Peso Vahehongofulú
ʻOku nofo ʻa e tokotaha naʻá ne faʻú ʻi Sihuahua, Mekisikou.
Naʻe ʻā pongipongia ʻa Sofia. Naʻe mahuʻinga makehe ʻa e ʻahó ni. Te ne ʻalu ʻo fakatau atu ʻa e inu lēmaní ʻi he fea maʻamaʻa ʻa hono mehikitangá mo e faʻētangatá. Naʻe fakasuka ʻe Mama ha fuʻu sioki lēmani lahi maʻana.
Naʻe ngaohi ʻe Sofia ha fakaʻilonga. Naʻá ne tohi ai “Inu Lēmani!” ʻaki e peni lanu moli mo e lanu engeenga. Naʻá ne fakapipiki ia ki ha kiʻi tēpile. Naʻá ne tangutu leva ʻo talitali.
Ne ʻikai fuoloa kuo haʻu ha tangata. Naʻá ne fehuʻi ange, “ʻE lava ke ʻomai haʻaku ipu?” Naʻá ne faʻo ha peso ʻi he hina tānakiʻanga sēniti [ʻa Sofiá].
“ʻIo!” Ko Sofia ange ia. Naʻá ne lingi ange haʻane ipu lēmani.
Naʻe haʻu taha taha pē ʻa e kakaí ke sio ʻi he feá. Pea naʻa nau fakatau taha taha pē ʻa e inu lēmani ifó. Naʻe ʻosi atu e pongipongí mo e fiefia lahi. Ne ʻikai fuoloa kuo ʻosi kotoa ʻa e inu lēmaní.
Naʻe luluʻi ʻe Sofia ʻa ʻene hina tānakiʻanga sēnití. Naʻe ngatata ʻa e pesó. Naʻe lahi ʻene sēniti naʻe maʻú!
“Tōatu!” Ko Papa ange ia.
Kuo teʻeki ke maʻu ʻe Sofia ha paʻanga lahi pehē kimuʻa. “Te u ʻalu ʻo kumi haʻaku yo-yo!”
Naʻe malimali pē ʻa Papa. “ʻOkú ke ʻilo ʻema meʻa mo Mama ʻoku fai ʻi he taimi ʻokú ma maʻu ai e paʻangá?”
Naʻe kalokalo ange ʻa Sofia.
Naʻe talaange ʻe Papa, “ʻOkú ma totongi vahehongofulu. Naʻe foaki mai ʻe he Tamai Hēvaní ʻa e meʻa kotoa pē maʻatautolu. ʻOkú Ne kole mai ke tau foaki ange ha kiʻi konga siʻi pē. ʻOku tau totongi ʻa e vahehongofulú he ʻoku tau ʻofa ʻiate Ia.”
Naʻe malimali ʻa Sofia. Naʻá ne fakaʻamu ke fakahaaʻi ki he Tamai Hēvaní ʻokú ne ʻofa mo ia ʻiate Ia.
Naʻe tokoni ʻa Papa kia Sofia ke lau ʻene pesó. Ko e taimi kotoa pē naʻá ne lau ai ha 10, naʻá ne faʻo ha peso ʻe taha ki ha kiʻi sila. Naʻe tokoni ange ʻa Papa ke ne tohi ha ʻū mataʻifika ʻi ha kiʻi laʻipepa hinehina. Naʻá na faʻo ʻa e laʻipepá ki he silá fakataha mo e pesó. Naʻá na silaʻi malu leva ia. ʻE ʻave leva ia ʻe Sofia ki he pīsopé ʻi he lotú ʻapongipongi.
“ʻOkú ke ongoʻi fēfē nai?” Ko e fehuʻi ange ia ʻa Papa kia Sofiá.
“Fiefia lahi ʻaupito! Pea ʻoku kei toe pē ʻeku sēnití ki ha foʻi yo-yo.” Naʻá ne ongoʻi naʻe fiefia ʻa e Tamai Hēvaní ʻi heʻene filí. ●