Mga Igsoon nga Lalaki ug Mga Igsoon nga Babaye diha ni Kristo
Hinaot nga matagamtaman nato ang dugang nga espirituhanong relasyon nga anaa tali kanato ug ang bili sa lainlaing mga hiyas ug nagkadaiyang mga gasa nga ania natong tanan.
Minahal kong mga higala, kita adunay talagsaong mga sesyon sa komperensiya karon. Kitang tanan mibati sa Espiritu sa Ginoo ug sa Iyang gugma pinaagi sa talagsaong mga mensahe nga gipakigbahin sa atong mga lider. Ako mibati nga adunay pribilehiyo sa pagpamulong kaninyo niining gabhiona isip ang panapos nga mamumulong niini nga sesyon. Ako mag-ampo nga ang Espiritu sa Ginoo magpadayon nga magauban kanato samtang maglipay kitang tanan isip tinuod nga mga igsoon nga lalaki ug mga igsoon nga babaye diha ni Kristo.
Ang atong minahal nga propeta, si Presidente Russel M. Nelson mipahayag: “Karon moawhag ko sa atong mga miyembro bisan asa nga manguna sa pagbiya sa mga kinaiya ug binuhatan sa diskriminasyon. Mohangyo ako kaninyo sa pag-awhag og respeto sa tanang anak sa Dios.”1 Isip tibuok kalibotan ug nagpadayon sa pagtubo nga Simbahan, ang pagsunod niini nga imbitasyon gikan sa atong propeta usa ka mahinungdanon nga kinahanglanon alang sa pagtukod sa gingharian sa Manluluwas sa matag nasod sa kalibotan.
Ang ebanghelyo ni Jesukristo nagtudlo nga kitang tanan mga anak nga lalaki ug mga anak nga babaye sa langitnong mga ginikanan kinsa tinud-anay nga nahigugma kanato2 ug nga kita nagpuyo isip pamilya didto sa presensya sa Dios sa wala pa kita matawo niini nga yuta. Ang ebanghelyo nagtudlo usab nato nga kitang tanan gilalang pinaagi sa hitsura ug panagway sa Dios.3 Busa, kita managsama sa Iyang atubangan,4 kay Iyang “gibuhat ang tanang kaliwat sa katawhan ug gipapuyo sila sa tibuok kalibotan.”5 Busa, kitang tanan adunay balaan nga kinaiya, kabilin, ug potensyal, kay adunay “usa lamang ka Dios ug Amahan sa tanang mga tawo, Siya mao ang labaw sa tanan ug nagbuhat pinaagi sa tanan ug anaa [natong] tanan.”6
Isip disipulo ni Jesukristo, kita gidapit sa pagdugang sa atong hugot nga pagtuo, ug gugma alang, sa atong espirituhanon nga mga igsoon nga lalaki ug mga igsoon nga babaye pinaagi sa tinud-anay nga pagbugkos sa atong mga kasingkasing sa panaghiusa ug gugma, bisan pa sa atong mga kalainan, sa ingon modugang sa atong abilidad sa pagpasiugda og pagtahod alang sa kaligdong sa tanang anak nga lalaki ug anak nga babaye sa Dios.7
Dili ba mao gayod kana ang kahimtang nga nasinati sa katawhan ni Nephi sulod sa hapit duha ka siglo human mangalagad si Kristo ngadto kanila?
“Ug sa pagkamatuod wala nay mga katawhan nga labaw pa ka malipayon sa tanan nga mga katawhan nga gilalang sa kamot sa Dios. …
“Ni adunay mga Lamanite, ni bisan unsa nga matang sa pundok sa mga katawhan; apan sila nagkahiusa, mga anak ni Kristo, ug manununod sa gingharian sa Dios.
