Toʻu Tupú
ʻI he taimi naʻe vaheʻi ai au ke u ngāue ʻi he Misiona California San Bernardino ko ha faifekau taimi-kakató, naʻe ʻi ai tonu pē hoku fāmilí mo au. Ko e laʻitā ko ʻení ko ʻeku fāʻofua ia ki he taha hoku ngaahi tokouá ʻi he hili hoku vaheʻí. Ko ha fononga faingataʻa ia ke u aʻu ki he tuʻunga ko ʻení, ka ʻoku ou houngaʻia koeʻuhí ko e ngaahi liliu kuó u mātā ʻiate au mo hoku fāmilí.
ʻI he taʻu ʻe ua kimuʻa peá u ʻosi mei he ako māʻolungá, ne u kau ai ʻi ha fakatuʻutāmaki fakalilifu ʻi ha meʻalele. Kimuʻa aí naʻe ʻikai pē ke u fai ʻa e meʻa naʻe totonu ke u faí. Ka ʻi he hili ʻa e fakatuʻutāmakí, naʻe liliu moʻoni ʻeku fakakaukau ki he moʻuí. Naʻe mei lava ke toʻo ai pē ʻeku moʻuí ʻi he foʻi taimi pē ko iá, pea naʻe ʻikai ke u loto ke ngata pehē ʻeku moʻuí. Naʻe tokoni mai ʻeku pīsopé ke u foki ki he hala totonú: lau fakaʻaho e Tohi ʻa Molomoná mo teuteu ke ngāue fakafaifekau.
Ko e sipoti ʻoku ou manako taha aí ʻa e lová. ʻI he hili pē ʻa e fakatuʻutāmakí, naʻá ku nofo ʻi he faʻahitaʻu kakato ko iá, pea naʻá ku fifili pe ko e hā koā e meʻa ne toe maʻakú. Ka naʻá ku tafoki ki he ʻEikí, pea ʻi heʻeku fai iá, naʻá ku aʻusia ha faʻahitaʻu fisifisimuʻa ʻi he taʻu hono hokó. Naʻe kei ʻi ai pē e ngaahi faingataʻá, ka ko e meʻa naʻe kehé ko ʻeku fai ia maʻá e ʻEikí, kae ʻikai ke fai ia maʻakú.
Ko e meʻa naʻá ne liliu aú ko hono mātā ʻa e lahi ʻo e ngaahi tāpuaki ʻe lava ke maʻu mei he kakato ʻo e ongoongoleleí. Koeʻuhí kuó u maʻu ʻa e fiefia mo e nēkeneka kotoa ko iá, ʻoku ou fakaʻamu ai ke fakamafola ia ʻi he funga ʻo e māmaní. ʻOku ou fakaʻamu ange ke maʻu ʻe he kakaí ʻa e fiefia kuó u maʻu he ʻaho kotoa pē koeʻuhí ko e ongoongoleleí. Pea ko e ʻuhinga ia ʻoku ou ngāue fakafaifekau aí: ke tokoni ke “fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39).
Kēleti W., 18, North Carolina, USA