Au Epikopo
Tosina Atu i le Itupa Tutusa

“Tosina Atu i le Itupa Tutusa,” Punaoa Faufautua (2020).

“Tosina Atu i le Itupa Tutusa,” Punaoa Faufautua.

Tosina Atu i le Itupa Tutusa

Atonu e lagona e nisi o le au paia le tosina atu i itupa tutusa po o lea e ta’ua o le alii e tosina atu i le isi alii [gay], tamaitai e tosina atu i le isi tamaitai [lesbian] pe o se tasi e tosina atu uma i se alii poo se tamaitai [bisexual]. Ao e sailia le taitaiga a le Agaga Paia ma faaalu le taimi e aoao ai oe lava e uiga i manaoga o fanau a le Atua o e aafia i le tosina atu i le itupa tutusa, po o le ta’ua o le gay . o le a e atinaeina le alofa mama ma o le a faalauteleina lou gafatia e auauna atu ai.

O le lagonaina o le tosina atu i le itupa tutusa po o le filifili e faaaoga se ta’uga faaleitupa e iloagofie ai (e pei o le gay [tama i le tama], lesbian [teine i le teine], po o le bisexual [tama ma le teine]) e le o se agasala ma e le solia ai aiaiga po o aoaoga faavae o le Ekalesia. O upu e pei o le gay [tama i le tama] ma le lesbian [teine i le teine] e eseese faauigaga e tagata eseese. O le ta’uina o se gay (tane i le tane) e mafai ona faauigaina ua tosina atu i le itupa tutusa ae filifili e le faatinoina nei lagona. Atonu foi o lenei ta’uga ua faamatala ai le auala o loo latou faailoa atu ai i latou lava ia faalelagona, faaletino, faaalofamafana, faaleitupa, pe faaupufai (politiki). Aua le manatu faapea ua soli e se tagata le tulafono o le ola mama ona ua latou faaaogaina se ta’uga e faamatala ai se ta’uga faaleitupa.

Na saunoa Elder M. Russell Ballard, “E talitonu Le Ekalesia a Iesu Keriso o le Au Paia o Aso e Gata Ai e faapea ’o le aafiaga o le tosina atu i le itupa tutusa o se mea moni e faigata mo le toatele o tagata. O le tosinaga lava ia e le o se agasala, ae o le faatinoina o se agasala lea. E ui lava e le filifilia e tagata taitoatasi ina ia maua i ia tosinaga, ae ua iai le latou filifiliga pe faapefea ona tali atu i na tosinaga. Faatasi ai ma le alofa ma le malamalama, e aapa atu le Ekalesia i fanau uma a le Atua, e aofia ai [i latou e tosina atu i le itupa tutusa]’” (“Be Still, and Know That I Am God” [faigalotu a le Ofisa o Aoga a le Ekalesia mo le autalavou matutua, 4 Me, 2014], broadcasts.ChurchofJesusChrist.org.)

O tagata o e oo i ai lagona o le tosina atu i le itupa tutusa o e ua tuuto atu e tausi poloaiga a le Atua, e mafai ona talia ni tofiga, umia pepa faataga o le malumalu, ma talia sauniga o le malumalu.

O le mea aupito taua e mafai ona e faia pe a maea ona faailoa atu e se tagata ona lagona o le tosina atu i le itupa tutusa, o le faalogo lea ma fesoasoani ia latou lagona le taliaina.

E tele mataupu faavae e uiga i le tosina atu i le itupa tutusa o le a faatatau foi ia i latou o e lagona le lofituina ma le fememea‘i i lona itupa pe ta’ua o se faafafine po o le faafatama. Peitai, e matua eseese lava le tosina atu i le itupa tutusa ma le lofituina faaleitupa. O i latou e lagonaina le lofituina faaleitupa e mafai pe le mafai foi ona lagonaina le tosina atu i le itupa tutusa ma o le toatele o i latou e lagonaina le tosina atu i le itupa tutusa e le mananao e suia o latou ituaiga itupa.

