ma mafaufau i filifiliga e pei o se matua nofofua, vaetamaina, po o le faaipoipoga, pe a fai e talafeagai.

E tatau i taitai o le Ekalesia, ma uo ona aloese mai le uunaia pe faamalosi le matua sauniuni e filifili ‘a lē ‘o le tausia o le tamaitiiti, po o le ofoina atu o le tamaitiiti mo le vaetamaina.
Faamalosiau i le matua nofofua maitaga e tusi i lalo itu lelei ma itu e le lelei e o faatasi ma filifiliga taitasi, ma ia iloilo ma le agaga tatalo ma fefulisai taunuuga o ia mea taitasi, aemaise lava mo le tamaitiiti.
Fautua atu i le matua nofofua e maitaga e saili le fautuaga mai ia i latou o e e mafai ona fesoasoani ia te ia e mafaufau ma le totoa i nei filifiliga.
Faamalosiau i le matua nofofua e maitaga e saili se faamanuiaga faaleperisitua.
Fesoasoani ia malamalama le tagata e mafai ona ia maua musumusuga patino, lagona ma le taitaiga mai le Atua.

Lagolago le Aiga

O le aafiaga o le matua nofofua e maitaga e aafia ai foi olaga o tagata o lona aiga. Iloilo le aafiaga i luga o le aiga ma uunaia le aiga e talanoaina na faafitauli.

Uunaia taitai uma o le aufono a le uarota e auauna malosi atu i matua e maitaga faapea ma o latou aiga.

Ia faamalosiau atu i le aiga e fefautuaai faatasi e uiga i le faaiuga ma ia mautinoa e faaaloalogia le faaiuga a le matua nofofua e maitaga.

Atonu e le ioe nisi o tagata o le aiga i le faaiuga e faia e le matua nofofua e maitaga. Uunaia le aiga ina ia talanoaina le aafiaga o le faaiuga i luga o tagata o le aiga, fesoasoani ia i latou ma talanoaina na faafitauli, pe a tatau ai.

Faaaoga Punaoa a le Uarota ma le Siteki

Mafaufau e fai atu i taitai o le uarota po o isi tagata faatuatuaina e tuuina atu le lagolago, taitaiga ma le fesoasoani faifaipea. Talosaga le faatagaga a le tagata ao lei talanoa atu i isi e uiga i le mataupu.

Ia faailoa se tagata faatuatuaina e avea ma se faufautua mo le matua nofofua e maitaga, ma uunaia i la’ua uma ia feiloai soo.

O le tagata faufautua e tatau o se tasi e mafana lelei ma lea tagata ma e mafai ona avea o se uso po o se tuafafine mo auaunaga.

Faailoa mai punaoa i le lotoifale lea e tuuina atu auaunaga e ogatasi ma mataupu faavae o le talalelei.

O punaoa e mafai ona aofia ai faufautua faapolofesa, polokalama po o nofoaga autu, ma isi ofisa.

Afai o mafaufau matua nofofua e maitaga e avea ma ni matua, uunaia i laua e faitau pe auai i vasega o le Faamalosia o le Aiga, Sootaga o Faaipoipoga ma Aiga pe faitau anomea e fesootai pe afai e le o faia ia vasega.