ʻEletā Rubén V. Alliaud
Fitungofulu Taki Māʻolunga
Naʻe taʻu 14 ʻa Lūpeni ʻAliati he taimi naʻá ne mavahe ai mei hono ʻapi ʻi ʻĀsenitiná ke nofo taʻu taha ʻi heʻene faʻētangatá ʻi he ʻIunaiteti Siteití. Naʻe mālōlō kimuʻa ʻa ʻene tamaí, Lūpeni Lenaloto ʻAliati, pea naʻe tupu mei ai hano maʻu ʻe Lūpeni ha “laumālie fakafetau.”
ʻI he loto-hohaʻa ʻa ʻene faʻē ko Maliá, naʻá ne ʻomi ai [ʻa Lūpeni] ki Hiusitoni, Tekisisi ke nofo mo hono tuongaʻané, Manuela Pesitosi, mo hono fāmilí. Ko e meʻa pē taha naʻá ne kole ki he fāmili hono tuongaʻané: “ʻOua naʻa mou vahevahe ki hoku fohá homou tui [ki he Siasi] ʻo e Kau Māʻoniʻoni ʻi he Ngaahi ʻAho Kimui Ní.”
Ka naʻe tohoakiʻi ʻe he laumālie ʻo e ongoongoleleí ʻa e tamasiʻi faingataʻaʻiá. Naʻá ne siofi e founga ne fakatahaʻi ai ʻe he Siasí ʻa e fāmili Pesitosí ʻo fakafou ʻi he lotu mo e ngāue tokoní, pea naʻá ne fakatokangaʻi ʻa e lahi fau e ʻū tatau ʻo e Tohi ʻa Molomoná ʻi he funga laupapa ʻi hono lokí.
ʻI heʻene fie ʻiló, naʻá ne toʻo hifo ha tatau ʻe taha peá ne ʻiloʻi ai ʻa e talaʻofa ʻa Molonaí ʻe malava ke ne ʻiloʻi ʻoku moʻoni ʻa e Tohi ʻa Molomoná ʻo fakafou ʻi he lotu.
ʻOku pehē ʻe he Fitungofulu Taki Māʻolunga ne toki uiuiʻi foʻoú, “Naʻe liliu au ʻe he talaʻofa ko iá. Naʻá ku fakaʻamu ke u lau e tohí.”
Naʻá ne toʻo fakamātoato ʻa e talaʻofa ʻa Molonaí, ʻo ne maʻu ai ha tali fakapapau, pea naʻe ʻohovale ʻene faʻētangatá ʻi heʻene talaange ʻokú ne fie papitaisó. Naʻe tuaiekemo hono fakafoki ʻe Manuela ʻa Lūpeni ki ʻĀsenitina ke ne ʻalu ʻo kole ha ngofua mei heʻene faʻeé. Naʻe papitaiso leva ia. Naʻe talu mei ai mo hono fakamālohia ʻe he ongoongolelei kuo toe fakafoki maí e moʻui ʻa ʻEletā ʻAliatí.
Naʻe fāʻeleʻi ʻa Lūpeni Vīseni ʻAliati ʻi he ʻaho 8 ʻo Sānuali, 1966, ʻi Puenosi ʻAealesi. Naʻá ne mali mo Fapiena Pēneti Lamasi ʻi he Temipale Buenos Aires Argentina ʻi he ʻaho 17 ʻo Tīsema, 1992. ʻOku ʻi ai ʻena fānau ʻe toko ono.
Naʻe maʻu ʻe ʻEletā ʻAliati ha mataʻitohi ʻi he laó mei he ʻUnivēsiti ʻo Pelakalanó ʻi Puenosi ʻAealesi, pea kuó ne ngāue ʻi he tafaʻaki fakalaó ʻo fakatefito ʻi he lao ki he faihiá. Talu mei he 1998 kuó ne ngāue ko ha hoangāue pule ki he Alliaud & Asociados.
Kuó ne hoko ko ha Fitungofulu Fakaʻēlia, palesiteni ʻi he Misiona Argentina Córdoba, palesiteni siteiki, aleaʻanga māʻolunga, pīsope, palesiteni ʻi he kōlomu ʻo e kaumātuʻá, mo ngāue fakafaifekau ʻi he Misiona ʻUlukuai Monitivitioó. ʻI he taimi naʻe uiuiʻi ai iá, naʻá ne hoko ko ha faiako ʻinisititiuti, tokoni ʻuluaki ki he kau palesitenisī ʻo e Senitā Akoʻanga Fakafaifekau ʻi ʻĀsenitiná, mo ha talēkita ʻo e Ngāue ki he Fetuʻutaki mo e Kakaí (Public Affairs).