Mark L. Pace
Palesiteni Lahi ʻo e Lautohi Faka-Sāpaté
Naʻe fai ʻe Misa Maʻake L. Peisi ha tukupā ʻi he faʻa lotu, ʻi hono ʻinitaviu ia ke hoko ko e Palesiteni Lahi foʻou ki he Lautohi Faka-Sāpaté ʻi he Siasí.
Naʻá ne lotu ʻo pehē, “Tamai Hēvani, ko e hā pē meʻa te Ke finangalo ke u faí, ʻoku ou fiefia ke fai ia. Ke Ke ʻafioʻi pē ʻoku ou tukupā kakato ke fai ia.”
ʻOku pehē ʻe Misa Peisi ko ʻene tefitoʻi fakaʻamu ʻi hono fatongia foʻoú ke faitāpuekina, tokoni mo poupou ki he kāingalotu ʻo e Siasí. Naʻá ne lea fekauʻaki mo e Kau Palesitenisī Lahi ʻo e Lautohi Faka-Sāpaté ʻo pehē, “ʻOku mau fie foaki ʻa e meʻa kotoa pē ʻoku mau maʻú.”
Naʻe fāʻeleʻi ʻa Maʻake Leonato Peisi ʻi he ʻaho 1 ʻo Sānuali, 1957, ʻi Puenosi ʻAealesi, ʻĀsenitina, kia Lōlini Nalesoni mo Melelini Heimoa Peisi. ʻI he taimi ko ʻení, naʻe tokangaʻi ʻe he tamai ʻa Misa Peisí ʻa e Misiona Argentine.
Naʻe fetaulaki ʻa Misa Peisi mo hono uaifi ʻi he kahaʻú, Ane Malia Leinilani, lolotonga ʻena kalasi ua fakataha ʻi Sōleki Siti, ʻIutā, USA. Kimui angé, lolotonga ʻena ako ʻi ha ongo akoʻanga māʻolunga kehekehe ʻi he loto koló, naʻá na toe fetaulaki lolotonga ha ʻekitivitī semineli ne fakatahaʻi. Naʻá na fetohiʻaki ʻi he ngaahi taʻu ne hoko aí lolotonga ia e ʻalu [ʻa Ane] mo hono fāmilí ki Noauei, ʻa ia naʻe tokangaʻi ai heʻene tamaí ʻa e Misiona Norway Oslo, pea lolotonga ngāue ʻa Misa Peisi ʻi he Misiona Spain Madrid. Naʻá na mali ʻi he Temipale Sōleikí ʻi he ʻaho 21 ʻo Nōvema, 1978, pea ʻokú na hoko ko ha mātuʻa ki ha fānau ʻe toko fitu.
Naʻe ʻosi ʻa ʻEletā Peisi mei he ʻUnivēsiti ʻo ʻIutaá ʻi he 1980 mo ha mataʻitohi BA ʻi he ʻekonōmiká pea mo ha mataʻitohi MA ʻi he pisinisí mei he ʻApiako Pisinisi ʻo Hāvatí ʻi he 1982. Hili haʻane ngāue taimi nounou ʻi he Price Waterhouse ʻi Niu ʻIoke Sití, naʻá ne ngāue ʻi he Kautaha Boyer ʻi Sōleiki Siti, ʻo ne ngāue ai ʻi he fakatau kelekelé mei he 1984 ki he 2012. Hili ʻene ngāue taʻu tolu ko ha palesiteni ʻo e Misiona Pāselona Sipeiní, naʻá ne kau ki he Kautaha Kātenaá ʻi he 2015, ʻo ne fakahoko e ngāue fakatau kelekelé.
ʻI he taimi naʻe uiuiʻi foʻou ai ʻa Misa Peisí, naʻá ne hoko ko ha Fitungofulu Fakaʻēlia. ʻOku kau ʻi hono ngaahi uiuiʻi faka-Siasi kimuʻá ʻa ʻene hoko ko ha tokoni palesiteni fakasiteiki, aleaʻanga māʻolunga, pīsope, tokoni ki ha kau pīsopeliki, palesiteni kōlomu kaumātuʻa, palesiteni Talavou mo ha Taki Sikauti.