Haʻu, ʻo Muimui ʻIate Au: Tohi ʻa Molomoná
Te tau kau fēfē nai ki he “ngāue fakaofo” ʻa e ʻEikí?
(12–18 ʻOkatopa)
ʻI he ngaahi meʻa lahi naʻe akoʻi ʻe he Fakamoʻuí ki he kakai Nīfaí, naʻá Ne akoʻi kiate kinautolu fekauʻaki mo hono tānaki ʻo ʻIsilelí pea fekau ke nau ako e folofolá mo tauhi haʻanau lekooti ʻanautolu pē. Te tau muimui fēfē nai ki he ngaahi akonaki ko ʻení he ʻaho ní?
Kau ki he Ngāué
Naʻe kikiteʻi ʻe Sīsū Kalaisi ha “ngāue fakaofo” ʻi he ngaahi ʻaho kimui ní (vakai, 3 Nīfai 21:9). Ko e ngāue ia ʻo hono tānaki ʻo ʻIsilelí. Kuo ui ʻeni ʻe Palesiteni Lāsolo M. Nalesoni ko e “meʻa mahuʻinga taha ʻoku hoko ʻi he māmaní ʻi he ʻaho ní” peá ne pehē, “Kapau te ke fili ki ai, kapau ʻokú ke loto ki ai, te ke hoko ai ko hano konga kāfakafa.”1
-
Te ke lava fēfē nai mo ho fāmilí ke ako lahi ange fekauʻaki mo ʻeni pea kau ʻi hono tānaki ʻo ʻIsilelí?
Fakatotolo ki he Kau Palōfitá
Naʻe fekau ʻe he Fakamoʻuí ki he kau Nīfaí ke nau “fakatotolo ki he kau palōfitá” (3 Nīfai 23:5). ʻOku tau maʻu e faingamālie ke fanongo ki he lea ʻa e palōfita moʻuí mo e kau taki kehe ʻo e Siasí ʻi he konifelenisi lahí.
-
Ko e hā ha meʻa te ke lava ʻo fai ke maʻu ai ha meʻa lahi ange mei he konifelenisi lahí?
-
ʻOku tokoni fēfē nai ʻa e “fakatotolo ki he kau palōfitá” ke tau tānaki ai ʻa ʻIsilelí?
Tauhi ha Lekooti
Naʻe fekau ʻe Sīsū ki Heʻene kau ākonga Nīfaí ke nau tauhi ha lekooti ʻo ʻEne ngaahi akonakí mo e ngaahi kikite ʻa Samuela ko e tangata Leimaná (vakai, 3 Nīfai 23:4, 6–13). ʻI he founga tatau pē, te tau lava ʻo lekooti ʻetau ngaahi aʻusia ʻi he moʻuí ke tokoni kiate kitautolu mo akoʻi e niʻihi kehé.
-
ʻOku ʻi ai nai ha ngaahi aʻusia fakalaumālie he kuohilí kuo teʻeki ke ke lekooti?
-
Te ke lekooti fēfē ʻa e ngaahi meʻa ʻoku akoʻi atu ʻe he ʻOtuá kiate koé?