Mahangtoron nga Kamatuoran

Nobiyembre 2023

Mahangtoron nga Kamatuoran

Ni Elder John C. Pingree Jr.

Sa Seventy

Ang atong panginahanglan sa pag-ila sa kamatuoran nahimong mas importante pa gayod!

Mga kaigsoonan, salamat sa inyong debosyon ngadto sa Dios nga Amahan ug ngadto sa Iyang Anak, si Jesukristo, ug salamat kaninyo alang sa inyong gugma ug serbisyo sa usag usa. Kamo tinuod gayod nga dalaygon!

Pasiuna

Human ang akong asawa, si Anne, ug ako nakadawat og usa ka tawag nga moserbisyo isip full-time nga mga lider sa misyon, ang among pamilya determinado sa pagkat-on sa matag ngalan sa misyonaryo sa dili pa moabot sa natad sa misyon. Nagkuha kami og mga litrato, naghimo og mga flash kard, ug gisugdan ang pagtimaan sa mga panagway ug ang pagmemorya sa mga ngalan.

Sa dihang miabot na kami, mipahigayon kami og pasiuna nga mga komperensiya uban sa mga misyonaryo. Samtang kami nakighimamat, nadunggan nako ang among nuwebe anyos nga anak nga lalaki:

“Malipayon ko nga makaila ka, Sam!”

“Rachel, taga asa ka?”

“Wow, David, kataas nimo!”

Nabalaka, giduol nako ang among anak nga lalaki ug mihunghong, “Oy, hinumdomi nga tawagon ang mga misyonaryo isip Elder o Sister.”

Iya kong gitan-aw nga may kalibog ug miingon, “Pa, abi nako og kinahanglan natong memoryahon ang ilang mga ngalan.” Gibuhat sa among anak ang unsay iyang gituohan nga sakto basi sa iyang pagsabot.

Busa, unsa man ang atong pagsabot sa kamatuoran sa karon nga kalibotan? Kita kanunay kaayong gidabudabohan sa lig-on nga mga opinyon, may gidapigan nga mga taho, ug dili kompleto nga datos. Sa samang higayon, ang gidaghanon ug tinubdan niining impormasyon paspas kaayong nga nagkadako. Ang atong panginahanglan sa pag-ila sa kamatuoran nahimong mas importante pa gayod!

Ang kamatuoran kritikal alang kanato aron sa pagtukod ug sa pagpalig-on sa atong relasyon ngadto sa Dios, pagkaplag og kalinaw ug hingpit nga kalipay, ug sa pagkab-ot sa atong balaan nga potensiyal. Karon, atong ikonsiderar ang mosunod nga mga pangutana:

Unsa ang kamatuoran, ug ngano nga importante kini?
Unsaon man nato sa pagkaplag sa kamatuoran?
Kon atong makaplagan ang kamatuoran, unsaon nato sa pagpakigbahin niini?

Ang Kamatuoran Mahangtoron

Ang Ginoo mitudlo kanato diha sa mga kasulatan nga “ang kamatuoran mao ang kahibalo sa mga butang ingon nga sila mao karon, ug ingon nga sila mao sa kaniadto, ug ingon nga sila mao sa umaabot” (Doktrina ug mga Pakigsaad 93:24). Kini “wala [gi]lalang o [gi]buhat” (Doktrina ug mga Pakigsaad 93:29) ug “walay kataposan” (Doktrina ug mga Pakigsaad 88:66).¹ Ang kamatuoran segurado, permaninte, ug dili mausab. Sa laing pagkasulti, ang kamatuoran mahangtoron.²

Ang kamatuoran nagtabang kanato nga makalikay sa pagkalingla,³ masabtan ang maayo gikan sa daotan,⁴ makadawat og panalipod,⁵ ug makakaplag og kahupayan ug pagkaayo.⁶ Ang kamatuoran makagiya usab sa atong mga lihok,⁷ makahimo kanato nga gawasnon,⁸ molimpyo kanato,⁹ ug modala kanato ngadto sa kinabuhing dayon.¹⁰

Ang Dios Nagpadayag og Mahangtoron nga Kamatuoran

Ang Dios nagpadayag og mahangtoron nga kamatuoran ngari kanato pinaagi sa usa ka giestablisar nga sistema sa pagdawat og pagpadayag nga naglakip sa Iyang Kaugalingon, kang Jesukristo, sa Espiritu Santo, mga propeta, ug kanato. Atong hisgotan ang managlahi apan konektado nga mga tahas sa matag partisipante niini nga proseso.

