Sir, Buot Kaming Makigkita kang Jesus
Kita gusto nga makakita kang Jesus kon kinsa Siya ug mobati sa Iyang gugma.
Pagkabuta nga Dili na Makaila sa Panagway
Usa ka adlaw sa tingpamulak niadtong 1945, usa ka batan-ong lalaki ang nahigmata sulod sa usa ka ospital sa mga militar. Swerte nga nabuhi siya—napusilan siya sa kilid gyod sa iyang dunggan, apan naoperahan siya sa mga doktor, ug normal na siya nga molakaw ug moistorya.
Tungod sa trahedya, ang bala nakadaot sa bahin sa iyang utok nga maoy moila sa mga panagway. Karon motan-aw siya sa iyang asawa nga dili na makaila; dili na siya makaila sa iyang kaugalingong inahan. Bisan ang panagway diha sa salamin wala na niya mailhi—dili na siya makaingon kon usa ba kini ka lalaki o usa ka babaye.1
Siya nahimong buta nga dili na makaila sa panagway—usa ka kahimtang nga nakaapekto sa minilyon nga katawhan.2
Ang mga tawo nga dili na gayod makaila sa panagway maningkamot sa pag-ila sa uban pinaagi sa pagmemorya og mga lagda—usa ka lagda sa pag-ila sa anak nga babaye pinaagi sa posisyon sa iyang mga tumtom o sa usa ka higala pinaagi sa iyang sagudsod nga linaktan.
Pagtubo
Ania ang ikaduhang istorya, mismo sa balay: Isip batang lalaki, nakita nako kanunay ang akong mama isip tighimo og lagda. Siya ang mohukom kon kanus-a ko makadula ug kon kanus-a ko matulog o, ang labing grabe, ang mangibot og mga sagbot sa nataran.
Klaro man nga gihigugma ko niya. Apan kasagaran gyod ug sa akong kaulaw, nakita lamang nako siya isip “Siya Nga Kinahanglan Gayod nga Sundon.”
Pipila lamang ka tuig sa kaulahian nga akong nakita siya isip usa ka tinuod nga tawo. Naulaw ko nga wala gyod ako makamatikod sa iyang sakripisyo o maghunahuna kon ngano nga sa pipila ka tuig mao ra gihapon ang iyang gisul-ob nga duha ka karaan nga sayal (samtang ako adunay bag-ong sinina nga pang-eskwela) o kon ngano, sa kataposan sa adlaw, gikapoy kaayo siya ug gusto nga sayo ko matulog.
Kita Tingali mga Buta nga Dili na Makaila sa Panagway
Tingali inyong namatikdan nga kining duha ka istorya usa ra gayod ka istorya—sulod sa daghang katuigan, ako, niana nga higayon, buta nga dili na makaila sa panagway. Wala nako makita ang akong inahan isip usa ka tinuod nga tawo. Nakita nako ang iyang mga lagda apan wala nako makita diha niini ang iyang gugma.
Misulti ko ninyo niining duha ka istorya alang sa usa ka punto: Sa akong hunahuna nakaila kamo og usa ka tawo (tingali kamo karon mao ang tawo) nga nag-antos sa usa ka matang sa espirituhanong pagkabuta nga dili na makaila sa panagway.
Kamo tingali nanglimbasog sa pagtan-aw sa Dios isip usa ka mahigugmaong Amahan. Kamo mahimong motan-aw sa langit ug dili makakita sa panagway sa gugma ug kaluoy apan sa usa ka hugpong sa mga lagda nga kinahanglan ninyong subayon. Tingali mituo kamo nga ang Dios ang naghari sa Iyang kalangitan, namulong pinaagi sa Iyang mga propeta, ug nahigugma sa inyong igsoong babaye, apan sa sekreto naghunahuna kamo kon nahigugma ba Siya kaninyo.3 Tingali gibati ninyo nga nagkupot ang inyong kamot sa gunitanan nga puthaw apan wala pa mobati sa gugma sa inyong Manluluwas nga maoy padulngan niini.4
Sa akong hunahuna nakaila mo og mga tawo nga sama niini tungod kay sa dugayng panahon, ako kanhi mao ang tawo nga sama niini—ako kanhi espirituhanon nga buta nga dili na makaila sa panagway.
Naghunahuna ko nga ang akong kinabuhi mahitungod lang sa pagsunod og mga lagda ug mohangop sa dili makita nga mga sumbanan. Nasayod ko nga ang Dios hingpit nga nahigugma kaninyo apan wala nako kini mismo mabati. Nahadlok ko basin mas naghunahuna ko nga makasulod sa langit kaysa makauban ang akong Langitnong Amahan.