Mo aoaoga a le Ekalesia e uiga i le tosina atu i le itupa tutusa, o fesili e masani ona fai atu, ma isi faamatalaga e fesoasoani i taitai, faiaoga, matua, ma tagata taitoatasi, tagai i le Vaega o le Fesoasoani i le Olaga ma le Autu o le Talalelei i luga o le ChurchofJesusChrist.org.

Saili ina ia Malamalama

O i latou o e aafia i le tosina atu i le itupa tutusa e ono lagona le matamuli po o le le agavaa, e tusa lava pe latou te le’i faatinoina lava nei lagona. Atonu latou te fefefe o le a e teena i latou ona o nei lagona, ma atonu foi latou te le iloa pe faapefea ona faafetaui o latou aafiaga ma mataupu faavae o le talalelei.

Ao e fautuaina tagata o e aafia i le tosina atu i le itupa tutusa, ia amanaia lo latou faatuatua ma le lototele i le talanoaina o nei lagona ma oe. Ia faamautinoa atu ia i latou e uiga i le alofa o le Atua. Ia tautino atu atonu e te le malamalama atoatoa i le tulaga o loo latou i ai. Ta’u atu i ai lou alofa ia i latou ma e te manao ia e malamalama. Faailoa atu lou naunau e tuuina atu le lagolago faalelagona ma faaleagaga.

Mafaufau ma le agaga tatalo i fesili nei ina ia malamalama lelei ai i le tulaga: Saili e tuuina atu le agalelei ma ia taumafai e aloese mai i le soona suesue auiliili:

  • E mafai ona e faamatala maia faamolemole ia nisi mea e uiga i lou aafiaga?

  • Na faapefea ona aafia lou olaga i nei lagona? Na faapefea ona aafia ai olaga o au uo ma lou aiga?

  • E mafai faapefea ona ou fesoasoani ia te oe?

  • E te manao ta te feiloai pea e talanoaina lenei tulaga?

  • O igoa laulau e eseese ia faauigaga i tagata eseese. O le a le uiga o le upu gay [tama i le tama] (po o le lesbian [teine i le teine], bisexual [tama ma teine], ma le [tosina atu i le itupa tutusa], ma isi faaupuga faapena) ia te oe?

Fesoasoani i le Tagata

Ao e fautuaina tagata o e aafia i le tosina atu i le itupa tutusa, e le tau manaomia ona i ai sou malamalamaaga atoatoa i le faafitauli. O lou naunau e malamalama ma fesoasoani o le a e agavaa ai e maua le taitaiga mai le Agaga a o e [faaali atu le] alofa ma faalogo.

Fesoasoani i tagata ia iloa e faapea o lagona o le tosina atu i le itupa tutusa atonu o se tasi lea o vaega o lo latou aafiaga i le olaga faitino ae o na lagona e le suia ai o latou faasinomaga e faavavau ma paia o ni fanau a le Atua.

  • Fesoasoani i tagata ia iloa o latou malosiaga, taleni, ma tomai patino. Faamalosiau i latou e saili ia iloa faamoemoega a le Atua ma ia iloatino, e ala i le Agaga Paia, taitaiga e fitoitonu ma patino o loo i o latou ala.

  • Afai ua faatino e se tagata ni amioga o feusuaiga faale itupa tutusa, aoao atu le salamo ma le faamagaloga e ala i le Togiola a le Faaola o Iesu Keriso.

  • Ia tuuina atu e le aunoa ni fautuaga ma le lagolago ina ia le lagonaina e le tagata le tuua ai na‘o ia i lana faigamalaga.

  • Ia aloese mai le folafolaina atu o se faaitiitia po o le aveesea foi o le tosina atu i le itupa tutusa e avea o se taui o le faamaoni.

  • E le tatau ona fautuaina atu le faaipoipoina o se auala e aveesea ai pe tuuitiitia ai le tosina atu i le itupa tutusa.

Valaaulia le tagata e taulai atu i le atiina a‘e po o le faatumauina o mamanu lelei ma maloloina e ola ai.