Una, ang Dios mao ang tinubdan sa mahangtoron nga kamatuoran.¹¹ Siya ug ang Iyang anak, si Jesukristo,¹² diha sa Ilang hingpit nga salabotan sa kamatuoran ug kanunay nga naglihok nga nahiuyon sa tinuod nga mga baroganan ug mga balaod.¹³ Kini nga gahom nagtugot Kanila sa paglalang ug pagdumala og mga kalibotan¹⁴ ingon man sa hingpit nga paghigugma, paggiya, ug pag-amuma sa matag usa kanato.¹⁵ Sila gusto nga atong sabton ug gamiton ang kamatuoran aron kita makatagamtam sa mga panalangin nga Ilang gibuhat.¹⁶ Sila mahimong mopakigbahin sa kamatuoran mismo o, sa mas kasagaran, pinaagi sa mga mensahero sama sa Espiritu Santo, mga anghel, o buhi nga mga propeta.

Ikaduha, ang Espiritu Santo nagpamatuod sa tanang kamatuoran.¹⁷ Iyang direktang gipadayag ang mga kamatuoran ngari kanato ug nagsaksi sa kamatuoran nga gitudlo sa uban. Ang mga pag-aghat gikan sa Espiritu kasagaran moabot isip mga ideya mosantop sa atong mga hunahuna ug mga pagbati diha sa atong mga kasingkasing.¹⁸

Ikatulo, ang mga propeta nakadawat sa kamatuoran gikan sa Dios ug mopakigbahin niana nga kamatuoran kanato.¹⁹ Atong makat-onan ang kamatuoran gikan sa karaan nga mga propeta diha sa mga kasulatan²⁰ ug gikan sa buhi nga mga propeta sa kinatibuk-ang komperensiya ug pinaagi sa uban pang opisyal nga mga paagi sa komunikasyon sa Simbahan.

Sa kataposan, kamo ug ako adunay mahinungdanon nga papel dinhi niining proseso. Ang Dios naglaom kanato sa pagtinguha, pag-ila, ug pagbuhat sa kamatuoran. Ang atong abilidad sa pagdawat ug paggamit sa kamatuoran mag-agad sa kalig-on sa atong relasyon sa Amahan ug sa Anak, sa atong kaandam sa pagtubag sa impluwensiya sa Espiritu Santo, ug sa atong pagpahiuyon sa mga propeta sa ulahing mga adlaw.

Kinahanglan atong hinumdoman nga si Satanas naningkamot sa pagpahilayo kanato gikan sa kamatuoran. Siya nasayod nga kon wala ang kamatuoran, kita dili makaangkon sa kinabuhing dayon. Siya mosagol sa mga tipik sa kamatuoran kauban sa kalibotanon nga mga pilosopiya aron sa paglibog ug pagbalda kanato gikan sa unsay gisulti sa Dios.²¹

Pagpangita, Pag-ila, ug Paggamit sa Mahangtoron nga Kamatuoran

Samtang kita mangita sa mahangtoron nga kamatuoran,²² ang mosunod nga duha ka pangutana makatabang kanato sa pag-ila kon ang usa ka konsepto naggikan sa Dios o sa laing tinubdan:

Ang maong konsepto gitudlo ba nga nahauyon sa mga kasulatan ug pinaagi sa buhi nga mga propeta?
Ang maong konsepto gikompirmar ba sa pagsaksi sa Espiritu Santo?

Ang Dios nagpadayag sa mahangtoron nga mga kamatuoran pinaagi sa mga propeta, ug ang Espiritu Santo mokompirmar niadto nga mga kamatuoran ngari kanato sa personal nga paagi.²³ Kita kinahanglan gayod nga mahimong andam sa pagdawat niining espirituhanong mga pag-aghat kon kini moabot.²⁴ Kita labing dali nga modawat sa pagsaksi sa Espiritu kon kita mapainubsanon,²⁵ sinserong mag-ampo ug magtuon sa mga pulong sa Dios,²⁶ ug motuman sa Iyang mga sugo.²⁷

Sa higayon nga ang Espiritu Santo mokompirmar og usa ka piho nga kamatuoran ngari kanato, ang atong pagsabot mapalawman kon atong ibutang kana nga baroganan ngadto sa buhat. Kon kita magmakanunayon sa pagsunod niana nga baroganan, kita makaangkon og segurado nga kahibalo kabahin niana nga kamatuoran.²⁸