Kon kamo, sama nako, usahay nagpakaaron-ingnon lamang nga nagkanta apan dili “makakanta sa matubsanong gugma,”5 unsa ang atong buhaton?
Ang tubag, sama sa gipahinumdom ni Presidente Russell M. Nelson nato, sa kanunay mao si Jesus.6 Ug maayo kaayo kana nga balita.
Sir, Buot Kaming Makigkita kang Jesus
Adunay mubo nga bersikulo sa Juan nga ganahan nako. Nagsaysay kini bahin sa usa ka grupo sa mga taga-gawas nga miduol sa usa ka disipulo nga adunay importante nga hangyo. “Sir,” sila miingon, “buot kaming makigkita kang Jesus.”7
Mao kana ang gusto natong tanan—kita gusto nga makakita kang Jesus kon kinsa Siya ug mobati sa Iyang gugma. Kinahanglan nga mao kini ang rason sa kadaghanan sa unsay atong gibuhat diha sa Simbahan—ug diha gayod sa matag panatigom alang sa sakramento. Kon kamo naghunahuna gayod kon unsa nga leksiyon ang itudlo, unsa nga matang sa miting ang planohon, ug kon dili na lang ba ipadayon ang kalihokan sa mga deacon ug magdula na lang og dodgeball, himoa kini nga bersikulo isip inyong giya: makatabang ba kini sa mga tawo nga makakita ug mahigugma kang Jesukristo? Kondili, tingali sulayi ang lain pang butang.
Sa dihang akong naamgohan nga ako sa espirituhanong paagi buta nga dili na makaila sa panagway, nga ako nakakita sa mga lagda apan dili sa panagway sa kaluoy sa Amahan, ako nasayod nga dili kadto sayop sa Simbahan. Dili kadto sayop sa Dios, ug wala kini magpasabot nga nawala na ang tanan; kini usa ka butang nga kinahanglang makat-onan natong tanan. Bisan ang nag-unang mga saksi sa Pagkabanhaw kanunay nga nakig-atubang sa nabanhaw nga Ginoo apan wala makaila Kaniya; gikan sa Tanaman nga Lubnganan ngadto sa mga baybayon sa Galilea, ang Iyang unang mga sumusunod kaniadto “[nakakita kang] Jesus nga nagbarog didto apan wala makaila nga si Jesus diay kadto.”8 Sila kinahanglang magkat-on aron makaila Kaniya, ug ingon man usab kita.9
Gugma nga Putli
Sa dihang akong naamgohan nga ako sa espirituhanong paagi buta nga dili na makaila sa panagway, misugod ko sa pagsunod sa tambag ni Mormon nga mag-ampo “uban sa tibuok kusog sa kasingkasing” aron mapuno sa gugma nga gisaad sa Iyang mga disipulo—akong gugma alang Kaniya ug Iyang gugma alang nako—ug aron “makakita kaniya nga mao gihapon … nga makabaton niini nga paglaom.”10 Ako nag-ampo sulod sa katuigan nga makasunod sa unang dakong sugo nga higugmaon ang Dios ug mobati nianang “unang dako nga kamatuoran … nga ang Dios nahigugma kanato sa tibuok Niyang kasingkasing, gahom, hunahuna, ug kusog.”11
Ang mga Ebanghelyo
Nagbasa usab ako ug nagbalikbalik og basa sa upat ka Ebanghelyo—niining higayona dili aron makakutlo og mga lagda kondili aron makakita kon kinsa Siya ug kon unsa ang Iyang gusto. Ug, sa kataposan, naanod ko sa bul-og sa gugma nga midagayday gikan Kaniya.
Si Jesus mipahibalo sa sinugdanan nga Siya mianhi “aron pagsangyaw sa maayong balita ngadto sa mga kabos, aron [pagsangyaw sa kagawasan] ngadto sa mga binihag, ug [pagpahiuli] sa panan-aw sa mga buta.”12
Dili lamang kini usa ka lista sa angayng buhaton o maayong makig-atubang; mao kini ang paagi sa Iyang paghigugma.
Paklia ang mga Ebanghelyo bisan asa; hapit sa kada pahina kita makakita Kaniya nga nag-atiman sa mga tawo nga nag-antos—sa sosyal ug sa pisikal nga paagi. Gihikap niya ang mga tawo nga gituohan nga mahugaw ug dili limpyo13 ug gipakaon ang mga gigutom.14
Unsa ang inyong paborito nga istorya bahin ni Jesus? Ako naghunahuna nga kini mopakita ninyo sa Anak sa Dios nga nagtabang sa paghangop o nagtanyag og paglaom sa usa ka tawo nga sinalikway—ang sanlahon,15 ang gikasilagan nga Samaryanhon,16 ang giakusahan ug makauulaw nga makasasala,17 o ang kaaway sa nasod.18 Kana nga matang sa grasya makapahingangha.