“Ug pagkabulahan kanila!”8
Si Presidente Nelson dugang nga mihatag og gibug-aton sa kaimportante sa pagsabwag sa kaligdong ug pagtahod alang sa atong isig ka tawo sa dihang siya mipahayag: “Ang Tiglalang natong tanan mitawag sa matag usa nato sa pagbiya sa mga kinaiya nga diskriminasyon batok sa bisan unsa nga grupo sa mga anak sa Dios. Bisan kinsa kanato nga adunay diskriminasyon sa laing kaliwat kinahanglan nga maghinulsol! … Matarong lang nga ang matag usa kanato mobuhat kutob sa maabot sa atong impluwensya sa pagpreserbar sa kaligdong ug pagtahod nga angay sa matag anak nga lalaki ug anak nga babaye sa Dios.”9 Sa pagkatinuod, ang pagtagad sa tanang tawo uban sa kaligdong nagkinahanglan nga una natong tahoron ang kamatuoran nga kitang tanan managlahi.10
Kon ikonsiderar ang sagrado nga talikala nga naghiusa kanato uban sa Dios isip Iyang mga anak, kining mapanagnaon nga direksyon nga gihatag ni Presidente Nelson sa walay duhaduha usa ka importante nga lakang sa pagpalig-on og mga taytayan sa pagsabot imbes maghimo og mga paril sa dikriminasyon ug paglainlain diha kanato.11 Hinuon, sama sa gipasidaan ni Pablo sa Mga Taga-Efeso, kinahanglan nga atong masabtan nga aron makab-ot kini nga katuyoan, gikinahanglan ang paghimo og indibidwal ug hinugpong nga paningkamot sa paglihok inubanan sa pagpaubos, pagkamaaghop, ug pagpailob ngadto sa usag usa.12
Adunay sugilanon sa usa ka rabbi nga Judeo nga nalingaw sa pagsubang sa adlaw uban sa duha ka higala. Siya nangutana kanila, “Unsaon ninyo sa pagkahibalo kon nahuman na ang gabii ug nagsugod na ang bag-ong adlaw?”
Usa kanila mitubag, “Kon motan-aw ka sa silangan ug makaila sa usa ka karnero gikan sa usa ka kanding.”
Ang lain mitubag, “Kon ikaw motan-aw ngadto sa kapunawpunawan ug makaila sa usa ka kahoy nga oliba gikan sa kahoy nga igera.”
Dayon sila miatubang ngadto sa maalamon nga rabbi ug nangutana kaniya sa sama nga pangutana. Human sa taas nga pagpamalandong, mitubag siya, “Kon kamo motan-aw ngadto sa silingan ug makakita og nawong sa usa ka babaye o nawong sa usa ka lalaki ug makasulti, ‘Siya mao ang akong igsoon nga babaye; siya mao ang akong igsoon nga lalaki.’”13
Akong minahal nga mga higala, akong ikapaniguro ninyo nga ang kahayag sa bag-ong adlaw mas mosanag pa sa atong mga kinabuhi kon atong tan-awon ug tagdon ang atong mga isig ka tawo uban ang pagtahod ug kaligdong ug isip tinuod nga mga igsoon nga lalaki ug mga igsoon nga babaye diha ni Kristo.
Atol sa Iyang yutan-ong pangalagad, hingpit kaayong gipakita ni Jesus kini nga baroganan samtang “miadto siya sa tanang dapit ug naghimog mga maayong butang”14 ngadto sa tanang tawo, nagdapit kanila sa pagduol ngadto Kaniya ug pag-ambit sa Iyang kaayo, bisan pa sa ilang gigikanan, sosyal nga kahimtang, o mga kinaiya sa kultura. Siya nangalagad, nag-ayo, ug kanunay nga nagbantay sa mga panginahanglan sa tanan, ilabi na niadtong kinsa nianang higayona giisip nga lahi, ubos og kahimtang, o wala mahilakip. Siya walay gibalibaran apan mitagad kanila uban ang kaangayan ug gugma, kay Siya nakakita kanila isip Iyang mga igsoon nga lalaki ug mga igsoon nga babaye, mga anak nga lalaki ug mga anak nga babaye sa samang Amahan.15
Usa sa labing makapahinuklog nga mga okasyon sa dihang nahitabo kini mao nga sa dihang ang Manluluwas mipanaw ngadto sa Galilea, mituyo sa pag-agi sa rota nga moagi sa Samaria.16 Si Jesus dayon nakahukom nga molingkod sa atabay ni Jacob aron mopahulay. Samtang didto, usa ka Samaryanhon nga babaye mipuno sa iyang pitsil og tubig. Sa Iyang walay kinutoban nga kahibalo, si Jesus mitawag kaniya, nag-ingon “Paimna ako.”17
Kining babaye natingala nga ang usa ka Judeo mihangyo sa usa ka Samaryanhon nga babaye og panabang ug mipadayag sa iyang kasurprisa, nag-ingon, “Judio ka ug ako Samaryanhon, unya nganong nangayo ka man kanakog tubig nga mainom kay ang mga Judio gud ug ang mga Samaryanhon wala may panagsandurotay?”18
Apan si Jesus, misalikway sa dugay nang mga tradisyon sa kaligutgot tali sa mga Samaryanhon ug sa mga Judeo, mahigugmaong nangalagad niini nga babaye, nagtabang kaniya nga makasabot kinsa gayod Siya—nga mao, ang Mesiyas, kinsa makasulti sa tanan ug kansang pag-abot iyang gihulat.19 Ang epekto nianang malumong pangalagad nakapahimo sa babaye sa pagdagan ngadto sa siyudad aron ipahibalo sa katawhan unsay nahitabo, nag-ingon, “Mao ba kaha kini ang Kristo?”20
Ako adunay dakong kaluoy alang niadtong kinsa giisig-isig, ubos og kahimtang, o gigukod sa walay pagbati ug walay hunahuna nga mga tawo, tungod kay, sa dagan sa akong kinabuhi, ako nakakita gayod sa kasakit nga giantos sa buotan nga mga tawo nga gihukman o gibaliwala tungod kay lahi silang mosulti, tan-awon, o pagpuyo. Ako mibati usab og tinuod nga kasubo sa akong kasingkasing alang niadtong kansang mga hunahuna nagpabilin nga mangitngit, kansang panan-awon limitado, ug kansang mga kasingkasing nagpabilin nga tig-a tungod sa pagtuo sa ubos og kahimtang niadtong kinsa lahi kay kanila. Ang ilang limitado nga panan-aw sa uban sa tinuod nakababag sa ilang abilidad sa pagkakita kinsa sila isip usa ka anak sa Dios.