Pananglitan, nakahimo ako og mga kasaypanan ug mibati og pagbasol tungod sa bati nga mga pagpili. Apan pinaagi sa pag-ampo, pagtuon, ug hugot nga pagtuo diha ni Jesukristo, ako nakadawat og usa ka pagsaksi sa baroganan sa paghinulsol.²⁹ Sa akong pagpadayon sa paghinulsol, ang akong panabot bahin sa paghinulsol milambo nga mas malig-on. Mibati ako nga mas nasuod ngadto sa Dios ug sa Iyang Anak. Karon ako nahibalo na nga ang sala mahimong mapasaylo pinaagi ni Jesukristo, tungod kay akong nasinati ang mga panalangin sa paghinulsol sa matag adlaw.³⁰

Pagsalig sa Dios Kon ang Kamatuoran Wala pa Gipadayag

Busa, unsa man ang atong buhaton kon kita sinsero sa pagpangita sa kamatuoran nga wala pa gipadayag? Ako adunay pagsabot alang niadtong anaa kanato kinsa nangandoy alang sa mga tubag nga ingon og dili moabot.

Ngadto kang Joseph Smith, ang Ginoo mitambag, “pagpakahilom hangtod nga Ako makakita og angay nga mohimo sa tanan nga mga butang nga mahibaloan … mahitungod niana nga butang” (Doktrina ug mga Pakigsaad 10:37).

Ug ngadto kang Emma Smith, Siya mipasabot “Ayaw pagmulo tungod sa mga butang nga ikaw wala makakita, kay sila gitago gikan kanimo ug gikan sa kalibotan, nga mao ang kaalam ngari kanako diha sa panahon nga moabot” (Doktrina ug mga Pakigsaad 25:4).

Ako usab, nangita og mga tubag sa kinasingkasing nga mga pangutana. Daghang tubag ang moabot, ug ang uban wala moabot.³¹ Samtang kita nagpaabot—mosalig sa kaalam ug gugma sa Dios, mosunod sa Iyang mga kasugoan, ug mosalig sa unsay atong kasamtangang nahibaloan—Siya motabang kanato sa pagkaplag og kalinaw hangtod nga Siya mopadayag sa kamatuoran sa tanan nga mga butang.³²

Pagsabot sa Doktrina ug Palisiya

Kon mangita sa kamatuoran, makatabang ang pagsabot sa kalainan tali sa doktrina ug palisiya. Ang doktrina nagpasabot sa mahangtoron nga mga kamatuoran, sama sa kinaiyahan sa Dios nga Kapangulohan, sa plano sa kaluwasan, ug sa maulaon nga sakripisyo ni Jesukristo. Ang palisiya mao ang paggamit sa doktrina base sa kasamtangan nga mga kahimtang. Ang palisiya motabang kanato sa pagpangalagad sa Simbahan diha sa hapsay nga paagi.

Samtang ang doktrina dili gayod mausab, ang palisiya mausab sa matag karon ug unya. Ang Ginoo naglihok pinaagi sa Iyang buhi nga mga propeta sa pagpahigayon sa Iyang mga doktrina ug sa pag-usab sa mga palisiya sa Simbahan sumala sa mga panginahanglan sa Iyang mga Anak.

Subo lang, usahay atoang masaypan ang palisiya nga usa ka doktrina. Kon kita wala makasabot sa kalainan, kita mirisgo sa pagkahimong madismaya sa higayon nga ang mga palisiya mausab ug lagmit gani magsugod sa pagkuwestiyon sa kaalam sa Dios o sa tahas sa mga propeta sa pagdawat og.³³

Pagtudlo sa Mahangtoron nga Kamatuoran

Kon kita makabaton og kamatuoran gikan sa Dios, Siya nag-awhag kanato sa pagpakigbahin niana nga kahibalo ngadto sa uban.³⁴ Kita mobuhat niini sa higayon nga kita magtudlo og usa ka klase, mogiya sa usa ka bata, o maghisgot sa mga kamatuoran sa ebanghelyo uban sa usa ka higala.