Sulayi sa pagsulat ang matag higayon nga Siya midayeg o miayo o mikaon uban sa taga-gawas, ug mahutdan mo og tinta sa dili pa mo mobiya sa Lucas.
Sa akong pagkakita niini, ang akong kasingkasing milukso sa mahigugmaong pag-ila, ug misugod ko sa pagbati nga tingali Siya nahigugma kanako. Sama sa gitudlo ni Presidente Nelson, “Kon magkat-on kamo og mas daghan mahitungod sa Manluluwas, mas sayon ang pagsalig sa Iyang kaluoy, sa Iyang walay kinutoban nga gugma.”19 Ug mas mosalig ug mahigugma kamo sa inyong Langitnong Amahan.
Si Elder Holland nagtudlo nato nga si Jesus mianhi aron ipakita “kanato kon kinsa ug unsa ang Dios nga atong Amahan sa Kahangtoran, kon unsa Siya ka mapahinungoron sa hingpit ngadto sa Iyang mga anak.”20
Si Pablo nag-ingon nga ang Dios mao “ang Amahan sa [tanang] kaluoy, ug Dios sa tanang kahupayan.”21
Kon lahi ang inyong nakita Kaniya, palihog padayon sa pagpaningkamot.
Mga Pakigsaad ug Paghangop sa Dios
Ang mga propeta nagdapit nato sa pagpangita sa Iyang nawong.22 Gikuha ko kini isip pahinumdom nga kita nagsimba sa atong Amahan, dili sa usa ka pormula, ug nga kita dili mahuman hangtod nga kita makakita ni Jesus isip ang panagway sa gugma sa atong Amahan23 ug mosunod Kaniya, dili lang sa Iyang mga lagda.24
Kon ang mga propeta ug apostoles maghisgot og mga pakigsaad, dili sila sama sa mga coach nga magsinggit gikan sa (komportable) nga mga lingkoranan, mosulti nato og “paningkamot pa!” Gusto nila nga atong makita nga ang mga pakigsaad may kalabotan gayod sa mga pakigrelasyon25 ug mahimong usa ka tambal sa espirituhanong pagkabuta nga dili na makaila sa panagway.26 Dili kini mga lagda aron maangkon ang Iyang gugma; Siya nahigugma na kaninyo sa hingpit. Ang atong hagit mao ang pagsabot ug pagpahiangay sa atong kinabuhi ngadto niana nga gugma.27
Kita maningkamot nga makakita pinaagi sa atong mga pakigsaad, ingon og pinaagi sa usa ka bintana, ngadto sa panagway sa nagpaluyo nga kaluoy sa Amahan.
Ang mga pakigsaad mao ang paagi sa paghangop sa Dios.
Ang Bul-og sa Gugma sa Dios
Sa kataposan, kita makakat-on nga makakita Kaniya pinaagi sa pagserbisyo Kaniya. “Kay unsaon pagkasayod sa usa ka tawo sa agalon kinsa siya wala makaalagad?”28
Pipila ka tuig ang milabay, nakadawat ko og calling nga morag dili ko kwalipikado. Mimata ko og sayo, nakuyawan—apan naghunahuna sa usa ka hugpong sa mga pulong nga wala pa nako sukad madungog: nga ang pagserbisyo niini nga Simbahan mao ang pagbarog diha sa bul-og sa gugma sa Dios alang sa Iyang mga anak. Kini nga Simbahan usa ka nagtrabaho nga grupo sa katawhan nga nagdala og mga piko ug mga pala naningkamot sa paglimpyo sa agianan sa bul-og sa gugma sa Dios aron matabangan ang Iyang mga anak nga anaa sa kataposan sa linya.
Bisan kinsa pa kamo, bisan unsa pa ang inyong kaagi, adunay luna alang kaninyo dinhi niini nga Simbahan.29
Pagkuha og piko ug pala ug moapil sa grupo. Motabang sa pagdala sa Iyang gugma ngadto sa Iyang mga anak, ug ang pipila niini mopisik nganha ninyo.30
Pangitaon nato ang Iyang mahigugmaong panagway, Iyang paghangop pinaagi sa pakigsaad, ug dayon moapil nga makigtambayayong uban sa Iyang mga anak, magdungan sa pagpanganta og “Manunubos sa Israel”:
Iuli, akong Dios,
Ang kahayag mo;
Paghupay gipangayo ko;
Himoang kahidlaw
Diha kanimo
Mohupay sa [a]kong kamingaw.31
Hinaot nga kita mangita sa Iyang mahigugmaong panagway ug unya mahimong mga sudlanan sa Iyang kaluoy ngadto sa Iyang mga anak.32 Sa ngalan ni Jesukristo, amen.