Fakahinohino Fakalaumālie

Talu mei he hoko ʻa Lāsolo M. Nalesoni ko e Palesitení:

• Kuo toe fokotuʻutuʻu ai e ngaahi kōlomu ʻo e lakanga fakataulaʻeikí.

• Kuo fetongi ʻe he ngāue fakaetauhí ʻa e faiako fakaʻapí mo e faiako ʻaʻahí.

• ʻOku lolotonga fokotuʻutuʻu ha polokalama fakalakalaka fakataautaha foʻou maʻá e fānaú mo e toʻu tupú.

• ʻOku lolotonga teuteuʻi ha pulusinga foʻou ʻo e tohi himí mo e Tohi Hiva ʻa e Fānaú.

• Kuo fokotuʻu ha ngaahi fakahinohino foʻou ki he ʻinitaviu ʻa e toʻu tupú mo e pīsopé.

• Kuo fakamamafaʻi ke ui ʻaki ʻa e Siasí ʻa hono hingoa kakató.

• ʻOku ʻave ʻi he ʻinitanetí ʻa e ngaahi uiuiʻi ngāue fakafaifekau ʻi he U.S. mo Kānatá.

• Naʻe fakahingoa foʻou ʻa e Kuaea Tāpanekale Māmongá ko e Kuaea Tāpanekale ʻi he Temipale Sikueá.

• Kuo kamata ʻa e ako e ongoongoleleí ʻoku fakatefito ʻi ʻapi mo poupouʻi ʻe he Siasí, ʻo kau ai ʻa e liliu ke lotu houa ua pē ʻi he ʻaho Sāpaté.

• Kuo fanongonongo ha ngaahi temipale foʻou ʻe uofulu-mā-fitu.

• Kuo taʻofi e ngaahi fakaʻaliʻali kotoa pē ʻa e Siasí tukukehe pē ha ngaahi fakaʻaliʻali lalahi ʻe tolu.

• ʻOku malava he taimí ni ke fakahoko ʻi Sānuali e hiki ʻa e Palaimelí mo e toʻu tupú, fakanofo lakanga fakataulaʻeiki ʻo e kau talavoú, mo e lekomeni temipale ʻa e toʻu tupú kae ʻikai ko e muimui ʻi honau ʻaho fāʻeleʻí.

• ʻOku malava he taimí ni ke tui talausese fakafaifekau (dress pants) e kau faifekau fefiné.

• Kuo liliu e ngaahi fakamatala fakaikiiki fekauʻaki mo e ngāue fakatemipalé.

• Kuo faʻu ha ngaahi misiona foʻou pea kuo fakatonutonu mo e ngaahi fakangatangatá, pea kuo tāpuni ha senitā akoʻanga fakafaifekau ʻe ua.

• ʻOku lava he taimí ni ke tāpuakiʻi mo papitaiso ʻa e fānau ʻoku LGBT ʻenau mātuʻá, pea kuo fakamaʻalaʻala ʻa e tuʻutuʻuni fekauʻaki mo e mali ʻa e tangata mo e tangata pe fefine mo e fefiné.

Pea kuo talaʻofa ʻe Palesiteni Nalesoni hangē ko ia kuo fakahinohino mai ʻe he ʻEikí, ʻoku toe lahi mo ha ngaahi meʻa ke hoko mai!