Au Epikopo
Feteenaiga i Faaipoipoga

“Feteenaiga i Faaipoipoga,” Punaoa Faufautua (2020).

“Feteenaiga i Faaipoipoga,” Punaoa Faufautua.

Feteenaiga i Faaipoipoga

O faaipoipoga e faavavau faamanuiaina e fausia i luga o le faavae o le faatuatua i le Alii o Iesu Keriso ma le usiusitai i Ana aoaoga.

E pei o soo se ituaiga o mafutaga, o le a i ai feteenaiga i faaipoipoga. Ae o nisi taimi e taulima ai e ulugalii ia feeseeseaiga i auala e tuuitiitia ai le malosi o le la mafutaga ma e afaina ai paaga uma e toalua. I le avea ai o se taitai, e tatau ona e lagolagoina taumafaiga a le ulugalii lava ia e fofo ai le feteenaiga nai lo lou taumafai o oe lava e foia. Ia uunaia le tali atu mo le tagata lava ia ma le faamaoni ina ia mafai e taitoalua ona maua le taitaiga ma le iloatino mai le Agaga Paia.

Saili ina ia Malamalama

O le fesoasoani i pa‘aga taitoatasi o le ulugalii ina ia lagona lona amanaiaina ma malamalamaina ia atonu e tutusa lava le taua ma soo se fautuaga e mafai ona e tuuina atu. A o e talanoa ai ma taitoalua, faamautinoa e faaali atu le alofa ma le loto malamalama faapei ona faia e le Faaola. Mafaufau ma le agaga tatalo e fai atu i taitoalua taitasi o fesili e pei o nei i se ala agalelei ma le alofa ia fesoasoani ai ia sili atu lou matauina ma malamalama lelei i le tulaga o le tagata ma iloatino ai manaoga. Ia naunau e faaavanoa le taimi ia tau lava o le faalogo.

  • O le a le mea o loo tupu ia te oe i le taimi nei?

  • O a ni mea ua sili ona e popole i ai e uiga i lau faaipoipoga?

  • O le a sou lagona e uiga i au feagaiga o le faaipoipoga?

  • O le a le faamaoni na e talanoa atu ai po o lou naunau e talanoaina ai lenei faafitauli faatasi ma lou toalua?

  • Po o avea oe ma le ituaiga o tagata ma se toalua ua e manao e avea ai oe?

  • O a ni mea o loo e faia e faaleleia atili ai le lua mafutaga ma lou Tama Faalelagi?

  • O a ni auala atonu o loo e saofaga ai i le feteenaiga i le lua mafutaga?

  • O a ni mataupu faavae o le talalelei e ono tuuina atu ni fofo i le faafitauli?

  • O le a se mea ua e naunau e fai e fesoasoani e fofo ai le faafitauli?

  • O a ni mea e tatau ona e faamagaloina pe ia faamagalo ai oe i le lua mafutaga?

  • O a ni alagā lagolago po o isi punaoa o loo e maua e fesoasoani ai ia te oe?

  • O le a se mea e mafai ona e faia e liliu atu ai i le Faaola o Iesu Keriso ma maua ai le mana o Lona alofa tunoa?

Fesoasoani i le Tagata

Ao e fesoasoani ai i le ulugalii, ia mautinoa ua la malamalama i o laua tiutetauave o le sailia o fofo i o laua luitau. Ia faaalia atu ma le talafeagai lou alofa ma le popole mo le ulugalii a o e manatunatu i nisi o fautuaga nei.

Ia faamamafa atu le tiutetauave o loo i ai a le tagata lava ia ma le tali atu o paaga taitasi i le mafutaga faalefaaipoipoga. O taitoalua e faia e le aunoa se suesuega faamaoni o o laua lava amioga ma vave uia laasaga manaomia e salamo ma faaleleia ai, e mafai ona maua le faamalologa i a latou faaipoipoga.

  • Fesoasoani i taitoalua taitasi ia iloa e leai se tasi e mafai ona suia se isi, ae faatasi ai ma le faatuatua, taumafaiga, ma le fesoasoani a le Atua, e mafai ai e tagata taitoatasi ona oo i lona lava suiga tele o le loto.