Sama sa gipanagna sa mga propeta, kita nagpuyo sa makuyaw nga mga panahon nga paingon ngadto sa Ikaduhang Pag-anhi sa Manluluwas.21 Ang kalibotan sa kinatibuk-an gibulag sa lig-on nga mga panagbahin, nga makita pinaagi sa kaliwatan, politikal, ug sa sosyal ug ekonomikanhong mga kahimtang. Ang maong mga panagbahin usahay moresulta sa pag-impluwensya sa panghunahuna ug panglihok-lihok sa mga tawo kalabot sa ilang isig ka tawo. Tungod niini nga rason, komon nga makita ang mga tawo nga motan-aw sa paagi sa panghunahuna, panglihok-lihok, ug pagsulti sa ubang mga kultura, mga kaliwat, ug mga kagikan isip ubos nga kahimtang, mogamit sa gihunahuna nang daan, sayop, ug sa kasagaran makantalitahon nga mga ideya, mosangpot sa mga kinaiya nga matamayon, lampingasan, walay pagtahod, ug gani diskriminasyon batok kanila. Ang maong mga kinaiya nagagikan sa garbo, kaarogante, kasina, kaselos, mga kinaiya sa usa ka kalibotanon nga kinaiyahan,22 nga sa hingpit supak sa Kristohanong mga hiyas. Kini nga batasan dili angay alang niadtong kinsa naningkamot nga mahimong Iyang tinuod nga mga disipulo.23 Gani, akong mga kaigsoonan, walay luna ang mga mahusgahon nga panghunahuna o mga aksyon diha sa komunidad sa mga Santos.
Isip mga anak nga lalaki ug mga anak nga babaye sa pakigsaad, makatabang kita sa pagwagtang niini nga matang sa kinaiya pinaagi sa pagtan-aw sa klaro nga kalainan nga anaa tali kanato pinaagi sa mga mata sa Manluluwas24 ug base sa unsay komon nga anaa kanato—atong balaan nga pagkatawo ug relasyon. Dugang pa, makapaningkamot kita sa pagtan-aw sa atong kaugalingon sama sa makita sa mga damgo, mga paglaom, mga kasubo ug mga kasakit sa atong silingan. Kitang tanan mga isig ka magpapanaw isip mga anak sa Dios, managsama sa atong dili hingpit nga kahimtang ug sa atong abilidad sa pagtubo. Kita gidapit nga molakaw nga magdungan, malinawon, nga ang atong mga kasingkasing napuno sa gugma ngadto sa Dios ug sa tanang tawo—o, sama sa gisulat ni Abraham Lincoln, “walay malisya ni bisan kinsa ug gugma nga putli ngadto sa tanan.”25
Gikonsiderar ba ninyo kon sa unsa nga paagi nga ang baroganan sa pagtahod alang sa tawhanong kaligdong ug panag-angay gipakita pinaagi sa yanong paagi sa atong pagsinina diha sa balay sa Ginoo? Kitang tanan moadto sa templo nga nagkahiusa sa usa ka katuyoan ug napuno sa tinguha nga mahimong putli ug balaan diha sa Iyang balaan nga presensya. Nagsinina og puti, kitang tanan dawaton sa Ginoo Mismo isip Iyang pinalangga nga mga anak, mga lalaki ug mga babaye sa Dios, kaliwat ni Kristo.26 Kita adunay pribilehiyo sa pagpahigayon sa samang mga ordinansa, paghimo sa samang mga pakigsaad, pagpasalig sa atong mga kaugalingon sa pagpuyo og mas taas ug mas balaan nga mga kinabuhi, ug pagdawat sa samang mahangtoron nga mga saad. Nagkahiusa sa katuyoan, makita nato ang usag usa sa bag-ong mga mata, ug sa atong panaghiusa, saulogon nato ang atong mga kalainan isip balaan nga mga anak sa Dios.