  • Ia faailoa atu malosiaga faaleagaga ia e mafai ona, pe ua uma ona atina a‘e i le tali atu lea ma le faatuatua i lagona o le tosina atu i le itupa tutusa.

  • Fesoasoani i le tagata e mataitu avanoa e faia ai ni sao anoa i o latou aiga ma le uarota e ala i valaauga ma isi avanoa e auauna atu ai.

Faamalosiau i le tagata e atinae ni mafutaga lelei ma maloloina, e le aofia ai ni uiga feusuai, ma itupa tutusa ma ni tagata faatuatuaina. Fesoasoani i le Tagata ina ia:

  • Sue se faufautua po o se uo faatuatuaina e feiloai e le aunoa e talanoa i sini ma le alualu i luma.

  • Faailoa atu lagona o le tosina atu i le itupa tutusa i ni tagata faatuatuaina. Faailoa atu ma le magafagafa o nei lagona e le gata ina aoga ae e mafai foi ona puipuia ai nisi o tagata e faasagatau atu ai i le loto popole po o le faamanu‘alia e le tagata o ia lava.

  • Saili e faamalolosia mafutaga ma tagata faatuatuaina o le aiga, uo, tuaoi, ma ‘aufaigaluega.

O nisi o tagata o e aafia i le tosina atu i le itupa tutusa atonu sa faatinoina nei lagona ma solia ai le tulafono o le legavia.

  • Afai o tauivi le tagata ma ponokalafi, pule i le tino, po o isi amioga faalefeusuaiga e le tusa ai ma le tulafono o le legavia, ia lagolago atu i a latou taumafaiga e faatoilalo nei luitau. Faasino atu i le “Taulimaina o Ponokalafi” vaega o loo i luga o le ChurchofJesusChrist.org mo le fesoasoani i faafitauli tau ponokalafi.

  • Faailoa ia tulaga e sili ona taatele ia e taitai atu ai i amioga solitulafono.

  • Ia malamalama i lagona o i tua atu o nei tulaga (e pei o le tuuatoatasi po o le le amanaiaina).

  • Fesoasoani i le tagata e atiae ni isi tali faaagaaga.

O nisi o tagata o e aafia i le tosina atu i le itupa tutusa e ono sailia le taitaiga a se faufautua faapolofesa. O vaifofo e mafai ona faamalolosia ai mamanu maloloina o le olaga. Mafaufau i tulaga nei:

  • O nisi taimi e mafai ona faigata mo tagata ona vaai ifo le tagata ia te ia lava ma le le faaituau. O le saili atu i malamalamaaga mai se faufautua faapolofesa e ogatasi ma mataupu faavae o le talalelei, e mafai ona fesoasoani i le tele o vaega o le olaga, e aofia ai mamanu o le faanoanoa ma le popole, amioga soonafai, aafiaga o sauaga faatautala, ma isi faafitauli faalelagona. E pei ona sa matauina e Elder Jeffrey R. Holland, o le fesoasoani faapolofesa e mafai i nisi taimi ona tutusa le taua ma le fesoasoani faaleagaga (tagai i le “E Pesieai o se Ipu Ua Nutililii,” Liahona, Nov. 2013, 41).

  • O le sailia o se malamalamaaga mai se faufautua faapolofesa o se faailoga o le malosi ma le agamaulalo. Afai e filifili se tagata e sailia se na fesoasoani, e ao i isi ona faaaloalogia lana aia tatau e fuafua ai taunuuga moomia. E fautuaina atu e le Ekalesia faiga e faaaloalogia ai le “loto naunau o le tagata lava ia.”

  • I se isi faaupuga, ua iai i le tagata le aia tatau e fuafua ai taunuuga moomia, ma e ao i le au fofo faapitoa ma faufautua ona faaaloalogia ona manao. Mo se tasi ua aafia i le tosina atu i le itupa tutusa pe ua faaigoa foi o se faafafine, e mafai ona fesoasani fautuaga i le tagata e taulimaina lona tulaga feusuai i ni ala e sili ona lelei ma faamalieina. Peitai, e le manaomia e tagata uma ni fautuaga ma ni fofo faapitoa.

