Milton Camargo
Tokoni ʻUluaki ʻi he Kau Palesitenisī Lahi ʻo e Lautohi Faka-Sāpaté
Naʻe meimei lava ha taʻu ʻe taha ʻo Helio Loka Kamakó, ko ha faifekau mālōlō ʻi ha siasi kehe, ke fili ke papitaiso ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ne ʻikai fuoloa mei ai, ne fili hono uaifi ko Naia Pelamila Loka Kamakó ke ne muimui ʻi he tā sīpinga hono husepānití pea naʻe papitaiso foki mo ia.
ʻI he taimi ko iá, naʻe feitamaʻi ʻe Naia ʻa hona fohá ʻa ia te na fakahingoa ko Militoni. ʻE faitāpuekina taʻengata e ngaahi toʻutangata ʻo e fāmili Kamakoó koeʻuhí ko ʻenau fili ke kau ki he Siasí.
Naʻe fāʻeleʻi ʻa Misa Militoni Loka Kamako ʻi he ʻaho 10 ʻo Māʻasi, 1958, ʻi Sao Paulo, Palāsila. ʻOku pehē ʻe Misa Kamako, ʻa ia naʻe hikinimaʻi ʻi he ʻaho 6 ʻo ʻEpeleli, 2019, ke ne hoko ko e Tokoni ʻUluaki ʻi he Kau Palesitenisī Lahi ʻo e Lautohi Faka-Sāpaté, ʻokú ne monūʻia heʻene tupu hake ʻi he Siasí.
ʻOkú ne pehē, “ʻOku ʻafioʻi fakafoʻituitui kitautolu ʻe he ʻEikí. Ko ʻEne palani maʻatautolu takitahá ʻoku lahi ange ia he meʻa te tau lava ʻo makupusí.”
Naʻe fetaulaki ʻa Misa Kamako mo hono uaifi ko Petulisá lolotonga hono tokangaʻi heʻene tamaí ʻa e Misiona Brazil Rio de Janeiro, ʻi he konga kimui ʻo e 1970 tupú. Naʻe mali e ongomeʻá ʻi he ʻaho 4 ʻo Sānuali, 1980, meimei ko ha taʻu ia ʻe taha hili e foki mai ʻa Misa Kamako mei heʻene ngāue fakafaifekau taimi kakato ʻi he Misiona Portugal Lisbon. ʻOkú na maʻu ha fānau ʻe toko tolu.
Lolotonga e ngaahi fuofua taʻu ʻo e nofomali ʻa e fāmili Kamakó, naʻá na nofo ʻi Lio ti Sinelo, ʻa ia naʻe fakaʻosi ai ʻe Misa Kamako hono mataʻitohi BA ʻi he ʻenisinia sivilé mei he Instituto Militar de Engenharia. Naʻá ne maʻu kimui ange ha mataʻitohi MA ʻi he pisinisí mei he ʻUnivēsiti Pilikihami ʻIongí.
ʻI he kotoa e ngāue maʻuʻanga moʻui ʻa Misa Kamakó, kuó ne fakatapui hono taimí mo e iví ki hono akoʻi ʻo e niʻihi kehé. Kuó ne ngāue ki ha ngaahi ʻunivēsiti kehekehe, ʻo kau ai e Laureate Brazil Online Education, Universidad Tecnológica de México, pea fakamuimuitahá naʻá ne hoko ko e tokoni palesiteni ʻo e naunau fakalēsoni ki he Pathway Fakamāmani Lahi ʻa BYU.
Kuo hoko ʻa Misa Kamako ko ha Fitungofulu Fakaʻēlia, palesiteni ʻi he Misiona Brazil Porto Alegre South (1997–2000), tokoni palesiteni ʻi he Senitā Akoʻanga Fakafaifekau ʻi Palāsilá (2002–5), pīsope, palesiteni ngāue fakafaifekau ʻa e siteikí, mo ha palesiteni kōlomu kaumātuʻa.