Ang atong tumong mao ang pagtudlo sa kamatuoran sa paagi nga magdapit og makapakabig nga gahom sa Espiritu Santo³⁵ Tugoti akong mopakigbahin og serye sa yano nga mga imbitasyon gikan sa Ginoo ug sa Iyang mga propeta nga makatabang.³⁶

Pagsentro ngadto sa Langitnong Amahan, ni Jesukristo, ug sa Ilang sukaranang doktrina.³⁷
Lig-on nga pagbase sa mga kasulatan ug sa mga pagtulun-an sa mga propeta sa ulahing mga adlaw.³⁸
Mosalig sa doktrina nga naestablisar pinaagi sa daghang pagsaksi sa adunay awtoridad.³⁹
Likaye ang pangagpas, personal nga mga opinyon, o kalibotanong mga ideya.⁴⁰
Pagtudlo og usa ka punto sa doktrina sulod sa konteksto sa may kalabotan nga mga kamatuoran sa ebanghelyo.⁴¹
Paggamit og mga pamaagi sa pagtudlo nga magdapit sa impluwensiya sa Espiritu.⁴²
Klarohon ang pagpakig-istorya aron malikayan ang dili pagsinabtanay.⁴³

Mamulong sa Kamatuoran diha sa Gugma

Kon giunsa nato pagtudlo ang kamatuoran imporatante gayod. Si Pablo nag-awhag kanato sa pagsulti sa “kamatuoran uban ang gugma” (tan-awa sa Mga Taga-Efeso 4:14–15). Ang kamatuoran adunay labing dako nga kahigayonan sa pagpanalangin sa uban kon kini gipahayag inubanan sa Kristohanong gugma.⁴⁴

Ang kamatuoran nga gitudlo nga walay gugma makahatag og mga pagbati nga gihukman, kawalay kadasig, ug pag-inusara. Kini kasagaran mosangpot sa kasuko ug pagkabahinbahin—gani sa panagbangi. Sa laing bahin, ang gugma nga walay kamatuoran haw-ang ug nagkulang og saad sa paglambo.

Ang kamatuoran ug gugma mahinungdanon alang sa atong espirituwal nga kalamboan.⁴⁵ Ang kamatuoran naghatag sa doktrina, mga baroganan, ug sa mga balaod nga mahinungdanon ngadto sa pagbaton og kinabuhing dayon, samtang ang gugma naghatag og pagdasig nga gikinahanglan aron sa paghangop ug paglihok sumala sa unsay tinuod.

Ako hangtod sa kahangtoran nga mapasalamaton sa uban nga mapailobon nga mitudlo kanato sa mahangtoron nga kamatuoran uban sa gugma.

Panapos

Sa pagtapos, tugoti ko nga mopakigbahin sa mahangtoron nga mga kamatuoran nga nahimong angkla sa akong kalag. Ako nakabaton og kahibalo niini nga mga kamatuoran pinaagi sa pagsunod sa mga baroganan nga nahisgotan karon.

Ako nasayod nga ang Dios mao ang atong Langitnong Amahan.⁴⁶ Siya nasayod sa tanan,⁴⁷ gamhanan sa tanan,⁴⁸ ug hingpit nga mahigugmaon.⁴⁹ Siya mihimo og usa ka plano alang kanato aron makabaton og kinabuhing dayon ug mamahimong sama Kaniya.⁵⁰

Isip kabahin niana nga plano, Siya mipadala sa Iyang Anak, si Jesukristo, aron sa pagtabang kanato.⁵¹ Si Jesus mitudlo kanato sa pagbuhat sa kabubut-on sa Amahan⁵² ug sa paghigugma sa usag usa.⁵³ Siya miula alang sa atong mga sala⁵⁴ ug mihatag sa Iyang kinabuhi diha sa krus.⁵⁵ Siya nabanhaw gikan sa mga patay human sa tulo ka adlaw.⁵⁶ Pinaagi ni Kristo ug sa Iyang grasya, kita mabanhaw,⁵⁷ kita mapasaylo,⁵⁸ ug kita makakaplag og kalig-on diha sa kasakit.⁵⁹

Atol sa Iyang yutan-ong pangalagad, si Jesus mitukod sa Iyang Simbahan.⁶⁰ Paglabay sa panahon, kana nga Simbahan nausab, ug ang mga kamatuoran nawala.⁶¹ Si Jesukristo mipahiuli sa Iyang Simbahan ug sa mga kamatuoran sa ebanghelyo pinaagi ni Propeta Joseph Smith.⁶² Ug karon, si Kristo nagpadayon sa pagpangulo sa Iyang Simbahan pinaagi sa buhi nga mga propeta ug apostoles.⁶³

Ako nasayod nga kon kita moduol ngadto ni Kristo, kita sa kataposan “[magma]hingpit diha kaniya” (Moroni 10:32), makabaton og “ kahingpitan sa himaya” (Doktrina ug mga Pakigsaad 93:33), ug makadawat sa “tanan nga iya sa Amahan” (Doktrina ug mga Pakigsaad 84:38). Niining mga kamatuoran ako mosaksi sa ngalan ni Jesukristo, amen.