  • E ui o suiga i tulaga o feusuaiga e mafai ona tutupu mo nisi o tagata, ae e le ogatusa ma tulaga faatonuina ona taulai atu togafitiga faapolofesa i luga o se manatu faapea o se suiga i tulaga faalefeusuaiga o le a, pe e tatau foi ona tupu.

    Afai o maua, faafesootai le Tautua mo Aiga o le AAG mo ni faamatalaga po o se faatalatalanoaga.

Lagolago le Aiga

O le tosina atu i le itupa tutusa e i ai aafiaga i tagata o le aiga faapea foi ma le tagata lava ia. Iloilo le aafiaga i luga o tagata o le aiga, ma saili e talanoaina na faafitauli.

  • Lagolago i tagata o le aiga, e aofia ai taitoalua, ao latou galulue i ni lagona o i ai e pei o le tetei, tiga, ita, faalataina, ma le tausalaina.

  • Fesoasoani i matua, taitoalua, po o isi tagata o le aiga ia faaseetuagalu le tuuaia o i latou lava po o isi ina ia mafai ona latou taulai lelei atu i le faafaileleina o mafutaga faaleaiga.

  • Faamalosiau i tagata o le aiga ia alolofa i le tagata o le aiga ma talia o ia.

  • Ia uunaia tagata o le aiga e saili le fesoasoani ma fautuaga faapolofesa pe a manaomia.

  • Faamalosiau i tagata o le aiga e saili faamatalaga mai punaoa o le Ekalesia, e pei o Autu o le Talalelei po o le Vaega o le Olaga Fesoasoani i luga o le ChurchofJesusChrist.org.

Faaaoga Punaoa a le Uarota ma le Siteki

Mafaufau e fai atu i taitai o le uarota ma isi tagata faatuatuaina e tuuina atu le lagolago, taitaiga ma le fesoasoani faifaipea. Talosaga le faatagaga a le tagata ao lei talanoa atu i isi e uiga i le mataupu.

Iloilo po o a ni auala e sili ona lelei e auauna atu ai ia i latou o loo aafia i lagona o le tosina atu i le itupa tutusa.

  • Fatufatu se siosiomaga ma se aganuu mo tagata uma ia lagona ai le taliaina ma le alofaina.

  • Mafaufau e talanoaina le faafitauli i totonu o aufono a le uarota po o i totonu o se lesona o le Aso Sa lona lima. Faaaoga anomea mai le Vaega o Olaga Fesoasoani i luga o le ChurchofJeusChrist.org ma le “Tosina Atu i le Itupa Tutusa” i totonu o Autu o le Talalelei ina ia saunia lesona po o talanoaga.

  • Tetee i tuuaiga faivavale ma talafatu e uiga i le tosina atu i le itupa tutusa. Afai e leai ni malamalamaaga faavae o le talalelei o tagata o lau uarota po o le paranesi e uiga i lenei faafitauli, ia faasino atu i latou i le Vaega o Olaga Fesoasoani i luga o le ChurchofJesusChrist.org ma le “Tosina atu i le Itupa Tutusa” i totonu o Autu o le Talalelei.

  • Fesoasoani i tagata ia malamalama o le fegalegalea‘i faatasi ma i latou o e tosina atu i le itupa tutusa, e le faapea o le a latou aafia ai foi i le tosina atu i le itupa tutusa, ma o aafiaga o le tosina atu i le itupa tutusa o le a lē faateteleina ai le tulaga lamatia o feusuaiga ma tamaiti.

Faailoa atu faufautua i le lotoifale po o punaoa i luga o le initoneti e tuuina atu auaunaga e ogatasi ma mataupu faavae o le talalelei.

Mafaufau e faafesootai le Auaunaga mo Aiga o le AAG, pe afai o maua, ia faailoa ai punaoa.