    Ia faamalosiau i toalua taitasi e aloese mai i ona lava ala faasausili, tautala ma le manatu ua sili atu lona amiotonu, po o le sailia o faamaoniga [o ia e sao].

    Fesoasoani i taitoalua taitasi e mafaufau pe o le a se mea o lagonaina e le isi i le la mafutaga ma galueaiina le atiina a’e o le loto malamalama. Valaaulia i laua e talanoaina faatasi mea o loo la tauivi ai.

Fesoasoani i le ulugalii e mafaufau po o le a le mea atonu o loo tetee ai le tasi i le isi lea e manaomia ona lafoa‘i.

Ia mautinoa e lagona e toalua taitasi le saogalemu i le talanoaina tatala o feteenaiga i le faaipoipoga. O nisi taimi e alu ese ai se toalua nai lo o le finau sa‘o atu ona na te le o lagonaina le saogalemu faaletino pe faalelagona.

Afai e manaomia e paaga faaipoipo uma e toalua se fesoasoani faaopoopo, uunai i la’ua ia la maua faatasi fesoasoaniga faatomai faapitoa i soo se taimi e mafai ai ina ia taofia ai soo se le malamalama i lo laua va ma ia uunaia ai le faamaoni atoatoa.

Lagolago le Ulugalii ma le Aiga

O feteenaiga i faaipoipoga e aafia ai tagata uma o le aiga. Ia iloilo le aafiaga o le feteenaiga i isi tagata o le aiga, ma talanoa i faafitauli talafeagai e afua mai i i le feteenaiga.

Lagolago i mamanu lelei o fesootaiga (tagai i le “Fesootai ma le Alofa,” Faamalolosia o Faaipoipoga: Punaoa Taiala mo Ulugalii [2006], 4, 7).

  • Fesoasoani i le ulugalii ia iloa ma suia ia mamanu le lelei ma le faataumaoi o fesootaiga, e pei o le faitioina po o le taulimaina ma le inoino o le tasi ma le isi.

  • Ia uunaia taitoalua ia vave ona faamagalo atu ma saili le faamagaloga mai le tasi ma le isi.

  • Fesoasoani i ulugalii e faaaoga savali “Ou te” nai lo o savali “o oe”. Mo se faataitaiga, “Ou te lagona le le mautonu ma le le alofaina pe a ou le toe faalogo atu ia te oe” nai lo o le “O oe e te le alofa ia te au.” Po o le “Ou te lagona le pei o taimi uma ou te le ausia ai ou faamoemoega” nai lo o le “O oe e te faia e pei e matua le mafai lava ona ou faia se mea sao.”

Ia fautuaina tane ma ava ia taulima e le tasi le isi o se paaga tutusa.

  • Ia uunaia taitoalua ia faamaoni, tautala sao, ma faaaloalo le tasi i le isi.

  • Faamalosiau i taitoalua e faasoa atu ma tuu atu ia maua faamatalaga taua ma talafeagai.

  • Faamalosiau i taitoalua ia fai faaiuga i le autasi o se ulugalii.

  • Uunaia ulugalii e aloese mai faiga faaleaganuu po o faiga anamua lea e faumalo ai e le tasi o le toalua pe faia foi le isi i soo se auala e pei o se paaga e tulagalua i le mafutaga . O nei faiga e feteenai ma mataupu faavae o le talalelei ma e tatau i taitoalua ona suia i mamanu o amioga sao.

Fesoasoani i le ulugalii e suesue o laua mamanu o le faatuatua, tuaoi faaleaiga, ma isi faiga masani.

  • Talanoa i le auai o le aiga i sauniga a le Ekalesia, afiafi faaleaiga faalevaiaso, tatalo a le tagata lava ia ma tatalo faaleaiga, suesueina o tusitusiga paia, ma taimi o taumafataga faaleaiga.