Ako bag-o nga mitabang sa paggiya sa halangdon nga mga tawo ug mga opisyal sa gobyerno pinaagi sa open house alang sa Brasília Brazil Temple. Ako naghulat sa ilisanan nga dapit uban sa bise presidente sa Brazil, ug naghisgot mi sa puti nga sinina nga isul-ob sa tanan sa sulod sa templo. Akong gipasabot ngadto kaniya nga kining tibuok kalibotan nga paggamit sa puti nga sinina nagsimbolo nga kitang tanan managsama ngadto sa Dios ug nga diha sa templo, ang atong pagkatawo dili bise presidente sa usa ka nasod o usa ka lider sa simbahan apan ang atong mahangtoron nga pagkatawo isip mga anak nga lalaki sa usa ka mahigugmaong Langitnong Amahan.
Ang Suba sa Iguaçú nagdagayday agi sa habagatan nga Brazil ug moabot ngadto sa tagaytay nga magporma og daghang busay nga nailhan sa tibuok kalibotan nga ang Iguaçú Falls—usa sa labing matahom ug talagsaon sa mga gilalang sa Dios dinhi sa yuta, gikonsiderar nga usa sa pito ka kahibulongan sa kalibotan. Ang dako kaayo nga bul-og sa tubig modagyaday ngadto sa usa ka suba ug dayon magbulag, magporma og gatosan ka dili hitupngan nga mga busay. Sa pinasumbingay nga pagkasulti, kining talagsaon nga sistema sa mga busay usa ka hulagway sa pamilya sa Dios dinhi sa yuta, kay kita nakigbahin sa samang espirituwal nga gigikanan ug butang, gikuha gikan sa atong balaan nga kabilin ug relasyon. Hinuon, ang matag usa kanato nagagikan sa laing-laing mga kultura, mga kagikan, ug mga nasyonalidad, nga adunay lahilahi nga mga opinyon, mga kasinatian, ug mga pagbati. Bisan pa niini, kita magpadayon isip mga anak sa Dios ug isip mga igsoon nga lalaki ug mga igsoon nga babaye diha ni Kristo, nga dili mawala ang atong balaan nga koneksyon nga nakapahimo nato nga talagsaong katawhan ug usa ka minahal nga komunidad.27
Minahal kong mga kaigsoonan, hinaot nga atong ipatumong ang atong mga kasingkasing ug mga hunahuna sa kahibalo ug pagpamatuod nga kitang tanan managsama sa atubangan sa Dios, nga kitang tanan hingpit nga natugahan sa samang mahangtoron nga potensyal ug kabilin. Hinaot nga matagamtaman nato ang dugang nga espirituhanong relasyon nga anaa tali kanato ug ang bili sa lainlaing mga hiyas ug nagkadaiyang mga gasa nga ania natong tanan. Kon atong buhaton, ako mosaad kaninyo nga kita modagayday sa atong kaugalingong paagi, sama sa tubig sa Iguaçú Falls, nga dili mawala ang balaan nga koneksyon nga nag-ila nato isip usa ka talagsaon nga katawhan, “mga anak ni Kristo, ug mga manununod sa gingharian sa Dios.”28
Ako mopamatuod kaninyo nga samtang kita mopadayon sa pagdagayday niining paagiha atol sa atong mortal nga kinabuhi, usa ka bag-ong adlaw magsugod nga adunay kahayag nga mopasanag sa atong mga kinabuhi ug modan-ag og talagsaong mga oportunidad nga bililhon pa, ug hingpit nga panalanginan pa og dugang pinaagi, sa nagkadaiya nga gilalang sa Dios alang sa Iyang mga anak.29 Kita segurado nga mahimong mga instrumento sa Iyang mga kamot sa pagpasiugda og pagtahod ug kaligdong diha sa Iyang tanang anak nga lalaki ug anak nga babaye. Ang Dios buhi. Si Jesukristo mao ang Manluluwas sa kalibotan. Si Presidente Nelson mao ang propeta sa Dios sa atong panahon. Ako mosaksi niini nga mga kamatuoran pinaagi sa sagrado nga ngalan ni Jesukristo, amen.