  • Talanoa po o a auala e ono aafia ai la laua mafutaga ona o le faaaogaina e taitoalua o ala o fesootaiga ma masini faaeletonika.

  • Fautua atu i le ulugalii e faatulaga ni tuaoi i ala o fesootaiga, fesootaiga faaagafesootai, ma le faaaogaina o masini faaeletonika. Uunaia paaga e fefaasoaai i uputatala, ia iloa lelei atu le faaaogaina o ala o fesootaiga faaagafesootai, ma aloese mai soo se aafiaga faalilolilo i le Initoneti.

  • Uunaia taitoalua uma e aloese mai le fesootai atu i isi i auala e ono faalataina ai le faatuatuaina paia o lana paaga pe foliga ai o loo faia se mea e le talafeagai.

Afai o loo i ai ni fanau i le aiga, atonu latou te lagonaina le popole ma le mamafatu e uiga i le mafutaga a matua. Fesoasoani i ai i luitau o ono feagai ma i latou.

  • Fesoasoani i ulugalii ia malamalama i le aafiaga o fanau ona o finauga, feeseeseaiga, ma feteenaiga.

  • Faamalosiau i le ulugalii e faailoa tatau atu ia latou fanau soo se feteenaiga faaleulugalii ua faateteleina ; e fesoasoani lea e mautinoa ai e le o tuua nao le la fanau e feagai i latou lava ma aafiaga o le feteenaiga.

  • Valaaulia taitoalua e talanoa taitoatasi ma tamaiti, i upu e talafeagai ma le matutua, mea o loo faia e le ulugalii e faamasuiga malie ai le feteenaiga.

  • Afai e te silafia ni sauaina o tamaitipo o sauga i totonu o le aiga, ia vave faafesootai pulega a le malo. E i ai foi le laina fesoasoani a le epikopo e mafai ona ia valaau ai mo se fesoasoani i tulaga faapea.

Valaaulia le ulugalii e faailoa mai ni punaoa o loo i ai e mafai ona fesoasoani ia i laua e faaleleia ai le la mafutaga o le tasi ma le isi faapea ma le la fanau.

  • Valaaulia le ulugalii e fai se lisi o taleni, tomai, sootaga, punaoa, tagata o le aiga, ma isi punavai e mafai e le ulugalii ona tua iai e faaono foia ai le feteenaiga i le mafutaga.

  • Ia fautuaina le ulugalii e aloese mai le sueina mai o punaoa po o tagata faaituau i le feteenaiga po o se finauga faapitoa.

Faaaoga Punaoa a le Uarota ma le Siteki

A uma ona maua mai le faatagaga a le ulugalii e talanoaina ai le tulaga ma isi tagata, mafaufau e fai atu i taitai o le uarota po o isi tagata faatuatuaina e tuuina atu le lagolago, taitaiga, ma le fesoasoani faifai pea.

Mafaufau e faatulaga se vasega faaopoopo i fafo mai o sauniga faaleEkalesia po o le faia ia fono se faufautua ma le ulugalii taitoatasi i le faaaogaina lea o kosi o le Faamalosia o le Faaipoipoga ma le Faamalosia o le Aiga ma mea e faaaoga i le kosi.

I lalo o le taitaiga a le epikopo, faailoa atu se ulugalii faatuatuaina e mafai ona avea ma faufautua a lenei ulugalii ma avea ma a laua lagolago. I se tulaga maoae , o lenei ulugalii o le a manuia le taulimaina o se luitau faapea, ae e mafai e soo se ulugalii matutua faaleagaga ma agaalofa ona tuuina atu le tausiga alofa.

Mafaufau e faasino le ulugalii i se fesoasoani faapolofesa po o se faufautua faapitoa. Faailoa punaoa i le lotoifale e tuuina atu ai le auaunaga e ogatasi ma mataupu faavae o le talalelei.

  • O le Tautua mo Aiga a le AAG (i nofoaga e i ai) e mafai ona tuuina atu ni faatalanoaga mo taitai ma ofo atu ni fautuaga e uiga i punaoa i o outou alalafaga.